Agsursurokayo ken ni Nicodemo

“NO TI asinoman kayatna ti sumurot kaniak, paglikudanna koma ti bagina ket bagkatenna ti kayona a pagtutuokan iti inaldaw-aldaw ket agtultuloy a surotennak.” (Lucas 9:23) Dayta nga annongen ket sidadaan nga inawat dagiti napakumbaba a mangngalap ken malalais nga agsingsingir iti buis. Binaybay-anda ti amin a banag tapno surotenda ni Jesus.​—Mateo 4:18-22; Lucas 5:27, 28.

Umaw-awag pay laeng ni Jesus agingga ita, ket adu dagiti nangipangag. Nupay kasta, dadduma a naragsakan a nakipagadal iti Biblia kadagiti Saksi ni Jehova ti nagalikaka a ‘paglikudan ti bagida ket bagkaten ti kayoda a pagtutuokan.’ Agkedkedda a mangawat iti annongen ken pribilehio a panagbalin nga ad-adalan ni Jesus.

Apay nga agkedked dagiti dadduma a mangawat iti imbitasion ni Jesus ken mangidedikar iti bagida ken Jehova a Dios? Ipapantayon a dagidiay saan a napadakkel iti Judio-Kristiano nga ideya ti monoteismo ket mabalin nga agkasapulan iti adu a tiempo tapno naan-anay a maawatanda ti kaadda ti persona, mannakabalin amin a Namarsua. Kaskasdi, uray kalpasan a nakombinsirda a pudno ti Dios, dadduma ti nagsardeng a sumurot iti addang ni Jesus. Mabalin a maamakda iti panangumsi kadakuada dagiti kakabagian ken gagayyemda no agbalinda a Saksi ni Jehova. Gapu ta nalipatanda ti kinaganat ti tiempo a pagbibiagantayo, ikagkagumaan dagiti dadduma ti agbalin a nalatak ken bumaknang. (Mateo 24:36-42; 1 Timoteo 6:9, 10) Aniaman ti mabalin a kasasaad, kadagidiay mangitantantan iti pangngeddengda nga agbalin a pasurot ni Jesus, adda ti masursuroda iti pakasaritaan ni Nicodemo, maysa a nabaknang nga agturay a Judio idi kaaldawan ni Jesus.

Naparaburan Kadagiti Naisangsangayan a Gundaway

Agarup innem a bulan laeng kalpasan a rinugian ni Jesus ti naindagaan a ministeriona, nabigbig ni Nicodemo a ‘naggapu [ni Jesus] iti Dios kas maysa a mannursuro.’ Gapu iti siddaawna kadagiti milagro nga inaramid ni Jesus idiay Jerusalem di pay nabayag idi Paskua ti 30 K.P., sililimed nga immay ni Nicodemo bayat ti rabii, tapno ipudnona ti pammatina ken Jesus ken tapno ammuenna ti ad-adu pay maipapan iti daytoy a mannursuro. Gapu iti dayta, dinakamat ni Jesus ken ni Nicodemo ti maysa a napateg a kinapudno a nasken ti ‘pannakayanak manen’ tapno makastrek iti Pagarian ti Dios. Iti dayta a kanito, kinuna pay ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.”​—Juan 3:1-16.

Anian a naisangsangayan a namnama ti agur-uray idi ken ni Nicodemo! Makapagbalin a nasinged a kadua ni Jesus, a masaksianna a mismo dagiti nagduduma nga aspeto ti biag ni Jesus ditoy daga. Kas agturay kadagiti Judio ken mannursuro iti Israel, adu ti pannakaammo ni Nicodemo iti Sao ti Dios. Addaan met iti nauneg a pannakaawat, yantangay nabigbigna ni Jesus kas mannursuro nga imbaon ti Dios. Interesado ni Nicodemo kadagiti naespirituan a banag, ken naidumduma ti kinapakumbabana. Anian a nagrigat para iti maysa a miembro ti nangato a pangukoman dagiti Judio ti mangbigbig iti anak ti maysa a nanumo a karpintero kas tao nga imbaon ti Dios! Amin dagita a galad ket nakapatpateg iti panagbalin nga adalan ni Jesus.

