Apay a Nagbassit ti Panawen?

PANAWEN. Mabalin a narigat nga ilawlawag ti eksakto a kaipapanan dayta a sao, ngem sigurado nga ammotayo a kasla awan a pulos ti umdas a panawentayo. Ammotayo met a mabiit la nga aglabas. Kinapudnona, masansan nga isennaaytayo, “Napartak nga aglabas ti panawen.”

Nupay kasta, agparang a mas umiso ti Ingles a mannaniw a ni Austin Dobson idi kinunana idi 1877: “Aglabas ti panawen, kunam? Ay saan! Agtalinaed ti panawen, datayo ti aglabas.” Nanipud ipapatayna idi 1921, agarup 80 a tawen nga awanen ni Dobson; nagtultuloy ti panawen.

Nawadwad a Panawen

Maipapan iti Namarsua iti sangatauan, kuna ti Biblia kadatayo: “Sakbay a naipasngay dagiti bantay, wenno idi pinaltuadmo a kasla buyogen ti ut-ot ti panagpasikal ti daga ken ti nabunga a daga, manipud iti panawen a di nakedngan agingga iti panawen a di nakedngan, sika ti Dios.” (Salmo 90:2,) Wenno kas panangipatarus ti The New Jerusalem Bible, “manipud iti kinaagnanayon agingga iti kinaagnanayon, sika ti Dios.” No kasta, agtalinaed ti panawen a kas iti Dios a mismo​—iti agnanayon!

Maigidiat unay iti Dios, nga awan pagpatinggaan ti panawenna, mabasatayo maipapan kadagiti tattao: “Ta amin dagiti aldawmi naglabasda iti ungetmo: pagkanibusanenmi dagiti tawenmi a kas maysa a sasainnek: dagiti al-aldaw dagiti tawenmi pitopuloda a tawen, wenno agpapan pay gapu iti kinabileg walopulo a tawen; nupay kasta ti laeng sagudayda bannog ken ladingit; ta lumabas nga apagbiit, ket tumayabkamin.”​—Salmo 90:9,10.

Apay a nagababa ti biag ita, yantangay nalawag nga isursuro ti Biblia a panggep ti Dios a ti tao agbiag nga agnanayon? (Genesis 1:27, 28; Salmo 37:29) Imbes a di koma agpatingga ti panagbiagda kas pinanggep ti Dios, apay nga agarup 30,000 laeng nga aldaw ti promedio a kapaut ti panagbiag dagiti tattao, iti kasayaatanen a kasasaad? Apay a nagbassit ti panawen dagiti tattao? Siasino wenno ania ti pakaigapuan daytoy nakalkaldaang a kasasaad? Ipaay ti Biblia dagiti nalawag ken makapnek a sungbat.a

Bumassit a Bumassit ti Panawen

Pasingkedan dagiti lallakayen a pimmartak ti taray ti panagbiag kadagiti kallabes a dekada. Kinuna ni Dr. Sybille Fritsch, maysa a periodista, nga iti napalabas a 200 a tawen, nagbalin a 38 nga oras laengen imbes a 80 ti oras a mabusbos iti trabaho iti makalawas, “ngem saan a pinasardeng daytoy ti panagreklamotayo.” Inlawlawagna: “Kurang ti panawen; nabalor ti panawen; panangkamat iti panawen a kas iti panangkamat iti anges; okupado a panagbiag.”

Nangparnuay dagiti baro a partuat kadagiti oportunidad ken posibilidad a di pulos napanunot dagiti naglabas a kaputotan. Ngem no ad-adu ti mabalintay nga aramiden, dakdakkel met ti pannakaupaytayo gapu ta kurang ti panawentayo a mangaramid kadagita. Iti adu a paset ti lubong ita, adda nainget nga eskediul a sursuroten dagiti tattao, nga iyapurada nga ileppas dagiti bambanag. Masapul a mapan agtrabaho ni Tatang iti alas 7:00 t.b., itulod ni Nanang dagiti ubbing idiay eskuelaan iti alas 8:30 t.b., ket mapan agpakita ni Lolo iti doktor iti alas 9:40 t.b., ket amintayo masapul nga agrubbuat a mapan tumabuno iti napateg a taripnong iti alas 7:30 t.r. Gapu ta agsasaruno ti ikamakamtayo nga iringpas, gistay awanen ti panawentayo nga agaliwaksay. Ket agreklamotayo ta isu la nga isu ti ar-aramidentayo iti inaldaw, makabannog.

