Dagiti Napapateg a Piesta iti Pakasaritaan ti Israel

“Dagiti amin a lallakim mamitlo iti makatawen nga agparangdanto ken Jehova a Diosmo iti disso a ni Jehova piliennanto . . . , ket didanto agparang nga ima-ima iti sango ni Jehova.”​—DEUTERONOMIO 16:16.

1. Ania ti maikuna maipapan kadagiti piesta idi tiempo ti Biblia?

ANIA ti malagipyo no sumiplot iti panunotyo ti piesta? Gagangay ti panaglablabes ken imoralidad kadagiti dadduma a piesta idi un-unana. Pudno met dayta kadagiti dadduma a piesta iti agdama a panawen. Ngem naiduma dagiti piesta a nadakamat iti Linteg nga inted ti Dios iti Israel. Nupay naragsak nga okasion dagitoy, nadeskribirda met kas “nasantuan a pakagimongan.”​—Levitico 23:2.

2. (a) Ania ti kasapulan nga aramiden dagiti lallaki nga Israelita iti mamitlo kada tawen? (b) Kas naaramat iti Deuteronomio 16:16, ania ti “piesta”?

² Dagiti matalek a lallaki nga Israelita​—a masansan a kaduada ti pamiliada​—pagrag-oanda idi ti mapan idiay Jerusalem, ‘ti disso a pinili ni Jehova,’ ken nabuslon dagiti sagutda nga agpaay iti tallo a dadakkel a piesta. (Deuteronomio 16:16) Iti libro nga Old Testament Word Studies nadepinar ti sao a Hebreo a naipatarus a “piesta” iti Deuteronomio 16:16 kas “naragsak unay nga okasion . . . a nabuyogan iti panagdaton ken panagrambak gapu kadagiti naisangsangayan a parabur ti Dios.”a

Ti Pateg Dagiti Dadakkel a Piesta

3. Aniada a bendision ti impalagip dagidi tallo a tinawen a piesta?

³ Tangay panagtalon ti pagbiaganda, nagpannuray dagiti Israelita iti pamendision ti Dios babaen ti panangyegna iti tudo. Dagiti tallo a dadakkel a piesta iti Linteg Mosaiko ket nairana iti panagani iti sebada iti masapa a primavera, panagani iti trigo iti maladaw a primavera, ken dadduma pay a panagapit iti maladaw a kalgaw. Naragsak unay nga okasion dagitoy a pagyaman iti Mangmangted iti tudo ken Nangaramid iti nabunga a daga. Ngem adu pay ti nairaman kadagitoy a piesta.​—Deuteronomio 11:11-14.

4. Ania a napateg a pasamak ti narambakan iti umuna a piesta?

⁴ Naangay ti umuna a piesta iti umuna a bulan ti kadaanan a kalendario ti Biblia, manipud Nisan 15 agingga iti 21, a kaibatogan ti tartaraudi ti Marso wenno rugrugi ti Abril. Naawagan daytoy iti Piesta ti Tinapay nga Awan Lebadurana, ket gapu ta kasaruno a dagus ti Paskua iti Nisan 14, naawagan met iti “piesta ti paskua.” (Lucas 2:41; Levitico 23:5, 6) Impalagip daytoy a piesta iti Israel ti pannakaaonda iti Egipto a nagsagsagabaanda, ket naawagan dagiti tinapay nga awan lebadurana iti “tinapay ti panagladingit.” (Deuteronomio 16:3) Impalagipna kadakuada ti naganat unay idi nga ipapanawda idiay Egipto, nga awan idin panawenda a mangigamay iti lebadura iti tinapayda sa urayenda nga umalsa. (Exodo 12:34) Kabayatan daytoy a piesta, masapul nga awan ti masarakan a nalebaduraan a tinapay iti pagtaengan ti maysa nga Israelita. Mapapatay ti asinoman a mangrambak, agraman ti ganggannaet, a mangan iti tinapay a nalebaduraan.​—Exodo 12:19.

