Siasino Dagiti Rumbeng nga Ayatenyo?
“Masapul nga ayatem ti kaarrubam a kas iti bagim.”—MATEO 22:39.
1. No ay-ayatentayo ni Jehova, apay a masapul nga ayatentay met ti padatayo a tao?
IDI adda nagsaludsod ken Jesus no ania ti kangrunaan a bilin, insungbatna: “Masapul nga ayatem ni Jehova a Diosmo iti amin a pusom ken iti amin a kararuam ken iti amin a panunotmo.” Kalpasanna, inadawna ti maikadua a bilin nga umasping iti umuna: “Masapul nga ayatem ti kaarrubam a kas iti bagim.” (Mateo 22:37, 39) Wen, ti panagayat iti pada a tao ket pakailasinan ti maysa a Kristiano. Kinapudnona, no ay-ayatentayo ni Jehova, masapul nga ayatentayo ti padatayo a tao. Apay? Agsipud ta maipakitatayo ti ayattayo iti Dios babaen ti panagtulnog iti Saona, a mangibilbilin nga ayatentayo ti padatayo a tao. Gapuna, no saantay nga ayaten dagiti kakabsattayo, saan a napudno ti ayattayo iti Dios.—Roma 13:8; 1 Juan 2:5; 4:20, 21.
2. Ania a kita ti ayat ti rumbeng nga ipakitatayo iti padatayo a tao?
2 Idi kinuna ni Jesus a rebbengtay nga ayaten ti padatayo a tao, saan la a pannakigayyem ti kayatna a sawen. Tuktukoyenna ti ayat a naiduma iti ayat nga adda iti uneg ti pamilia wenno iti nagbaetan ti lalaki ken babai. Agsasao maipapan iti klase ti ayat nga ipakpakita ni Jehova kadagiti dedikado nga adipenna ken ti ayat nga ipakpakitada kenkuana. (Juan 17:26; 1 Juan 4:11, 19) Maysa nga eskriba a Judio—a nadlaw ni Jesus a nasaririt gapu iti panagsasaona—ti immanamong ken ni Jesus a ti panagayat iti Dios ket rumbeng a ‘buyogen ti amin a puso ken buyogen ti amin a pannakaawat ken buyogen ti amin a pigsa.’ (Marcos 12:28-34) Husto ti imbagana. Nainaig ti emosion ken panunottayo iti ayat nga ipakita ti maysa a Kristiano iti Dios ken iti padana a tao. Agubbog dayta iti puso ken iturong ti panunot.
3. (a) Kasano nga insuro ni Jesus ti “maysa a lalaki a nalaing iti Linteg” a rumbeng a palawaenna ti panangmatmatna no asino ti kaarrubana? (b) Kasano nga agaplikar kadagiti Kristiano ita ti pangngarig ni Jesus?
3 Kas insalaysay ni Lucas, idi kinuna ni Jesus a rebbengtay nga ayaten ti kaarrubatayo, insaludsod ti “maysa a lalaki a nalaing iti Linteg”: “Asino a pudpudno ti kaarrubak?” Simmungbat ni Jesus babaen ti maysa a pangngarig. Adda maysa a tao a kinabkabil dagiti tulisan, innalada amin nga adda kenkuana, sada pinanawan iti igid ti dalan a dandanin matay. Nairana a limmabas ti maysa a padi, ket kalpasanna limmabas met ti maysa a Levita. Agpada a binaybay-anda. Kamaudiananna, limmabas met sadiay ti maysa a Samaritano. Idi nakitana ti nasugatan a lalaki, naasian ket tinaripatona a naimbag. Siasino kadagiti tallo ti kaarruba daydi tao a naranggasan? Nabatad ti sungbat. (Lucas 10:25-37) Nalabit nasdaaw daydi lalaki a nalaing iti Linteg idi kinuna ni Jesus a ti maysa a Samaritano ket mabalin a naim-imbag a kaarruba ngem ti maysa a padi ken Levita. Nalawag a tultulongan ni Jesus daydi a lalaki a dina kedngan ti panagayatna iti padana a tao. Kasta met ti panagayat dagiti Kristiano. Usigenyo no siasino ti ayatenda.
