Ti Gamengtayo Kadagiti Damili a Basehas
“Addaankami itoy a gameng kadagiti dinamili a basehas, tapno ti pannakabalin a nalablabes ngem ti gagangay biang koma ti Dios ket saan nga iti bagbagimi.”—2 CORINTO 4:7.
1. Kasano a makaparegta kadatayo ti ulidan nga impakita ni Jesus?
BAYAT ti panangsukog kenkuana ni Jehova ditoy daga, napasaran a mismo ni Jesus dagiti pagkapuyan ti sangatauan. Anian a makaparegta kadatayo ti panagtalinaedna a natarnaw! Kuna ti apostol kadatayo: “Iti kinapudnona, naayabankayo iti daytoy a kurso, agsipud ta uray ni Kristo nagsagaba a maipaay kadakayo, a nangibati kadakayo iti maysa a pagwadan tapno surotenyo a sisisinged dagiti addangna.” (1 Pedro 2:21) Iti kasta a panagpasukogna, pinarmek ni Jesus ti lubong. Pinabilegna met dagiti apostolna a parmekenda [ti lubong]. (Aramid 4:13, 31; 9:27, 28; 14:3; 19:8) Ket anian a nagsayaat a pammaregta ti impaayna iti paggibusan ti maudi a pannakisaona kadakuada! Kinunana: “Sinaok dagitoy a bambanag kadakayo tapno babaen kaniak maaddaankayo koma iti talna. Iti lubong addaankayo iti rigat, ngem bumilegkayo! Pinarmekko ti lubong.”—Juan 16:33.
2. Maigidiat iti kinabulsek ti lubong, ania a lawag ti adda kadatayo?
2 Kasta met, kalpasan a pinaggidiatna ti kinabulsek a gapuanan “ti dios daytoy a sistema ti bambanag” ken “ti lawag ti nadayag a naimbag a damag,” kinuna ni apostol Pablo maipapan iti napateg a ministeriotayo: “Addaankami itoy a gameng kadagiti dinamili a basehas, tapno ti pannakabalin a nalablabes ngem ti gagangay biang koma ti Dios ket saan nga iti bagbagimi. Marikutankami iti tunggal pamay-an, ngem saan a mailetan a di makagunay; mariribukankami, ngem saan a naan-anay nga awanan ruaran; maidadaneskami, ngem saan a nabaybay-an iti rigat; maituangkami, ngem saan a nadadael.” (2 Corinto 4:4, 7-9) Nupay narukoptayo a “dinamili a basehas,” suksukogennatayo ti Dios babaen ti espirituna tapno maparmektayo a naan-anay ti lubong ni Satanas.—Roma 8:35-39; 1 Corinto 15:57.
Panangsukog iti Nagkauna nga Israel
3. Kasano nga inladawan ni Isaias ti pannakasukog ti nasion dagiti Judio?
3 Saan laeng a dagiti indibidual no di ket intero a nasion ti suksukogen ni Jehova. Kas pagarigan, idi nagpasukog ti nagkauna nga Israel ken Jehova, rimmang-ay daytoy. Ngem idi kamaudianna, nagpatangken agingga a nagsukir. Iti kasta, ti Israel ket ‘dinidigra’ daydiay Nangaramid kenkuana. (Isaias 45:9) Idi maikawalo a siglo K.K.P., dinakamat ni Isaias ken Jehova ti nakaro a kinamanagbasol ti Israel, a kunkunana: “O Jehova, sika ti Amami; dakami pilakami, ket sika ti agdamdamili; ket dakami amin gapuanannakami ta imam. . . . Amin a nakaay-ayo a dissomi narnarbada.” (Isaias 64:8-11) Nasukog ti Israel a kas basehas a maikari laeng iti pannakadadael.
