Ti Pammati Mabalbaliwanna ti Biagmo

“TALAGA a posible unay ti maaddaan kadagiti nasayaat a prinsipio uray awan ti Dios.” Kasta ti kinuna ti maysa nga agnostiko. Imbagana a pinadakkelna dagiti annakna nga addaan kadagiti nangato a moral a prinsipio, ket kas resultana, pinadakkel met dagiti annakna ti annakda nga addaan met laeng kadagiti nangato a pagalagadan. Agpapadada amin a di mamati iti Dios.

Kaipapanan kadi daytoy a saan a nasken ti panamati iti Dios? Nabatad a kasta ti impagarup daytoy a tao. Ket agpayso met a saan nga amin a di mamati iti Dios ket dakes a tattao. Nadakamat ni apostol Pablo “dagiti tattao iti nasnasion” a di makaammo iti Dios ngem “aramidenda dagiti bambanag iti linteg sigun iti nakaisigudan.” (Roma 2:14) Amintayo​—agraman dagiti agnostiko​—ket naipasngay nga addaan iti konsiensia. Adu kadakuada ti mangsursurot iti diktar ti konsiensiada nupay dida mamati iti Dios a nangted kadakuada iti nakaisigudan a pannakabalin a mangilasin iti naimbag ken dakes.

Nupay kasta, ti nabileg a pammati iti Dios​—daydiay naibasar iti Biblia​—ket nabilbileg nga amang a puersa a maipaay a pagimbagan ngem iti di maiwanwanwan a konsiensia. Ti pammati a naibasar iti Sao ti Dios a ti Biblia sursuruanna ti konsiensia, ad-adda a pagsiglatenna a mangilasin iti naimbag ken ti dakes. (Hebreo 5:14) Maysa pay, ti pammati pabilgenna dagiti tattao a mangsalimetmet kadagiti nangato a pagalagadan iti sango ti nakaro a pakasuotan. Kas pagarigan, iti maika-20 a siglo, adu a pagilian ti inturayan dagiti rinuker a napolitikaan a rehimen, a nangpilit kadagiti natakneng a tattao nga agaramid kadagiti nakaam-ames a kinaranggas. Nupay kasta, dagidiay addaan iti pudno a pammati iti Dios nagkitakitda a mangikompromiso kadagiti prinsipioda, nupay nagpeggad ti biagda. Kanayonanna, ti naibasar-Biblia a pammati mabalbaliwanna dagiti tattao. Maalawna dagiti naiwawa a tattao ken matulonganna ida a mangliklik kadagiti nakaro a biddut. Usigenyo ti sumagmamano a pagarigan.

Ti Pammati Mabalbaliwanna ti Biag ti Pamilia

“Babaen ti pammatiyo, naaramidyo ti imposible.” Kasta ti imbaga ti maysa nga Ingles a hues idi impaulogna ti pangngeddengna maipapan iti pannakaaywan ti annak da John ken Tania. Idi dimmatag da John ken Tania kadagiti autoridad, saanda pay a nagkasar ken nariribuk ti biag ti pamiliada. Agdrogdroga ken sugador ni John, ken nagaramid iti krimen tapno masuportaranna dagiti bisiona. Binaybay-anna dagiti agiinana. No kasta, ania ngay ti napasamak a “milagro”?

Maysa nga aldaw, nangngeg ni John ti kaanakanna nga ages-estoria maipapan iti Paraiso. Tangay naginteres, dinamagna dagiti nagannak ti ubing. Saksi ni Jehova dagiti nagannak, ket tinulonganda ni John a mangammo iti dayta manipud iti Biblia. In-inut a napatanor da John ken Tania ti naibasar-Biblia a pammati a nangbalbaliw iti biagda. Pinagbalinda a legal ti panagdennada babaen ti panagkasarda ket pinarmekda dagiti bisioda. Dagiti autoridad a nanginspeksion iti sangakabbalayanda adda nakitada a kasla imposible idi kasakbayanna​—maysa a naragsak a pamilia iti nadalus a pagtaengan, makaay-ayo a lugar a pangpadakkelan kadagiti annak. Umiso ti panangipagapu ti hues iti daytoy a “milagro” iti kabarbaro a pammati da John ken Tania.

