Pakasarakanyo Kadagiti Pudno a Naespirituan a Prinsipio?

“NO SUMUROTKA iti maysa a relihion gapu laeng ta dayta ti nabangonam, apay a dika pilien ti relihion dagiti Celt nga inalagad dagiti inapotayo 2,000 a tawenen ti napalabas?” inyimtuod ni Rodolphe a kasla mangumsi. Nakaisem ti agtutubo a nakangngeg iti dayta a kapanunotanna.

“Nakapatpateg kaniak ti relasionko iti Dios,” kuna ni Rodolphe. “Diak pulos kanunongan ti kapanunotan a masapul a sumurotak iti narelihiosuan a pammati gapu ta dayta ti nabangonak, gapu laeng ta ti maysa a relihion ket inalagad dagiti kapuonak a nagbiag sangapulo wenno ginasgasut a tawenen ti napalabas.” Siaannad nga inutob ni Rodolphe daytoy a banag; saanna a minatmatan a maysa laeng a banag a tinawidna.

Nupay saan unayen a nainget ti panangsurot dagiti kaputotan iti maysa a relihion, naisinggalut pay laeng ti kaaduan a tattao iti relihion ti pamiliada. Ngem kanayon kadi nga umiso ti agtalinaed iti narelihiosuan a prinsipio dagiti nagannak? Ania ti kuna ti Biblia?

Kalpasan ti 40 a tawen iti desierto, ni Josue, ti simmukat ken ni Moises, pinagpilina dagiti Israelita: “Ita no dakes kadagiti matayo ti panagserbi ken Jehova, agpilikayo ita nga aldaw maipaay iti bagbagiyo no siasino ti pagserbianyonto, no ti didios a nagserbian dagidi ammayo nga adda idi iti ballasiw ti Karayan wenno ti didios dagiti Amoreo nga iti dagada ti pagnanaedanyo. Ngem no maipapan kaniak ken iti sangakabbalayak, agserbikamto ken Jehova.”​—Josue 24:15.

Maysa kadagiti amma a tinukoy ni Josue isu ni Tare, ti ama ni Abraham, nga agnanaed iti siudad ti Ur, a masarakan idi iti daya ti Karayan Eufrates. Awan ti adu nga ibaga ti Biblia maipapan ken ni Tare, malaksid iti panagdayawna kadagiti didiosen. (Josue 24:2) Ti anakna a ni Abraham, nupay awanan iti naan-anay a pannakaammo iti panggep ti Dios, situtulok idi a mangpanaw iti siudadna idi imbilin ni Jehova nga aramidenna dayta. Wen, pinili ni Abraham ti relihion a naiduma iti amana. Gapu iti dayta, inawat ni Abraham dagiti bendision nga inkari ti Dios kenkuana, ken adu a relihion ti mangbigbig kenkuana kas ti “ama dagiti amin a mamati iti Dios.”​—Roma 4:11, Naimbag a Damag Biblia.

Salsalaysayen met ti Biblia ti nasayaat a pakasaritaan ni Ruth, maysa a kapuonan ni Jesu-Kristo. Nabalo ni Ruth, maysa a Moabita a nayasawa iti maysa nga Israelita, ket masapul nga agpili: agtalinaed iti pagilianna wenno kaduaanna ti katuganganna a babai nga agsubli idiay Israel. Gapu ta nabigbigna a nakapatpateg ti panagdayaw ken ni Jehova no maidilig iti idolatroso a panagdayaw dagiti dadakkelna, impakaammo ni Ruth iti katuganganna a babai: “Dagiti kailiam isudanto dagiti kailiak, ket ti Diosmo Diosko.”​—Ruth 1:16, 17.

Iti panangkomentona iti pateg daytoy a rekord iti katalogo ti Biblia, ilawlawag ti Dictionnaire de la Bible a daytoy a salaysay ipakitana “no kasano a ti ganggannaet a babai, a nayanak iti pagano nga ili a kabusor ken kagura ti Israel, . . . gapu iti ayatna iti nasion ni Jehova ken iti panagdayaw kenkuana, naparaburan nga agbalin a kapuonan ni nasantuan nga Ari David.” Saan a nagalikaka ni Ruth a nangpili iti relihion a naiduma iti panagdayaw dagiti dadakkelna. Kas resulta dayta a pangngeddeng, binendisionan ti Dios.

Ti rekord a mangisalsalaysay iti panangrugi ti Kristianidad ti ad-adda a mangilawlawag kadagiti rason no apay a pinanawan dagiti adalan ni Jesus ti relihion dagiti kapuonanda. Iti makaguyugoy unay a palawagna, indagadag ni apostol Pedro kadagiti dumdumngeg kenkuana a ‘maisalakanda iti daytoy nakillo a kaputotan’ babaen ti panagbabawi kadagiti basolda ken agpabautisar iti nagan ni Jesu-Kristo. (Aramid 2:37-41) Maysa kadagiti naisangsangayan unay a pagarigan isu ni Saulo, maysa a Judio a manangidadanes kadagiti Kristiano. Iti dalanna nga agturong iti Damasco, nasirmatana ni Kristo. Kalpasan dayta, nagbalin a Kristiano ni Saulo ken nabigbig kas ti apostol Pablo.​—Aramid 9:1-9.

