Adda Masursurotayo iti Umuna a Pagassawaan

TI Dios tiningitingna ti planeta a Daga. Insaganana tapno pagnaedan ti tao. Nakitana a nasayaat amin nga inaramidna. Kinapudnona, idi nairingpas daytoy a trabaho, kinunana a “nasayaat unay” dayta. (Genesis 1:12, 18, 21, 25, 31) Ngem sakbay nga insawang ti Dios dayta a perpekto a konklusion, adda nadakamatna a banag a “saan a nasayaat.” Siempre, awan ti aniaman nga inaramid ti Dios a saan a perpekto. Saan pay la ngamin idi a nalpas ti panamarsuana. “Saan a nasayaat nga agmaymaysa ti tao,” kinuna ni Jehova. “Yaramidakto ti katulonganna a maitutop kenkuana.”​—Genesis 2:18.

Panggep ni Jehova nga agbiag nga agnanayon ti tao a nasalun-at, naragsak, ken aglaplapusanan iti paraiso a daga. Ni Adan ti ama ti intero a sangatauan. Ti asawana, ni Eva, nagbalin nga “ina dagiti isuamin a nabiag.” (Genesis 3:20) Nupay binilion itan dagiti annakda ditoy daga, awan ti tao a perpekto.

Pamiliar ti estoria maipapan kada Adan ken Eva. Ngem ania ti maitulong dayta kadatayo? Ania ti masursurotayo iti panagbiag ti umuna a pagassawaan?

“Pinarsuana Ida a Lalaki ken Babai”

Idi pinanaganan ni Adan dagiti animal, nakitana nga adda assawada malaksid kenkuana. Nagrag-o ngarud idi nakitana ti napintas a parsua a binukel ni Jehova manipud iti paragpagna. Gapu ta ammona a ti babai ket naisalsalumina a paset ti bagina, indir-i ni Adan: “Daytoy ita isu ti tulang dagiti tulangko, ken lasag ti lasagko: isu mapanagananto, Babai, ta iti tao ti nakaalaanna.”​—Genesis 2:18-23.

Kasapulan ti lalaki ti ‘katulongan.’ Ket naaddaan iti maitutop a katulongan. Mayataday unay ni Eva a komplemento ni Adan​—iti panangaywan iti minuyongan a pagtaenganda ken kadagiti animal, panagpaadu iti annak, ken ti nainsiriban a panangparegta ken panangbayabay ti matalek a katakunaynay.​—Genesis 1:26-30.

Impaay ni Jehova iti agassawa ti amin a nainkalintegan a kasapulanda. Idi inyeg ti Dios ni Eva iti asawana kas pananganamong iti panagtiponda, impasdekna ti urnos a panagasawa ken pamilia a pakaorganisaran ti kagimongan. Kastoy ti kuna ti salaysay ti Genesis: “Ti lalaki panawannanto ti amana ken ti inana, ket tumiponto iti asawana, ket agbalindanto a maymaysa a lasag.” Idi binendisionan ni Jehova ti umuna a pagassawaan ken binilinna ida nga agpaadu, nalawag a pinanggepna a maipasngay koma ti tunggal ubing iti sidong ti naayat a pamilia, nga addaan ama ken ina a mangtaripato.​—Genesis 1:28; 2:24.

“Iti Ladawan ti Dios”

Perpekto nga anak ti Dios ni Adan, a naaramid iti ‘ladawan ken kaasping’ ti Dios. Ngem gapu ta “ti Dios maysa nga Espiritu,” saan a pisikal a langa ti nagpadaanda. (Genesis 1:26; Juan 4:24) Agkaaspingda kadagiti galad a namagbalin iti tao a natantan-ok nga adayo ngem kadagiti animal. Wen, naisigud iti tao dagiti galad nga ayat, kinasirib, pannakabalin, ken kinahustisia. Naikkan iti wayawaya nga agdesision ken iti espiritualidad. Adda kenkuana ti makin-uneg a moral a karirikna, wenno konsiensia, tapno mailasinna ti naimbag ken dakes. Addaan ti tao iti abilidad nga agsursuro, tapno mautobna ti panggep ti kaadda dagiti tattao, maadalna ti maipapan iti Namarsua, ken suminged Kenkuana. Naited ngarud ken Adan ti amin a kasapulan a mangitungpal iti annongenna kas administrador dagiti pinarsua ti Dios ditoy daga.

Nagbasol ni Eva

Awan duadua, impakaammo a dagus ni Adan ken Eva ti maysa nga imparit ni Jehova: Mabalinda a mangan iti bunga ti amin a kayo iti minuyongan a pagtaenganda malaksid iti maysa​—ti kayo ti pannakaammo iti naimbag ken dakes. Masapul a saanda a mangan iti dayta. No labsingenda dayta a bilin, matayda iti aldaw a pannanganda.​—Genesis 2:16, 17.