Rinibu a kilometro manipud Inglatera, adda agkabannuag nga asawa a babai iti Asideg a Daya a dandani idin agbalin a paset ti maysa a nakalkaldaang nga estadistika. Pangpanggepenna ti agbalin a maysa kadagiti minilion, nga iti kada tawen, agpatingga ti panagasawada iti diborsio. Addaan iti anak, ngem in-inauna nga adayo ni lakayna ngem isu. Gapu itoy, idagdagadag dagiti kabagianna a makidiborsio, ket iti kinapudnona, rinugianna payen nga ipagna dayta. Nupay kasta, makipagad-adal iti Biblia iti maysa kadagiti Saksi ni Jehova. Idi naammuan ti Saksi ti kasasaad, inlawlawagna ti ibagbaga ti Biblia maipapan iti panagasawa​—kas pagarigan, ti panagasawa ket sagut ti Dios ken banag a di rumbeng a matagtagilag-an. (Mateo 19:4-6, 9) Kinuna ti babai iti un-unegna, ‘Karkarna man a daytoy a babai, a diak kapkapin-ano, ti mangikagkagumaan a mangsalbar iti pamiliami idinto ta kayat dagiti nasinged kaniak a makidiborsioakon.’ Ti kabarbaro a pammatina ti nakatulong kenkuana a di makidiborsio.

Mainaig iti aborsion ti maysa pay a nakalkaldaang nga estadistika a mangap-apektar iti biag ti pamilia. Pinattapatta ti maysa a report ti United Nations nga iti kada tawen, di kumurang nga 45 a milion a sikog ti maigagara a maiparegreg. Maysa a trahedia ti tunggal maysa kadagita a pasamak. Ti pannakaammo iti Biblia ti nakatulong iti maysa a babai ditoy Pilipinas a mangliklik iti panagbalinna a paset dayta nga estadistika.

Nasarakan dagiti Saksi ni Jehova ti babai, nangala iti broshur a mausar iti panagadal iti Biblia a napauluan Ania ti Kalikaguman ti Dios Kadatayo?,a ket rinugianna ti nakipagadal iti Biblia. Sumagmamano a bulan kalpasanna, inlawlawagna ti makagapu. Masikog ti babai idi damo a sinarungkaran dagiti Saksi, ngem panggepda ken lakayna nga iparegreg ti sikogna. Nupay kasta, natukay ti pusona idi makitana ti retrato ti di pay naipasngay a maladaga iti panid 24 ti broshur. Ti naipakuyog a naibasar-Biblia a panangilawlawag a ti biag ket sagrado agsipud ta ‘adda iti Dios ti ubbog ti biag’ ti nakagutugotanna a di agparegreg. (Salmo 36:9) Ita, isut’ maysan nga ina ti napintas, nasalun-at a maladaga.

Ti Pammati Tulonganna Dagidiay Malalais

Idiay Ethiopia, dua a nakurapay ti panagkawkawesda a lallaki ti timmabuno iti gimong dagiti Saksi ni Jehova. Idi nalpas ti gimong, maysa a Saksi ti nainggayyeman a nakiam-ammo kadakuada. Nagkiddaw dagiti lallaki iti limos. Saan a kuarta no di ket adda nasaysayaat nga inted ti Saksi kadakuada. Pinaregtana ida a mangpatanor iti pammati iti Dios, a “dakdakkel unay ti pategna ngem ti balitok.” (1 Pedro 1:7) Maysa kadakuada ti nagtignay ken nangrugi a nakipagadal iti Biblia. Daytoy ti nangbalbaliw iti biagna. Bayat a bimmileg ti pammatina, insardengna ti agsigarilio, agbartek, agaramid iti imoralidad, ken agusar iti khat (makaadikto a pangpaganaygay). Nasursurona a suportaran ti bagina imbes nga agpalimos, ket ita, nadalus ken makapneken ti biagna.

Idiay Italia, nasentensiaan iti sangapulo a tawen a pannakaibalud ti maysa nga 47 anyos a lalaki ken naibalud iti psychiatric hospital a tartarawidwidan ti pangukoman. Isut’ inyadalan iti Biblia ti maysa kadagiti Saksi ni Jehova nga autorisado a sumrek kadagiti pagbaludan tapno tumulong iti naespirituan. Napartak ti irarang-ay daytoy a lalaki. Ti pammati ti nangbalbaliw unay iti biagna ta mabalin payen nga agpabalakad kenkuana ti dadduma a balud no kasanoda a risuten dagiti parikutda. Ti naibasar-Biblia a pammatina ti gapu a nagun-odanna ti panagraem, panangipateg, ken panagtalek dagiti autoridad iti pagbaludan.

Kadagiti kallabes a tawen, impadamag dagiti periodiko ti adu a gerra sibil idiay Africa. Nangnangruna a makapasidduker dagiti damag maipapan kadagiti ubbing a lallaki a masansanay nga agsoldado. Pagdrogaen, ranggasan, ken pilitenda dagitoy nga ubbing a makipaset iti di natauan nga aramid maibusor kadagiti kabagianda tapno masierto ti naan-anay a kinasungdoda iti paksion nga ilablabanda. Umdas kadi ti kinabileg ti naibasar-Biblia a pammati a mangbalbaliw iti biag dagita nga ubbing? Napaneknekan a kasta iti dua a pasamak.

