Panangipateg Kadagiti Pribilehio iti Sagrado a Panagserbi
MAIPATPATEG koma dagiti annongen iti sagrado a panagserbi. Idi inyaleng-aleng dagiti papadi iti kadaanan a Juda dagiti pribilehioda a mainaig iti templo ni Jehova, siiinget a tinubngarna ida. (Malakias 1:6-14) Ken idi indagadag ti dadduma iti Israel nga iyaleng-aleng dagiti Nazareo dagiti rebbengen nga inawatda a mainaig iti sagrado a panagserbida, tininggar ni Jehova dagidiay a managbasol nga Israelita. (Amos 2:11-16) Dagiti pudno a Kristiano mangipapaayda met iti sagrado a panagserbi, ket ipaspasnekda dayta. (Roma 12:1) Adu ti parupa daytoy sagrado a panagserbi, ket napategda amin.
Idi adda pay ni Jesus ditoy daga a kadua dagiti pasurotna, sinanayna ida nga agbalin a manangiwaragawag iti Pagarian ti Dios. Inton agangay, dumanon ti mensaheda kadagiti ungto ti daga. (Mateo 28:19, 20; Aramid 1:8) Ad-adda a nagangganat daytoy a panangasaba bayat ti maudi nga al-aldaw ti agdama a sistema ti bambanag.
Makiramraman dagiti amin a Saksi ni Jehova iti daytoy a trabaho. Maragsakan dagiti ginasut a ribu ta mabaelanda ti agpayunir. Tapno maipaay dagiti nasken a kasapulan iti sangalubongan a trabaho, rinibu ti nangipaay iti bagbagida iti naisangsangayan nga amin-tiempo a serbisio idiay Bethel, iti trabaho a panagdaliasat kas manangaywan ti sirkito ken distrito, wenno iti serbisio a kinamisionero. Ania ti ramanen daytoy iti biang dagidiay agtarigagay nga agtultuloy iti kasta a naisangsangayan a serbisio?
No Adda Nasken Unay a Pakasapulan ti Pamilia
Sakbay nga awatenna ti naisangsangayan nga amin-tiempo a serbisio, kadawyan a mangaramid ti maysa a tao kadagiti panagbalbaliw iti kasasaadna. Saan a maaramid daytoy ti isuamin. Dagiti Nainkasuratan nga obligasion ti maysa a tao ti mamagbalin nga imposible dayta. Ngem, ania ti mapasamak no maipasango dagiti nasken a pakasapulan ti pamilia, a nalabit pakairamanan dagiti lallakay ken babbaketen a nagannak, kadagidiay addan iti naisangsangayan a serbisio? Dagiti prinsipio ken balakad ti Biblia a kas iti sumaganad mangipaayda iti kasapulan a panangiwanwan.
Maisentro koma ti intero a panagbiagtayo iti relasiontayo ken Jehova. (Eclesiastes 12:13; Marcos 12:28-30) Maipateg koma unay dagiti sagrado a bambanag a naitalek kadatayo. (Lucas 1:74, 75; Hebreo 12:16) Adda idi maysa a lalaki a masapul a mangbalbaliw iti ipangpangrunana, ket kinuna ni Jesus kenkuana a rumbeng a naan-anay a makumikom iti panangiwaragawag iti Pagarian ti Dios. Nabatad a gandat ti lalaki nga itantan ti kasta nga aramid agingga a maitabon ti amana. (Lucas 9:59, 60) Iti kasumbangirna, imbutaktak ni Jesus ti di umiso a panagpampanunot ti siasinoman nga agkuna a naidatonen ti isuamin iti Dios ket kalpasanna saanen nga “agaramid iti maysa a banag maipaay ken ni amana wenno inana.” (Marcos 7:9-13) Impakita met ni apostol Pablo ti kinapateg ti rebbengen a panangipaay iti kasapulan ‘dagidiay kameng ti sangakabbalayan,’ a pakairamanan dagiti nagannak ken dagiti apong a lallakay ken babbaket.—1 Timoteo 5:3-8.