5. Ania a pribilehio ti mabalin nga impalagip ti maikadua a piesta, ket siasino dagiti nairaman nga agrag-o?

⁵ Naangay ti maikadua a piesta iti pito a lawas (49 nga aldaw) kalpasan ti Nisan 16 ken nairana iti maika-6 nga aldaw ti maikatlo a bulan, Sivan, a kaibatogan ti tartaraudi ti Mayo. (Levitico 23:15, 16) Naawagan dayta iti Piesta dagiti Lawas (idi tiempo ni Jesus, naawagan met iti Pentecostes, kayatna a sawen “Maikalimapulo” iti Griego), ket naangay dayta iti agarup isu met laeng a tiempo ti tawen a panangawat ti Israel iti Linteg ti tulag idiay Bantay Sinai. (Exodo 19:1, 2) Iti daytoy a piesta, mabalin nga inut-utob dagiti matalek nga Israelita ti pribilehioda a nailasin kas nasantuan nga ili ti Dios. Tangay isuda ti naisangsangayan nga ili ti Dios, kasapulan a tungpalenda ti Linteg ti Dios, kas ti bilin nga ipakitada ti naayat a pannakaseknan kadagiti napanglaw tapno matagiragsak met dagitoy ti piesta.​—Levitico 23:22; Deuteronomio 16:10-12.

6. Ania a kapadasan ti impalagip ti maikatlo a piesta iti ili ti Dios?

⁶ Ti maudi kadagiti tallo a dadakkel a tinawen a piesta ket naawagan iti Piesta ti Panagummong, wenno Piesta dagiti Abong-abong. Naangay dayta iti maikapito a bulan, Tisri, wenno Etanim, manipud maika-15 agingga iti maika-21 nga aldaw, a kaibatogan ti rugrugi ti Oktubre. (Levitico 23:34) Iti daytoy a tiempo, agnaed dagiti tattao ti Dios iti ruar dagiti pagtaenganda wenno iti tuktok dagiti balayda kadagiti temporario a sapaw (abong-abong) a naaramid kadagiti sanga ken bulong dagiti kayo. Daytoy ti nangipalagip kadakuada iti panagdaliasatda manipud Egipto agingga iti Naikari a Daga iti 40 a tawen, idi a nasken a sursuruen ti nasion ti agpannuray iti Dios a mangipaay iti inaldaw a masapsapulda.​—Levitico 23:42, 43; Deuteronomio 8:15, 16.

7. Kasanotay a magunggonaan iti panangrepaso kadagiti piesta a rinambakan ti nagkauna nga Israel?

⁷ Repasuentayo ti sumagmamano a piesta a napateg iti pakasaritaan ti nagkauna nga ili ti Dios. Paregtaennatay koma daytoy ita, tangay maaw-awistayo met nga agtataripnong a regular iti linawas ken iti mamitlo kada tawen kadagiti dadakkel nga asamblea ken kombension.​—Hebreo 10:24, 25.

Idi Tiempo Dagiti Ari a Kaputotan ni David

8. (a) Ania a napateg a selebrasion ti naangay idi kaaldawan ni Ari Solomon? (b) Ania a nadaeg a tampok ti antitipiko a Piesta dagiti Abong-abong ti mabalintay a seggaan?

