Salsaludsod Dagiti Agbasbasa
Nainsiriban kadi a makipamumpon wenno makiboda iti simbaan ti maysa a pudno a Kristiano?
Ti pannakipaset iti aniaman a kita ti palso a relihion ket di makaay-ayo ken ni Jehova ken masapul a liklikan. (2 Corinto 6:14-17; Apocalipsis 18:4) Ti pamumpon iti simbaan ket maysa a narelihiosuan a serbisio a mangiraman la ketdi iti sermon a mangitantandudo iti di nainkasuratan a kapanunotan kas iti imortalidad ti kararua ken ti ipapan idiay langit kas gunggona dagiti amin a naimbag a tattao. Mabalin nga iramanna met dagiti aramid a kas iti panagkurus ken pannakipaglualo iti padi wenno ministro. Dagiti lualo ken dadduma a narelihiosuan nga ar-aramid a maikontra iti sursuro ti Biblia ket mabalin a paset met ti narelihiosuan a seremonia ti kasar a maangay iti simbaan wenno iti sadinoman. No ti Kristiano ket nailaok iti maysa a grupo a ti tunggal maysa ket makipaspaset iti palso a narelihiosuan nga aramid, mabalin a mapilitan a makipaset. Anian a di nainsiriban nga ipasidongna ti bagina iti kasta a situasion!
Kasanon no maobligar ti maysa a Kristiano a makipamumpon wenno makiboda iti simbaan? Kas pagarigan, ti maysa a di manamati a lalaki idagadagna iti Kristiano a baketna a kaduaenna iti kasta nga okasion. Mabalinna kadi ti kumuyog uray agpaliiw laeng? Kas konsiderasion iti kiddaw ni lakayna, mabalin a kumuyog ti asawa a babai, a determinado a saan a makiraman iti aniaman a narelihiosuan a seremonia. Iti sabali a bangir, mabalinna ti di mapan, ta amangan no maapektaran ti emosionna, a nalabit mangituggod kenkuana a mangikompromiso kadagiti nadiosan a prinsipio. Isu ti mangngeddeng. Kayatna la ketdi a natalna ti panunotna, a nadalus ti konsiensiana.—1 Timoteo 1:19.
Aniaman ti kasasaad, pagimbaganna no ilawlawagna iti asawana a saan a kaya ti konsiensiana ti makiraman iti aniaman a narelihiosuan a seremonia wenno makipaset iti panagkanta iti himno wenno agdumog bayat ti lualo. Gapu iti panangilawlawagna, mabalin a mapanunot ti asawa a lalaki a ti kaadda ti asawana ket mangyeg iti pakaibabainanna. Nalabit ikeddengna ti mapan nga agmaymaysa maigapu man laeng iti panagayatna iti asawana, panagraem iti patpatienna, wenno gapu ta kayatna a maliklikan ti aniaman a pakaibabainan. Ngem no pilitenna nga umay, mabalin a mapan ti asawa a babai ngem agpaliiw laeng.
Sipapanunottayo met koma iti mabalin nga epektona kadagiti kapammatiantayo no dumar-aytayo iti okasion iti maysa a narelihiosuan a pasdek. Maapektaran kadi ti konsiensia ti dadduma? Kumapuy ngata ti determinasionda a lumiklik iti idolatria? ‘Siguraduenyo ti napatpateg a bambanag,’ imbalakad ni apostol Pablo, “iti kasta awan koma ti pakapilawanyo ket saanyo a maitibkol ti sabsabali agingga iti aldaw ni Kristo.”—Filipos 1:10.
No ti dar-ayan ket okasion ti maysa nga asideg a kabagian, mabalin nga ad-adda ti panangpilit ti pamilia. Aniaman ti kasasaad, masapul a panunoten a nalaing ti Kristiano dagiti amin a banag a nairaman. Adda dagiti situasion nga awan ti parikut a makita ti kabsat a lalaki wenno babai no dar-ayanna ti pamumpon wenno kasar iti simbaan ta agpaliiw laeng. Ngem adda dagiti kasasaad a nasaysayaat ti saan a dumar-ay no maapektaran ti konsiensiatayo wenno ti konsiensia ti sabsabali. Aniaman ti sirkumstansia, siguraduen koma ti Kristiano a ti pangngeddengna ket saan a makaapektar iti panangtaginayonna iti naimbag a konsiensia iti imatang ti Dios ken dagiti tattao.