Awan ti kasta a naisangsangayan a kapadasan ti kaaduan kadagiti nagkauna a Kristiano. Kaskasdi, masapul a panawanda amin ti Judaismo wenno ti panagdayaw kadagiti nagduduma a pagano a didiosen. Kasta ti inaramid dagidiay nangawat iti Kristianidad gapu ta naan-anay a naammuanda ti kinapudno, masansan a kalpasan ti nabayag a panagsasarita maipapan iti akem ni Jesus kas ti Mesias. (Aramid 8:26-40; 13:16-43; 17:22-34) Silalawag a napakaammuan dagitoy a nagkauna a Kristiano a kasapulan a balbaliwanda ti biagda. Naawis ti amin, agpadpada dagiti Judio ken di Judio, ngem di nabalbaliwan ti mensahe. Tapno maay-ayo ti Dios, masapul ti sumurot iti baro a porma ti panagdayaw, ti Kristianidad.

Panagpili a Napateg Kadatayo

Idi umuna a siglo, sigurado a kasapulan ti tured tapno maiwaksi dagiti narelihiosuan a tradision ti pamilia​—Judaismo, panagdayaw iti emperador, panagdayaw kadagiti pagano a didiosen​—ken sumurot iti relihion a lalaisen agpadpada dagiti Judio ken Romano. Di nagbayag, nagresulta daytoy a panagpili iti nakaro a pannakaidadanes. Ita, kasapulan ti kasta met la a tured iti panagkedked a “maituggod ken maisinggalut iti agraraira nga atmospera ti pannakitunos,” kas ilawlawag ni Hippolyte Simon, Katoliko nga obispo ti Clermont-Ferrand, iti librona a Vers une France païenne? (Ti Panagbalin ti Francia a Pagano?) Kasapulan ti tured iti pannakitimpuyog iti bassit a narelihiosuan a grupo a pasaray padaksenda, dagiti Saksi ni Jehova.

Ni Paul, maysa nga agtutubo manipud Bastia, Corsica, ket napadakkel iti Katoliko a relihion. Sagpaminsan, nakipaset ni Paul kadagiti aktibidad ti simbaan, kas iti panaglako iti bibingka tapno makaur-or iti kuarta para iti Katoliko nga organisasion a mangipapaay iti tulong. Gapu ta tarigagayanna ti maaddaan iti nalawlawag a pannakaawat iti Biblia, immanamong a regular a makipagadal kadagiti Saksi ni Jehova. Idi agangay, naammuanna nga agnanayon a makagunggona dagiti ad-adalenna. Maitunos iti dayta, naan-anay nga inawat ni Paul dagiti prinsipio ti Biblia ket nagbalin a maysa kadagiti Saksi ni Jehova. Rinaem dagiti dadakkelna ti desisionna, a saan a nakaapektar iti kinasinged ti pamiliada.

Agnanaed ni Amélie idiay makin-abagatan a Francia. Dagiti kapamiliana ket uppat a kaputotan a Saksi ni Jehova. Apay nga inkeddengna nga awaten dagiti narelihiosuan a prinsipio dagiti dadakkelna? “Saanka nga agbalin a Saksi ni Jehova gapu ta Saksi ni Jehova dagiti dadakkelmo wenno apongmo,” kunana. “Ngem mapanunotmonto, ‘Daytoy ti relihionko agsipud ta adda ditoy dagiti patpatiek.’” Kas kadagiti adu a sabsabali nga agtutubo a Saksi ni Jehova, ammo ni Amélie a dagiti natibker a narelihiosuan a patpatienna mangted kenkuana iti panggep iti biag a gubuayan ti agnanayon a ragsak.

No Apay nga Awaten Dagiti Nadiosan a Prinsipio

Ti libro a Proverbio, kapitulo 6, bersikulo 20, parparegtaenna dagidiay agtarigagay a mangay-ayo iti Dios: “Salimetmetam, O anakko, ti bilin ni amam, ket saanmo a baybay-an ti linteg ni inam.” Imbes nga irekomendana ti basta panagtulnog, ti kasta a balakad idagadagna kadagiti agtutubo nga awatenda dagiti nadiosan a pagalagadan babaen ti panangpabilegda iti pammatida ken babaen ti bukodda a pannakidasig iti Dios. Ni apostol Pablo inawisna dagiti kakaduana a ‘mangsigurado kadagiti amin a banag,’ a sukimatenda no dagiti maisursuro kadakuada ket maitunos iti Sao ti Dios ken iti pagayatanna, ken situtunos nga agtignayda.​—1 Tesalonica 5:21.

Kasta ti inaramid a desision ti nasurok nga innem a milion a Saksi ni Jehova, agtutubo ken nataengan, napadakkelda man wenno saan iti Kristiano a sangakabbalayan. Babaen ti naannad a panangadal iti Biblia, nakasapulda kadagiti mapagtalkan a sungbat kadagiti saludsodda maipapan iti panggep ti biag ken naaddaanda iti nalawag a pannakaawat iti pagayatan ti Dios para iti sangatauan. Apaman a naammuanda daytoy a pannakaammo, inawatda dagiti nadiosan a prinsipio ken inaramidda ti kabaelanda a mangaramid iti pagayatan ti Dios.

Regularka man nga agbasbasa iti daytoy a magasin wenno saan, apay a dimo awaten ti tukon dagiti Saksi ni Jehova a tulongandaka a mangusar iti Biblia tapno masukimatmo dagiti naespirituan a prinsipio. Iti kasta a pamay-an, mabalinam a ‘nanamen ken kitaen a ni Jehova naimbag’ ken maaddaan iti pannakaammo a, no mayaplikar, mangiturong iti biag nga agnanayon.​—Salmo 34:8; Juan 17:3.

[Ladawan iti panid 5]

Dagiti uppat a kaputotan ti pamilia a Saksi ni Jehova idiay Francia

[Ladawan iti panid 7]

Pinili ni Ruth ti agserbi ken ni Jehova imbes a kadagiti didiosen dagiti ammana