⁸ Naangay ti napateg a selebrasion iti panawen ti Piesta dagiti Abong-abong kabayatan ti narang-ay a panagturay ni Ari Solomon nga anak ni David. Naguummong ti “dakkel unay a gimong” a naggapu kadagiti adayo a lugar iti Naikari a Daga tapno dar-ayanda ti Piesta dagiti Abong-abong ken ti pannakaidaton ti templo. (2 Cronicas 7:8) Idi nalpasen, pinagawid ni Ari Solomon dagiti nakipagrambak, a ‘nangbendito iti ari, ket napanda kadagiti toltolda a siraragsak ken sirarag-o iti puso gapu kadagiti amin a kinaimbag a ni Jehova impakitana ken David nga adipenna, ken iti Israel nga ilina.’ (1 Ar-ari 8:66) Pudno a napateg daydi a piesta. Iti tiempotayo, segseggaan dagiti adipen ti Dios ti nadaeg a tampok ti antitipiko a Piesta dagiti Abong-abong iti ngudo ti Sangaribu a Tawen a Panagturay ti Natantan-ok a Solomon, ni Jesu-Kristo. (Apocalipsis 20:3, 7-10, 14, 15) Iti dayta a tiempo, dagiti tattao nga agnanaed iti amin a suli ti daga, agraman dagiti mapagungar ken dagiti makalasat iti Armagedon, sangsangkamaysadanto nga agdaydayaw a siraragsak ken Jehova a Dios.​—Zacarias 14:16.

9-11. (a) Ania ti nangiturong iti napateg a piesta idi kaaldawan ni Ari Ezekias? (b) Ania nga ulidan ti impaay dagiti adu a naggapu iti makin-amianan a sangapulo-tribu a pagarian, ket ania ti ipalagipna kadatayo ita?

⁹ Naangay ti sumaganad a naisangsangayan a piesta a nadakamat iti Biblia kalpasan ti panagturay ni nadangkes nga Ari Acaz, a nangiserra iti templo ken nangisungsong iti pagarian ti Juda nga agapostasia. Ni naimbag nga Ari Ezekias ti simmukat ken Acaz. Iti umuna a tawen ti panagturayna, iti edad a 25, rinugian ni Ezekias ti dakkel a programa a panangabaruanan ken panangreporma. Linuktanna a dagus ti templo sana pinatarimaan. Kalpasanna, nagpaipan ti ari kadagiti surat kadagiti Israelita nga agnanaed iti bumusbusor a pagarian ti Israel iti amianan a buklen ti sangapulo a tribu, nga inawisna ida a makipagrambak iti Paskua ken iti Piesta ti Tinapay nga Awan Lebadurana. Adu ti immay, iti laksid ti panangrabrabak dagiti kailianda.​—2 Cronicas 30:1, 10, 11, 18.

¹⁰ Naballigi kadi ti piesta? Ipadamag ti Biblia: “Ket dagiti annak ti Israel nga adda idiay Jerusalem sinalimetmetanda ti piesta ti di nalebaduraan a tinapay bayat iti pito nga aldaw a binuyog ti dakkel a ragsak; ket dagiti Levita ken papadi dinaydayawda ni Jehova iti inaldaw-aldaw, a nagkankantada a binuyog dagiti ig-igam a natbag.” (2 Cronicas 30:21) Anian a nagsayaat a pagwadan dagidi nga Israelita para iti ili ti Dios ita, nga adu kadakuada ti mangib-ibtur iti ibubusor ken agbibiahe iti nawatiwat tapno tumabuno kadagiti kombension!

¹¹ Kas pagarigan, usigenyo ti tallo a “Nadiosan a Debosion” a Kombension Distrito a naangay idiay Poland idi 1989. Karaman kadagiti 166,518 a timmabuno ti dadakkel a grupo a naggapu iti dati nga Union Soviet ken iti dadduma pay a pagilian iti Makindaya a Europa a sadiay maiparit idi ti trabaho dagiti Saksi ni Jehova. “Para kadagiti dadduma a timmabuno kadagitoy a kombension,” ipadamag ti libro a Dagiti Saksi ni Jehova​—Manangiwaragawag iti Pagarian ti Dios,b “daydi ti damo unay nga iyaatenderda iti dakkel a taripnong a nasursurok ngem 15 wenno 20 a tattao ni Jehova. Nalapunos ti pusoda iti panangapresiar idi naimatanganda dagiti pinullo ribu nga adda kadagiti estadium, a nakitimpuyogda iti kararag, ken nakikaykaysat’ timekda a nangkansion kadagiti kanta a pangdayaw ken Jehova.”​—Panid 279.