Di nagbayag, adda isyu a timmaud mainaig iti naiparit a bunga. Maysa nga uleg, nga inusar ti maysa a di makita nga espiritu kas pannakangiwatna, ti nakipatang ken Eva. Nagpammarang nga awan ammona, inyimtuod ti uleg: “Pudno aya a kinuna ti Dios, Saankay a mangan iti amin a kayo iti minuyongan?” Kinuna ni Eva a napalubosanda a mangan iti bunga ti amin a kayo malaksid ti maysa. Ngem ti uleg sinupiatna ti Dios, a kinunana iti babai: “Saan a pudno a mataykayonto. Ta ti Dios ammona nga iti aldaw a pannanganyo iti dayta, dagiti matayo maluktandanto, ket kaslakayton iti Dios a makaammo ti naimbag ken ti dakes.” Nagbaliw ti panangmatmat ti babai iti maiparit a kayo. “Ti kayo nasayaat a kanen, ken makaay-ayo a buyaen.” Linabsing ni Eva ti linteg ti Dios gapu ta naan-anay a naallilaw.​—Genesis 3:1-6; 1 Timoteo 2:14.

Di aya maliklikan ni Eva ti agbasol? Nikaanoman! Agsaadka iti lugarna. Naan-anay a binallikug ti uleg ti kinuna ti Dios ken ni Adan. Ania ti mariknam no ti maysa nga ay-ayatem ken pagtaltalkam ket akusaren ti maysa a ganggannaet iti panagkusit? Saan koma a kasdiay ti inaramid ni Eva, nakaunget ken nakapungtot koma, a dina pulos inkaskaso. Total, siasino koma ngay daydiay a serpiente tapno babalawenna ti kinalinteg ti Dios ken ti sao ni lakayna? Maigapu iti panagraem iti prinsipio ti kinaulo, nagpabalakad pay koma ni Eva sakbay a nagaramid iti aniaman a desision. Kasta koma met ti aramidentayo no pasanguandatayo iti impormasion a maikaniwas iti sursuro ti Dios. Ngem namati ni Eva iti kuna ti Mannulisog, ket pinilina nga ikeddeng a bukod no ania ti naimbag ken dakes. Lalo a naallukoy idi pinampanunotna dayta nga ideya. Anian a dakkel a biddut ti panangpalugodna iti dakes a tarigagay, imbes nga iwaksina dayta iti panunotna wenno iyuman iti ulo ti pamiliana!​—1 Corinto 11:3; Santiago 1:14, 15.

Impangag ni Adan ti Panangsulbog ti Asawana

Di nagbayag, nagargari ni Eva ni Adan nga agbasol. Ania ti maawatantayo iti nalaka nga iyaannugot ni Adan? (Genesis 3:6, 17) Nasuot ti kinasungdo ni Adan. Agtulnog ngata iti Namarsua, a nangted iti amin nga adda kenkuana, agraman ti ay-ayatenna nga asawa, ni Eva? Agpaidalan ngata ni Adan iti Dios no ania ti aramidenna? Wenno kumanunong ti lalaki iti asawana? Pagaammo unay ni Adan a naallilaw ni Eva a namati a makagunggona ti pannangan iti maiparit a bunga. Napaltiingan ni apostol Pablo a nangisurat: “Ni Adan saan a naallilaw, no di ket ti babai ti naan-anay a naallilaw ket nagsalungasing.” (1 Timoteo 2:14) Gapuna, sipapakinakem ni Adan a nagsukir ken Jehova. Nalawag a naturturay ti panagamakna iti panagsinada nga agassawa ngem ti panagtalekna iti pannakabalin ti Dios a mangrisut iti parikut.

Panagpakamatay ti inaramid ni Adan. Kaipapanan met dayta ti panangpapatay iti amin a naputotna gapu iti naasi a pammalubos ni Jehova, yantangay nayanakda amin iti sidong ti panangilunod ti basol nga agtungpal ken patay. (Roma 5:12) Anian a nagkaro ti supapak ti agimbubukodan a panagsukir!

Dagiti Supapak ti Basol

Nagbanag nga insigida ti panagbasol iti pannakaibabain. Naglemmeng dagiti agassawa, imbes a naragsakda koma nga umadani a makisarita ken Jehova. (Genesis 3:8) Saandan a gayyem ti Dios. Idi napalutpot ti inaramidda, awan panagbabawida, nupay ammoda a linabsingda ti linteg ti Dios. Linaksidda ti kinaimbag ti Dios idi nanganda iti maiparit a bunga.

Kas bungana, impakauna ti Dios nga umadunto ti rigat iti panagpasngay. Gartemanto ni Eva ni lakayna, ket dominaranto ni Adan. Nagresulta ngarud ti gandat ni Eva iti eksakto a kasungani ti wayawaya a tinarigagayanna. Manganen ni Adan kadagiti mula nga agtubo iti daga a pagrigatanna. Imbes a mabsog a di agrigat idiay Eden, masapul idin nga agbannog tapno mapaaddana dagiti kasapulan iti biag agingga a nagsubli iti tapok a nakabuklanna.​—Genesis 3:16-19.