4. Ania nga ilustrasion ti inyakto ni Jeremias?
4 Maysa a siglo kalpasanna, bayat nga umad-adani ti aldaw ti panagsingir, imbilin ni Jehova ken Jeremias a mangala iti gorgorita ket ikuyogna ti dadduma kadagiti panglakayen ti Jerusalem a mapan iti Tanap ti Hinnom. Kinunana kenkuana: “Buongemto ti gorgorita iti imatang dagiti lallaki a makikuyog kenka. Ket kunaemto kadakuada, Kastoy ti kuna ni Jehova dagiti buybuyot: Kastanto ti panangburakko iti daytoy nga umili ken daytoy nga ili, kas iti panangbuong iti dinamili ti agdamdamili, a saan a mabalinen a tarimaanen.”—Jeremias 19:10, 11.
5. Kasano kakaro ti panangukom ni Jehova iti Israel?
5 Idi 607 K.K.P., rinebbek ni Nabucodonosor ti Jerusalem agraman ti templo daytoy ket impanawna a kas balud idiay Babilonia dagiti nakalasat a Judio. Ngem kalpasan ti pannakakayawda iti las-ud ti 70 a tawen, nakapagsubli dagiti nagbabawi a Judio tapno bangonenda manen ti Jerusalem ken ti templo daytoy. (Jeremias 25:11) Nupay kasta, idi umuna a siglo K.P., tinallikudan manen ti nasion ti Naindaklan a Dumadamili, ket idi kamaudianna, inaramidda ti nakadangdangkok a krimen, a pinapatayda ti mismo nga Anak ti Dios. Idi 70 K.P., inusar ti Dios ti Roma, ti kabilgan idi a nasion ditoy lubong, a namagpatingga iti Judio a sistema dagiti bambanag, a binegbegna ti Jerusalem ken ti templo daytoy. Saanen a sinukog ni Jehova ti nasion nga Israel kas “nasantuan ken naimnas.”a
Panangsukog iti Naespirituan a Nasion
6, 7. (a) Kasano nga inladawan ni Pablo ti pannakasukog ti naespirituan nga Israel? (b) Ania ti kompleto a bilang dagiti “basehas ti asi,” ken kasano a nabukel?
6 Dagiti Judio a nangawat ken Jesus nasukogda a kas umuna a miembro ti maysa a baro a nasion, ti naespirituan nga “Israel ti Dios.” (Galacia 6:16) Maikanatad ngarud dagitoy a sasao ni Pablo: “Ania? Ti kadi agdamdamili awanan kinaturay iti pitak tapno manipud iti isu met laeng a masa mangaramid iti maysa a basehas a maipaay iti nadayaw a pakausaran, ti sabali maipaay iti di nadayaw a pakausaran? . . . Ti Dios, nupay pagayatanna nga iparangarang ti pungtotna ken ipakaammo ti pannakabalinna, pinanuynoyanna buyogen iti kasta unay a mabayag a panagitured dagiti basehas ti pungtot a naaramid a maikari iti pannakadadael, tapno maipakaammona dagiti kinabaknang ti dayagna kadagiti basehas ti asi, nga insaganana a nasaksakbay maipaay iti kinadayag.”—Roma 9:21-23.
7 Idi agangay, impalgak ni napagungar a Jesus a 144,000 ti bilang dagitoy a “basehas ti asi.” (Apocalipsis 7:4; 14:1) Tangay saan a nakompleto ti natural nga Israel dayta a bilang, imburay ni Jehova ti asina kadagiti tattao ti nasnasion. (Roma 11:25, 26) Napartak ti irarang-ay ti kabbuangay idi a kongregasion Kristiano. Iti las-ud ti 30 a tawen, “naikaskasaba [ti naimbag a damag] kadagiti isuamin a parsua nga adda iti baba ti langit.” (Colosas 1:23) Gapu itoy, nasken a maipasidong iti umiso a pannakaaywan dagiti adu a naiwaraswaras a lokal a kongregasion.