12. Ania ti nangiturong iti napateg a piesta kabayatan ti panagturay ni Ari Josias?

¹² Kalpasan ti ipapatay ni Ezekias, nagturong manen dagiti taga Juda iti palso a panagdayaw iti babaen da Ari Manases ken Amon. Kalpasanna nagturay ti maysa pay a naimbag nga ari, ni agtutubo a Josias, a situtured a nangisubli iti pudno a panagdayaw. Iti edad a 25, pinatarimaan ni Josias ti templo. (2 Cronicas 34:8) Bayat a matartarimaan, nasarakan iti templo ti Linteg nga insurat ni Moises. Natukay iti kasta unay ni Ari Josias iti nabasana iti Linteg ti Dios ket inyurnosna ti pannakaibasa dayta kadagiti amin nga umili. (2 Cronicas 34:14, 30) Kalpasanna, segun iti adda a naisurat, inorganisarna ti pannakarambak ti Paskua. Nangipaay met ti ari iti nasayaat nga ulidan babaen ti nabuslon a sagutna nga agpaay iti dayta nga okasion. Kas resultana, ipadamag ti Biblia: “Awan idi ti paskua a kas iti dayta a nasalimetmetan iti Israel nanipud kadagiti al-aldaw ni Samuel a mammadto.”​—2 Cronicas 35:7, 17, 18.

13. Ania ti ipalagip kadatayo ita dagiti piesta a naangay idi kaaldawan da Ezekias ken Josias?

¹³ Ti panangreporma da Ezekias ken Josias ket umasping iti nakaskasdaaw a pannakaisubli ti pudno a panagdayaw a napasamak kadagiti pudno a Kristiano nanipud naisaad ni Jesu-Kristo a kas ari idi 1914. Kas iti panangreporma nga inaramid nangnangruna ni Josias, daytoy a pannakaisubli [ti pudno a panagdayaw] iti moderno a panawen ket naibatay iti adda a naisurat iti Sao ti Dios. Ken, kas idi kaaldawan da Ezekias ken Josias, iti moderno-aldaw a pannakaisubli [ti pudno a panagdayaw] adda dagiti asamblea ken kombension a pakaidatagan dagiti makapagagar a pannakailawlawag ti padto ti Biblia ken naintiempuan a pannakayaplikar dagiti prinsipio ti Biblia. Ad-adda pay a mangnayon iti rag-o kadagitoy a makaisuro nga okasion ti dakkel a bilang dagiti nabautisaran. Kas kadagiti nagbabawi nga Israelita idi kaaldawan da Ezekias ken Josias, tinallikudanen dagiti kabbautisar dagiti dakes nga aramid ti Kakristianuan ken amin a paset ti lubong ni Satanas. Idi 1997 nasurok a 375,000 ti nabautisaran kas simbolo ti panagdedikarda iti nasantuan a Dios, ni Jehova​—agpromedio iti nasurok a 1,000 kada aldaw.

Kalpasan ti Pannakakayaw

14. Ania ti nangiturong iti napateg a piesta idi 537 K.K.P.?

¹⁴ Kalpasan ti ipapatay ni Josias, nagturong manen ti nasion iti rinuker a palso a panagdayaw. Kamaudiananna, idi 607 K.K.P., dinusa ni Jehova ti ilina babaen ti panangyegna iti buyot ti Babilonia maibusor iti Jerusalem. Narbek ti siudad ken ti templona, ket naglangalang ti daga. Kalpasanna, nakautibo dagiti Judio idiay Babilonia iti 70 a tawen. Kalpasanna, pinabileg ti Dios dagiti nagbabawi a natda a Judio, a nagsubli idiay Naikari a Daga tapno isublida ti pudno a panagdayaw. Simmangpetda iti nadadael a siudad ti Jerusalem iti maikapito a bulan ti tawen 537 K.K.P. Ti immuna nga inaramidda, nangbangonda iti altar tapno pagdatonanda iti inaldaw kas impaannurot ti Linteg ti tulag. Apag-isu a naipatang dayta iti maysa pay a napateg a selebrasion. “Ket nginilinda ti piesta dagiti tabernakulo [“abong-abong,” NW], a kas naisurat.”​—Esdras 3:1-4.

