“Ania ti Mapaspasamak Idiay Francia?”

“Wayawaya, maipatpateg a wayawaya.” Naadaw dagita a sasao iti “La Marseillaise,” ti nailian a kanta ti Francia. Di pagduaduaan a maipatpateg ti wayawaya. Ngem dagiti kallabes a pasamak idiay Francia pagpeligruenda dagiti napateg a kalintegan. Dayta ti gapuna nga idi Biernes, Nobiembre 3, 2000, pinullo ribu a Saksi ni Jehova ti nagiwaras iti agdagup a 12 milion a kopia ti naisangsangayan a polieto a napauluan “Ania ti Mapaspasamak Idiay Francia? Maisanud Aya ti Wayawaya?”

SUMAGMAMANO a tawen itan a dagiti Saksi ni Jehova ket at-atakaren dagiti nadumaduma a politiko ken grupo a bumusbusor kadagiti sekta. Nangyeg daytoy kadagiti parikut kadagiti Saksi kas indibidual, kongregasion, ken iti sangapagilian. Nupay kasta, idi Hunio 23, 2000, ti Conseil d’État, ti kangatuan nga administratibo a korte ti Francia, ket nangipaulog iti nagpateg a desision a nangpatalged iti opinion ti 31 a nababbaba a korte iti nasurok a 1,100 a kaso. Pinatalgedan ti nangato a korte a ti panagdayaw dagiti Saksi ni Jehova ket naan-anay a maitunos iti linteg ti Francia ken nainkalintegan a di mabuisan dagiti Kingdom Hall-da a kas kadagiti sabali a relihion.

Nupay kasta, namimpinsan a di inkabilangan ti Ministry of Finance ti Francia daytoy a desision gapu ta agtultuloy latta ti panangipatawna iti buis kadagiti Saksi ni Jehova idinto ta saan a mabuisan dagiti relihioso nga organisasion a kas sagudayen ti linteg. Nangipataw ti Ministry of Finance iti 60-porsiento a buis kadagiti kontribusion nga ipapaay dagiti Saksi ken dagiti gagayyemda a naitimpuyog iti 1,500 a lokal a kongregasion idiay Francia. Madama a maus-usig daytoy a panaglabsing.

Panggep ti nadakamat a kampania nga ibutaktak daytoy a panaglabsing ken ipanayag dagiti risgo nga ipasimudaag ti kasta nga inkapilitan a panagbuis ken dagiti naigakat a linteg a manglapped iti narelihiosuan a wayawaya ti amin.a

Napaut nga Aldaw

Iti alas dos ti parbangon, rinugianen dagiti Saksi iti dadduma a kongregasion ti nagiwaras iti ruar dagiti estasion ti tren ken paktoria sa kadagiti eropuerto. Iti alas sais, okupadon ti Paris. Nagpuesto ti agarup 6,000 a boluntario kadagiti nasayaat a lugar a pangsabatanda kadagiti agturong iti trabaho. Kinuna ti maysa nga agkabannuag a babai: “Nasayaat ti ar-aramidenyo maipaay iti narelihiosuan a wayawaya. Saan laeng a dagiti Saksi ni Jehova ti nairaman.” Idiay Marseilles, nasurok a 350 a Saksi ti nangibunong iti polieto kadagiti estasion iti subway ken iti lansangan. Kalpasan ti maysa nga oras, impakaammo ti radio ti pagilian ti maipapan iti kampania, nga imbagana kadagiti agdengdengngeg a saanda a masdaaw no asitgan ida dagiti Saksi ni Jehova. Idiay Strasbourg, a yan ti European Court of Human Rights, dagiti biahero iti dakkel nga estasion siaanus a nagliliniada a nangala iti kopiada. Kinuna ti maysa nga abogado a nupay dina anamongan dagiti patpatientayo, interesado a mangpadpadaan iti pagbanagan ti kasotayo, yantangay napateg ken nainkalintegan ti ilablabantayo.

Iti alas otso, nupay nagtudo iti napigsa, 507 a Saksi idiay Grenoble a siudad ti Alpino ti nangwanas kadagiti lansangan tapno agipaima iti polieto wenno saan, nangipisok iti polieto kadagiti pagikabilan iti surat. Idi makita dagiti drayber ti kotse ken tram ti mapaspasamak, insardengda dagiti luganda tapno dumawatda iti polieto. Iti makinlaud a siudad ti Poitiers, dagiti biahero a simmangpet babaen ti tren iti alas nuebe ket naikkanen iti polieto idi addada pay laeng iti naggapuanda. Idiay Mulhouse, iti asideg ti beddeng ti Alemania, 40,000 a kopia ti naiwarasen.

Iti alas dies, adu dagiti kongregasion a kagudua kadagiti polietoda ti naiwarasen. Bayat nga umal-aldaw, manmano dagiti nagkedked a mangala iti polieto, ken adu dagiti interesado a makisarita. Idiay Besançon, a nasurok a 80 kilometro laeng manipud iti beddeng ti Switzerland, maysa nga agkabannuag a lalaki ti naginteres iti Biblia ket insaludsodna no apay nga ipalpalubos ti Dios ti panagsagaba. Inawis ti maysa a Saksi a mapanda iti asideg a Kingdom Hall tapno ituloyda ti agsarita. Nairugi a dagus ti panagadal iti Biblia babaen ti broshur nga Ania ti Kalikaguman ti Dios Kadatayo?

