Dagiti Nabaknang a Gunggona iti Sagrado a Panagserbi
Kas insalaysay ni Harry Bloor
Agarup sangagasut a tawenen ti napalabas, ni lelongko ket maysa a napeklan a miembro ti Simbaan a Metodista. Maysa met a mararaem a gagangay a manangaskasaba, a sipaparabur nga agdondonar tapno masuportaran ti adu a kapilia iti Stoke-on-Trent, ti pagdamdamilian nga ili iti Inglatera. Idi agangay rimmigat ti panagbiagna. Tapno makatulong ken Lelong, inyurnos ni tatang a mangipasdek ni Lelong iti bassit a tiendaan iti purok. Adda lisensia ti tiendaan nga aglako iti serbesa, ket idi naammuan daytoy dagiti Metodista, dagus nga inlaksidda ni Lelong.
KASTA unay ti pungtot ni tatang ket insapatana a dinton pulos sumrek iti relihion—ket intakderanna ti saona. Nagbalin a polis, ngem idi agangay nagbalin a propetario ti maysa a taberna. Gapuna napadakkelak iti tengnga ti angot ken asuk dayta a lugar. Awan lugar ti relihion iti biagko, ngem nasursurok a naimbag ti agay-ayam kadagiti board game! Nupay kasta, gapu iti impluensia ni Lelong bayat ti kinaubingko, napagtalinaedko ti dakkel a panagraemko iti Biblia, nupay bassit laeng ti ammok maipapan iti daytoy.
Nasursurok ti Kinapudno iti Biblia
Idi 1923, idi agtawenak iti 24, immakarak idiay daya iti Nottingham ket rinugiak nga inarem ni Mary, nga agnanaed iti purok ti Whetstone nga agarup 40 a kilometro ti kaadayona, iti abagatan a laud ti Leicester. Ti amana, ni Arthur Rest, ket dati nga organista iti kapilia iti lugarda, ngem maysan a naregta nga Estudiante ti Biblia, kas pannakaawag idi dagiti Saksi ni Jehova. Kanayon a kasarsaritanak idi ni Arthur maipapan iti baro a nasarakanna a pammati—ngem saanak unay nga interesado. Nupay kasta, natukay ti interesko idi kinaduak iti kapilia dagiti Baptist iti lugarmi iti malem ti Domingo, Hulio 13, 1924, tapno dumngeg iti lekteur ti maysa a kameng ti parlamento a prominente a Baptist. Ti temana a, “Dagiti Isursuro ni Pastor Russell Nasukimat iti Lawag ti Kasuratan,” ti namagpanunot kaniak. Adda pay la kaniak dagidi innotarko.
Nagkedked dagiti Baptist idi indawat dagiti Estudiante ti Biblia a sungbatan ti pannakaatakar ti pammatida. Nakapungtotak iti daytoy ket inkeddengko ti agbirok iti sabali a lugar a pangangayan iti kasta a gimong. Adda maysa a kamalig iti asideg a mayanatup a pagtataripnongan. Dinalusanmi daytoy, inikkatmi dagiti saput, impaigid dagiti makina triliadora, sa kalpasanna nakasaganakamin amin. Nangalakami iti 70 a tugaw, ken nagimalditkami kadagiti polieto.
Idi dimteng ni Frank Freer manipud iti Leicester tapno agpalawag, napnon ti amin a pagtugawan, ken adda pay 70 a tattao a nakatakder! Nagustuak ti nalawag a panagrasrason ni Frank manipud iti Kasuratan, kasta met ti dadduma pay a timmabuno. Manipud idin, napartak a dimmakkel ti bassit a kongregasion dagiti Estudiante ti Biblia idiay Blaby iti asideg ti Leicester. Iti daydi met a panawen a nagbalbaliw ti biagko—kasta met ken ni Mary. Idi 1925 nagdedikarkam a dua ken Jehova, nagpabautisar, ken nagkasar.