15. Ania a trabaho ti agur-uray idi kadagiti naisubli a natda idi 537 K.K.P., ket kasano nga umasping ti kasasaad idi 1919?

¹⁵ Dakkel a trabaho ti agur-uray idi kadagitoy a nakayawan a nagsubli​—ti panangbangon manen iti templo ti Dios ken ti Jerusalem agraman dagiti bakudna. Nakaro ti ibubusor dagiti agimon a kaarruba. Idi mabangbangon ti templo, maysa daydi nga “aldaw dagiti babassit a bambanag.” (Zacarias 4:10) Umasping ti situasion iti kasasaad dagiti matalek a napulotan a Kristiano idi 1919. Iti dayta a nakallalagip a tawen, naruk-atanda iti naespirituan a pannakakautibo iti Babilonia a Dakkel, ti sangalubongan nga imperio ti palso a relihion. Sumagmamano a ribu laeng ti bilangda idi ket sinangoda ti nauyong a lubong. Napasardeng kadi dagiti kabusor ti Dios ti irarang-ay ti pudno a panagdayaw? Ti sungbat dayta a saludsod ipalagipna ti maudi a dua a piesta a nailanad iti Hebreo a Kasuratan.

16. Ania ti naisangsangayan iti piesta idi 515 K.K.P.?

¹⁶ Nabangon kamaudiananna ti templo iti bulan ti Adar 515 K.K.P., nga apag-isu a naipatang iti piesta iti primavera iti Nisan. Ipadamag ti Biblia: “Nginilinda a sirarag-o ti piesta ti di nalebaduraan a tinapay bayat iti pito nga aldaw: ta ni Jehova pinarag-ona ida, ket pinasublina ti puso ti ari ti Asiria kadakuada, tapno papigsaenna dagiti im-imada iti panagaramid iti balay ti Dios, a Dios ti Israel.”​—Esdras 6:22.

17, 18. (a) Ania a napateg a piesta ti naangay idi 455 K.K.P.? (b) Kasano nga addatayo iti umasping a kasasaad ita?

¹⁷ Kalpasan ti 60 a tawen, idi 455 K.K.P., naangay ti maysa pay a napateg nga okasion. Iti daydi a tawen, apag-isu a Piesta dagiti Abong-abong idi nalpas a nabangon manen dagiti bakud ti Jerusalem. Ipadamag ti Biblia: “Amin a gimong dagidiay a rimmuar manen a naggapu iti pannakakayaw nagaramidda kadagiti sapaw, ket nagnaedda kadagiti sapaw: ta nanipud kadagiti al-aldaw ni Josue nga anak a lalaki ni Nun agingga iti daydi nga aldaw, dagiti annak ti Israel saanda nga inaramid ti kasta. Ket adda idi dakkel unay a ragsak.”​—Nehemias 8:17.

¹⁸ Anian a nakallalagip a pannakaisubli ti pudno a panagdayaw iti Dios iti sango ti nakaro nga ibubusor! Kasta met laeng ti kasasaad ita. Iti laksid ti adu a pannakaidadanes ken ibubusor, nakadanon agingga kadagiti pungto ti daga ti dakkel a trabaho a panangikasaba iti naimbag a damag ti Pagarian ti Dios, ken sisasaknap a maiwarwaragawag ti mensahe maipapan iti panangukom ti Dios. (Mateo 24:14) Umad-adanin ti pinal a pannakaselio dagiti natda kadagiti 144,000 a napulotan. Nasuroken a lima a milion kadagiti “sabsabali a karnero” a kakaduada a nagtaud kadagiti amin a nasion ti naikaykaysa kadagiti napulotan a natda iti “maymaysa nga arban.” (Juan 10:16; Apocalipsis 7:3, 9, 10) Anian a nakaskasdaaw a kaitungpalan ti naimpadtuan nga iladladawan ti Piesta dagiti Abong-abong! Ket agtultuloy daytoy naindaklan a trabaho a panagurnong agingga iti baro a lubong inton maawis dagiti binilion a napagungar a makipagrambak iti antitipiko a Piesta dagiti Abong-abong.​—Zacarias 14:16-19.

