Report Dagiti Manangiwaragawag iti Pagarian
“Tunggal Aldaw Idiay Plasa”
INUSAR ni apostol Pablo ti tunggal gundaway a mangirakurak iti mensahe ti Pagarian. Tapno mabirokanna dagiti maikari, ‘idiay sinagoga rinugianna ti nakirinnason kadagiti Judio . . . ken iti tunggal aldaw idiay plasa kadagidiay nairanrana nga adda.’—Aramid 17:17.
Ti kasta a kinaregta ti tanda dagiti pudno a managdayaw ken Jehova sipud pay idi umuna a siglo K.P. (Mateo 28:19, 20) Us-usaren met ita dagiti Saksi ni Jehova ti nadumaduma a pamay-an bayat a sireregta a tultulonganda dagiti nasingpet panagpuspusona a tattao a maaddaan iti umiso a pannakaammo iti kinapudno. (1 Timoteo 2:3, 4) Iyilustrar daytoy ti sumaganad a kapadasan manipud Australia.
Lima nga aldaw kada lawas, agrelreliebo da Sid ken Harold a mangbantay iti bassit nga eskaparate ti literatura ti Biblia iti estasion ti tren idiay Sydney. Iburburayda ti naimbag a damag ti Pagarian ti Dios iti kastoy a wagas iti las-ud ti agarup lima a tawenen. Kastoy ti kinuna ni Sid, nga agtawen iti 95: “Idi 87 ti tawenkon, saanakon a makamaneho iti kotse. Dayta ti namagliday kaniak agsipud ta pagragsakak ti trabaho a panangasaba iti publiko. Maysa nga aldaw bayat nga addaak iti asideg ti nalatak a lugar a pagpaspasiaran dagiti turista a maaw-awagan Echo Point idiay Katoomba, nakitak ti maysa a pintor nga aglaklako kadagiti naipinta a buya ti daga. Binidingko dagiti ladawan ket kinunak iti bagik, ‘Napimpintas dagiti adda a ladawan iti uneg ti bagko a pangasaba ngem kadagita—ken iti bassit laeng a gatad!’ Iti kasta, inkeddengko ti agaramid iti bassit nga eskaparate, ipuesto dayta iti nalatak a disso, ken itukon kadagiti aglabas dagiti nagpipintas ti pannakayilustrarna a literatura ti Biblia nga iwarwaras dagiti Saksi ni Jehova.
“Uppat a tawen ti napalabasen idi inyakarko ti eskaparate idiay Sydney, ket nakikadua ni Harold kaniak. Agsinnublatkami a mangbantay iti eskaparate ken mangasaba a kadua ti lokal a kongregasionmi.” Ni Harold nga agtawen itan iti 83, kunana: “Manipud Lunes agingga iti Biernes, manmano a tattao ti adda kadagiti pagtaenganda. Isu a ti panangiranud iti mensahe ti Pagarian iti kastoy a wagas ti mangipan kadakami kadagiti lugar a pakasarakan kadagiti tattao. Kadawyanna, nasaysayaat dagiti magun-odanmi a resulta. Dagiti maipapaimami a pagbasaan iti daytoy nga ili ket talaga a naisangsangayan.”
“Nupay kadagiti naglabas a tawtawen ket namin-uppat wenno naminlima a nagpuestokami iti nagduduma a disso,” kuna ni Sid, “iti saan a nagbayag ammon dagiti tattao ti ayanmi. Umay dagiti sumagmamano a tattao kadakami tapno mangalada iti pagbasaan. Addaan salsaludsod dagiti dadduma a kayatda a masungbatan. Ket kayat dagiti dadduma ti makitungtong laeng iti sumagmamano a minuto. Daytoy laeng ti tiempo nga umay kaniak dagiti sarsarungkarak,” inyisemna.
“Adu dagiti tattao a pudpudno nga interesado iti Biblia,” innayon ni Harold. “Iti maysa a bulan, uppat a tattao ti nangrugi a nakiadal iti Biblia kadagiti Saksi kas resulta ti naawatda a literatura kadakami ken gapu kadagiti naibatay Biblia a sungbatmi kadagiti saludsodda. Pinabilegdakami unay dagiti kasta a kapadasan.”
Kas kada Sid ken Harold—kasta met ken apostol Pablo—dagiti Saksi ni Jehova iti sadinoman a lugar usarenda ti amin a posible a pamay-an a mangirakurak iti napateg a mensaheda. Ngarud, agtultuloy a maikaskasaba ti “naimbag a damag . . . iti isuamin a mapagnaedan a daga.”—Mateo 24:14.