Dagiti Naespirituan a Bendision
Iti simmaganad a tawen, natudinganak kas direktor ti serbisio iti Blaby Congregation. Kayatmi nga agassawa ti sumurot kadagiti addang dagiti colporteur ken agbalin nga amin-tiempo nga ebanghelisador, ngem di nagbayag nabatad a saan a palubosan ti salun-at ni Mary ti kasta nga okupado nga eskediul. Nupay nagsagaba iti nakapuy a salun-at agingga iti ipapatayna idi 1987, isu ket maysa a nasayaat a kadua ken nakasaysayaat a ministro a nalaing iti di pormal a panangasaba ken panangirugi iti panangyadal iti Biblia. Gistay rinabii a tumabtabunokami kadagiti gimong wenno mangiranranud kadagiti kinapudno iti Biblia kadagiti kaarrubami.
Maysaak nga inheniero ken agtartrabahoak idi iti maysa a kompania nga agar-aramid kadagiti makinaria a pagragadi iti troso. Karaman iti trabahok ti nasaknap a panagdaliasat idiay Britania, kasta met idiay Pransia, ket masansan a kaduaennak ni Mary. Impaayannakami dagitoy a panagdaliasat iti gundaway a mangasaba a sisasaknap.
Dagiti Pundasion ti Irarang-ay
Idi 1925 nangipatakderkami iti maysa a napintas a pasdek a paggigimonganmi idiay Blaby, ket manipud sadiay nangorganisarkami iti epektibo a panangasaba. Kada agsapa ti Domingo, agarkilakami iti bus a mangitulod kadakami kadagiti naiwaraswaras a purok ken babassit nga ili. Iti dalan maidissaag dagiti agibumbunannag tapno mangasaba, sa kalpasanna dagasen ida ti bus iti biahe nga agsubli. Kadagiti nadagaang a bulan ti kalgaw, mangangaykami iti panagadal iti Biblia iti malem ti Domingo, nga usarenmi ti kabbaro a ruar ti Pagwanawanan. Kalpasanna, iti alas otso, agsasarakkami iti plasa ti Leicester maipaay iti palawag publiko. Iti maysa a rabii 200 a tao ti dimngeg. Daytoy nga aktibidad ti nangipasdek kadagiti pundasion para iti adu a kongregasion nga adda itan iti uneg ken ruar ti intero a Leicester.
Idi 1926 ti nakallalagip a kombension naggiddan a naangay idiay Alexandra Palace ken iti Royal Albert Hall idiay London. Iti dayta a gundaway, ni Joseph F. Rutherford, ti presidente idi ti Watchtower Society, inruarna ti libro a Deliverance. Ti resolusion a “Testimonia Kadagiti Agtuturay iti Lubong” ken ti nabileg a palawag publiko ni Brother Rutherford a “No Apay nga Agibar-ibar Dagiti Pannakabalin ti Lubong—Ti Remediona” ket naimaldit a naan-anay iti kangrunaan a pagiwarnak iti kinabigatanna kalpasan a naisango dagitoy. Nasurok a 10,000 ti nakangngeg iti palawag publiko, ket 50,000,000 a kopia ti resolusion ti dagus a naiwaras iti intero a lubong. Daydi a kombension ti nangpapartak iti trabaho a panangasaba iti Britania.
Dakkel a Kombension Kabayatan ti Gubat
Bimtak ti maikadua a gubat sangalubongan idi Setiembre 1939, ket idi dimteng ti 1941 addan ti gubat iti kangitingitanna. Aldaw ken rabii a rumaut dagiti para-bomba nga Aleman, ket awan ti koriente iti rabii iti intero a pagilian. Nakirang ti taraon, ket siiinget a nairasion ti adda a taraon. Limitado unay ti transportasion, uray iti tren. Iti laksid dagitoy kasla di maparmek a tuben, nangangaykami iti lima-aldaw a kombension nasional idi Setiembre 3-7, 1941.
