Mailasinmo Kadi ti Naimbag ken ti Dakes?
“Agarup 25 a tattao ti pinatayko. . . . Aldaw-rabii nga agparangda iti alintataok. Masansan a batibatenak. . . . Sadinoman a papanak, makakitaak iti rupa a mangipalagip kaniak kadagiti tattao a pinatayko. Nakalawlawag dayta iti imatangko, a kas ket ’tay napasamak la dayta ita nga aldaw, ita a kanito. . . . Diak mapakawan ti bagik gapu kadagiti inaramidko.”—V.S.
“Nabilinak a sumrek sadiay ket gudasek dagiti kabusor. . . . Awan aniamanna kaniak no lallakida man, babbai ken ubbing. . . . Inaramidko ken tungtungpalek pay laeng ti ipapaaramidda, ken ar-aramidek laeng ti naibilin kaniak ket iti panagkunak diak pakabasolan dayta.”—W.C.
IDI Marso 16, 1968, nakiraman dagiti dua a lallaki a naadaw iti ngato iti naawagan idi agangay a nakaam-ames a krimen iti tiempo ti gubat. Kaduada dagiti dadduma pay a soldado a simrek iti maysa a bassit a purok idiay Vietnam ket pinapatayda dagiti ginasut a sibilian—a pakairamanan dagiti babbai, ubbing, ken lallakay. Ngem paliiwenyo ti agduma a reaksion dagitoy dua a soldado. Nalawag a natutuok ti umuna a soldado gapu iti inaramidna. Impagarup ti maikadua a nainkalintegan ti inaramidna. Apay nga agduma ti reaksion ti dua a tao iti isu met laeng a kasasaad?
Ti sungbat ket adda pakainaiganna iti konsiensia—inted-Dios a pannakabalin a tumulong kadatayo a mangtingiting a sipupudno iti bagbagitayo ken mangukom kadagiti tignay ken motibotayo. Ti konsiensia ti mangiparikna kadatayo no ania ti naimbag ken no ania ti dakes.
No agdesisionda, sursuroten dagiti dadduma a tattao ti pagsasao a, “Paidalanka iti konsiensiam.” Ngem ti dakesna, saan a kanayon a mapagtalkan ti konsiensia. Kinapudnona, adu ti nangpanuynoy ken nakaaramid pay kadagiti nakaam-ames a kinaranggas, ket saanda a pulos makonsiensia. (Juan 16:2; Aramid 8:1) Kas kinuna naminsan ti nobelista nga Ingles a ni Samuel Butler, “inton agangay, saanton nga agsao [ti konsiensia] kadagidiay agkedked a dumngeg kenkuana.”
Mapagtalkam kadi ti konsiensiam? Agpannuray unay ti sungbat iti no kasano kasayaat ti pannakasanay ti konsiensiam, kas ipakita ti sumaganad nga artikulo.
[Picture Credit Line iti panid 3]
Makingngato a ladawan ti gubat: Rinetrato ti U.S. Signal Corps