Report Dagiti Manangiwaragawag iti Pagarian

Panangam-ammo iti Naayat a Dios

NADISMAYAN iti biag idi agtawen iti 16 ni Antônio a taga Brazil. Gapu ta awan direksion ti biagna, nasumokna ti droga ken alkoholismo. Kanayonna a panggepen ti agpakamatay. Kadagitoy a gundaway a nalagipna ti imbaga idi ti inana kenkuana: “Ti Dios ket ayat.” (1 Juan 4:8) Ngem ayanna ngay daytoy naayat a Dios?

Iti ayatna a makalapsut iti droga ken alkoholismo, nagpatulong ni Antônio iti padi ti lugarda. Nupay nagbalin nga aktibo unay ni Antônio iti Iglesia Katolika, adu latta dagiti saludsodna. Kas pagarigan, dina matarusan ti sasao ni Jesus a, “Maammuanyonto ti kinapudno, ket ti kinapudno wayawayaannakayto.” (Juan 8:32) Ania a wayawaya ti inkari ni Jesus? Saan a makapnek dagiti sungbat ti simbaan kadagiti saludsodna. Idi agangay, naiwawa ni Antônio ket sinublianna dagiti dati a bisiona. Kinapudnona, kimmarkaro pay ti pannakaadiktona.

Iti dayta met la a tiempo, rinugian ni Maria nga asawa ni Antônio ti makipagadal iti Biblia kadagiti Saksi ni Jehova. Nupay dina busoren ti pannakipagadal ni baketna, minatmatan ni Antônio dagiti Saksi kas “maysa a relihion dagiti Americano nga agpaay a pagimbagan ti imperialismo ti America.”

Saan a naupay ni Maria. Ibatina iti nadumaduma a paset ti balay dagiti kopia ti magasin a Pagwanawanan ken Agriingkayo! a naglaon kadagiti artikulo nga impagarupna a paginteresan ni Antônio. Tangay pagay-ayat ni Antônio ti agbasa, pasaray a palabsanna dagiti magasin no awan ni baketna. Iti kaunaan a gundaway iti biagna, nasarakanna ti sungbat dagiti saludsodna mainaig iti Biblia. “Nadlawko met ti ayat ken asi nga ipakpakita kaniak ti asawak ken dagiti Saksi,” kunana.

Iti ngalay ti 1992, immannugot metten ni Antônio a makipagadal iti Biblia kadagiti Saksi ni Jehova. Nupay kasta, intuloyna ti agdroga ken agbartek. Maysa a rabii, bayat ti panagawidda iti gayyemna manipud iti maysa a purok, pinasardeng ida dagiti polis. Idi narekisa dagiti polis ti sumagmamano a cocaine ken Antônio, isut’ kinabkabilda. Maysa kadagiti polis ti nangipalladaw kenkuana iti kapitakan sana impaturong ti paltog iti rupa ni Antônio. “Gudasemon!” imbugkaw ti kakaduana a polis.

Bayat nga adda iti kapitakan ni Antônio, nalagipna ti kabibiagna. Ti laeng nasayaat a napanunotna isu ti pamiliana ken ni Jehova. Nagkararag iti ababa, nga indawatna ti tulong ni Jehova. Pinanawan lattan dagiti polis nga awan gapgapuna. Nagawid ket kombinsido a ni Jehova ti nangsaluad kenkuana.

Napabaro ti regta ni Antônio a nagadal iti Biblia. In-inut a nagbalbaliw tapno maay-ayona ni Jehova. (Efeso 4:22-24) Inkagkagumaanna ti agteppel tapno makalapsut iti droga. Ngem masapulna latta ti medikal a tulong. Bayat ti dua a bulan a kaaddana iti rehabilitation clinic, nabasana ti sumagmamano a publikasion a naibatay iti Biblia, agraman ti libro a Pannakaammo a Mangiturong iti Biag nga Agnanayon. Inranud ngarud ni Antônio iti dadduma a pasiente ti naadalna kadagitoy a libro.

Idi nakaruaren ni Antônio iti klinika, intuloyna ti nakipagadal iti Biblia kadagiti Saksi. Agserserbi itan ken Jehova kas maysa a naragsak ken nagkaykaysa a pamilia da Antônio, Maria, ti dua nga annakda a babbai, ken ti ina ni Antônio. Kuna ni Antônio: “Matarusak itan ti pudpudno a kaipapanan ti sasao a ‘ti Dios ket ayat.’”

[Ladawan iti panid 8]

Panangasaba idiay Rio de Janeiro