Idi Umuna a Siglo K.P.

19. Ania ti namagbalin a naisangsangayan iti Piesta dagiti Abong-abong idi 32 K.P.?

¹⁹ Awan duadua a mairaman dagiti piesta a dinar-ayan ti Anak ti Dios, ni Jesu-Kristo, kadagiti naisangsangayan a piesta a nailanad iti Biblia. Kas pagarigan, usigenyo ti idadar-ay ni Jesus iti Piesta dagiti Abong-abong (wenno, Tabernakulo) idi tawen 32 K.P. Ginundawayanna idi nga insuro dagiti napapateg a kinapudno ket pinatalgedanna ti sursurona babaen ti panangadawna iti Hebreo a Kasuratan. (Juan 7:2, 14, 37-39) Iti daytoy a piesta, kadawyan a magangtan dagiti uppat a nagdadakkelan a kandelabro iti makin-uneg a paraangan ti templo. Nangnayon daytoy iti panangtagiragsak kadagiti aktibidad kabayatan ti piesta nga agtultuloy agingga iti rabii. Nalabit dagitoy a dadakkel a silaw ti adda iti panunot ni Jesus idi kinunana: “Siak ti silaw ti lubong. Ti sumurot kaniak saanto a pulos magna iti sipnget, no di ket ikutannanto ti silaw ti biag.”​—Juan 8:12.

20. Apay a naisangsangayan ti Paskua idi 33 K.P.?

²⁰ Kalpasanna naangay ti Paskua ken ti Piesta ti Tinapay nga Awan Lebadurana iti napateg a tawen 33 K.P. Iti daydi nga Aldaw ti Paskua, ni Jesus ket pinapatay dagiti kabusorna ken nagbalin nga antitipiko a Kordero ti Paskua, a natay tapno maikkat ti “basol ti lubong.” (Juan 1:29; 1 Corinto 5:7) Kalpasan ti tallo nga aldaw, idi Nisan 16, ti Dios pinagungarna ni Jesus, a naipaayan iti imortal nga espiritu a bagi. Naipatang daytoy iti pannakaidaton ti umuna nga apit a sebada kas impaalagad ti Linteg. No kasta, nagbalin ni napagungar nga Apo Jesu-Kristo nga “umuna a bungbunga kadagidiay nakaturog ken patay.”​—1 Corinto 15:20.

21. Ania ti napasamak idi Pentecostes 33 K.P.?

²¹ Pudno a naisangsangayan a piesta ti Pentecostes idi 33 K.P. Iti daydi nga aldaw, adu a Judio ken proselita ti naguummong sadi Jerusalem, agraman ti agarup 120 nga adalan ni Jesus. Kabayatan ti piesta, imparukpok ni napagungar nga Apo Jesu-Kristo ti nasantuan nga espiritu ti Dios kadagiti 120. (Aramid 1:15; 2:1-4, 33) Iti kasta, napulotan ken nagbalinda a baro a nasion a pinili ti Dios babaen ti baro a tulag nga imbabaet ni Jesu-Kristo. Iti daydi a piesta, ti Judio a nangato a padi nangidaton iti Dios iti dua a nalebaduraan a tinapay a nagtaud iti umuna nga apit a trigo. (Levitico 23:15-17) Dagitoy a tinapay a nalebaduraan iladladawanda dagiti 144,000 nga imperpekto a tattao a ‘ginatang [ni Jesus] maipaay iti Dios’ tapno agserbida a kas ‘pagarian ken papadi . . . nga agturay a kas ar-ari iti daga.’ (Apocalipsis 5:9, 10; 14:1, 3) Ti banag a naggapu dagitoy a nailangitan nga agtuturay iti dua a benneg ti managbasol a sangatauan, Judio ken Gentil, ket mabalin nga inladawan met dagiti dua a nalebaduraan a tinapay.