Idiay Liberia, maysa a sakristan ni Alex iti Iglesia Katolika. Ngem idi 13 ti tawenna, nakikappon iti maysa a makigubgubat a paksion ket nagbalin nga agdindinamag ti kinadakesna nga ubing a soldado. Tapno natured iti gubatan, nagpatulong iti manggagamud. Nakita ni Alex nga adu kadagiti kakaduana ti napapatay, ngem isu ket nakalasat. Idi 1997, naam-ammona dagiti Saksi ni Jehova. Imbes nga umsienda, tinulonganda ketdi a mangammo iti ibagbaga ti Biblia maipapan iti kinaranggas. Immikkat ni Alex iti armada. Bayat a bimmileg ti pammatina, sinurotna ti bilin ti Biblia: “Umadayo koma iti dakes ket aramidenna ti naimbag; sapulenna koma ti talna ket surotenna dayta.”​—1 Pedro 3:11.

Kabayatanna, maysa a dati nga ubing a soldado nga agnagan Samson ti napan iti ili a pagnanaedan itan ni Alex. Maysa idi a kantor ngem nagsoldado idi 1993 ket nasumokna ti droga, espiritismo, ken imoralidad. Idi 1997, naikkat iti kinasoldadona. Agpa-Monrovia koma idin ni Samson tapno makikappon iti maysa nga espesial a puersa seguridad idi inawis ti maysa a gayyemna a makipagadal iti Biblia kadagiti Saksi ni Jehova, ket kas resultana, napatanorna ti naibasar-Biblia a pammati. Daytoy ti nangted kenkuana iti kired a mangiwaksi kadagiti naranggas a kababalinna. Agpada a natalna ken natakneng itan ti kabibiag da Alex ken Samson. Adda pay kadi aniaman malaksid iti naibasar-Biblia a pammati a mabalin a mangbalbaliw kadagiti naranggasan unay idi a biag?

Ti Umiso a Kita ti Pammati

Sumagmamano laeng dagitoy iti nagadu a pagarigan a mabalin a madakamat a mangipakita no ania ti maaramidan ti pudno a pammati a naibasar iti Biblia. Siempre, saan nga amin a basta agkunkuna a mamati iti Dios ket agbibiag a mayannurot kadagiti nangato a pagalagadan ti Biblia. Kinapudnona, adda dagiti ateista a mabalin a nasaysayaat ti kabibiagda ngem iti dadduma nga agkunkuna a Kristiano. Saan la ngamin a ti panagkuna a mamatika iti Dios ti saklawen ti naibasar-Biblia a pammati.

Inawagan ni apostol Pablo ti pammati kas “ti sigurado a panangsegga kadagiti bambanag a namnamaen, ti nabatad a parangarang dagiti kinapudno nupay saan a nakita.” (Hebreo 11:1) Gapuna, ti pammati kakuykuyogna ti napigsa a panamati​—a naibasar iti di mabalusingsing nga ebidensia​—​kadagiti di makita a banag. Nangnangruna a ramanenna ti di pulos panagduadua iti kaadda ti Dios, nga isut’ interesado kadatayo, ket bendisionanna dagidiay mangar-aramid iti pagayatanna. Kinuna pay ti apostol: “Ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.”​—Hebreo 11:6.

Daytoy a kita ti pammati ti nangbalbaliw iti biag da John, Tania, ken dadduma pay a nadakamat iti artikulo. Dayta ti nakatulong kadakuada nga agtalek a naan-anay iti Sao ti Dios, ti Biblia, a mangigiya iti panagaramid kadagiti pangngeddeng. Tinulonganna ida a temporario nga agsakripisio tapno dida agaramid iti kombiniente, ngem dakes met. Nupay nagduduma ti tunggal kapadasan, agpapada ti nangrugianda amin. Maysa a Saksi ni Jehova ti nangyadal iti Biblia kadagitoy a tattao, ket napaneknekanda ti kinapudno ti ibagbaga ti Biblia: “Ti sao ti Dios nabiag ken adda bilegna.” (Hebreo 4:12) Ti bileg ti Sao ti Dios ti timmulong iti tunggal maysa a mangpatanor iti napigsa a pammati a nangpasayaat iti biagna.

Aktibo dagiti Saksi ni Jehova iti nasurok a 230 a pagilian ken puro iti baybay. Aw-awisendaka a makipagadal iti Biblia. Apay? Agsipud ta kombinsidoda nga adu met ti naimbag a maaramidanna iti biagmo ti naibasar-Biblia a pammati.

[Footnote]

[Dagiti Ladawan iti panid 3]

Ti pammati a naibasar iti Biblia ti mangpaspasayaat iti biagda

[Picture Credit Line iti panid 2]

Title card ti Biblia nieświeska by Szymon Budny, 1572