Iti agmatuon, adu a Saksi ti nangasaba iti maysa wenno dua nga oras kabayatan ti panangaldawda. Iti malem, intuloyda ti nagiwaras, ket adu a kongregasion ti nalpas iti alas tres wenno alas kuatro. Iti siudad ti Reims, imbaga dagiti dadduma a nakipagadal wenno nakipulpulapol idi kadagiti Saksi ni Jehova a kayatda ti makitimpuyog manen iti kongregasion. Idiay Bordeaux, tallo a panagadal iti Biblia iti pagtaengan ti nairugi. Iti dayta met la a siudad, simrek ti maysa a Saksi iti maysa a tiendaan tapno gumatang iti diario ket nakitana nga adda dagiti polieto iti counter. Dati a Saksi ti makinkukua iti tiendaan. Naikkan iti polieto, ket gapu ta ammona a napateg daytoy, nagaramid kadagiti kopia nga iwarasna a mismo.

Idiay Le Havre, Normandy, naklaat ti maysa a babai a Protestante idi nangngegna iti radio nga adda buisna dagiti kontribusion dagiti Saksi ni Jehova. Magagaran a nangawat iti polieto ket pinadayawanna dagiti Saksi gapu iti turedda a kumontra iti kasta a kinaawan hustisia. Iti 7:20 ti rabii, kinuna ti maysa a komentarista iti TV idiay Lyons maipapan iti pannakaiwaras dagiti polieto: “Ita a bigat, nalaklaka ti aglisi iti nagbabaetan ti tedted ti tudo ngem ti aglisi kadagiti polieto dagiti Saksi ni Jehova.” Nainterbiu ti dua a Saksi ket inlawlawagda dagiti rason a nayussuat ti kampania.

Gapu ta kayatda ti makiraman nga agibunong, adda dagiti Saksi a kalpasan ti sekular a trabahoda winarasanda dagiti agaw-awid ken nangipisokda iti polieto kadagiti pagikabilan iti surat. Kadagiti ili a kas iti Brest ken Limoges​—a nalatak gapu iti porselana​—dagiti tattao a rumrummuar iti pagsinean iti alas 11:00 ti rabii ket karaman kadagiti kaudian a nakaawat iti polieto iti dayta nga aldaw. Naurnong ken naiwaras iti kabigatanna dagiti natda a polieto.

Dagiti Resulta

Insurat ti maysa a Saksi: “Ipagarup dagiti kabusortayo a pakpakapsutendatayo. Kinapudnona, ti kasunganina ti mapaspasamak.” Iti kaaduan a kongregasion, nasurok a 75 porsiento kadagiti Saksi ti nakiraman a nagiwaras iti dayta nga aldaw, a dagiti dadduma 10, 12, wenno 14 nga oras ti binusbosda. Idiay Hem, iti abagatan ti Francia, kalpasan ti trabahona iti rabii, nagiwaras ti maysa a Saksi kadagiti polieto manipud alas singko ti bigat agingga iti alas tres ti malem. Iti kabangibang a Denain, nga addan kongregasion sadiay nanipud pay idi 1906, 200 nga oras ti binusbos ti 75 a Saksi a nagiwaras iti polieto iti Biernes. Determinado met a nakiraman dagiti dadduma, nupay lallakay wenno babbaketdan, adda an-annayenda, ken saan a nasayaat ti paniempo. Idiay Le Mans, kas pagarigan, tallo a kakabsat nga agtawen iti nasurok a 80 ti nangbusbos iti dua nga oras a nangipisok iti polieto kadagiti pagikabilan iti surat, ken maysa a Saksi a naka-wheelchair ti nagiwaras iti polieto iti sanguanan ti estasion ti tren. Ken anian a makaparegta a makita ti sumagmamano a dati a saan nga aktibo a Saksi a nakiraman iti daytoy naisangsangayan a trabaho!

Di pagduaduaan a dakkel a pammaneknek ti imbunga daytoy a panagiwaras. Naikkan iti polieto dagiti tattao a nagduduma ti kasasaadda, nga adu kadakuada ti manmano a madanon kadagiti pagtaenganda. Adu dagiti agkuna a saan laeng a tapno masalakniban ti interes dagiti Saksi ti naibanag daytoy a tignay. Iti panangmatmat ti adu, maysa dayta a panangidepensa iti wayawaya ti konsiensia ken panagdayaw dagiti amin a Pranses. Kas pammaneknek iti daytoy, adu nga umili ti nagkiddaw kadagiti kanayonan a kopia ti polieto nga itedda kadagiti gagayyem, kakadua, wenno kabagianda.

Wen, pagragsakan dagiti Saksi ni Jehova idiay Francia nga ipakaammo ti nagan ni Jehova ken salakniban ti intereses ti Pagarian. (1 Pedro 3:15) Sipapasnek a namnamaenda a ‘maitultuloyda ti agbiag a natalinaay ken naulimek buyogen ti naan-anay a nadiosan a debosion ken kinaserioso’ ken rinibu pay ti tumipon kadakuada a mangidaydayaw iti nailangitan nga Amada, ni Jehova.​—1 Timoteo 2:2.

[Footnote]