Napateg ti Ayat

AGKASAPULAN iti ayat ti amin a tao aniaman ti edad, kultura, lenguahe, wenno pulida. Saanda a naragsak no saan a mapennek dayta a kasapulanda. Insurat ti maysa a managsirarak maipapan iti medisina: “Dakkel ti impluensia ti ayat ken kinasinged no ania ti mamagsakit ken no ania ti mamagimbag kadatayo, no ania ti mamagladingit ken no ania ti mangyeg iti kinaragsak, no ania ti mamagsagaba ken no ania ti mangpabang-ar. No ti baro nga agas ket addaan iti isu met laeng nga epekto, nganngani amin a doktor iti pagilian irekomendada dayta kadagiti pasienteda. Maibilang a panagliway ti saan a panangireseta iti dayta.”

Kaskasdi, ti moderno a kagimongan, nangruna ti media ken dagiti nalatak a modelo, ad-adda nga itandudona ti kinabaknang, pannakabalin, kinalatak, ken sekso ngem iti kasapulan ti tao a nabara, naayat a relasion. Adu nga edukador ti mangigunamgunam kadagiti sekular a kalat ken karera, a dagita ti kangrunaan a pangibatayanda iti balligi. Pudno, napateg ti edukasion ken ti panangpatanor kadagiti abilidad ti maysa a tao, ngem rumbeng kadi nga ipamaysa ti pananggun-od kadagitoy nga uray la awanen tiempo ti maysa para iti pamilia ken gagayyemna? Sigun iti maysa nga edukado a nagkauna a mannurat ken nasaririt a nangpalpaliiw iti kababalin dagiti tattao, ti natalunggadingan ngem di maipatpateg nga indibidual ket mayasping iti “agun-uni a suer wenno umaw-aweng a piangpiang.” (1 Corinto 13:1) Mabalin a bumaknang ti kasta a tao, natan-ok pay ketdi, ngem saan pulos a naragsak.

Ni Jesu-Kristo, a nauneg ti pannakaawat ken naisangsangayan ti kinadungngona kadagiti tattao, imbilangna a napateg a paset ti sursurona ti panagayat iti Dios ken iti kaarruba. Kinunana: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo. . . . Masapul nga ayatem ti padam a tao a kas iti bagim.” (Mateo 22:37-39) Dagidiay laeng mangtungpal kadagitoy a sasao ti pudno a pasurot ni Jesus. Gapuna, kinunana: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”​—Juan 13:35.

Ngem kasano a ti maysa masukayna ti ayat iti sidong ti agdama a lubong? Ken kasano a maisuro dagiti nagannak ti ayat kadagiti annakda? Sungbatan ti sumaganad nga artikulo dagitoy a saludsod.

[Dagiti Ladawan iti panid 3]

Maysa a karit ti panangsukay iti ayat iti lubong nga agraraira ti kinaagum