Yoga—Maysa Laeng nga Ehersisio Wenno Adda Pay Iramanna?
PAKASEKNAN unay ita dagiti tattao ti panagpakuttong ken nasalun-at a bagi. Dayta ti makagapu nga adu ti mapan kadagiti gymnasium ken health club. Dayta met laeng ti rason no apay a rinibu nga agnanaed kadagiti Lumaud a pagilian ti nagbaw-ing iti aramid a yoga a nasaknap kadagiti Dumaya a pagilian.
Dagiti tattao a madukdukotan, malmaldaangan, ken maup-upay nagbaw-ingda met iti yoga tapno maliwliwa ken marisutda dagiti parikutda. Nangnangruna nanipud idi dekada 1960, ti dekada dagiti rebelioso nga agtutubo, nagsaknap kadagiti Lumaud a pagilian ti panaginteres kadagiti relihion ken misterioso nga aramid dagiti Dumaya a pagilian. Ti nabuyogan iti panagbitla a panagmennamenna, a mainaig unay iti yoga, ket limmatak gapu kadagiti artista iti pelikula ken kumakanta iti rock. Gapu iti umad-adu a panaginteres iti yoga, mabalintay nga imtuoden: ‘Ti kadi yoga ket maysa laeng a panagehersisio a mangyeg iti nasalun-at, kalkalainganna a bagi ken natalna a panunot? Mabalin kadi ti ag-yoga a di malaokan iti narelihiosuan a kaipapanan? Mayanatup kadi ti yoga kadagiti Kristiano?’
Ti Pakasaritaan ti Yoga
Ti orihinal a Sanskrit a nagtaudan ti sao a “yoga” ket mangipasimudaag iti panagtipon wenno pannakisangol, panangkontrol. Para iti maysa a Hindu, ti yoga ket maysa a pamay-an wenno sistema a mangiturong iti pannakitipon iti nabileg a karkarna a puersa wenno espiritu. Nadeskribir dayta kas “ti pannakitipon ti amin a bileg ti bagi, panunot, ken kararua iti Dios.”
Kasano kabayagen ti yoga? Adda dagiti ladawan ti tattao a nakatugaw iti nadumaduma a posision ti yoga a nayukit kadagiti selio a masarakan iti Tanap ti Indus, iti agdama a Pakistan. Ti sibilisasion ti Tanap ti Indus ket pinetsaan dagiti arkeologo manipud iti maikatlo agingga iti maikadua a milenio K.K.P., a nakaas-asideg iti tiempo ti kultura ti Mesopotamia. Dagiti tedda iti dayta a dua a lugar ipakitada ti maysa a tao, a mangirepresentar iti maysa a didiosen, a nabalangatan iti sara ti animal ken linikmut dagiti animal, a mangipalagip ken ni Nimrod, ti “mannakabalin a mangnganup.” (Genesis 10:8, 9) Sigun kadagiti Hindu, dagiti nakatugaw nga agyogyoga ket ladawan ti dios a ni Siva, ti apo dagiti animal ken apo ti yoga, a masansan a mapagdayawan kas lingam, ti simbolo ti mabagbagi ti lalaki. Gapuna, ti libro a Hindu World awaganna ti yoga kas “pagalagadan a buklen ti asetiko a kaugalian, a nangnangruna a nagtaud sakbay ti panawen ti Aryan, a naglaon kadagiti tedda ti adu a nagkauna a kapanunotan ken kapaliiwan.”
Berbal ti damo a pannakayallatiw dagiti metodo ti yoga. Kalpasanna, ti Indian a mannursuro iti yoga a ni Patañjali detalyado nga insuratna dagita kas ti Yoga Sutra, a nagtalinaed kas ti kangrunaan a libro a mangisuro iti yoga. Sigun ken ni Patañjali, ti yoga ket “maysa a sistematiko a metodo tapno magun-od ti kinaperpekto, babaen ti panangkontrol ti nadumaduma nga elemento ti kinatao, pisikal ken naespirituan.” Manipud idi nangrugi agingga ita, nagbalin ti yoga a napateg a paset dagiti relihion iti Daya, nangnangruna ita iti Hinduismo, Jainismo, ken Budismo. Dadduma a mangan-annurot iti yoga ti mamati a daytoy ti mangiturong kadakuada iti moksha, wenno pannakawayawaya, babaen ti pannakitipon iti mangsaknap nga espiritu.
