Report Dagiti Manangiwaragawag Iti Pagarian

Naalangon ti Nagan ti Dios

TI Biblia a Sao ti Dios kunana: “Taginayonenyo a nasayaat ti kababalinyo iti tengnga dagiti nasion, tapno, iti banag a pangsasawanda iti maibusor kadakayo a kasla managaramid iti dakes, dayawenda koma ti Dios iti aldaw a panangsukimatna kas bunga ti nasayaat nga ar-aramidyo nga isuda ti saksi kadagita.” (1 Pedro 2:12) Gapuna, ikagumaan dagiti pudno a Kristiano a taginayonen a nasayaat ti kababalinda tapno di maibabain ti nagan ni Jehova.

Idiay Senanga, maysa a nasulinek a lugar iti Zambia, natakaw ti radio ti maysa a maestro manipud balayna. Yantangay mangaskasaba idi iti dayta a lugar dagiti Saksi ni Jehova, pinabasol ida ti maestro nga isuda ti nagtakaw. Impulongna dayta iti polisia, a kunkunana a dagiti Saksi ti nangtakaw iti radiona. Kas pammaneknek a nakapan dagiti Saksi iti balayna, imparangna ti maysa a tract a nasarakanna iti suelo. Nupay kasta, di mamati kenkuana dagiti polis. Imbalakadda nga agawid ket agimbestigar pay.

Dagiti Saksi a nangasaba iti mismo a lugar ti maestro iti dayta nga aldaw ket pinaregta ti bagi dagiti panglakayen a mapanda kasarita ti maestro maipapan iti pammabasolna. Napan nakisarita kenkuana ti sumagmamano a kakabsat, nga inlawlawagda a kayatda nga alangonen ti nagan ni Jehova. Bayat ti panagsasaritada, imbagada kenkuana nga adda nadanonanda a barito idiay balayna ket isu ti inikkanda iti tract. Maibatay iti panangdeskribirda, ti maestro nabigbigna ti lalaki. Kinapudnona, agkarelihionanda. Nakisao ti maestro iti agtutubo a lalaki, ngem dina inamin ti basolna. Kinasarita ngarud ti maestro ti nagannak ti barito sa nagawid. Iti uneg ti maysa nga oras, ti nanang ti barito insublina ti natakaw a radio.

Iti napalalo a bainna, napan ti maestro kadagiti panglakayen tapno dumawat iti pammakawan gapu iti pammabasolna. Inawat dagiti panglakayen ti panagpadispensarna ngem kiniddawda nga ibutaktakna dagiti natakuatanna tapno maammuan ti amin nga awan basol dagiti Saksi. Nayanunsio dayta idiay eskuelaan, ket ngarud naalangon ti nagan ni Jehova. Agtultuloy a nawaya dagiti Saksi ni Jehova a mangasaba iti dayta a lugar.

[Mapa/Ladawan iti panid 19]

(Para iti aktual a pannakaurnosna, kitaem ti publikasion)

AFRICA

Zambia

[Credit Line]

Mountain High Maps® Copyright © 1997 Digital Wisdom, Inc.