Balligi iti Federal Constitutional Court
NAGUN-OD dagiti Saksi ni Jehova idiay Alemania ti naisangsangayan a balligi iti Federal Constitutional Court idiay Karlsruhe. Iti kasta, nakaibanagda iti maysa a napateg nga addang maipaay iti legal a pannakabigbigda.
Nasuroken a 100 a tawen nga aktibo dagiti Saksi ni Jehova idiay Alemania. Nalasatanda ti nakaro a pannakaidadanes kadagiti ima dagiti dua a diktador a turay iti maika-20 a siglo—dagiti National Socialist ken dagiti Komunista. Sipud pay 1990, inkagumaanen dagiti Saksi a gun-oden ti legal a pannakabigbig kas maysa a korporasion ti linteg publiko. Kalpasan ti dua a pangngeddeng ti korte a pabor kadagiti Saksi ken maysa a pannakabaliw ti desision, nagapelar dagiti Saksi iti Federal Constitutional Court, a nangyanunsio iti desisionna idi Disiembre 19, 2000.
Nagkaykaysa a Pangngeddeng Para Kadagiti Saksi ni Jehova
Pabor kadagiti Saksi ti desision dagiti amin a pito a hues ti korte. Binaliktad dagiti hues ti desision ti Federal Administrative Court idi 1997 ket imbilinda nga usigen manen ti korte ti aplikasion dagiti Saksi.
Inusar ti Federal Constitutional Court dayta nga okasion tapno komentuanna ti pundamental a relasion iti nagbaetan ti Estado ken dagiti relihioso a grupo. Kadawyanna a ti kasasaad ti relihion “ket maikeddeng, saan a babaen kadagiti patpatienna, no di ket babaen iti tigtignayna.”
Napaliiw met ti korte a no alagaden dagiti Saksi ti “Nakristianuan a neutralidad, saanda nga atakaren ti prinsipio ti demokrasia” ken “saanda a tarigagayan a suktan ti demokrasia iti sabali a porma ti gobierno.” Gapuna, ti di pannakipaset kadagiti napolitikaan nga eleksion ket saan a maawat a pagbatayan kontra kadagiti Saksi no dawatenda ti legal a pannakabigbigda.—Juan 18:36; Roma 13:1.
Napaliiw pay ti korte a ti maysa a manamati—Saksi man wenno sabali ti relihionna—maipasango no dadduma iti situasion a dagiti kalikaguman ti Estado ket maikontra kadagiti kalikaguman ti relihionna. No suroten ti indibidual ti konsiensiana babaen ti “panagtulnog kadagiti pagalagadan ti pammati nga ad-adda ngem iti linteg,” mabalin a matmatan daytoy ti Estado kas maiparbeng ken saklawen ti narelihiosuan a wayawaya.—Aramid 5:29.
Nagdinamag dayta a desision ti korte. Dayta a kaso ti impadamag ti nganngani amin a pagiwarnak idiay Alemania. Nagipadamag ken naginterbiu dagiti amin a kangrunaan nga istasion ti telebision ken radio maipapan iti dayta. Pulos nga awan idi ti kasta a nasaknap a publisidad a naipaay iti nagan ni Jehova idiay Alemania.
[Picture Credit Line iti panid 8]
AP Photo/Daniel Maurer