Kayat kadi a sawen daytoy a no rumsua dagiti naganat a pakasapulan, dagidiay adda iti naisangsangayan a serbisio masapul a baybay-anda ti nakadutokanda tapno agaywanda? Ti sungbat agpannuray iti adu a bambanag. Adda iti maysa a mangikeddeng iti dayta. (Galacia 6:5) Adu ti nakabigbig a nupay no impatpategda ti nakadutokanda, nainsiriban a kaduaanda dagiti dadakkelda tapno matulonganda ida. Apay? Nalabit nasken unay ti pakasapulan, nalabit awanen ti sabali a kameng ti pamilia a makatulong, wenno ti lokal a kongregasion nalabit saanna a maipaay ti kasapulan. Dadduma ti nakapagpayunir bayat a tumultulongda. Dagiti dadduma nakastrekda manen iti naisangsangayan nga amin-tiempo a serbisio kalpasan ti panangtamingda iti pakasapulan ti pamilia. Nupay kasta, iti adu a kasasaad, mabalin a mataming ti kasasaad iti dadduma a pamay-an.
Panangibaklay ti Rebbengenda
No rumsuan dagiti nasken a pakasapulan, kabaelan dagiti dadduma nga adda iti naisangsangayan nga amin-tiempo a serbisio nga asikasuen dagidiay a pakasapulan a saanda a panawan ti destinoda. Amirisenyo ti sumagmamano laeng kadagiti adu a pagarigan.
Maysa a pagassawaan nga agserserbi iti sangalubongan a hedkuarter dagiti Saksi ni Jehova ti nangrugi a nagserbi idiay Bethel idi 1978, kalpasan ti panagserbida iti sirkito ken distrito. Nadagsen ti rebbengen ti kabsat a lalaki iti teokratiko nga organisasion. Ngem kasapulan met dagiti dadakkelna ti tulong. Daytoy nga agassawa idiay Bethel nasken nga agbiaheda iti mamitlo wenno mamimpat iti makatawen—agarup 3,500 kilometro nga agpapan ken agawid—tapno aywananda dagiti dadakkelda. Nangibangonda iti pagtaengan a pakaasikasuan dagiti dadakkelda. Agawidda met no dadduma tapno asikasuenda dagiti naganat a medikal a pakasapulan. Inusarda ti dandani amin a bakasionda iti unos ti 20 a tawen tapno maasikaso daytoy a rebbengen. Ayaten ken raraemenda dagiti dadakkelda, ngem ipatpategda met dagiti pribilehioda iti sagrado a panagserbi.
Adda met kabsat a lalaki a 36 a tawenen nga agserserbi kas agdaldaliasat a manangaywan idi napasanguan iti kunana a karirikutan a kasasaad iti panagbiagna. Ti 85-anyos a katuganganna a babai, maysa a matalek nga adipen ni Jehova, masapulna ti kumabbalay iti maysa a makatulong kenkuana. Iti daydi a tiempo, pagarupen ti kaaduan kadagiti annakna a saan a maikanada nga isut’ makipagian kadakuada. Imbaga ti maysa kadagiti kabagianda iti agdaldaliasat a manangaywan a rumbeng a sumardengda nga agassawa iti dayta a serbisio ket aywananda ti inada, maigapu iti pamilia. Ngem saan nga insardeng ti agassawa ti napateg a serbisioda, wenno binaybay-an dagiti kasapulan ti inada. Iti simmaganad a siam a tawen, isut’ kaduada iti kaaduan a tiempo. Idi damo nagnaedda iti maysa a mobile home, kalpasanna kadagiti nadumaduma nga apartment nga impaay ti sirkito. Ti kabsat a lalaki, a maysa idin a manangaywan iti distrito, masansan nga agbiahe tapno maasikasona ti annongenna bayat a nakipagnaed ti asawana iti inana tapno maipaay ti naayat nga amin-tiempo a panangaywan. Tunggal lawas kalpasan dagiti gimong iti Domingo, agawid ti asawa a lalaki tapno tulonganna ida. Inyebkas ti adu a makaammo iti kasasaad ti kasta unay a panangapresiarda iti ar-aramiden dagitoy nga agassawa. Idi agangay, natignay ti dadduma a kameng ti pamilia a tumulong. Rinibu iti ili ni Jehova ti agtultuloy a magunggonaan iti panagserbi dayta a managsakripisio nga agassawa agsipud ta sinalimetmetanda ti pribilehioda a naisangsangayan nga amin-tiempo a serbisio.
