Nasken nga Ammuentayo No Asino ti Dios
SAANKAYO kadi nga agsiddaaw no makitayo ti langit a naadornuan iti bitbituen iti naariwanas a rabii? Saan kadi a makaay-ayo ti ayamuom dagiti namaris a sabsabong? Diyo kadi pagragsakan a denggen ti kanta dagiti tumatayab ken kumarasakas a bulbulong a madalapus ti pul-oy? Ken anian a makapaamanga a buyaen dagiti nabileg a balyena ken dadduma pay a parsua nga agnanaed iti taaw! Sa dagiti tattao nga addaan iti nakaisigudan a konsiensia ken komplikado unay nga utek. Kasanoyo nga ilawlawag ti kaadda dagiti amin a nakaskasdaaw a banag iti aglikmuttayo?
Mamati ti dadduma a naiparparna laeng ti itataud amin dagitoy. Ngem no pudno dayta, apay a dagiti tattao mamatida iti Dios? Kasano a ti di inggagara a kombinasion dagiti nagduduma a kemikal ket mangpataud iti parparsua nga addaan iti naespirituan a kasapulan?
“Ti relihion ket nairamut unay iti tao aniaman ti saadna iti kagimongan ken edukasion a naragpatna.” Daytoy a sasao ti pakagupgopan ti panagsirarak nga imparang ni Propesor Alister Hardy iti librona a The Spiritual Nature of Man. Kas resulta dagiti nabiit pay a panageksperimento iti utek, adda dagiti neurosientista a mangibaga a mabalin a “naisigud” kadagiti tattao ti kinarelihioso. Kunaen ti libro a napauluan Is God the Only Reality?: “Ti panangbirok iti kaipapanan ti biag babaen ti relihion . . . ket gagangay iti tunggal kultura ken kaputotan manipud pay idi timmaud ti sangatauan.”
Imutektekanyo ti nakuna ti maysa nga edukado a tao agarup 2,000 a tawenen ti napalabas. Insuratna: “Tunggal balay adda nangibangon, ngem ti nangibangon iti amin a bambanag isu ti Dios.” (Hebreo 3:4) Kinapudnona, ti mismo nga umuna a bersikulo ti Biblia kunaenna: “Idi punganay, ti Dios pinarsuana ti langlangit ken ti daga.”—Genesis 1:1.
Ngem asino ti Dios? Agduduma ti sungbat dagiti tattao iti daytoy a saludsod. Idi napagsaludsodan no asino ti Dios, maysa nga agtutubo a Haponesa nga agnagan iti Yoshi ti simmungbat: “Diak ammo. Maysaak a Budista, ket saan a napateg kaniak ti panangammo no asino ti Dios.” Ngem aminen ni Yoshi nga adu ti mangbigbig ken ni Buddha kas maysa a dios. Ni Nick, maysa a negosiante nga agtawen iti nasurok 60, ket mamati iti Dios ken ibilangna daytoy kas maysa a mannakabalin-amin a puersa. Idi makiddaw nga ilawlawagna ti ammona maipapan iti Dios, insungbat ni Nick kalpasan ti napaut a panagsarimadengna: “Narikut unay dayta a saludsod, gayyem. Ti laeng maibagak, adda ti Dios.”
Addada tattao nga “agdayaw ken agserbi iti pinarsua ti Dios imbes nga iti mismo a Namarsua.” (Roma 1:25, Today’s English Version) Minilion a tattao ti agdaydayaw iti natay nga inapo, a patienda a narigat a maasitgan ti Dios. Iti relihion a Hindu, adu dagiti dios ken diosa. Nagduduma a didiosen, a kas kada Zeus ken Hermes, ti dinaydayaw dagiti tattao idi kaaldawan dagiti apostol ni Jesu-Kristo. (Aramid 14:11, 12) Adu a relihion ti Kakristianuan ti mangisuro a ti Dios ket Trinidad, a buklen ti Dios Ama, Dios Anak, ken Dios Espiritu Santo.
Wen, kuna ti Biblia nga “adda adu a ‘didios’ ken adu nga ‘appo.’” Ngem innayonna: “Kinaagpaysuanna kadatayo adda maymaysa a Dios nga Ama, a kenkuana agtaud ti amin a bambanag.” (1 Corinto 8:5, 6) Wen, adda laeng maysa a pudno a Dios. Ngem asino ti Dios? Ania aya a talaga ti Dios? Napateg a maammuantayo ti sungbat kadagitoy a saludsod. Kinuna a mismo ni Jesus idi nagkararag iti daytoy a Dios: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Nainrasonan a patien a ti agnanayon a pagimbagantayo ket agpannuray iti panangammo iti kinapudno maipapan iti Dios.
[Ladawan iti panid 3]
Ania ti mangilawlawag iti kaaddada?
[Credit Line]
Balyena: Iti pammalubos ti Tourism Queensland
[Picture Credit Line iti panid 2]
AKKUB: Index Stock Photography © 2002