Kasla di agbaaw ti interes ni Nicodemo iti daytoy a tao a taga Nazaret. Dua ket kagudua a tawen kalpasanna, iti Piesta dagiti Abong-abong, timmabuno ni Nicodemo iti taripnong ti Sanhedrin. Iti dayta a kanito, ni Nicodemo ket “maysa idi kadakuada.” Nangibaon dagiti panguluen a papadi ken dagiti Fariseo kadagiti soldado a mangaresto ken ni Jesus. Nagsubli ken impadamag dagiti soldado: “Awan pay a pulos sabali a tao a nagsao iti kastoy.” Ket inumsi dagiti Fariseo ida: “Nayaw-awankay kadi met? Adda aya maysa kadagiti agtuturay wenno kadagiti Fariseo ti naaddaan iti pammati kenkuana? Ngem daytoy a bunggoy a saan a makaammo iti Linteg nailunodda a tattao.” Saanen a nakapagteppel ni Nicodemo. Kinunana: “Ukomen aya ti lintegtayo ti maysa a tao malaksid no umuna a dimngeg kenkuana ken inammona ti ar-aramidenna?” Nagbalin ngarud a sentro ti pammabalaw dagiti dadduma a Fariseo: “Naggapuka kadi met idiay Galilea? Sukimatem ket kitaem nga awan mammadto a maibangon manipud Galilea.”​—Juan 7:1, 10, 32, 45-52.

Agarup innem a bulan kalpasanna, idi Aldaw ti Paskua ti 33 K.P., nakita ni Nicodemo ti bagi ni Jesus a naidissaag manipud iti kayo a pagtutuokan. Kinaduaanna ni Jose a taga Arimatea, maysa met a miembro ti Sanhedrin, iti panangisagana iti maitabon a bangkay ni Jesus. Iti dayta a panggep, nangyeg ni Nicodemo iti “sangalukot a mirra ken aloe” nga agdagsen iti agarup 100 a libra ti Roma, a katupag ti 72 a libra ti Inglatera. Kaipapananna dayta ti dakkel a panaggastos. Kasapulan met ti tured iti panangsangona iti resulta ti pannakaibilangna a kas iti “dayta nga agpampammarang,” kas iti panangawag dagiti padana a Fariseo ken ni Jesus. Kalpasan ti nadaras a panangisaganada iti maitabon a bangkay ni Jesus, intabon dagiti dua ti bangkay ni Jesus iti baro a pakalaglagipan a tanem iti asideg. Kaskasdi, uray iti daytoy a kanito, saan pay laeng a naibilang ni Nicodemo a kas adalan ni Jesus!​—Juan 19:38-42; Mateo 27:63; Marcos 15:43.

Apay a Saan a Nagtignay

Saan nga impalgak ni Juan iti salaysayna no apay a nagkedked ni Nicodemo a ‘mangbagkat iti kayona a pagtutuokan’ ket surotenna ni Jesus. Ngem nangipaay kadagiti pamalatpatan a mabalin a mangilawlawag iti panagpangadua daytoy a Fariseo.

Umuna iti amin, dinakamat ni Juan a ti agturay a Judio ket ‘immay [ken ni Jesus] iti rabii.’ (Juan 3:2) Inlawlawag ti maysa nga eskolar iti Biblia: “Immay ni Nicodemo iti rabii, saan a gapu iti butengna, no di ket tapno awan ti bunggoy a mangsinga iti panagsaludsodna ken ni Jesus.” Nupay kasta, tinukoy ni Juan ni Nicodemo kas ‘ti lalaki nga immay [ken Jesus] iti rabii iti daydi umuna a gundaway’ iti isu met laeng a konteksto a nangdakamatanna ken ni Jose a taga Arimatea kas “adalan idi ni Jesus ngem sililimed gapu iti butengna kadagiti Judio.” (Juan 19:38, 39) No kasta, mabalin a sililimed nga immay ni Nicodemo ken ni Jesus gapu iti “butengna kadagiti Judio,” kas iti panagbuteng idi ti sabsabali a maaddaan iti pakainaigan ken ni Jesus.​—Juan 7:13.