8. Siasino dagiti nangbukel iti immuna a bagi a manarawidwid, ket kasano a rimmang-ay daytoy a grupo?
8 Naisagana idin ni Jesus dagiti 12 nga apostol nga agbalin nga umuna a bagi a manarawidwid, a sinanayna ida agraman dagiti sabsabali pay iti ministerio. (Lucas 8:1; 9:1, 2; 10:1, 2) Idi Pentecostes 33 K.P., naipasdek ti kongregasion Kristiano, ket idi agangay nanayonan dagiti miembro ti bagi a manarawidwid, a pakairamanan dagiti “apostol ken lallakay idiay Jerusalem.” Agparang a nabayag bassit a nagserbi a kas tserman ti kabsat ni Jesus iti ina a ni Santiago, nupay saan nga apostol. (Aramid 12:17; 15:2, 6, 13; 21:18) Sigun ken Eusebius a historiador, dagiti apostol ti nangnangruna a puntiria idi ti panangidadanes ket naiwaraswarasda iti nadumaduma a lugar. No kasta, adda panagbalbaliw ti pakabuklan ti bagi a manarawidwid.
9. Ania a nakalkaldaang a kasasaad ti impakpakauna ni Jesus a mapasamak?
9 Iti arinunos ti umuna a siglo, inrugi ti “kabusor, ti Diablo,” ti ‘nagimula kadagiti dakes a ruot’ iti nagbabaetan dagiti arig trigo nga agtawid iti “pagarian ti langlangit.” Impadto idi ni Jesus a mapalubosan ti kastoy a nakalkaldaang a kasasaad agingga iti panagaani iti “panungpalan ti sistema ti bambanag.” Ket “dagiti nalinteg agsilnagdanto [manen] a siraraniag a kas iti init iti pagarian ni Amada.” (Mateo 13:24, 25, 37-43) Kaano a napasamak dayta?
Panangsukog iti Israel ti Dios Ita
10, 11. (a) Kasano a naibanag ti pannakasukog ti Israel ti Dios iti agdama a panawen? (b) Aniada a naggidiat a sursuro ti masarakan iti Kakristianuan ken kadagiti napasnek nga Estudiante ti Biblia?
10 Idi 1870, nangbuangay ni Charles Taze Russell iti maysa a grupo idiay Pittsburgh, Pennsylvania, E.U.A., tapno adalenda ti Biblia. Idi 1879, inrugina ti nagipablaak iti binulan a magasin a pagaammo itan a The Watchtower. Di nagbayag, nabigbig dagitoy nga Estudiante ti Biblia, kas awag kadakuada idi, a di nainkasuratan no di ket napaganuan ti isursuro ti Kakristianuan, kas ti imortalidad ti kararua, umap-apuy nga impierno, purgatorio, dios a Trinidad, ken ti panangbuniag kadagiti maladaga.
11 Ngem napatpateg pay, insubli dagitoy a mangipatpateg iti kinapudno ti Biblia dagiti kangrunaan a sursuro ti Biblia, kas ti pannakaisalakan babaen ti daton a panubbot ni Jesus ken ti panagungar iti biag nga agnanayon iti natalna a paraiso a daga iti sidong ti Pagarian ti Dios. Kangrunaan iti amin, naipaganetget ti umad-adanin a pannakaalangon ni Jehova a Dios kas Soberano nga Apo ti uniberso. Patien dagiti Estudiante ti Biblia nga asidegen a masungbatan ti Kararag ti Apo: “Amami nga adda iti langlangit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met iti rabaw ti daga.” (Mateo 6:9, 10) Suksukogen ida idi ti nasantuan nga espiritu ti Dios nga agbalin a maysa a sangalubongan a sosiedad dagiti mannakikappia a Kristiano.
12. Kasano a nailasin dagiti Estudiante ti Biblia ti maysa a napateg a petsa?
12 Iti napasnek a panangusigda iti Daniel kapitulo 4 ken dadduma pay a padto, kombinsido dagiti Estudiante ti Biblia nga asideg idin ti kaadda ni Jesus kas Mesianiko nga Ari. Naawatanda nga agpatingga ti “naituding a pampanawen dagiti nasion” iti tawen 1914. (Lucas 21:24; Ezequiel 21:26, 27) Inagawaan dagiti Estudiante ti Biblia a pinarang-ay ti trabahoda, a nangbuangayda kadagiti makunkuna a “Bible class” (idi agangay, naawagan a kongregasion) iti intero nga Estados Unidos. Idi apagtapog ti agdama a siglo, agsaksaknap ti trabahoda a panangisuro iti Biblia agingga iti Europa, Australia, ken Asia. Nasken a maorganisar a naimbag daytoy.
