Aramidentayo ti Amin a Kabaelantayo!
“ARAMIDEM ti amin a kabaelam.” Dayta a praktikal a balakad ti naminsan nga impalagip ti maysa a kameng ti Bagi a Manarawidwid dagiti Saksi ni Jehova iti maysa a misionero. Ngem apay a naipaay ti kasta a balakad iti maysa nga aduan iti kapadasan a ministro? Saan aya a natenneb ti kaaduan a misionero nga inaldaw a maipaspasango kadagiti kiteb, uleg, pudot, sakit, ken dadduma pay a pakarigatan?
Kinapudnona, ordinario a tattao dagiti misionero a Saksi ni Jehova, Kristianoda a natignay nga agserbi iti ganggannaet a pagilian gapu iti nasged nga ayatda ken ni Jehova ken iti padada a tao. Ikagkagumaanda nga aramiden ti inggat’ kabaelanda nga agserbi ken ni Jehova, ti pagpannurayanda iti pigsa.—Efeso 6:10.
Tapno ad-adu pay ti maammuan maipapan iti trabaho dagiti misionero, ipapantay a simmarungkartayo iti maysa a gagangay a pagtaengan dagiti misionero idiay Makinlaud nga Africa.
Maysa nga Aldaw a Panagmisionero
Dandani 7:00 ti bigat. Apagisu ti idadatengtayo iti pagtaengan dagiti misionero tapno makiraman iti panangusig iti teksto ti Kasuratan iti dayta nga aldaw. Sibabara a pinasangbaydatayo ti sangapulo a misionero ket inwayaandatay iti panganan. Kalpasan a nakiam-ammotayo, maysa kadagiti misionero a nabayagen iti teritoriana ti nangisalaysay iti nakakatkatawa a kapadasanna iti tay-ak. In-inut a nagsardeng ti saritaantayo idi impakaammo ti tserman iti dayta nga aldaw a mangrugin ti panagteksto. Pranses ti pagsasao a mausar iti diskusion. Nupay ditay ammo dayta a pagsasao, madlawtayo a nalaingen dagiti ganggannaet a misionero iti dayta a lenguahe bayat nga iyeb-ebkasda ti bagida.
Kalpasan ti panangusig iti Kasuratan, adda naimpusuan a panagkararag, satay namigat. Bayat a tagtagiragsakentay ti adu a cereal, indagadag ti katugawtayo a misionero a laokantayo dayta kadagiti naiwa a saba. Kunatay a ditayo mangmangan iti saba, ngem impanamnamana a mabalbaliwan dayta apaman a maramanantayo dagiti saba iti dayta a lugar. Nangikabiltay ngarud iti sumagmamano nga iwa ti saba iti kankanentay a cereal. Husto ti kunana! Nagimas dagitoy a saba—kasla kasam-it ti sorbetes! Ken masiguradotayo a ti naidasar nga immatiddog a tinapay ket kalluto itay parbangon iti bassit a panaderia iti ballasiw ti pagtaengan dagiti misionero.
Kalpasan ti pamigat, agmalmalem a makaduatayo ti agassawa a misionero, nga awagantayo iti Ben ken Karen. Nadamagtayo ti nabunga a teritoria iti pagilian ti Makinlaud nga Africa, ket magagarantay a mangammo no pudno dayta a damag.
Idi simmangpettayo iti pagsardengan ti bus, adda agarup sangadosena a tattao nga agur-uray. Di nagbayag, naragsak a kasarsarita dagiti kaduatayo a misionero ti maysa a babai ken ti anakna maipapan iti maysa a suheto ti Biblia. Gapu ta ditay maawatan ti pagsasao a Pranses, awan maaramidtay no saan nga agisem! Bayat nga aw-awaten ti babai dagiti kopia ti Pagwanawanan ken Agriingkayo!, dimteng ti bus, ket nagiinnuna dagiti tattao a naglugan! Idi sumagpattay iti bus, naidurondatayo dagiti aglilinnetlet a tattao. Makakarit ti agtalinaed a nakatakder bayat nga agturongtayo iti makinlikud a pagtugawan ti bus. No pinaandaren ti drayber, kumpetka laengen. Pasaray agsardeng ti bus, ket adu pay a pasahero ti lumugan. Agiinnisemtayo laengen kadagiti pada a pasahero. Nagsayaat koma no makasaritatay ida!