Buyogen ti Kooperasion ti Pamilia
No apresiaren ti nadumaduma a kameng ti pamilia ti kinapateg ti naisangsangayan nga amin-tiempo a serbisio, mabalin a makitinnulongda tapno makiraman ti dadduma kadakuada iti dayta.
Ti kasta nga espiritu ti panagtitinnulong ti pamilia ket nakatulong iti agassawa a taga Canada nga agserserbi kas misionero idiay West Africa. Saanda nga inuray a rimsua ti pakasapulan, a ninamnamada nga awan ti mapasamak. Sakbay a napanda iti Watchtower Bible School of Gilead a mangisagana [kadakuada] nga agserbi iti ganggannaet a daga, nakisarita ti asawa a lalaki iti adingna a lalaki maipapan iti pannakaaywan ti inada no agsakit wenno mabaldado daytoy. Gapu iti ayatna iti inada ken ti panangapresiarna iti kinapateg ti trabaho a kinamisionero, kinuna ti adingna a lalaki: “Adda pamilia ken annakkon. Diak maaramiden dagiti bambanag a maaramidam. Isu nga aniaman ti mapasamak ken Inang, siak ti mangaywan kenkuana.”
Nakagun-od ti agassawa nga agserserbi idiay South America iti adu a tulong iti pamilia ti asawa a babai maipaay iti pannakaaywan ti baketen nga ina ti babai. Maysa kadagiti manangna ken ti lakayna ti nangaywan iti ina ti babai agingga a nagsakit ti manangna iti makapatay a sakit. Ania ngaruden ti mapasamak? Tapno saanda a madanagan, insurat ti kayongna: “Agingga a sibibiagak ken sibibiag dagiti annakko, dikayto pulos agsardeng nga agserbi kas misionero.” Dimteng pay ti sabali a tulong ti pamilia idi a ti adingna a babai ken ti asawana pinanawanda ti pagtaenganda ket immakarda iti pagnanaedan ti inada tapno maaywananda agingga iti ipapatayna. Anian a nagsayaat nga espiritu ti panagtitinnulong! Aminda ti agtitinnulong a mangsuporta iti serbisio a kinamisionero.
Dagiti Nagannak a Mangipaay a Sibubulos ken Jehova
Masansan nga ipakita dagiti nagannak ti naisangsangayan a panangapresiar iti sagrado a serbisio. Karaman dagiti annakda kadagiti kapapatgan a sanikuada a mabalinda a pagdayaw ken Jehova. (Proverbio 3:9) Adu a Kristiano a nagannak ti mangparparegta kadagiti annakda a sumrek iti amin-tiempo a serbisio. Ket dadduma kadakuada ti kas ken Anna, a nangipaay iti anakna a ni Samuel ken Jehova tapno agserbi iti “tiempo a din nakedngan,” kayatna a sawen, iti “amin nga al-aldaw ti panagbiagna.”—1 Samuel 1:22, 28, NW.
Maysa kadagita a naganak insuratna iti balasangna idiay Africa: “Agyamankami ken Jehova gapu iti nagsayaatan a pribilehiom. Awanen ti nasaysayaat pay nga arapaapenmi.” Ket kinunana iti sabali pay a gundaway: “Agpayso a masapul nga agsakripisiotayo nga agiinnaddayo, ngem anian a rag-omi a makakita iti panangaywan ni Jehova kadakayo!”