Napili ti De Montfort Hall iti Leicester kas pagkombensionan gapu ta adda ti Leicester iti sentro ti Inglatera. Tangay addaak iti industria ti troso, nakatulongak iti panangipatakder kadagiti karatula iti panangyanunsio. Inyurnosko met ti lokal a transportasion maipaay kadagiti kombensionista. Babaen ti nasakbay a panaggatang iti tiket ken panagbayad iti nasursurok ngem ti regular a presio, napagbiahemi dagiti trambia ti Leicester uray Domingo.
Gapu ta addada restriksion iti panagbiahe, ninamnamami a nalabit 3,000 a Saksi ti makaumay. Iladawanyo ti ragsakmi idi nasurok a 10,000 a delegado ti nangikuna a dumtengda! Ngem pagdagusanda ngay? Siaayat nga inawis dagiti umili ti Leicester ti adu nga agdagus iti pagtaenganda. Mainayon pay, agarup sangaribu ti nagnaed kadagiti tolda a naipatakder iti kataltalonan tallo a kilometro ti kaadayona manipud iti pagkombensionan. Ti Camp Gideon, kas awagmi iti daytoy, inawisna ti atension ti komunidad.
Dadakkel a puraw a tolda ti naabangan a mausar kadagiti departamento ti kombension ken pagyanan ti nakaad-adu a tattao. Idi nautobmi nga iti sellag, dagiti tolda ti nalabit puntiriaen dagiti para-bomba a Nazi, dagus a nabaliwan ti langa dagitoy tapno di madlaw. Ti gubat, ken nangnangruna ti di pannakipaset dagiti Saksi iti dayta, ket pakaseknan idi ti publiko. Ginasut a Saksi iti daydi a tiempo ti naibalud gapu iti naibatay-Biblia a takderda iti neutralidad.—Isaias 2:4; Juan 17:16.
Inreport ti Sunday Pictorial, a Setiembre 7, 1941: “Nakaskasdaaw a masarakan ti 10,000 a tattao, kaaduanna agtutubo, a makalawas a makisarsarita maipapan iti relihion a dida dakdakamaten ti gubat, malaksid no madakamat nga isyu.
“Nagsaludsodak no addada miembro dagiti Saksi idiay Alemania. Wen, ti sungbatda kaniak, ket gistay aminda, agarup 6,000, ti adda kadagiti kampo konsentrasion.”
Innayon ti reporter: “A, wen, kabusor nga agpayso dagiti Nazi, ngem bassit laeng ti ar-aramiden dagiti Saksi maibusor kadakuada, malaksid iti panaglako iti tract ken panagdengngeg kadagiti bitla.”
Negatibo ti kaaduan a komento dagiti pagiwarnak maipapan kadakami, ket nagbalin pay ketdi a naranggas dagiti bumusbusor gapu iti napaay a panangikagumaanda a mangriribuk iti kombensionmi. Nupay kasta, inamin ti Daily Mail ti London, a kas man la napilitan: “Naurnos, naulimek, ken nasayaat ti organisasion.”
Dakami ti napabasol iti panagkirang ti suplay a sigarilio ti siudad. Ngem inlawlawag ti The Daily Mail: “Uray ti Leicester wenno ti Tobacco Controller saanda a makapagreklamo nga ib-ibusen dagiti Saksi ti sigarilio ti Leicester. Saanda nga agsigsigarilio.” Kasta met, ti reklamo a nagkamtud ti taraon dagiti umili sadiay gapu kadagiti Saksi ket napaneknekan nga ulbod idi nailawlawag nga intugot ti kaaduan ti bukodda a rasion. Kinapudnona, iti ngudo ti kombension, 1.8 kilo a tinapay ti naidonar iti Leicester Royal Infirmary—dakkel a kontribusion kadagidi a panawen a nakirang ti taraon.