Gapuna, maisaludsodtayo manen: Mabalin kadi ti ag-yoga kas pisikal a panagehersisio laeng tapno magun-od ti nasalun-at a bagi ken nasimbeng a panunot, nga awan ti aniaman a pakainaiganna iti relihion? Maibatay iti pakasaritaanna, ti sungbat ket saan.
Ania ti Mabalin a Pangiturongan ti Yoga Kadakayo?
Ti panggep ti yoga kas maysa a pagalagadan isu ti panangiturongna iti tao iti naespirituan a pannakarikna iti pannakaitipon wenno pannakaikaykaysa iti mannakabalin nga espiritu. Ngem ania ngay dayta nga espiritu?
Iti Hindu World, kuna ti autor a ni Benjamin Walker maipapan iti yoga: “Mabalin a nagkauna daytoy a sistema ti karkarna a ritual, ket nataginayon ti yoga ti anagna a mangipamatmat iti okulto ken panagsalamangka.” Admitiren dagiti Hindu a pilosopo a ti panangannurot iti yoga ket makaited iti datdatlag a pannakabalin, nupay gagangay a kunaenda a saan a daytoy ti kangrunaan a panggep ti yoga. Kas pagarigan, iti libro nga Indian Philosophy, kuna ti dati a presidente ti India a ni Dr. S. Radhakrishnan maipapan iti yoga: ‘Ti panangkontrol iti bagi babaen dagiti nadumaduma a posision aramidenda a posible ti panangandur iti nakaro a pudot wenno lamiis. Makakita ken makangngeg ti agyogyoga uray iti adayo. Posible a mayallatiw iti sabali a tao ti kapanunotan ti maysa uray awan ti tulong dagiti kadawyan a sistema ti komunikasion. Mabalin pay a pagbalinen ti agyogyoga a di makita ti bagina.’
Ti buya a nakaidda ti agyogyoga kadagiti nakatangad a lansa wenno magmagna kadagiti beggang ket agparang a di agpayso para iti dadduma ken nakakatkatawa iti sabsabali. Ngem gagangay dagita a buya idiay India, kas iti panagtakder babaen ti maysa laeng a saka bayat a sipeperreng iti init iti sumagmamano nga oras ken panangkontrol iti panaganges a mamagbalin a posible a maikali ti sibibiag a tao iti napaut nga oras. Idi Hunio 1995, inreport ti The Times of India a maysa a babai nga agtawen iti tallo ket kagudua ti nakaidda nga awanan iti puot bayat a pinalabasda iti tianna ti maysa a lugan nga agdagsen iti nasurok a 750 kilo. Nagsiddaaw dagiti agbuybuya idi bimmangon ti ubing nga awan pulos dunorna. Innayon ti report: “Naan-anay a bileg daytoy ti yoga.”
Di pagduaduaan nga awan ti normal a tao a makaaramid iti uray ania kadagitoy. Gapuna, nasken nga imtuoden ti Kristiano: Ania ti ipamatmat dagitoy a gapuanan? Naggapuda kadi ken Jehova a Dios, “ti Kangatuan iti intero a daga,” wenno nagtaudda iti sabali a gubuayan? (Salmo 83:18) Nalawag ti ibaga ti Biblia iti daytoy a punto. Idi sumreken dagiti Israelita iti Naikari a Daga, a pagnanaedan dagiti Canaanita, binilin ni Jehova dagiti annak ti Israel babaen ken Moises: “Dika sursuruen nga aramiden ti maitunos kadagiti nakarimrimon a banag dagidiay a nasion.” Aniada a “nakarimrimon a banag”? Nangballaag ni Moises maibusor iti “asinoman a mangaramat iti panagpadles, maysa a managsalamangka wenno asinoman nga agsapul kadagiti partaan wenno maysa a mangkukulam.” (Deuteronomio 18:9, 10) Makarimon iti Dios dagitoy a bambanag gapu ta gapuanan ida dagiti demonio ken ti managbasol a lasag.—Galacia 5:19-21.