Kalpasan ti panangrepasona kadagiti nadumaduma a kasasaad a rimsua tapno maipaay ti kasapulan a pannakaaywan dagiti lakay ken baketen a dadakkelna, insurat ti maysa a misionero idiay Ecuador: “Pagarupek a ti kadadakkelan a tulong nga inawatmi nga agassawa ket dagiti kararag ni tatangko. Kalpasan ti ipapatayna, imbaga ni nanang kadakami: ‘Awan ti limmabas nga aldaw a di nagkararag ni tatangyo ken Jehova tapno makapagtalinaedkayo a dua iti destinoyo.’”
Maragsakan ti lakay ken baketen nga agassawa idiay California, E.U.A., ta adda maysa kadagiti annakda nga agserserbi iti amin a tiempo. Adda ti anakda ken ti asawana idiay España idi natay ti ina. Kuna ti dadduma a kameng ti pamilia a kasapulan a mayurnos ti pannakaaywan ti ama. Agsipud ta makumikomda iti sekular a trabahoda ken ti panangpadakkel kadagiti annakda, ammoda a saanda a maibaklay dayta a rebbengen. Isu nga indariragda iti agassawa nga adda iti naisangsangayan nga amin-tiempo a serbisio nga agawiddan ket aywananda ti amada. Ngem nupay 79 ti tawenen ti ama, naimbag pay la ti salun-atna, ken nalawag met ti naespirituan a panagkitana. Iti panagmimiting ti pamilia, kalpasan nga inyebkas ti nadumaduma a kameng ti opinionda, timmakder ti ama ket sititibker a kinunana: “Kayatko nga agsublida idiay España ket itultuloyda ti trabahoda sadiay.” Kasta ti inaramidda, ngem nabatad met ti panangtultulongda kenkuana. Agserserbida iti sirkito idiay España itatta. Nanipud idi nagmimiting ti pamilia, inapresiar ti dadduma a kameng ti pamilia ti ar-aramiden dagiti agassawa nga agserserbi iti ganggannaet a daga. Kalpasan ti adu a tawen, maysa kadagiti annak ti nangala iti ama iti pagtaenganna ket inaywananna agingga a natay.
Idiay Pennsylvania, E.U.A., 90 ti edad ti maysa a napulotan a kabsat a lalaki nga agarup 40 a tawen a nagpayunir idi nagsakit ti baketna iti grabe ket pimmusay. Adda maysa a lalaki ken tallo a babbai nga annakna, malaksid kadagiti adu a naespirituan nga annakna. Uppat a pulo a tawenen nga agserserbi iti amin a tiempo ti maysa kadagiti annakna a babbai, a kaduana idi ni lakayna a nagserbi kas misionero, agdaldaliasat a manangaywan, ken idiay Bethel. Timmulong ti anak a babai a nangyurnos iti maipaay a mayanatup a pannakaaywan ni tatangna. Timmulong met dagiti lokal a kakabsat a mangkadua ken ni tatangna a makigimong idiay Kingdom Hall. Idi agangay, idi natayen ni lakayna, sinaludsod ti babai ken amana no kayatna a panawanna ti Bethel tapno adda mangaywan kenkuana. Impatpateg ti ama dagiti sagrado a bambanag, ket ammona a maaywanan dagiti kasapulanna iti dadduma a pamay-an. Isu nga insungbatna: “Dayta ti kadadaksan a banag a maaramidmo, ket dakdakes pay no ipalubosko nga aramidem dayta.”
Manangsuporta Dagiti Kongregasion
Dakkel ti maitultulong dagiti dadduma a kongregasion a mangaywan kadagiti lallakay ken babbaketen a nagannak dagidiay adda iti naisangsangayan nga amin-tiempo a serbisio. Apresiarenda unay dagidiay adun a tawen nga adda iti kasta a serbisio. Nupay saanda a maruk-atan ida kadagiti Nainkasuratan a rebbengenda, adu ti maaramidan dagitoy a kongregasion a mangpalag-an iti awitda tapno saanen a nasken a panawan dagiti annak ti naisangsangayan nga annongenda.