Bayat a tumartaray ti bus, timman-awtayo iti tawa ket nakitatayo ti aktibidad iti lansangan. Magmagna ti dua a babbai nga addaan iti nadagsen a susuonen. Maysa kadakuada ti nakasusuon iti dakkel a timba ti danum. Adda negosiante a lalaki a nangyaplag iti ules iti bangketa ket nangiplastar iti sumagmamano a babassit a banag a namnamaenna a malako. Iti sadinoman, addada tattao nga aggatgatang wenno aglaklako iti komporme a banag.
Pagaammuan, ni Ben a nakatakder iti asidegko nariknana nga adda sumsumpeg iti sakana. Ania ngay dayta? Napunno ti bus, ngem nariknana manen. Inkagumaanna ti nagdumog. Iti maysa a bag iti sakaananna, adda pato a pasaray mangiruar iti ulona iti bag ket seppegenna ni Ben! Kunana a nalabit maipan dayta iti palengke tapno ilako ti makinkukua.
Idi dumanontay iti teritoriatayo, naragsakantay a makaammo a maysa a kadawyan a komunidad dagiti Africano ti pangasabaantayo. Idi addatayo iti umuna a balay, sipipigsa a nagpalakpak ni Ben tapno awaganna ti bumalay. Kasta ti pamay-an dagiti tattao nga “agtuktok iti ruangan” iti daytoy a lugar. Rimmuar ti maysa nga agtutubo a lalaki ket imbagana nga okupado ngem mabalintayo ti agsubli inton umal-aldaw.
Iti sumaruno a balay, nakasaritatayo ti maysa a babai a di matarusan ni Ben ti pagsasaona. Inayabanna ti anakna ket kiniddawna a daytoy ti mangipatarus iti ibaga ni Ben. Idi nalpas ni Ben, inawat ti babai ti broshur a naglaon kadagiti Nainkasuratan a topiko, ket inkari ti anakna nga ilawlawagna ken nanangna. Iti maikatlo a balay, naummong ti sumagmamano nga agtutubo iti paraangan. Dua kadakuada ti dagdagus a nangitukon iti tugawda tapno pagtugawenda dagiti bisita. Simmaruno ti maysa a narayray a diskusion maipapan iti panangusar iti krus iti panagdayaw. Nayurnos a maituloy dayta a panagsasarita iti sumaruno a lawas. Oras itan tapno sublian ti agtutubo a lalaki a nakasaritatayo iti damo a balay. Agparang a nangngegna ti saritaantayo kadagiti agtutubo a kaarrubada. Adu ti saludsodna maipapan iti Biblia ket kiniddawna a mayadalan iti Biblia. Kalpasan a nasukimatna ti eskediulna, immannugot ni Ben nga agsubli iti isu met laeng nga oras iti sumaruno a lawas. Idi nagsublitayo iti pagtaengan dagiti misionero tapno mangaldaw, kinuna da Ben ken Karen a masapul nga urnosenda a naimbag ti eskediulda a mangyadal iti Biblia gapu ta baka makairugida iti ad-adu a panangyadal iti Biblia ngem iti kabaelanda nga ikondukta.
Komendarantay ti kinalaingda nga agsao iti Pranses. Imbaga ni Ben nga innem a tawendan ken ni Karen nga agserserbi kas misionero, ket lumallaingdan nga agsao iti Pranses. Impasiguradoda kadatayo a saan a nalaka ti agadal iti baro a lenguahe, ngem nagsayaat ti resultana kadakuada.
Iti 12:30 ti malem, naurnong dagiti misionero iti panganan para iti pangaldaw. Naammuantayo nga iti tunggal aldaw, adda sabali a misionero a nadutokan a mangisagana iti pammigat ken pangaldaw ken aginnaw. Iti daytoy nga aldaw, maysa kadagiti misionero ti nangisagana iti naimas a prito a manok ken patatas, agraman ti salad a kamatis—ti paboritona nga isagana!