Nangipaay ti kombension iti adu a naespirituan a pammabileg para kadagiti 11,000 a Saksi iti Britania. Naragsakanda ta agarup 12,000 ti timmabuno! Sirarag-o a nakiraman dagiti delegado iti awan pay kaaspingna a kaadu ti panangasaba iti lansangan iti Leicester, ket sinarungkaranda dagiti nasulinek a purpurok, nga inusarda dagiti presentasion iti ponograpo.
Dagiti kangrunaan a palawag iti kombension ket rekording a naaramid iti napalabas a bulan kadagiti palawag a naipaay iti lima-aldaw a kombension dagiti Saksi ni Jehova idiay St. Louis, Missouri, E.U.A. Ti nairekord a palawag ni Brother Rutherford a “Dagiti Annak ti Ari” ti tampok a paset ti kombension. Tangay imposible ti panagpedido iti sabali a pagilian kadagiti kopia ti libro a Children a nairuar idiay St. Louis, maysa a naisangsangayan a nalamuyot ti akkubna nga edision ti naaramid idi agangay idiay Britania. Napatulodan iti maysa a kopia ti amin nga ubbing a timmabuno iti kombension.
Ti Naisangsangayan a Tinawen a Miting Idiay Leicester
Kalpasan ti gubat nakaskasdaaw ti panagadu dagiti manangiwaragawag iti Pagarian idiay Britania! Idi rugrugi ti dekada 1980, addan sangapulo a kongregasion iti Leicester. Kalpasanna napakaammuankami nga inkeddeng ti Bagi a Manarawidwid dagiti Saksi ni Jehova a maangay ti tinawen a miting ti Watch Tower Bible and Tract Society iti Leicester idi 1983. Kas city overseer ti Leicester, di nagbayag nairamanak iti panagsagana, a pakairamanan ti panangabang manen iti De Montfort Hall.
Sangapulo ket tallo a kameng ti Bagi a Manarawidwid ti dimteng manipud iti hedkuarter ti Sosiedad idiay Brooklyn maipaay iti dayta nga okasion. Agdagup iti 3,671 a delegado—iti daytoy a gundaway manipud iti aglikmut ti lubong, ket kaaduanna nababayagen a Saksi—ti nangpunno iti auditorium. Adda kanayonan a 1,500 ti dimngeg iti programa iti kabangibang nga Assembly Hall.
Ni Albert D. Schroeder, a mangay-aywan idi iti sanga nga opisina ti Watch Tower Society idiay London kabayatan ti kombensionmi iti Leicester idi tiempo ti gubat, ti nangidaulo iti daytoy tinawen a miting. Iti panangtaliawna iti kombension idi 1941, insaludsod ni Brother Schroeder: “Mano kadakayo nga adda ita ti presente idi?” Nasurok a kagudua iti tallaong ti nangitayag iti imada. “Ayna! Anian a panagkikita manen para kadakayo a matalek, nasusungdo!” indir-ina. Wen maysa daydi a di malipatan a kapadasan.
Iti edad a 98, agserserbiak pay laeng kas sekretario iti kongregasionmi ken agtultuloy a mangipapaay kadagiti palawag publiko, nupay ar-aramidek daytoy itan a situtugaw. Kalpasan ti ipapatay ni Mary idi 1987, inkallaysak ni Bettina, maysa a biuda a nabayagen nga am-ammomi ken Mary. Agyamyamanak ta maay-aywananak a naimbag, agpada iti pisikal ken naespirituan a pamay-an. Iti laksid dagiti limitasion gapu iti nakapuy a salun-at ni Mary ket ita gapu iti kinalakayko, nasarakak a ti pannakaadda iti adu nga aramid iti sagrado a panagserbi kanayon a mangyeg iti nabaknang a gunggona.—1 Corinto 15:58.
[Ladawan iti panid 26]
Nakasagana a makiraman iti ministerio idi dekada 1920
[Ladawan iti panid 26]
Dagiti buya iti kombension idiay Leicester