Rumbeng Kadi nga Usigenyo Dagiti Sabali a Relihion?

“TIMMABTABUNOAK kadagiti Nakristianuan a gimong iti dandani makatawen, ken naragsakanak a makisarsarita kadagiti dadduma maipanggep iti Pagarian ti Dios,” kuna ni Miguel a maysan kadagiti Saksi ni Jehova idiay South America. “Kalpasanna rinugiak ti agdengngeg kadagiti relihioso a programa iti radio ken agbuya kadagiti relihioso a manangaskasaba iti telebision. Impapanko a matulongandak dagita a programa a mangtarus a naimbag kadagiti saanko a karelihionan. Ammok a di mayannurot iti Biblia ti isursuroda, ngem kayatko la a denggen.”

Iti isu met la a pagilian, sipipinget nga isursuro ni Jorge kadagiti dadduma ti maipapan iti pudno a panagdayaw. Ngem dimteng ti tiempo a rinugianna met ti dumngeg kadagiti relihioso a programa iti radio ken telebision. “Masapul a maammuam ti kapanunotan ti dadduma,” sangkasaona. No masaludsodan maipapan kadagiti posible a pagdaksan ti kasta a panagusioso kadagiti palso a sursuro, kastoy ti sungbatna: “Awan ti makadadael iti pammati ti maysa a makaammo iti kinapudno a linaon ti Biblia.” Gapu kadagitoy a kapadasan, tumaud ti nasken a saludsod, Nasayaat kadi ti dumngeg iti patpatien ti sabsabali?

Panangilasin iti Pudno a Kristianidad

Idi natayen dagiti apostol, natulawan ti pudno a panagdayaw gapu iti in-inut nga itatanor ti nadumaduma a kita ti sinsinan a Kristianidad. Kas panangpasakbay ni Jesus iti daytoy, impanayagna ti maysa a wagas a pakailasinan dagitoy sinsinan a klase ti Kristianidad no idilig iti pudno a Kristianidad. Umuna, imballaagna: “Siputanyo dagiti ulbod a mammadto nga umay kadakayo iti kawes ti karnero, ngem iti uneg loboda a narawet.” Sana innayon: ‘Babaen kadagiti bungada mailasinyonto ida.’ (Mateo 7:15-23) Dagiti pudno a pasurot ni Jesus aramidenda ti insurona, ket nalaka ida a mailasin gapu kadagiti nasayaat nga aramidda. Kas iti inaramid ni Jesus, sarungkaranda dagiti tattao tapno ilawlawagda babaen ti Kasuratan ti maipapan iti Pagarian ti Dios. Tultuladenda ni Jesus kas ulidan, isu a saanda a makiraman iti politika ken panagsusuppiat ti lubong. Patienda a ti Biblia ket Sao ti Dios ken raemenda dayta kas ti kinapudno. Ipakaammoda ti nagan ti Dios. Ken dida makipaset kadagiti gubat gapu ta ikagumaanda nga ipakita ti ayat nga isursuro ti Dios. Tratuenda ketdi ti maysa ken maysa kas kakabsat.​—Lucas 4:43; 10:1-9; Juan 13:34, 35; 17:16, 17, 26.

Sigun iti Kasuratan, mabalin a ‘makita ti pagdumaan daydiay nalinteg ken daydiay nadangkes, daydiay agserserbi iti Dios ken daydiay saan a nagserbi kenkuana.’ (Malakias 3:18, NW) Kas kadagiti Kristiano idi umuna a siglo, agtutunos iti panunot ken aramid dagiti pudno a managdaydayaw iti kaaldawantayo. (Efeso 4:4-6) No nailasinyon dayta a grupo dagiti pudno a Kristiano, rumbeng kadi pay nga agsukimat wenno agusiosokayo iti patpatien ti sabsabali?