Ania ngay ti planoda da Ben ken Karen iti malem? Kunada nga oras ti panaginana dagiti tattao ti 1:00 agingga iti 3:00 ti malem, isu a kaaduanna a busbosen dagiti misionero ti dadduma a paset dayta a malem tapno agadal wenno rumidep. Saantay a nasdaaw idi ibaga ni Karen a saan a narigat a sursuruen dagiti baro a misionero daytoy a kultura!
Kalpasan a nakaridep, ituloytayo ti mangasaba. Awan iti balayna ti interesado a lalaki a namin-anon a sinarungkaran ni Ben, ngem dua a lallaki ti rimmuar idi nagtipat ni Ben. Imbagada a nadakamat ti bumalay ti maipapan iti panagsarungkar ni Ben ket indagadagna nga agalada iti katulongan iti panagadal iti Biblia a Pannakaammo a Mangiturong iti Biag nga Agnanayon. Maragsakantay a nangibati kadakuada iti kopia dayta a libro. Kalpasanna, aglugantayo iti bus a mapan iti lugar nga ayan ti interesado a babai nga iyad-adalan ni Karen iti Biblia.
Bayat ti panagdaliasattayo iti lansangan nga aduan iti tattao, kuna ni Karen a naam-ammona dayta a babai idi naminsan a nagkaluganda iti maysa a taksi agraman iti dadduma pay a pasahero. Inikkan ni Karen ti babai iti tract tapno basaenna kabayatan ti biahe. Binasa ti babai dayta a tract ket nagkiddaw iti sabali pay a basaenna. Ad-adda ti interesna ita a nangbasa iti dayta a tract. Sakbay a dimsaagda, nakitulag ni Karen a sarungkaranna ti babai iti pagtaenganna ket nairugi ti maysa a nabunga a panagadal iti Biblia babaen ti broshur nga Ania ti Kalikaguman ti Dios kadatayo? Iti daytoy nga aldaw, isuro ni Karen ti maikalima a leksion ti broshur.
Natagiragsaktay a naimbag ti agmalmalem a panangasaba, ngem adda ti di maikkat a saludsodtayo maipapan iti trabaho a panagmisionero. Impanamnama dagiti kaduatayo nga inton makaawidtayo, mangisaganada iti saan a nadagsen iti tian a taraon sada sungbatan dagiti saludsodtayo.
No Kasanoda a Taginayonen ti Eskediulda
Bayat a nagsasanguantayo ti prito nga itlog, tinapay nga immatiddog, ken keso, adu pay ti naammuantayo maipapan iti biag dagiti misionero. Lunes ti gagangay nga aldaw nga aginana wenno asikasuen dagiti misionero dagiti personal a banag. Usaren ti kaaduan a misionero ti dadduma a paset dayta nga aldaw tapno agsurat iti pamilia wenno gagayyemda. Napateg kadakuada ti damag manipud iti pamiliada, ket pagay-ayat dagiti misionero ti makisinnurat.
Yantangay agkakabbalay dagiti misionero, nasken a taginayonenda ti nasayaat a komunikasion babaen ti pannakilangen iti padada a misionero ken babaen ti panagsasarita maipapan kadagiti naespirituan a bambanag. Tapno maaramidda dayta, adalen dagiti misionero ti Biblia a kadua ti magasin a Pagwanawanan kada rabii ti Lunes, malaksid pay iti panangtaginayon iti regular nga eskediul a personal a panagadal iti Biblia. Kuna ni Ben a no agkakadua dagiti misionero nga addaan iti nadumaduma a nalikudan, manamnama ti bassit a panagduduma iti opinion, ngem ti naespirituan a probision a panagadal ti pamilia tulonganna ida a mangtaginayon iti talna ken panagkaykaysa. Impaganetgetna met a tumulong daytoy tapno maliklikan ti panagpaimportante.
Napateg met ti kinapakumbaba. Naibaon dagiti misionero tapno agserbi, saan a tapno pagserbian. Nadlaw dagiti gagayyemtayo a ti maysa a karigatan nga iyebkas iti uray ania a pagsasao isu ti “dispensarennak,” nangnangruna no ti agpadpadispensar ket dina inggagara ti imbaga wenno inaramidna. Impalagip kadatayo ni Ben ti ulidan ni Abigail, a nagpadispensar gapu iti kinagubsang ni lakayna ket iti kasta bimmaaw ti maysa a situasion a nagbanag koma iti didigra. (1 Samuel 25:23-28) Ti abilidad nga “agbiag a sitatalna” ket napateg a paset ti naballigi a misionero.—2 Corinto 13:11.