13. Ania a legal nga estado ti nagun-od dagiti Estudiante ti Biblia, ket ania ti naisangsangayan a nagapuanan ti immuna a presidente ti Sosiedad?
13 Tapno maaddaan dagiti Estudiante ti Biblia iti legal nga estado, nainkorporada ti Zion’s Watch Tower Tract Society idi 1884 sadi Estados Unidos. Idiay Pittsburgh, Pennsylvania, ti hedkuarterda. Nagserbi dagiti direktor daytoy kas sentral a Bagi a Manarawidwid, a mangimaton iti sangalubongan a pannakaikaskasaba ti Pagarian ti Dios. Insurat ti immuna a presidente ti Sosiedad, ni Charles T. Russell, ti innem a tomo ti Studies in the Scriptures ken napan nangaskasaba iti nagduduma a lugar. Indonarna met iti sangalubongan a trabaho ti Pagarian ti kinabaknang a naurnongna sakbay nga inrugina nga inadal ti Biblia. Idi 1916, idi a madama ti Gubat Sangalubongan I idiay Europa, pimmusay ni napaksuyan a Brother Russell bayat ti panagbiahena a napan nangaskasaba. Inusarna ti amin nga adda kenkuana tapno maisaknap ti pannakaikaskasaba ti Pagarian ti Dios.
14. Kasano a “nakirupakak iti nasayaat a dangadang” ni J. F. Rutherford? (2 Timoteo 4:7)
14 Ni Joseph F.Rutherford, a maysa idi a temporario a hues idiay Missouri, ti simmukat a presidente. Gapu iti natured a panangitandudona iti kinapudno ti Biblia, nakikappon ti klero ti Kakristianuan kadagiti politiko a ‘nangbuangay iti ranggas gapu iti pagbilinan.’ Idi Hunio 21, 1918, naibalud da Brother Rutherford ken dagiti pito a dadduma pay a nalatak nga Estudiante ti Biblia. Nasentensiaan ti dadduma kadakuada iti 10 a tawen, ket dagiti dadduma, 20. Nakilaban dagiti Estudiante ti Biblia iti korte. (Salmo 94:20; Filipos 1:7) Nagapelarda, ket naruk-atanda idi Marso 26, 1919. Idi agangay, naan-anay a naabsueltoda iti sedision a naipabasol kadakuada.b Nagserbi daytoy a kapadasan a mangsukog kadakuada, ket nagbalinda a nabileg a manangitandudo iti kinapudno. Iti tulong ni Jehova, inaramidda ti amin a kabaelanda tapno agballigida iti naespirituan a pannakidangadangda a mangiwaragawag iti naimbag a damag iti baet ti ibubusor ti Babilonia a Dakkel. Agtultuloy dayta a pannakidangadang agingga iti daytoy a tawen 1999.—Idiligyo ti Mateo, kapitulo 23; Juan 8:38-47.
15. Apay a napateg iti historia ti tawen 1931?
15 Idi dekada 1920 ken 1930, nagtultuloy ti pannakasukog ti napulotan nga Israel ti Dios iti panangiturong ti Naindaklan a Dumadamili. Nagsilnag ti naimpadtuan a lawag manipud iti Kasuratan, a nangitan-ok ken Jehova ken nangitampok iti Mesianiko a Pagarian ni Jesus. Idi 1931, sirarag-o nga inawat dagiti Estudiante ti Biblia ti baro a nagan a Saksi ni Jehova.—Isaias 43:10-12; Mateo 6:9, 10; 24:14.
16 ken ti kahon iti panid 19. Kaano a nakompleto ti bilang dagiti 144,000, ket ania ti mangpaneknek iti daytoy?