Intantanyo kadi ti mangngeddeng nga agbalin nga adalan ni Jesus gapu iti mabalin nga ibaga dagiti kabagian, gagayyem, wenno katrabahuanyo? “Ti panagpigerger iti tattao isu ti mangipakat iti silo,” kuna ti proverbio. Kasanoyo a parmeken dayta a panagbuteng? Ituloy ti proverbio: “Ngem daydiay agtalek ken Jehova masalaknibanto.” (Proverbio 29:25) Tapno maaddaan iti panagtalek ken ni Jehova, masapul a mapadasanyo a mismo ti pannaranay ti Dios no adda ti ibubusor. Agkararagkayo ken Jehova, ket kiddawenyo nga ipaayannakayo iti tured nga agaramid uray kadagiti babassit a pangngeddeng mainaig iti panagdayawyo. In-inut a bumileg ti pammati ken panagtalekyo ken ni Jehova ket makaaramidkayo iti dadakkel a pangngeddeng a maitunos iti pagayatan ti Dios.

Ti saad ken kinatan-ok ni Nicodemo kas miembro ti klase agturay ti mabalin a nanglapped kenkuana iti panangaramid iti napateg nga addang, ti panangtallikud iti bagina. Iti dayta a kanito, siiirut pay laeng a naisinggalut iti saadna kas maysa a miembro ti Sanhedrin. Bumdengkayo kadi nga agtignay nga agbalin a pasurot ni Kristo agsipud ta mabalin a mapukawyo ti natan-ok a dayawyo iti kagimongan wenno gundawayyo nga agprogreso? Awan kadagitoy ti dakdakkel nga amang ngem ti dayaw a makapagserbi iti Kangatuan iti uniberso, a sidadaan a mangipaay iti kalikagumanyo a maitunos iti pagayatanna.​—Salmo 10:17; 83:18; 145:18.

Ti kinabaknang ti posible a sabali pay a makagapu iti panangitantan ni Nicodemo. Kas maysa a Fariseo, mabalin a naimpluensiaan iti sabsabali, a “managayat iti kuarta.” (Lucas 16:14) Nabatad a nabaknang, yantangay agik-ikut iti nangina a sangalukot a mirra ken dagiti aloe. Itantantan ti dadduma ita ti desisionda a mangibaklay kadagiti annongen ti maysa a Kristiano agsipud ta maringgoranda kadagiti material a sanikuada. Ngem binagbagaan ni Jesus dagiti pasurotna: “Isardengyo ti maringgoran maipapan kadagiti kararuayo no ania ti kanenyonto wenno no ania ti inumenyonto, wenno maipapan iti bagbagiyo no ania ti ikawesyonto. . . . Ta ammo ti nailangitan nga Amayo nga amin dagitoy a banag ket kasapulanyo. Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag mainayonto kadakayo.”​—Mateo 6:25-33.

Adu ti Nakaikapisanna

Makapainteres, iti salaysay maipapan ken ni Nicodemo nga agparang laeng iti Ebanghelio ni Juan, saan a nadakamat no isu ket nagbalin a pasurot ni Jesus. Sigun iti maysa a tradision, dimmasig ni Nicodemo ken ni Jesus, nagpabautisar, nagbalin a sentro ti panangidadanes dagiti Judio, naikkat iti saadna, ken napapanaw manipud Jerusalem kamaudiananna. Aniaman ti napasamak, maysa a banag ti sigurado: Adu ti nakaikapisanna gapu iti panangitantanna bayat ti kaadda ni Jesus ditoy daga.

No rinugian ni Nicodemo a sinurot ni Jesus idi damo a nakasangona ti Apo, nagbalin koma a nasinged nga adalan ni Jesus. Nagbalin koma ni Nicodemo a maysa a naisangsangayan nga adalan ni Jesus gapu iti pannakaammo, pannakaawat, kinapakumbaba, ken pannakabigbigna iti naespirituan a kasapulan. Wen, nangngegna koma dagiti nakaskasdaaw a palawag ti Naindaklan a Mannursuro, nakasursuro koma kadagiti napateg nga ilustrasion ni Jesus, nasaksianna koma dagiti milagro nga inaramid ni Jesus, ken napabileg koma kadagiti pammagbaga ni Jesus kadagiti apostolna. Ngem naikapis amin kadagitoy.