Maminsan iti kada bulan, adda miting dagiti misionero tapno pagsasaritaanda dagiti bambanag a mangapektar iti pamilia, agraman iti panagbaliw ti eskediul iti pagtaengan. Kalpasanna, pagraranudan ti amin ti maysa nga espesial a dulse. Agparang a praktikal unay—ken makaay-ayo—dayta nga urnos.
Apaman a nalpas ti pangrabii, pinasiartay iti apagbiit ti intero a pagtaengan dagiti misionero. Nadlawtayo a nupay simple laeng ti pagtaengan, agtitinnulong dagiti misionero a mangtaginayon iti kinadalimanekna. Adda refrigerator, washing machine, ken paglutuan. Kuna ni Karen a kadagiti napudot a lugar, kas iti daytoy a lugar iti Makinlaud nga Africa, mabalin met nga agusar iti air-conditioning. Makatulong met dagiti komportable a pagnaedan, nasustansia a taraon, ken simple a panangaluad iti salun-at tapno agtalinaed a nakaradkad ken nabunga dagiti misionero.
Ipamaysa Kadagiti Makaay-ayo a Banag
Nagustuantay ti amin a nakitatayo. Maikaritayo kadi nga agmisionero? Kasanotay a maammuan? Nangted dagiti nangsangaili kadatayo iti sumagmamano a pagpampanunotan.
Umuna, sigun kadakuada, saan a mangasaba dagiti Kristiano a misionero tapno makigasanggasat. Agsapsapulda kadagiti nasingpet ti panagpuspusoda a tattao nga agtarigagay nga agadal maipapan kadagiti agkakaimbag a kari ti Dios. Busbosen dagiti misionero ti di kumurang a 140 nga oras kada bulan iti panangasaba, isu a nasken unay ti panangipateg iti ministerio.
‘Ngem,’ pampanunotentayo, ‘komusta met ngay dagiti uleg, alutiit, ken kiteb?’ Nupay masarakan dagitoy iti adu a teritoria dagiti misionero, nairuamen kadagitoy dagiti misionero, sigun ken ni Ben. Innayonna a ti tunggal teritoria ti misionero ket addaan iti bukod a pintas, ket iti agangay, maipamaysa dagiti misionero ti atensionda kadagiti makaay-ayo a benneg ti teritoriada. Nagbalin a gagangay dagiti kasasaad a maibilang idi damo a “karkarna” ket agbalin pay ketdi a makaay-ayo no dadduma. Maysa a misionero a nagserbi iti Makinlaud nga Africa iti adu a tawen sakbay a nagawid iti pagilianna gapu iti personal nga obligasion ti nagkuna a nadagdagsen ti riknana a nangpanaw iti teritoriana ngem idi pimmanaw iti pagilianna sumagmamano a tawen ti naglabasen. Nairuamnan ti bagina iti teritoriana kas misionero.
Nakasaganakayo Kadin?
Pinagpanunotdakami da Ben ken Karen iti adu a bambanag. Dakayo ngay? Pinampanunotyo kadin ti agserbi kas misionero iti ganggannaet a pagilian? No wen, nalabit nalaklakayo a ragpaten dayta a kalat ngem iti ipagarupyo. Ti maysa kadagiti kangrunaan a makalikaguman isu ti panangipateg iti amin-tiempo a ministerio ken tagiragsaken ti trabaho a panangtulong kadagiti tattao. Laglagipenyo, saan a nabilbileg ngem iti tao dagiti misionero. Ordinarioda a lallaki ken babbai. Ikagkagumaanda nga aramiden ti amin a kabaelanda tapno mairingpasda ti maysa a nakapatpateg a trabaho.
[Dagiti Ladawan iti panid 27]
Mangrugi ti kada aldaw babaen ti panangusig iti teksto ti Biblia
[Dagiti Ladawan iti panid 28, 29]
Dagiti mabuya idiay Africa
[Ladawan iti panid 29]
Makapnek unay ti biag kas misionero