16 Idi dekada 1930, agparang a nakompleton ti 144,000 a bilang “dagidiay naayaban ken napili ken matalek.” (Apocalipsis 17:14; kitaenyo ti kahon iti panid 19.) Ditay ammo no mano kadagiti napulotan ti naurnong idi umuna a siglo ken manipud kadagiti “dakes a ruot” kabayatan dagiti siglo ti maaw-awagan “dark ages,” ti panawen a nakaro ti panagapostasia ti Kakristianuan. Ngem idi 1935, iti kangatuan a bilang a 56,153, agdagup iti 52,465 dagiti agibumbunannag iti intero a lubong a nangipamatmat iti nailangitan a namnamada babaen ti pannakipasetda kadagiti emblema ti Memorial. Ania ngata ti pagtungpalan dagiti adu a maurnongto pay laeng?
“Adtoy! Maysa a Dakkel a Bunggoy”
17. Ania ti nagpateg a napasamak idi 1935?
17 Iti maysa a kombension a naangay manipud idi Mayo 30 agingga idi Hunio 3, 1935, idiay Washington, D.C., E.U.A., nangipaay ni Brother Rutherford iti naisangsangayan a palawag a napauluan “Ti Dakkel nga Umariwekwek.”c Agparang daytoy a grupo, “nga awan ti tao a makabael a mangbilang,” bayat ti naan-anay a pannakaselio dagiti 144,000 a mangbukel iti naespirituan nga Israel. Addaan met dagitoy iti pammati iti mangsubbot a bileg ti “dara ti Kordero,” ni Jesus, ken mangipapaayda iti sagrado a serbisio iti arig templo nga urnos ni Jehova iti panagdayaw. Kas grupo, sibibiagdanto nga ‘aggapu iti dakkel a rigat,’ tapno tawidenda ti naindagaan a Paraiso a sadiay “awanton ni patay.” Iti las-ud ti sumagmamano a tawen sakbay daydi a kombension, daytoy a grupo ti maaw-awagan idi a Jonadab.—Apocalipsis 7:9-17; 21:4; Jeremias 35:10.
18. Kadagiti ania a pamay-an a nagpateg ti tawen 1938?
18 Nagpateg ti tawen 1938 iti nalawag a pannakaipabigbig dagiti dua a grupo. Iti Marso 15 ken Abril 1, 1938, a ruar ti The Watchtower, napagadalan ti nagkadua-paset nga artikulo a napauluan “Ti Arbanna” a nangilawlawag iti sasaaden dagiti napulotan a natda ken dagiti kakaduada, ti dakkel a bunggoy. Kalpasanna, naglaon ti Hunio 1 ken Hunio 15 a ruar kadagiti artikulo a mapagadalan maipapan iti “Organisasion,” a naibatay iti Isaias 60:17. Nakiddaw amin a kongregasion a mangidawat iti Bagi a Manarawidwid a mangdutok daytoy kadagiti lokal nga adipen, tapno sumayaat ti impasdek ti Dios a teokratiko nga urnos. Kasta ti inaramid dagiti kongregasion.
19 ken footnote. Ania ti mangpasingked a nasurok nga 60 a tawenen nga agpatpatuloy ti pangkaaduan a pannakaayab dagiti “sabsabali a karnero”?
19 Kastoy ti kuna ti report iti Yearbook of Jehovah’s Witnesses idi 1939: “Manmanon dagiti napulotan a pasurot ni Kristo Jesus nga adda ita ditoy daga, ket awanen ti mainayon kadakuada. Iti Kasuratan, naawagan dagitoy kas ‘dagiti natda’ a kaputotan ti Sion, ti organisasion ti Dios. (Apoc. 12:17) Ur-urnongen itan ti Apo dagiti ‘sabsabali a karnerona,’ a mangbukel iti ‘dakkel nga umariwekwek.’ (Juan 10:16) Dagidiay maur-urnong ita ti kakadua dagiti natda, a kabinnulig dagiti natda. Manipud ita nga agpatpatuloy, umadunto ti mangbukel iti ‘sabsabali a karnero’ agingga a maurnong ti ‘dakkel nga umariwekwek.’” Nasukog idin dagiti napulotan a natda a mangtaming iti pannakaurnong ti dakkel a bunggoy. Masapul a masukog met dagitoy.d