Saan nga Agpaay Kadagiti Kristiano
Saan man nga umanamong dagiti instruktor iti salun-at, ti yoga ket saan laeng a basta pisikal nga ehersisio. Ti libro a Hindu Manners, Customs and Ceremonies isalaysayna ti kapadasan ti dua nga agdadamo iti yoga a sinursuruan ti maysa a guru. Naadaw ti kinuna ti maysa kadakuada: ‘Saan nga ang-angaw ti panangikagumaak a mangtengngel iti panagangesko agingga a kabaelak, ket saakto la aganges manen no dandaniak matalimudaw. Maysa nga aldaw, iti agmatuon, ipagarupko a nakakitaak iti naraniag a bulan, a kasla aggargaraw. Iti sabali a gundaway, dardarepdepek a nabalkotak iti napuskol a daguyemyem iti tengnga ti aldaw. Maragragsakan unay ti mangisursuro kaniak idi dinakamatko dagitoy a nasirmatak. Impanamnamana kaniak, a di agbayag, ad-addanto pay a karkarna ti mapasarak gapu iti panagpenitensiak.’ Kuna ti maikadua a lalaki: ‘Binilinnak a tumangad iti langit kada aldaw a diak pulos agkirem wenno baliwan ti posisionko. No dadduma ipagarupko a nakakitaak iti maysa a gilap ti apuy iti tangatang; no dadduma kasla nakakitaak iti gumilgil-ayab a globo ken dadduma a layap. Naay-ayo unay ti mangisursuro kaniak kadagita a resulta ti panagreggetko.’
Dagita a karkarna a buya ti agparang a pakapnekan dagiti guru kas umiso a resulta ti panangragpatda iti pudno a panggep ti panagehersisio a yoga. Wen, ti kangrunaan a panggep ti yoga isu ti moksha, a nailawlawag kas ti pannakitipon iti dadduma a karkarna a di persona nga espiritu. Nadeskribir dayta kas “ti (inggagara) a panagsardeng ti aktibo a panagandar ti panunot.” Nabatad a maikontra daytoy iti kalat a naituyang kadagiti Kristiano, a nabalakadan: “Iparangyo ti bagbagiyo a maysa a sakripisio a sibibiag, nasantuan, makaay-ayo iti Dios, maysa a sagrado a panagserbi buyogen ti pannakabalinyo nga agrason. Ket dikay agpaisukogen iti daytoy a sistema ti bambanag, no di ket agbalbaliwkayo babaen ti panangpabaroyo iti panunotyo, tapno mapaneknekanyo iti bagbagiyo ti naimbag ken makaay-ayo ken naan-anay a pagayatan ti Dios.”—Roma 12:1, 2.
Personal a banag ti panangpili no ania nga ehersisio ti kayatyo nga aramiden. Kaskasdi, saan nga ipalubos dagiti Kristiano ti aniaman—panagwatwat man dayta ti bagi, panangan, panaginum, panagkawkawes, paglinglingayan, wenno sabali pay a banag—a mangmulit iti relasionda ken ni Jehova a Dios. (1 Corinto 10:31) Para kadagidiay ager-ehersisio gapu iti salun-at, adu nga ehersisio ti mabalin nga aramiden a saan a nasken ti maipasango kadagiti peggad ti espiritismo ken okultismo. Bayat a liklikantayo dagiti aramid ken pammati a nairamut iti palso a relihion, sapay koma ta sinanamatayo iti bendision ti Dios a maysa a nalinteg a baro a sistema ti bambanag a pangtagiragsakantayo iti perpekto a bagi ken isip iti agnanayon.—2 Pedro 3:13; Apocalipsis 21:3, 4.
[Dagiti Ladawan iti panid 22]
Adu ti mangtagtagiragsak iti makagunggona nga aktibidad a saan a nainaig iti espiritismo