Maysa nga agassawa a taga Alemania ti nakapagserbin iti agarup 17 a tawen iti sabali a pagilian, a kaaduan dayta a tiempo ket nabusbos iti trabaho a panagdaliasat, idi kimmaro ti kasasaad ti baketen nga ina ti lalaki. Tinawen nga inusarda ti bakasionda tapno tumulongda kenkuana. Nangipaay met dagiti kaarrubada a Saksi iti naayat a tulong. Ket idi kadua ti agassawa nga agserserbi iti amin a tiempo ti inada bayat ti karirikutan a tiempo, inyurnos dagiti panglakayen iti lokal a kongregasion ti makisarita kadakuada. Pagaammoda ti kanayon nga ar-aramiden ti agassawa a maipaay iti inada. Inapresiarda met ti kinapateg ti naisangsangayan a serbisio a pakiramramanan dagiti agassawa. Isu nga insingasing dagiti panglakayen ti maysa a programa a panangaywan iti inada ket kalpasanna kinunada: “Dikay kabaelan ti ad-adu pay ngem ti ar-aramidenyo a panangaywan kenkuana; tulongandakayo tapno makapagtalinaedkayo iti destinoyo idiay España.” Iti napalabas a pito a tawenen, intultuloy dagitoy a panglakayen nga aramiden ti kasta.
Kasta met, adda maysa a kabsat a lalaki a sipud pay idi 1967 nga agserserbi idiay Senegal nga immawat iti naayat a pannaranay ti kongregasion a nakaitimpuyogan ni amana. Idi rimsua ti rigat, ti lalaki, buyogen ti situtulok a kooperasion ti naayat nga asawana, ket agmaymaysa a nagawid idiay Estados Unidos tapno tulonganna dagiti dadakkelna. Nasken nga agtalinaed sadiay iti sumagmamano a bulan. Narigat ti kasasaad, ngem idi naaramidnan ti amin a kabaelanna, timmulongen ti kongregasion tapno maitultuloyna ti panagserbina kas misionero. Iti unos ti 18 a tawen, impaay ti kongregasion ti naayat a tulong iti adu a pamay-an, umuna iti ama (uray no dina mabigbigen ti adu kadakuada) ken kalpasanna iti ina. Nalibre kadi ti anak a lalaki iti rebbengenna? Saan; masansan nga agbiahe manipud Senegal ken inusarna ti bakasionna tapno maipaayna ti amin a kabaelanna nga itulong. Ngem adu kadagiti adda iti dayta a kongregasion ti maragsakan a makaammo nga adda pasetda iti panagtalinaed ti nagaget nga agassawa iti amin-tiempo a serbisio idiay Senegal.
Kinuna ni Jesus a dagidiay nangpanaw iti isuamin gapu iti naimbag a damag umawatdanto iti maminsangagasut a kakabsat, inna, ken annak. (Marcos 10:29, 30) Talaga nga agpayso dayta kadagiti adipen ni Jehova. Napasaran daytoy ti maysa nga agassawa nga agserserbi itan idiay Benin, West Africa, iti naisangsangayan a pamay-an idi dua a Saksi iti kongregasion dagiti dadakkelda ti nangibaga kadakuada a dida pakadanagan dagiti dadakkelda. Kinunada pay: “Dagiti nagannakyo ket nagannakmi metten.”
Wen, adu ti pamay-an a maipakitatayo nga ipatpategtayo unay ti sagrado a panagserbi. Adda kadi dagiti pamay-an a maan-anayyo pay nga aramiden daytoy?
[Dagiti Ladawan iti panid 26]
Madadaanda nga agpaay iti naisangsangayan nga amin-tiempo a serbisio