Adu ti napukaw ni Nicodemo gapu ta di nakapangngeddeng. Karaman iti nakaikapisanna ti nabara nga imbitasion ni Jesus: “Umaykayo kaniak, dakayo amin a mabambannogan ken madagdagsenan, ket pagin-awaenkayto. Ibaklayyo ti sangolko ket agsursurokayo kaniak, ta naalumamay ti kababalinko ken napakumbaba ti pusok, ket makasarakkayto ti gin-awa a maipaay kadagiti kararuayo. Ta ti sangolko nalanay ken ti awitko nalag-an.” (Mateo 11:28-30) Literal a naikapis ni Nicodemo iti gundaway a magin-awaan babaen ken ni Jesus a mismo!

Dakayo Ngay?

Sipud 1914, agturturayen ni Jesu-Kristo idiay langit kas ti Ari ti nailangitan a Pagarian ti Dios. Iti panangipakpakaunana iti mapasamak bayat ti kaaddana, innayonna a kinunana: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” (Mateo 24:14) Sakbay nga umay ti panungpalan, masapul a maitungpal daytoy sangalubongan a trabaho a panangasaba. Pakaragsakan ni Jesu-Kristo nga adda dagiti imperpekto a tattao a makipaset. Mabalinyo met ti makiraman iti daytoy a trabaho.

Nabigbig ni Nicodemo a naggapu ni Jesus iti Dios. (Juan 3:2) Iti panagadalyo iti Biblia, mabalin a nabigbigyo met dayta. Mabalin a binalbaliwanyo ti kabibiagyo tapno maiyataday iti estandarte ti Biblia. Mabalin a tumabtabunokayon kadagiti gimong dagiti Saksi ni Jehova tapno manayonan ti pannakaammoyo iti Biblia. Makomendarankayo iti kasta a panangikagumaanyo. Ngem ad-adu pay ti masapul nga aramiden ni Nicodemo ngem ti basta panangbigbig ken ni Jesus kas imbaon ti Dios. Masapul a ‘paglikudanna koma ti bagina ket bagkatenna ti kayona a pagtutuokan iti inaldaw-aldaw ket agtultuloy a surotenna [ni Jesus].’​—Lucas 9:23.

Ipapusoyo ti ibaga kadatayo ni apostol Pablo. Insuratna: “Yantangay sangsangkamaysakami a makipagtartrabaho kenkuana, ipakaasimi met kadakayo a saanyo nga awaten ti di kaikarian a kinamanangngaasi ti Dios ket maikapiskayo iti panggepna. Ta kunana: ‘Iti makaay-ayo a tiempo dinengngegka, ket iti aldaw ti pannakaisalakan tinulonganka.’ Adtoy! Itan ti kangrunaan a makaay-ayo a tiempo. Adtoy! Itan ti aldaw ti pannakaisalakan.”​—2 Corinto 6:1, 2.

Itan ti tiempo a patanoren ti pammati a manggutugot kadakayo nga agtignay. Tapno mapatanoryo dayta, mennamennaenyo dagiti maad-adalyo iti Biblia. Agkararagkayo ken ni Jehova, ket agpatulongkayo kenkuana tapno maiparangarangyo ti kasta a pammati. Bayat a tultulongannakayo, ti apresasion ken panagayatyo kenkuana ti mangtignay kadakayo tapno tarigagayanyo a ‘pagtallikudan ti bagiyo ken bagkaten ti kayoyo a pagtutuokan iti inaldaw-aldaw ket agtultuloy a sumurot ken Jesu-Kristo.’ Agtignaykayo kadi itan?

[Ladawan iti panid 9]

Idi damo, situtured a dimmasig ni Nicodemo ken ni Jesus

[Ladawan iti panid 9]

Iti laksid ti ibubusor, timmulong ni Nicodemo a nangisagana iti pannakaitabon ti bangkay ni Jesus

[Ladawan iti panid 10]

Ti personal a panagadal ken panagkararag pabilgennakayo nga agtignay

[Ladawan iti panid 10]

Awatenyo kadi ti pribilehio nga agtrabaho iti panangidaulo ni Jesu-Kristo?