Report Dagiti Manangiwaragawag iti Pagarian

Ipaayan ni Jehova ti Ilina iti Paginanaan

MAKAPABANG-AR unay iti napaksuyan nga agdaldaliasat no makakita iti nalinong a paginanaan iti desdes ti bantay. Idiay Nepal, maawagan iti chautara dagiti kasta a paginanaan. Gagangay a masarakan ti chautara iti abay ti narukbos a kayo ti baliti, a maysa a nalinong a lugar a pagtugawan ken paginanaan. Naimbag nga aramid ti mangbangon iti chautara, ket saan nga agpabigbig ti kaaduan kadagiti mangibangbangon.

Ipakita dagiti kapadasan idiay Nepal no kasano a ni Jehova a Dios ti Gubuayan ti rag-o ken naespirituan a pannakabang-ar ti adu a napaksuyan nga “agdaldaliasat” iti daytoy a sistema dagiti bambanag.​—Salmo 23:2.

• Agnanaed ni Lil Kumari iti napintas a siudad ti Pokhara, a pakakitaan iti namarangmang a buya ti naabbungotan iti niebe a Kabambantayan ti Himalaya. Ngem desperado ni Lil Kumari gapu iti pinansial a parikut ti pamiliana. Idi sinarungkaran ti maysa kadagiti Saksi ni Jehova, naallukoy iti naraniag a namnama a linaon ti Biblia ket insigida a kiniddawna a mayadalan iti Biblia.

Nupay maay-ayatan ni Lil Kumari iti pannakipagadalna, saan a nalaka ti panagtultuloyna gapu iti nakaro nga ibubusor ti pamiliana. Ngem saan a simmuko. Kanayon a timmabuno kadagiti Nakristianuan a gimong ken inyaplikarna ti maad-adalna, nangnangruna ti maipapan iti panagpasakup ti asawa a babai. Kas resultana, naamiris ni lakayna ken ni nanangna a pagimbagan ti intero a pamilia ti panagadal ni Lil Kumari iti Biblia.

Agad-adal itan iti Sao ti Dios ni lakayna ken adu a kakabagianna. Kadua ni Lil Kumari ti 15 a kakabagianna a nangtagiragsak iti programa ti nabiit pay nga asamblea idiay Pokhara. Kunana: “Natalinaay a lugar itan ti pagtaenganmi gapu ta nagkaykaysa ti pamiliami iti pudno a panagdayaw, ket pudno a natalnan ti panunotko.”

• Maiparit idiay Nepal ti panangidumduma maibatay iti kasasaad iti kagimongan, ngem napigsa latta ti impluensia dayta iti panagbiag dagiti tattao. Gapuna, adu ti interesado iti ibaga ti Biblia maipapan iti panagpapada ken di panangidumduma. Dakkel ti nagbalbaliwan ti biag ni Surya Maya ken ti pamiliana idi naadalda a “ti Dios saan a mangidumduma.”​—Aramid 10:34.

Nariribukan ni Surya Maya iti kinaawan hustisia nga itden ti panangidumduma a naibatay iti kasasaad iti kagimongan ken ti panangparigat dagiti naipasdek a tradision ken kaugalian. Gapu ta debosionada, adu a tawen nga immararaw ni Surya Maya kadagiti didiosenna. Ngem saan a napatgan dagiti kararagna. Idi naminsan nga agkarkararag iti napigsa, immasideg ti innem-tawenna nga apokona a ni Babita sa nagsaludsod: “Apay nga agkarkararagkayo kadagiti di makatulong a didiosen?”

Iyad-adalan gayam ti maysa kadagiti Saksi ni Jehova iti Biblia ti nanang ni Babita. Sireregta nga inawis ni Babita ni apongna a tumabuno iti Nakristianuan a gimong. Nasdaaw ni Surya Maya idi timmabuno ket nakitana a naragsak ken awan panangidumduma nga aglalangen dagiti tattao nga addaan iti sabasabali a kasasaad iti kagimongan. Dagus a kiniddawna a mayadalan iti Biblia. Nupay inlaksid dagiti kaarrubana gapu iti pannakiadalna, saan a naupay; saan met a nakalapped iti naespirituan nga irarang-ayna ti kinakapuyna nga agbasa ken agsurat.

Iti las-ud ti walo a tawen, nagbalin a Saksi ni Jehova ti innem a miembro ti pamiliana, agraman ni lakayna ken ti tallo nga annakda. Maysa itan ni Surya Maya nga amin-tiempo a ministro wenno regular pioneer, a naragsak a tumultulong kadagiti sabsabali tapno mapalag-ananda kadagiti nadagsen nga awitda iti pudpudno a paginanaan a ni Jehova laeng ti makaipaay.