20. Aniada nga organisasional a panagbalbaliw ti naaramid idi 1942?
20 Idi Enero 1942, iti kangitingitan ti Gubat Sangalubongan II, pimmusay ni Joseph Rutherford ket ni Nathan Knorr ti simmukat kenkuana kas presidente. Sidudungngo a malaglagip ti maikatlo a presidente ti Sosiedad gapu iti panangipasdekna kadagiti teokratiko nga eskuelaan kadagiti kongregasion ken ti Eskuelaan ti Gilead a pakasanayan dagiti misionero. Iti tinawen a miting ti Sosiedad idi 1944, impakaammona a narebisar ti karta ti Sosiedad tapno ti panagbalin a miembro ket saan a maibatay iti material a kontribusion, no di ket iti espiritualidad. Iti simmaganad a 30 a tawen, immadu ti bilang dagiti trabahador iti sangalubongan a tay-ak—manipud 156,299 nagbalin a 2,179,256. Idi 1971-75, kinasapulan dagiti kanayonan nga organisasional a panagbalbaliw. Saanen a maymaysa a tao nga agak-akem kas presidente ti mangimaton iti sangalubongan a trabaho ti Pagarian. Nanayonan ti miembro ti Bagi a Manarawidwid, a nabatangbatang dagiti agtakem a tserman. Sangapulo ket walo idin dagiti miembro a bin-ig a napulotan. Agarup kagudua kadakuada ti nakaturposen ti panagbiagda ditoy daga.
21. Ania ti namagbalin kadagiti miembro ti bassit nga ipastoran a maikari iti Pagarian?
21 Nasukog dagiti natda a kameng ti bassit nga ipastoran babaen kadagiti pakasuotan iti las-ud ti adu a dekada. Agragrag-oda, ta nabatad nga inawatdan ti ‘pammaneknek ti espiritu.’ Kinuna ni Jesus kadakuada: “Dakayo dagidiay nagtalinaed kaniak kadagiti pannakasusuotko; ket mangaramidak iti maysa a tulag kadakayo, kas iti panangaramid ni Amak iti maysa a tulag kaniak, maipaay iti maysa a pagarian, tapno mabalinyo ti mangan ken uminum iti panganak idiay pagariak, ket agtugawkayo kadagiti trono tapno ukomenyo dagiti sangapulo ket dua a tribo ti Israel.”—Roma 8:16, 17; Lucas 12:32; 22:28-30.
22, 23. Kasano a masuksukog ti bassit nga ipastoran ken dagiti sabsabali a karnero?
22 Bayat a bumasbassit ti bilang dagiti napulotan-espiritu a natda ditoy daga, natudingan dagiti nataengan a kakabsat a lallaki iti dakkel a bunggoy a mangaywan iti naespirituan a kasapulan ti gistay amin a kongregasion iti intero a lubong. Ket inton maturposen dagiti maudi a lallakay ken babbaketen a napulotan a saksi ti panagbiagda ditoy daga, nasanayton a naimbag dagiti arig prinsipe a sa·rimʹ iti sabsabali a karnero a mangitungpal kadagiti administratibo a rebbengenda kas klase pangulo ditoy daga.—Ezequiel 44:3; Isaias 32:1.
23 Agpada nga agtultuloy a masuksukog ti bassit nga ipastoran ken dagiti sabsabali a karnero kas basehas nga agpaay iti nadayaw a panggep. (Juan 10:14-16) Naisaad man ti namnamatayo iti “baro a langlangit” wenno iti “baro a daga,” sapay koma ta naimpusuan nga ipangagtayo ti awis ni Jehova: “Agragsakkayo ken agrag-okayo iti agnanayon iti daydiay a parsuaek; ta adtoy, a parsuaek ti [nailangitan a] Jerusalem a maysa a pagrag-oan, ken ti umili kenkuana a maysa a ragsak.” (Isaias 65:17, 18) Sapay koma ta datayo a narukop a tattao kankanayon nga agserbitayo a sipapakumbaba, nga agtultuloy a pasukogtayo iti “pannakabalin a nalablabes ngem ti gagangay”—ti bileg ti nasantuan nga espiritu ti Dios!—2 Corinto 4:7; Juan 16:13.