Kamaudiananna, napagtalaw da Adan ken Eva idiay minuyongan ti Eden. Kinuna ni Jehova: “Adtoy, ti lalaki nagbalin a kas maysa kadatayo, nga ammona ti naimbag ken ti dakes; ket ita, di la ket ta igaw-atna ti imana, ken mangala iti kayo ti biag, ken mangan, ken agbiag a kankanayon . . .” “Saan a kompleto ti sentensia,” kuna ti eskolar a ni Gordon Wenham, ket makaammotayon a mangnayon iti kayat a sawen ti Dios​—a nalabit kinunana, “pagtalawek iti minuyongan.” Kaaduanna, ilanad ti mannurat iti Biblia ti kompleto a kapanunotan ti Dios. Ngem ditoy, kuna pay ni Wenham, “ti pannakalibtaw iti konklusion ipasimudaagna ti napartak a panagtignay ti Dios. Saan pay a nalpas a nagsao ket napapanawdan iti minuyongan.” (Genesis 3:22, 23) Nalawag a nagpatingga ditan ti pannakikomunikar ni Jehova iti umuna a pagassawaan.

Saan a natay iti pisikal da Adan ken Eva iti daydi 24-oras nga aldaw. Ngem natayda iti naespirituan. Gapu ta awanen remedio ti pannakaisinada iti Ubbog ti biag, nagtungpalda ken patay. Iladawanyo ti ladingitda a nakaimatang iti kaunaan nga ipapatay idi pinapatay ti inauna nga anakda a ni Cain ti adienna a ni Abel!​—Genesis 4:1-16.

Kalpasanna, awan unayen ti nadakamat maipapan iti umuna a pagassawaan. Naipasngay ni Set, ti maikatlo nga anakda, idi 130 ti tawen ni Adan. Natay ni Adan 800 a tawen kamaudiananna, idi agtawen iti 930, kalpasan a naaddaan ‘kadagiti annak a lallaki ken babbai.’​—Genesis 4:25; 5:3-5.

Ti Masursurotayo

Malaksid iti panangipalgakna iti gapu ti dakes a kasasaad ti sangatauan iti kaaldawantayo, adda napateg a leksion a masursurotayo iti pakasaritaan ti umuna nga agassawa. Agdadata a minamaag ti sikukuspag nga isisina ken Jehova a Dios. Dagiti pudno a masirib agtalekda ken ni Jehova ken iti Saona, saan nga iti kapkapnekanda a pannakaammo. Ni Jehova ti mangikeddeng no ania ti naimbag ken dakes, ket panagtulnog kenkuana ti pudpudno a kaipapanan ti panagaramid iti naimbag. Ti panagbasol kaipapananna ti panaglabsing kadagiti lintegna ken di panangikankano iti prinsipiona.

Ituktukon pay la ti Dios ti amin a mabalin a tarigagayan ti sangatauan​—agnanayon a biag, wayawaya, pannakapnek, ragsak, salun-at, talna, nam-ay, ken panangtakuat kadagiti di pay naammuan a bambanag. Ngem tapno matagiragsaktayo amin dagitoy, masapul a bigbigen ti naan-anay a panagpannuraytayo iti nailangitan nga Amatayo, ni Jehova.​—Eclesiastes 3:10-13; Isaias 55:6-13.

[Kahon/Ladawan iti panid 26]

Adan ken Eva​—Mitolohia Laeng?

Ti panamati nga adda nagkauna a paraiso a napukaw gapu iti basol ket nagsaknap kadagiti umili ti kadaanan a Babilonia, Asiria, Egipto, ken dadduma pay. Agpapada ti adu nga estoria maipapan iti kayo ti biag a ti bungana makaipaay iti agnanayon a biag kadagidiay mangan iti dayta. Ammo ngarud ti sangatauan ti nakalkaldaang a pasamak idiay Eden.

Adu ita ti mangibilang a mitolohia laeng ti estoria iti Biblia maipapan kada Adan ken Eva. Nupay kasta, bigbigen ti kaaduan a sientista a maymaysa ti pamilia ken nagtaudan ti puli ti tao. Saan a mailibak ti adu a teologo a nayallatiw iti sangatauan dagiti epekto ti damo a basol ti maysa nga inapo. Ti panamati a saan la a maymaysa ti nagtaudan ti tao pilitenna ida a mangisuro nga adu nga amma ti damo a nagbasol. Iti kasta, mapilitanda a mangilibak a ni Kristo, “ti maudi nga Adan,” sinubbotna ti sangatauan. Ngem saan a napasaran ni Jesus ken dagiti adalanna ti kasta a pannakariro. Ammoda a pudno ti salaysay ti Genesis.​—1 Corinto 15:22, 45; Genesis 1:27; 2:24; Mateo 19:4, 5; Roma 5:12-19.