Saankami a Nabaybay-an Idi Nasubok ti Pammatimi

Maysa idi a nalibnos a maladaga ni Vicky​—nasalun-at, napintas, ken nasaranta. Wen, napalalo ti ragsakmi idi naipasngay idi primavera ti 1993. Agnanaedkami iti maysa a bassit nga ili iti abagatan ti Sweden, ket nagsayaat ketdin ti biag.

NUPAY kasta, idi maysa ket kagudua ti tawen ni Vicky, kasla marakrak ti nasayaat a biagmi. Nabayag bassit a madi ti salun-atna, isu nga impanmi iti ospital. Diminto pulos malipatan daydi kanito a panangibaga ti doktor a ti balasangmi ket addaan iti acute lymphoblastic leukemia, maysa a kita ti kanser iti ubbing a mangapektar kadagiti white blood cell.

Nagrigat a tarusan a ti bassit nga anakmi ket nakaptan iti kastoy a nakaam-amak a sakit. Karugrugina pay laeng a maaddaan puot iti aglawlawna, ket ita mabalin a matay. Kinuna ti doktor, iti panangpadpadasna a mangliwliwa kadakami, a mabalin a maipakat kenkuana ti nalabit naballigi a panangagas, a pakairamanan ti chemotheraphy ken adu a pannakayalison ti dara. Daytoy ti simmaganad a nakaburiboranmi.

Nasubok ti Pammatimi

Talaga nga ay-ayatenmi ti balasitangmi, ket kayatmi a maipaay kenkuana ti kasayaatan a panangagas. Ngem naan-anay a dimi maawat ti pannakayalison ti dara. Natibker ti panamatimi iti Sao ti Dios, ti Biblia, a silalawag a kunaenna a dagiti Kristiano masapul nga ‘umadayoda iti dara.’ (Aramid 15:28, 29) Pagaammomi met a napeggad dagiti panangyalison iti dara. Rinibu ti nakaala iti saksakit ken natay gapu iti panagpayalison. Ti kakaisuna a remedio isu ti nasayaat ti kalidadna a panangagas nga awan panangyalison iti dara. Maigapu iti daytoy, mangrugin ti pannakidangadangmi a maipaay iti pammati.

Ania itan ti aramidenmi? Immawagkami iti Hospital Information Services iti sanga nga opisina dagiti Saksi ni Jehova idiay Sweden tapno agpatulongkami.a Madagdagus a nagipatulodda kadagiti fax iti nadumaduma nga ospital iti intero a Europa gapu iti panagsapulmi iti ospital ken doktor a situtulok a mangaramid iti chemotheraphy nga awan iti panangyalison iti dara. Ti anep ken ayat nga impakita dagiti Kristiano a kakabsatmi iti panagreggetda a tumulong kadakami ket pudno a makapabileg unay. Saankami a nabaybay-an iti pannakidangadangmi a maipaay iti pammati.

Iti sumagmamano laeng nga oras, addan nasarakan nga ospital ken doktor idiay Homburg/Saar, Germany. Nayurnos ti panageroplanomi a mapan sadiay iti sumaganad nga aldaw tapno maeksamen ni Vicky. Idi nakasangpetkami, addan sadiay a mangpasangbay kadakami dagiti Kristiano a kakabsat a naggapu iti lokal a kongregasion dagiti Saksi ni Jehova idiay Homburg, agraman sumagmamano a kakabagianmi. Ket maysa a pannakabagi ti lokal a Hospital Liaison Committee ti sibabara a nangabrasa kadakami. Kinuyognakami iti ospital ket impaayna ti amin a mabalinna a maitulong. Naliwliwakami a makakita ta uray iti ganggannaet a pagilian, addaankami kadagiti naespirituan a kakabsat a mangan-andingay kadakami.

Idi naam-ammomi ni Dr. Graf iti dayta nga ospital, naliwliwakami manen. Mannakaawat unay ket impasiguradona kadakami nga aramidenna ti amin a kabaelanna a mangagas ken Vicky a di mayalisonan iti dara. Uray no bumaba ti hemoglobin-na agingga iti 5 g/dl, situtulokto latta a mangitultuloy iti panangagas nga awan panangyalison iti dara. Kinunana pay a ti nasapa a diagnosis iti sakitna ken ti dagus a pannakaipan ni Vicky sadiay ti nangted kenkuana iti nasayaat a tsansa nga agballigi ti panangagas. Inadmitirna a daytoy ti damo a panangaramidna iti chemotheraphy nga awan panangyalison iti dara a kas iti kaso ni Vicky. Kasta unay ti panagyaman ken panangraemmi iti tured ken determinasion ni Dr. Graf a tumulong.