[Footnotes]
a Maysa daytoy a pakdaar a kastanto met a pannakaukom ti ipalak-am ni Jehova iti nagulib a Kakristianuan, nga inladawan ti nagkauna nga Israel.—1 Pedro 4:17, 18.
b Ni Judge Manton, maysa a Romano Katoliko a nagkedked a mapiansaan dagiti Estudiante ti Biblia, ket naibalud a mismo idi agangay gapu iti panangawatna kadagiti pasuksok.
c Iti New World Translation of the Christian Greek Scriptures, a nairuar idi 1950, nausar ti “dakkel a bunggoy” kas nasaysayaat a patarus ti naipaltiing a Griego a termino.
d Idi 1938, iti intero a lubong, 73,420 ti timmabuno iti Memorial, ket 39,225—53 porsiento kadagiti timmabuno—ti nakipaset kadagiti emblema. Idi 1998, 13,896,312 ti timmabuno, nga adda laeng 8,756 a nakipaset, agpromedio iti kumurang a 1 a makipaspaset iti kada 10 a kongregasion.
Malagipyo Kadi?
◻ Iti panagpasukogna ken Amana, kasano a nagbalin ni Jesus a Pagwadantayo?
◻ Ania a panangsukog ti naaramid iti nagkauna nga Israel?
◻ Kasano a masuksukog ti “Israel ti Dios” agingga ita?
◻ Agpaay iti ania a panggep a masuksukog dagiti “sabsabali a karnero”?
[Kahon iti paanid 18]
Ad-adda Pay a Panangsukog iti Kakristianuan
Iti panagsublina manipud Athens, Greece, kastoy ti impadamag ti maysa a pannakabagi ti Associated Press maipapan iti panguluen ti Greek Orthodox Church a nabiit pay a nadutokan: “Rebbeng koma a mensahero ti kappia. Ngem ad-adda a kasla maysa a heneral nga agsagsagana a makigubat ti lider ti Greek Orthodox Church.
“‘Nakasaganakami a mangibuyat iti dara ken agsakripisio no kasapulan. Sangsangkamaysakami kas iglesia a mangikarkararag iti kappia . . . Ngem bendisionanmi dagiti sagrado nga armas iti kanito a kasapulan,’ kinuna ni Arsobispo Christodoulos iti kallabes a pannakangilin ti nasantuan nga aldaw ti Pannakaipalangit ti Birhen, a narambakan met kas aldaw ti armada ti Grecia.”
[Kahon iti panid 19]
“Awanen ti Mainayon!”
Iti panagturpos iti Gilead idi 1970, ni Frederick Franz, ti bise-presidente idi ti Watch Tower Society, kinunana kadagiti estudiante, a bin-ig a kameng dagiti sabsabali a karnero nga addaan naindagaan a namnama, a nalabit addanto bautisaranda nga agkunkuna a maysa kadagiti napulotan a natda. Posible kadi a mapasamak daytoy? Bueno, inlawlawagna a maysa ni Juan Bautista a kameng ti sabsabali a karnero, ngem binautisaranna ni Jesus ken ti dadduma kadagiti apostol. Kalpasanna, insaludsod ni Brother Franz no addanto pay maayaban a maitipon kadagiti natda. “Awan, awanen ti mainayon!” kinunana. “Nagpatinggan dayta a panangayab idi 1931-35! Awanen ti mainayon. Siasino ngarud dagiti sumagmamano a nabiit pay a naitimpuyog a makipaspaset kadagiti emblema ti Memorial? No maibilangda kadagiti natda, isuda dagiti kasukat! Saanda a nainayon kadagiti napulotan, no di ket kasukat dagidiay timmallikud.”
[Ladawan iti panid 15]
Anian a panangipategtayo iti gamengtayo a panagserbi!
[Ladawan iti panid 16]
Nagbalin ti nagkauna nga Israel a basehas a maikari laeng iti pannakadadael