Agaluadkayo Kadagiti Saan a Pudno a Mannursuro

Admitiren ti Biblia nga uray naammuanyon ti kinapudno a linaon ti Biblia, adda peggad a matulawannakayo iti naespirituan dagiti saan a pudno a sursuro. Imballaag ni apostol Pablo: “Agaluadkayo: amangan no adda asinoman a mangkayawto kadakayo kas naanupanna babaen iti pilosopia ken awan kapapay-anna a panangallilaw maitunos iti tradision dagiti tattao, maitunos kadagiti pagdamdamuan a bambanag ti lubong ket saan a maitunos ken Kristo.” (Colosas 2:8) Anian a naglawag ti panangiladawan daytoy a teksto! Kas kadagiti animal a nakasagana a mangkemmeg ken mangalun-on kadakayo, talaga a makadangran dagiti saan a pudno a mannursuro.

Pudno, naginteres ni Pablo iti patpatien ti dadduma. Naminsan, inrugina ti nagdiskurso, a kunkunana: “Lallaki a taga Atenas, makitak a kadagiti isuamin a bambanag kasla ad-adda a managbutengkayo kadagiti didiosen ngem dagiti dadduma. Kas pangarigan, bayat ti ilalabasko ken siaannad a panangpalpaliiwko kadagiti bambanag a pagdaydayawanyo nasarakak met ti maysa nga altar a sadiay naikitikit ‘Maipaay iti Dios a Di Am-ammo.’” (Aramid 17:22, 23) Nupay kasta, saan a kanayon nga inadal ni Pablo ti pilosopia dagiti Griego nga orador.

Ti panangammo iti namunganayan ken patpatien dagiti palso a relihion ket naiduma iti panagsursuro kadagita.a Dinutokan ni Jehova “ti matalek ken masirib nga adipen” a mangipaay iti sursuro a naibasar iti Saona. (Mateo 4:4; 24:45) Insurat a mismo ni Pablo: “Dikay mabalin ti makiraman iti ‘lamisaan ni Jehova’ ken iti lamisaan dagiti sairo. Wenno ‘gargarientayo aya nga agimon ni Jehova’?”​—1 Corinto 10:20-22.

Nalabit a dati a pudno a Kristiano ti dadduma nga ulbod a mannursuro, ngem dimteng ti tiempo a pinanawanda ti kinapudno maigapu iti kinaulbod. (Judas 4, 11) Saantay koma a masdaaw iti dayta. Kalpasan a nadakamat ni Jesus ti maipapan iti “matalek ken masirib nga adipen” a mangirepresentar iti grupo dagiti napulotan a Kristiano, dinakamatna ti maipapan iti “dakes nga adipen,” ti klase nga agkunkuna, “ni apok agtaktak,” ket rugianna a kabilen dagiti padana nga adipen. (Mateo 24:48, 49) Masansan nga awan ti nalawag ken kabukbukodan a sursuro dagitoy a tattao ken dagiti pasurotda; panggepda laeng a dadaelen ti pammati ti sabsabali. Nagsurat ni apostol Juan maipapan kadakuada: “No ti asinoman umay kadakayo ket dina iyeg daytoy a sursuro, dikay pulos awaten kadagiti pagtaenganyo wenno sawen ti maysa a kablaaw kenkuana.”​—2 Juan 10; 2 Corinto 11:3, 4, 13-15.

Dagiti napasnek nga agbirbirok iti kinapudno nasayaat no tingitingenda a naimbag ti mangngeganda iti nagduduma a relihion. Inton agangay, bendisionan ti Dios dagiti nasingpet a tattao nga agsapsapul iti kinapudno. Maipapan iti nadiosan a sirib, kuna ti Biblia: “No isu birokem a kas pirak, ken tuntonem a kas nalmeng a gamgameng: iti kasta . . . masarakamto ti pannakaammo iti Dios.” (Proverbio 2:4, 5) Dagiti pudno a Kristiano didan dumdumngeg iti sursuro dagiti palso a relihion, gapu ta nasarakandan ti kasta a pannakaammo iti Dios babaen ti Biblia ken ti kongregasion Kristiano ken napaneknekandan no kasano a bembendisionan ni Jehova dagidiay agpapaidalan iti dayta a pannakaammo.​—2 Timoteo 3:14.

[Footnote]