SALUDSOD DAGITI AGTUTUBO
Kasanok a Sanayen ti Konsiensiak?
Ania kadagitoy ti kapada ti konsiensiam?
kompas
sarming
gayyem
ukom
Amin dagitoy ket umiso a sungbat. Ilawlawag ti artikulo no apay.
Ania ti konsiensia?
Ti konsiensiam ket ti abilidadmo a mangilasin iti naimbag ken dakes. Kuna ti Biblia a dayta ket kas iti naisurat a linteg iti puso ti tao. (Roma 2:15) Ti nasayaat a konsiensia tulongannaka a mangkita no umiso wenno saan ti aramidem wenno ti naaramidmon.
Ti konsiensiam ket kas iti kompas. Iwanwannaka iti umiso a direksion tapno maliklikam ti problema.
Ti konsiensiam ket kas iti sarming. Ipakitana no ania ti ibilangmo nga umiso wenno di umiso, ken ipakitana ti pudpudno a kinataom.
Ti konsiensiam ket kas iti nasayaat a gayyem. Mabalin nga ikkannaka iti nasayaat a balakad ken tulongannaka nga agballigi—no denggem dayta.
Ti konsiensiam ket kas iti ukom. Ibagana kenka no adda dakes a naaramidam.
Tulongannaka ti nasayaat a konsiensia a mangaramid kadagiti nasayaat a desision
Laglagipem: Ti konsiensiam ket maysa a napateg nga instrumento a makatulong kenka a (1) mangaramid iti umiso a desision ken (2) mangilinteg kadagiti kamalim.
Apay a sanayem ti konsiensiam?
Ibaga kadatayo ti Biblia a ‘taginayonentayo ti nasayaat a konsiensia.’ (1 Pedro 3:16) Narigat nga aramiden dayta no saan a nasanay ti konsiensiam.
“Diak ibagbaga kadagiti nagannakko no sadino ti agpayso a napanak. Idi damo, makonkonsiensiaak, ngem idi bumaybayag, awanen, saanakon a makonkonsiensia.”—Jennifer.
Idi agangay, ti konsiensia met laeng ni Jennifer ti nangtulong kenkuana tapno ibagana kadagiti nagannakna no ania ti mapaspasamak ken tapno saannan a lokuen ida.
Panunotem: Mabalin kadi a nasapsapa koma a nagalarma ti konsiensia ni Jennifer?
“Nagrigat ken makapa-stress ti doble kara a panagbiag. No iti damo ket saankan a makonsiensia a mangaramid iti dakes a banag, nalaklakanton para kenka ti agaramid iti dakes.”—Matthew.
Saanen a pulos a dengdenggen ti dadduma a tattao ti konsiensiada. Kuna ti Biblia a “kimmalio ti konsiensiada.” (Efeso 4:19) Kastoy ti patarus ti Naimbag a Damag Biblia: “Saandan nga ammo ti agbain.”
Panunotem: Nasaysayaat kadi ti biag dagiti tattao a saan a makonkonsiensia kadagiti dakes nga ar-aramidenda? Ania dagiti problema a sigurado a maipasango kadakuada?
Laglagipem: Tapno maaddaanka iti nasayaat a konsiensia, masapul a sursuruem nga ‘usaren ti abilidadmo nga agpanunot tapno mailasinmo ti umiso ken di umiso.’—Hebreo 5:14.
Kasanom a sanayen ti konsiensiam?
Tapno masanaymo ti konsiensiam, kasapulam ti pagrukodan a pangikomparaam kadagiti aramidmo. Sursuroten ti dadduma a tattao ti pagrukodan ti:
pamilia ken kultura
gagayyem
popular a tattao
Ngem nasaysayaat nga amang ti pagalagadan nga adda iti Biblia. Saan a nakaskasdaaw dayta, ta ti pannakaisurat ti Biblia ket “inwanwan ti Dios,” ti Namarsua kadatayo ken ti makaammo iti kasayaatan para kadatayo.—2 Timoteo 3:16.
Kitaem ti sumagmamano a pagarigan.
TI PAGALAGADAN: “Kayatmi ti agbiag a mapagtalkan iti amin a banag.”—Hebreo 13:18.
Kasano nga apektaran dayta ti konsiensiam no masulisogka nga agkusit iti eksam, agulbod kadagiti nagannakmo, wenno agtakaw?
No tignayennaka ti konsiensiam nga agbalin a mapagtalkan iti amin a banag, panagkunam, ania ti maitulong dayta kenka ita ken iti masanguanan?
TI PAGALAGADAN: “Adaywanyo ti seksual nga immoralidad!”—1 Corinto 6:18.
Kasano nga apektaran dayta ti konsiensiam no masulisogka nga agbuya iti pornograpia wenno makiseks a saan pay a nagkasar?
No tignayennaka ti konsiensiam nga umadayo iti seksual nga immoralidad, ania ti maitulong dayta kenka ita ken iti masanguanan?
TI PAGALAGADAN: “Agbalinkayo a naimbag iti tunggal maysa, sidudungngo a makipagriknakayo, ken situtulok nga agpipinnakawankayo.”—Efeso 4:32.
Ania ti maitulong dayta no adda diyo pagkinnaawatan iti kabsatmo wenno iti gayyemmo?
No tignayennaka ti konsiensiam a mangpakawan ken agbalin a naasi, ania ti maitulong dayta kenka ita ken iti masanguanan?
TI PAGALAGADAN: “Kagura [ni Jehova] ti asinoman a mangay-ayat iti kinaranggas.”—Salmo 11:5.
Kasano a makatulong dayta kenka no agpilika iti pelikula, pabuya iti TV, ken video game?
No tignayennaka ti konsiensiam a mangliklik iti naranggas a paglinglingayan, ania ti maitulong dayta kenka ita ken iti masanguanan?
PUDNO A KAPADASAN: “Adda dagiti gagayyemko nga agay-ay-ayam kadagiti naranggas a video game, ken uray siak agay-ay-ayamak met. Idi kuan, imbaga kaniak ni Papa a saanakon a mabalin nga agay-ayam kadagita. Isu a no kayatko ti agay-ayam, mapanak kadagiti gagayyemko. No agawidak ’diay balaymi, saanko nga ibagbaga a nagay-ayamak. No damagen kaniak ni Papa no adda problema, ibagak nga awan. Maysa nga aldaw, nabasak ti Salmo 11:5 ket nangrugi a mariknak a kamali ti ar-aramidek. Nabigbigko a masapul nga isardengkon ti agay-ayam kadagita a video game. Ita, naaramidakon dayta. Gapu iti inaramidko, maysa kadagiti gagayyemko ti natignay a saanen nga agay-ayam kadagiti naranggas a video game.”—Jeremy.
Panunotem: Kaano koma a nangrugi nga agkurri ti konsiensia ni Jeremy, ken kaano a nangrugi a dinengngegna dayta? Ania ti masursurom iti kapadasan ni Jeremy?
Laglagipem: Ipakita ti konsiensiam no asinoka ken no ania ti ibilangmo a napateg. Ania ti ipakita ti konsiensiam maipapan kenka?