Dagiti Saludsod Manipud Kadagiti Agbasbasa
Naglaon ti Isaias kapitulo 53 iti nalatak a padto maipapan iti Mesias. Kuna ti Isa 53 bersikulo 10 (NW): “Ni Jehova naragsakan iti panangparigatna kenkuana; isu pinagsakitna.” Ania ti kayat a sawen daytoy?
Nalaka a matarusan no apay a tumaud dayta a saludsod maipapan iti Isaias 53:10. Adayo a panunoten dagiti pudno a Kristiano a ti naasi ken nadungngo a Diostayo ket maragsakan a mangparigat wenno mamagsakit iti asinoman. Ipatalged kadatayo ti Biblia a di maragsakan ti Dios iti pannakaparigat ti awan basolna. (Deuteronomio 32:4; Jeremias 7:30, 31) Iti panaglabas dagiti siglo, adda dagiti gundaway nga impalubos ni Jehova ti panagsagaba gapu kadagiti rason a maitunos iti sirib ken ayatna. Ngem nalawag a saan nga isu ti makin-aramid iti panagsagaba ti dungdungnguenna nga Anak a ni Jesus. No kasta, ania ti kaipapanan ti nadakamat a teksto?
Bueno, makatulong kadatayo a mangtarus iti kaipapananna no usigentayo ti intero a bersikulo, nga imutektekantayo ti dua a nagparangan ti sao a ‘ragsak.’ Kuna ti Isaias 53:10: “Ni Jehova naragsakan iti panangparigatna kenkuana; isu pinagsakitna. Inton aramidem ti kararuana a maysa a daton gapu iti basol, makitananto ti kaputotanna, paatiddogennanto dagiti aldawna, ket iti imana agballiginto ti pakaragsakan ni Jehova.”
Ipakita ti pakabuklan a mensahe ti Biblia a ti “pakaragsakan ni Jehova,” a nadakamat iti ngudo ti bersikulo, ket naipamaysa iti pannakaibanag ti panggepna babaen ti Pagarian. Ti panangaramid ni Jehova iti daytoy ti mangalangonto iti kinasoberanona ken mangikkat manipud kadagiti natulnog a tattao iti natawid a basol—dagiti basoltayo. (1 Cronicas 29:11; Salmo 83:18; Aramid 4:24; Hebreo 2:14, 15; 1 Juan 3:8) Tapno maibanag amin daytoy, masapul nga agbalin a tao ti Anak ti Dios ket ipaayna ti daton a pangsubbot. Kas pagaammotayo, nagsagaba ni Jesus. Kunaen ti Biblia kadatayo a “nasursurona ti panagtulnog manipud kadagiti bambanag a sinagabana.” No kasta, adda nagimbaganna ken Jesus ti kasta a panagsagaba.—Hebreo 5:7-9.
Ammo idin ni Jesus nga aglak-amto iti rigat iti dayta a naindaklan nga aramidenna. Nabatad daytoy iti sasaona a nailanad iti Juan 12:23, 24 a pakabasaantayo: “Ti oras immayen tapno maipadayag ti Anak ti tao. Pudno unay kunak kadakayo, Malaksid no ti maysa a bukel ti trigo agtinnag iti daga ket matay, agtalinaed dayta a maymaysa laeng a bukel; ngem no matay dayta, iti kasta pataudenna ti adu a bunga.” Wen, ammo ni Jesus a masapul a salimetmetanna ti kinatarnawna uray no agsagaba agingga ken patay. Kuna pay ti salaysay: “‘Ita mariribukan ti kararuak, ket anianto ti sawek? Ama, isalakannak manipud iti daytoy nga oras. Nupay kasta, daytoy ti makagapu nga immayak iti daytoy nga oras. Ama, padayagem ta naganmo.’ Gapuna immay ti maysa a timek manipud langit: ‘Agpadpada a pinadayagko dayta ken padayagekto dayta manen.’”—Juan 12:27, 28; Mateo 26:38, 39.
Iti daytoy a konteksto a matarusantayo ti Isaias 53:10. Pagaammo unay ni Jehova nga aglak-am iti rigat ti Anakna. Ngem yantangay sipapanunot ni Jehova iti nadayag ken manayon a pagimbagan nga ibungana, naragsakan ni Jehova iti adda idi a mapasaran ni Jesus. Iti dayta nga anag a ni Jehova “naragsakan iti panangparigatna,” wenno pannakaparigat ti Mesias. Naragsakan met ni Jesus iti kabaelanna nga aramiden ken iti naaramidanna. Pudno unay ‘nga iti imana nagballigi ti pakaragsakan ni Jehova,’ kas kuna ti Isaias 53:10.