Saan Laeng a Datayo ti Bassit ti Panawenna

Ti Kabusor ti Dios a ni Satanas a Diablo, a ti gakatna nangituggod iti pannakapaababa ti biag ti tao, ket biktima itan ti kinadakesna. (Idiligyo ti Galacia 6:7, 8.) Maipapan iti pannakaipasngay ti Mesianiko a Pagarian idiay langit, ikkannatayo ti Apocalipsis 12:12 iti pangnamnamaan, a kunkunana: “Gapu itoy agragsakkayo, dakayo a langlangit ken dakayo nga agnaed kadakuada! Asi pay ti daga ken ti baybay, agsipud ta ti Diablo immulog kadakayo, nga addaan iti dakkel nga unget, yantangay ammona nga ababan ti periodo ti tiempona.”

Sigun iti mapagtalkan a kronolohia ti Biblia ken ti kaitungpalan ti padto ti Biblia, agbibiagtayon iti arinunos dayta nga ‘ababa a periodo ti tiempo.’ Anian a makaparagsak a maammuan a dandanin maibus ti natda a tiempo ni Satanas! No awanen ni Satanas, maisublinto ti kinaperpekto kadagiti natulnog a tattao, ket magun-oddanto ti biag nga agnanayon a pinanggep ni Jehova para kadakuada idi punganay. (Apocalipsis 21:1-4) Saanton a problema ti kinakurang ti panawen.

Mailadawanyo kadi no ania ti kaipapanan ti panagbiag nga agnanayon​—agbiag nga awan inggana? Saankayton a maringgoran kadagiti bambanag a saanyo a naiwakas. No kasapulanyo ti kanayonan a panawen, adda pay met ti bigat, wenno sumaruno a lawas, wenno sumaruno a tawen​—kinapudnona, kinaagnanayon ti agur-uray kadakayo!

Nainsiriban a Panangusar iti Adda a Panawentayo

Tangay ammona a bassit laengen ti panawenna a mangimpluensia kadagiti tattao, ikagkagumaan ni Satanas a pagokupaduen dagiti tattao tapno awan panawenda a dumngeg iti naimbag a damag maipapan iti naipasdeken a Pagarian ti Dios. Nasayaat ngarud nga ipangagtayo ti nadiosan a balakad: “Itultuloyyo ti agaluad a siiinget a ti pannagnayo saan a kas kadagiti nakuneng no di ket kas kadagiti masirib [a tattao], a gatangenyo ti nainggundawayan a tiempo maipaay iti bagbagiyo, agsipud ta dagiti aldaw nadangkesda. Gapu itoy sumardengkayo nga agbalin a di nainkalintegan, no di ket itultuloyyo a lasinen no ania ti pagayatan ni Jehova.”​—Efeso 5:15-17.

Anian a nagpateg nga usarentayo a nainsiriban ti panawentayo kadagiti banag a kaskenan imbes a sayangentay dayta kadagiti ubbaw nga aramid nga awan maitedda a manayon a gunggona! Patanorentayo koma ti karirikna a kas iti karirikna ni Moises idi indawatna ken Jehova dagitoy a naimpusuan a sasao: “Isuronakami a mangbilang kadagiti al-aldawmi, tapno magun-odmi koma ti puso a manakem.”​—Salmo 90:12.

Pudno, iti lubong ita, okupado amin a tao. Nupay kasta, sipapasnek nga idagadag dagiti Saksi ni Jehova nga usarenyo ti dadduma a napateg a panawenyo a mangammo no ania ti iparebbeng ti Dios tapno magun-odyo ti biag nga agnanayon iti sidong ti turay ti Pagarianna. Babaen ti maysa nga oras iti kada lawas a sistematiko a panagadal iti Biblia, ‘panangilasin no ania ti pagayatan ni Jehova,’ mabalin a matungpalto kadakayo a mismo dagitoy a sasao: “Pagtalawam ti dakes ket agaramidka iti naimbag; ket agtalinaedka nga agnanayon. Ti sililinteg tawidennanto ti daga, ket agtaengto kenkuana nga agnanayon.”​—Salmo 37:27, 29.

[Footnote]