Siuulimek nga Idaydayawda ti Namarsua Kadakuada

NAKAPARSUAAN a makapasiddaaw ti ilelennek ti init. Ngem ti buya ti init a bumabbaba iti likudan daytoy a bantay iti Apuan Alps iti Tuscany, Italia, ket pudno nga awan kaaspingna.

No matmatan iti adayo, agparang a ti init bumabbaba a sumrek iti bantay imbes a bumaba iti likudanna. Apay? Gapu ta addaan ti tuktok ti bantay iti natural nga arko a kasla kinungkongan iti bantay. Kinapudnona, daytoy a tuktok ket napanaganan iti Monte Forato​—ti Nakungkongan a Bantay. Gapu iti panagrikus ti daga iti init, mamindua laeng kada tawen nga agparang a sumrek ti init iti Monte Forato iti imatang dagidiay mangmatmat iti dayta babaen ti arko.

Kas iti dadduma pay a paset ti sangaparsuaan, ti awanan biag a bambanag iti law-ang idaydayawda ti Namarsua kadakuada. Kasano? Kas iti dayaw a maiyeg ti maysa a napintas a ladawan iti artesano a nangaramid iti dayta. No ar-arigen, dagiti banag iti langit saritaenda ti maipapan iti pannakabalin, sirib, ken kinatan-ok ni Jehova. Kas kuna ti salmista, “dagiti langlangit ipalawagda ti dayag ti Dios; ket ti law-ang ipakitana ti aramid ti imana.” (Salmo 19:1; 69:34) Tangay ti init ken ti dadduma pay nga awanan biag a banag idaydayawda ti Namarsua kadakuada, anian nga ad-adda a rebbeng nga aramidentay dayta!​—Salmo 148:1, 3, 12, 13.