Ania ti Gatad ti Panangsalimetmet iti Nadalus a Konsiensia?
“NAIBILIN iti Gobierno nga Awatenna ti R$20,000 (real ti Brazil).” Daytoy ti nabiit pay a karkarna a paulo ti damag a nagparang iti pagiwarnak a Correio do Povo idiay Brazil. Insalaysay ti artikulo ti kapadasan ni Luiz Alvo de Araújo, maysa a kartero a nangilako iti dagana iti gobierno. Kalpasan ti panagpirmana tapno maipanagan ti dagana iti gobierno, nasdaaw ni Luiz idi maammuanna a simmobra iti R$20,000 (mapattapatta a $8,000, U.S.) ti naibayad kenkuana!
Saan a kaskarina a naisubli ni Luiz ti surok ti bayad. Kalpasan ti di naballigi nga iyuumanna kadagiti departamento ti gobierno, naibalakad ken ni Luiz a mangabogado ket risutenna ti parikut iti korte. “Agparang nga adda nagbiddut, ket gapu iti narikut a proseso, awan ti makaammo no kasano a marisut ti parikut,” kinuna ti hues a nangibilin iti gobierno a mangawat iti kuarta ken bayadanna ti serbisio legal. “Ita laeng a masaksiak ti kastoy a kaso.”
Inlawlawag ni Luiz, maysa a Saksi ni Jehova: “Lappedannak ti sinanay-Biblia a konsiensiak a mangala iti diak kukua. Masapul nga ikagumaak nga isubli ti kuarta.”
Para iti adu a tattao, mabalin a karkarna ken minamaag pay ketdi ti kasta a kapanunotan. Ngem ipakita ti Sao ti Dios nga ipatpateg dagiti pudno a Kristiano ti panangsalimetmetda iti nadalus a konsiensia iti pannakilangenda kadagiti sekular nga agtuturay. (Roma 13:5) Determinado dagiti Saksi ni Jehova a mangtaginayon iti ‘napudno a konsiensia ken agbiag a mapagtalkan iti amin a bambanag.’—Hebreo 13:18.