22. (a) Apay a saan a rambakan dagiti Kristiano dagiti piesta iti Linteg ti tulag? (b) Ania ti usigentayo iti sumaganad nga artikulo?

²² Idi nangrugi a maipatungpal ti baro a tulag idi Pentecostes 33 K.P., kaipapananna nga awanen ti pateg ti daan a Linteg ti tulag iti imatang ti Dios. (2 Corinto 3:14; Hebreo 9:15; 10:16) Di kayat a sawen dayta nga awan linteg a sursuroten dagiti napulotan a Kristiano. Addada iti babaen ti nadibinuan a linteg nga insuro ni Jesu-Kristo ken naisurat iti pusoda. (Galacia 6:2) Gapuna, saan a rambakan dagiti Kristiano dagiti tallo a tinawen a piesta, a paset ti daan a Linteg ti tulag. (Colosas 2:16, 17) Nupay kasta, adu ti maadaltayo iti kababalin dagiti adipen ti Dios kasakbayan ti panawen Kristiano maipapan kadagiti piestada ken dadduma pay a gimong a maipaay iti panagdayaw. Iti sumaganad nga artikulo, usigentayo dagiti ulidan a sigurado a manggutugot iti amin a mangipateg iti regular nga itatabuno kadagiti Nakristianuan a panagtataripnong.

[Dagiti Footnote]

Dagiti Saludsod a Pangrepaso

◻ Ania ti panggep dagiti tallo a dadakkel a piesta ti Israel?

◻ Ania ti naaramid kadagiti piesta idi kaaldawan da Ezekias ken Josias?

◻ Ania a napateg nga okasion ti narambakan idi 455 K.K.P., ket apay a makaparegta dayta kadatayo?

◻ Ania ti naisangsangayan iti Paskua ken Pentecostes idi 33 K.P.?

[Kahon iti panid 12]

Ti Maadaltayo Ita iti Piesta

Amin a magunggonaan iti agnanayon iti mangabbong-basol a daton ni Jesus masapul nga agbiagda a maitunos iti iladladawan ti Piesta ti Tinapay nga Awan Lebadurana. Daytoy antitipiko a piesta ket isu ti naragsak a panagrambak dagiti napulotan a Kristiano gapu iti pannakaaonda iti daytoy dakes a lubong ken pannakaruk-atda iti lunod ti basol babaen ti subbot ni Jesus. (Galacia 1:4; Colosas 1:13, 14) Pito nga aldaw ti kapaut ti literal a piesta​—numero a naaramat iti Biblia a mangisimbolo iti naespirituan a kinanaan-anay. Agpaut ti antitipiko a piesta iti intero a panawen a kaadda ti kongregasion dagiti napulotan a Kristiano ditoy daga ken masapul a marambakan a buyogen ti “kinapasnek ken kinapudno.” Kaipapanan dayta ti kankanayon a panagsiput iti piguratibo a lebadura. Iti Biblia, naaramat ti lebadura a mangiladawan iti rinuker a sursuro, kinamanaginsisingpet, ken kinadakes. Masapul a guraen dagiti pudno a managdaydayaw ni Jehova ti kasta a lebadura, a saanda a palubosan a mangdadael iti mismo a biagda ken mangtulaw iti kinadalus ti kongregasion Kristiano.​—1 Corinto 5:6-8; Mateo 16:6, 12.

[Ladawan iti panid 9]

Tinawen a maidaton ti sangabettek nga umuna nga apit a sebada iti Nisan 16, ti aldaw a pannakapagungar ni Jesus

[Ladawan iti panid 10]

Mabalin nga adda iti panunot ni Jesus dagiti silaw iti piesta idi inawaganna ti bagina iti “silaw ti lubong”