Parikut iti Kuarta

Ti parikut ita ket, Kasanomi a mabayadan ti pannakaagas ni Vicky? Nakigtotkami idi naibaga kadakami a ti dua a tawen a panangagas ket aggatad iti agarup 150,000 deutsche mark. Awanankami ti uray la koma sangkabassit a paset dayta a kuarta, ngem masapul a mairugin a dagus ti panangagas ken ni Vicky. Yantangay pimmanawkami idiay Sweden tapno agpaagaskami idiay Germany, saankami a maikari iti aniaman a publiko a seguro iti salun-at. Isu nga addakamin sadiay agraman ti masaksakit unay nga anakmi ken addan nalaing a doktor a madadaan a mangagas, ngem awan met umdas a kuartami.

Ti ospital ti immarayat kadakami ket imbagada a mairugin a dagus ti panangagas no makaipaunakami iti 20,000 mark ken agpirma iti kasuratan a bayadanminto ti dadduma kalpasanna. Adda bassit nga urnongmi, ken babaen iti naayat a tulong dagiti gagayyem ken kakabagian, nabayadanmi ti 20,000 mark. Ngem ti ngay dadduma?

Naminsan manen a naipalagip kadakami a saankami a nabaybay-an iti pannakidangadangmi a maipaay iti pammati. Maysa a kabsat a saanmi nga am-ammo idi ti mayat a mangibaklay iti udimi. Nupay kasta, saanmi a nausar ti naparabur a tulongna ta nakairemedioakami met laeng.

Panagtignay ti Nalaing a Doktor

Nairugi ti chemotheraphy. Naglabas dagiti aldaw ken lawas. No dadduma, nakarigrigat ken makapaupay kadakami ken iti balasitangmi. Iti sabali a bangir, napalalo ti ragsak ken panagyamanmi tunggal adda makitami a pagsaysayaatanna. Nagpaut iti walo a bulan ti chemotheraphy. Ti kababaan a hemoglobin ni Vicky ket 6 g/dl, ngem tinungpal ni Dr. Graf ti karina.

Naglabas ti nasurok nga innem a tawen, ket iti maudi a pannakaeksamen ti pluido ti durina, awanen ti makita a pagilasinan iti leukemia. Nakaragragsak itan nga ubing nga awanen ti aniaman a pakakitaan a naaddaan iti sakit. Wen, kasla milagro ta naan-anayen nga immimbag ni Vicky. Pagaammomi nga adu nga ubbing ti matmatay iti daytoy a sakit uray no ma-chemotheraphy-da ken mayalisonan iti dara.

Nagballigi ti pannakidangadangmi a maipaay iti pammati, ngem dakkel ti naitulong dagiti kakabagian, Kristiano a kakabsat, ken nalalaing a doktor. Beinte kuatro nga oras kada aldaw a sinaranaydakami ti Hospital Information Services. Impakat ni Dr Graf agraman kakaduana ti laingda tapno makaungar ni Vicky. Napalalo ti panagyamanmi gapu amin kadagitoy.

Napabileg ti Pammatimi

Ngem ti kangrunaan a pagyamananmi ket ti Diostayo a ni Jehova, gapu iti naayat a pannarabayna ken ti pammabileg a nagun-odanmi babaen iti Saona, ti Biblia. No taliawenmi ti nalikudan, mabigbigmi nga adu ti nasursuromi ken anian a pannakapabileg ti pammatimi bayat a linasatmi daytoy nakarikrikut a kapadasan iti biag.

Ti naimpusuan a tarigagaymi ita ket panangtaginayon iti nasinged a relasion ken Jehova a Dios ken panangisuro iti balasitangmi ti kinapateg ti panagbiag a maitunos kadagiti alagadenna. Wen, kayatmi nga ipaay kenkuana ti nasayaat a naespirituan a tawid a biag nga agnanayon iti um-umayen a Paraiso ditoy daga.​—Naipatulod.

[Footnote]