Datayo Dagiti Kita nga Addaan Pammati
Panangidanon iti Makaliwliwa a Mensahe Idiay Italia
NI Jehova ti “Dios ti amin a liwliwa.” Babaen ti panangsursuro dagiti adipenna a mangtulad kenkuana, ‘mabalinanda a liwliwaen dagidiay adda iti aniaman a kita ti rigat.’ (2 Corinto 1:3, 4; Efeso 5:1) Maysa daytoy kadagiti kangrunaan a panggep ti panangaskasaba dagiti Saksi ni Jehova.
Panangtulong iti Babai nga Agkasapulan
Nangnangruna kadagiti kallabes a tawen, ti kinapanglaw, gubat, ken ti panagtarigagay a makasarak iti nasaysayaat a biag ti nangtignay iti adu nga umakar kadagiti nabakbaknang a pagilian. Ngem saan a nalaka ti makibagay iti baro nga aglawlaw. Makipagnanaed ni Manjola kadagiti padana a taga Albania idiay Borgomanero. Tangay di legal ti panagnaedna idiay Italia, nagkedked a makisao ken Wanda, maysa kadagiti Saksi ni Jehova. Ngem kamaudiananna, inyurnos ni Wanda a makasaritana ni Manjola, a dagdagus a nangipakita ti dakkel nga interes iti panagadal iti Sao ti Dios, nupay adda rigrigatna gapu iti parikut iti pagsasao. Nupay kasta, kalpasan ti sumagmamano nga isasarungkar, awanen tao a madandanon ni Wanda iti pagtaengan ni Manjola. Aniat’ napasamak? Naammuan ni Wanda a nagtalaw amin nga agnanaed iti dayta a balay agsipud ta maysa kadakuada—ti nobio ni Manjola—ket sapsapulen dagiti polis ta nakapapatay!
Uppat a bulan kalpasanna, nagsarak manen da Wanda ken Manjola. “Malasin iti kinabessag ken kinakuttongna a talaga a naglasat iti rigat,” malagip ni Wanda. Inlawlawag ni Manjola a nakabalud ti dati a nobiona ken napalalo ti panangpaay kenkuana dagiti nagpatulonganna a gagayyemna. Gapu ta desperado, dimmawat ti tulong iti Dios. Idin, nalagipna ni Wanda, a nangisarita kenkuana ti maipapan iti Biblia. Anian a ragsak ni Manjola a nakakita manen kenkuana!
Naituloy ti panagadalna iti Biblia, ket di nagbayag, rinugian ni Manjola ti tumabuno kadagiti Nakristianuan a gimong. Nagballigi a mangala iti legal a pammalubos nga agtalinaed sadi Italia. Kalpasan ti makatawen, nagbalin ni Manjola a bautisado a Saksi. Gapu ta naliwliwa kadagiti kari ti Dios, nagsubli sadi Albania tapno iranudna ti makaliwliwa a mensahe ti Biblia kadagiti kailianna.
Panangasaba iti Kampo Dagiti Imigrante
Inyurnos ti adu a kongregasion dagiti Italiano a kasabaan dagiti imigrante kas ken Manjola. Kas pagarigan, inyurnos ti maysa a kongregasion idiay Florence a regular a masarungkaran ti maysa a kampo dagiti imigrante. Dagiti agnanaed iti kampo—nga adu ti naggapu idiay Makindaya nga Europa, Macedonia, ken Kosovo—mapaspasaranda ti nadumaduma a pakarigatan. Mainaig iti droga wenno arak ti parparikut ti dadduma. Adu ti agbibiag babaen ti saggabassit a panagtakaw.
Maysa idi a karit ti panangasaba iti daytoy a komunidad. Nupay kasta, maysa nga amin-tiempo nga ebanghelisador a ni Paola nakasaona idi agangay ni Jaklina, maysa a babai a taga Macedonia. Kalpasan ti sumagmamano a panagsarita, pinaregta ni Jaklina ti gayyemna a ni Susanna a mangusig ti Biblia. Naibaga met dayta ni Susanna iti dadduma a kakabagianda. Idi agangay, lima a kameng ti pamilia ti regularen nga agad-adal iti Biblia, tumabtabuno kadagiti Nakristianuan a gimong, ken mangyap-aplikar kadagiti masursuroda. Iti laksid dagiti parikut a masapul a sarangtenda, makagun-odda iti liwliwa manipud ken Jehova ken iti Saona.
Madre nga Immawat iti Liwliwa Manipud ken Jehova
Iti ili ti Formia, maysa nga amin-tiempo nga ebanghelisador a ni Assunta, nakasaritana ti maysa a babai a marigrigatan a magna. Madre idi daytoy a babai iti maysa a relihioso nga orden a mangsarsaranay kadagiti addaan an-annayen ken masaksakit kadagiti ospital ken pribado a pagtaengan.
Kinuna ni Assunta iti madre: “Adda met sagsagabaenyo, saan kadi? Makapaladingit ta amintayo ket addaan kadagiti problema a pakidangadangan.” Idin, nagsangit ti madre sa inlawlawagna a nakaro dagiti an-annayenna. Pinaregta ni Assunta, a kunkunana nga isu ket liwliwaen ti Dios iti Biblia. Inawat ti madre dagiti naibatay-Biblia a magasin nga intukon ni Assunta.
Kabayatan ti simmaganad a panagtungtongda, inamin ti madre nga agnagan ti Palmira, a napalalo ti panagsagabana. Nabayag idin nga agnanaed iti institusion nga imatmatonan dagiti madre. Idi masapul a pumanaw iti ababa a tiempo gapu iti sakit, saanen a napalubosan nga agsubli. Nupay kasta, narikna ni Palmira nga adda rebbengenna iti Dios maigapu kadagiti inkarina kas madre. ‘Nagpaagas’ kadagiti mangngagas ngem naburibor gapu iti kapadasanna. Immannugot ni Palmira nga agadal iti Biblia, ken timmabuno kadagiti Nakristianuan a gimong iti makatawen. Kalpasanna, immakar iti sabali a lugar, ket saanen a nakasarita ti Saksi. Dua a tawen ti limmabas sakbay a nasarakan manen ni Assunta. Napasaran ni Palmira ti nakaro nga ibubusor ti pamiliana ken ti klero. Agpapan pay kasta, intultuloyna ti panagadalna iti Biblia, rimmang-ay iti naespirituan, ken nagpabautisar kas maysa kadagiti Saksi ni Jehova.
Wen, adu ti maparparegta iti mensahe ‘ti Dios a mangipaay iti liwliwa.’ (Roma 15:4, 5) Ngarud, dagiti Saksi ni Jehova idiay Italia determinadoda nga itultuloy a tuladen ti Dios babaen ti panangidanon kadagiti sabsabali iti nakaskasdaaw a makaliwliwa a mensahena.