Ti Kinasirib iti ‘Panangammo No Anianto ti Mapasamak’
“TATTAODA a di manakem ken awanan pannakaawat. No masiribda koma, matarusanda koma daytoy ken ammoda no anianto ti mapasamak kadakuada.”—Deuteronomio 32:28, 29, Beck.
Sinao daytoy ni Moises kadagiti Israelita idi a sitatakderda iti pagbeddengan ti Naikari a Daga. Impakpakauna ni Moises ti panawen a paglikudandanto ni Jehova ket laglag-anenda dagiti pagbanagan ti ar-aramidda. Kadagiti simmaganad a siglo, di inkankano ti nasion ti Israel—agraman ti adu nga ar-ari—dagiti pakdaar ti Dios.
Kas pagarigan, ammo ni Solomon ti bilin ti Dios a di panangasawa kadagiti managdaydayaw iti didiosen imbes a ken Jehova. (Deuteronomio 7:1-4) Kaskasdi, nangasawa ni Solomon iti “adu a ganggannaet a babbai.” Ti nagbanaganna? Kuna ti rekord ti Biblia: “Ta naaramid idi a ni Solomon lakayen, a dagiti assawana pinagsublida ti pusona a pinasurot kadagiti sabali a didios; ket ti pusona saan a nasin-aw ken Jehova a Diosna, a kas iti puso idi ni David nga amana.” (1 Ar-ari 11:1, 4) Nupay masirib a tao, saan nga inusar ni Solomon ti panunotna tapno ‘ammona koma no anianto ti mapasamak’ no agsukir iti bilin iti Dios.
Datayo met ngay? Maliklikantayo ti adu nga ut-ot no agpanunottayo pay a naimbag kadagiti desisiontayo iti biag. Kas pagarigan, nabalakadan dagiti Kristiano a “dalusan[da koma ti bagbagida] iti tunggal pakatulawan iti lasag ken iti espiritu.” (2 Corinto 7:1) Nainsiriban daytoy, ngem adu ti di agpanunot nga umuna no anianto ti mabalin a mapasamak no laksidenda ti patigmaan ni Pablo. Kas pagarigan, adu nga agtutubo ti mangrugit iti bagida babaen ti panagsigarilio, a pagarupenda a daytoy ti mamagparang kadakuada a sosial ken nataengan. Anian a nagkas-ang no agbanagto dayta iti panagsagaba ti dadduma iti sakit ti puso, kanser ti bara, wenno emphysema!
Napateg a siiinget a tingitingentayo dagiti mabalin a pagbanaganto dagiti desision ken tignaytayo. Adda naimbag a rason nga insurat ni Pablo: “Aniaman nga imulmula ti maysa a tao, daytoyto met ti apitenna; agsipud ta ti agimulmula a maipaay iti lasagna apitennanto ti panagrupsa manipud iti lasagna, ngem ti agimulmula maipaay iti espiritu apitennanto ti agnanayon a biag manipud iti espiritu.”—Galacia 6:7, 8.