Ayat iti Uneg ti Pamilia
4. Sadino ti umuna a pangipakitaan ti maysa a Kristiano iti ayat?
4 Ayaten dagiti Kristiano dagiti kameng ti pamiliada—ti agassawa ayatenda ti tunggal maysa, dagiti nagannak ayatenda ti annakda. (Eclesiastes 9:9; Efeso 5:33; Tito 2:4) Pudno, adda nainkasigudan nga ayat iti kaaduan a pamilia. Nupay kasta, dagiti damag maipapan iti panagsina, panangabuso iti asawa, ken dagiti nabaybay-an ken maab-abuso nga ubbing ipakitana a marirriribuk ita ti pamilia, ket mabalin a saan nga umdas ti natural nga ayat iti pamilia a mamagkaykaysa iti dayta. (2 Timoteo 3:1-3) Tapno pudpudno a naragsak ti biag ti pamiliada, kasapulan nga ipakita dagiti Kristiano ti ayat nga adda ken Jehova ken ni Jesus.—Efeso 5:21-27.
5. Siasino ti pagpatulongan dagiti nagannak a mangpadakkel iti annakda, ket ania ti resulta daytoy kadagiti adu?
5 Dagiti Kristiano a nagannak ibilangda dagiti annakda a kas tawid nga intalek ni Jehova, ket agpannurayda iti tulongna a mangpadakkel kadakuada. (Salmo 127:3-5; Proverbio 22:6) Iti kastoy a pamay-an, ipakpakitada ti Nakristianuan nga ayat, a tumulong kadakuada a mangsalaknib iti annakda kadagiti dakes nga impluensia a mabalin a pakatnagan dagiti agtutubo. Kas resultana, adu a Kristiano a nagannak ti maragsakan a kas iti maysa nga ina idiay Netherlands. Idi maimatanganna ti panagpabautisar ti anakna a lalaki—maysa kadagiti 575 a nabautisaran idiay Netherlands idi napan a tawen—nagsurat iti kastoy: “Iti daytoy a kanito, nasupapakan ti panagsakripisiok iti 20 a tawen. Bale awanen kaniak ti amin a panawen ken bannog—agraman ti saem, rigat, ken ladingit a napasarak.” Anian a ragsakna ta sibubulos a pinili ti anakna ti agserbi ken Jehova. Iti kangatuan a bilang dagiti agibumbunannag a 31,089 a nagreport idiay Netherlands idi napan a tawen, adu kadakuada ti sinursuruan dagiti dadakkelda nga agayat ken Jehova.
6. Kasano a makatulong ti Nakristianuan nga ayat a mangpalagda iti relasion ti agassawa?
6 Inawagan ni Pablo ti ayat kas “naan-anay a singgalut ti panagkaykaysa.” Kabaelan ti ayat a taginayonen ti relasion ti agassawa uray kadagiti narikut a tiempo. (Colosas 3:14, 18, 19; 1 Pedro 3:1-7) Idiay Rurutu, maysa a bassit nga isla nga agarup 700 kilometro ti kaadayona manipud Tahiti, adda lalaki a binusor iti kasta unay ni baketna idi rinugianna ti makipagadal iti Biblia kadagiti Saksi ni Jehova. Idi agangay, impanaw ni baketna dagiti annakda, sada napan nagnaed idiay Tahiti. Ngem impakita latta daytoy a lalaki ti ayatna babaen ti regular a panangipatulodna iti kuarta iti asawana ken panagteleponona tapno ammuenna no adda aniaman a kasapulan ni baketna wenno dagiti annakda. Inaramidna ngarud ti amin a kabaelanna tapno matungpalna dagiti obligasionna kas Kristiano. (1 Timoteo 5:8) Sangkakararagna nga agkaykaysanto manen koma ti pamiliana, ket idi aganay nagsubli ni baketna. Iti panagsubli ti asawana, nabuyogan iti “ayat, panagibtur, kinaalumamay ti karirikna” ti panangtratona kenkuana. (1 Timoteo 6:11) Nagpabautisar idi 1998, ket napalalo ti ragsakna idi immannugot ni baketna nga agadal iti Biblia. Dayta a panagadal ket maysa kadagiti 1,351 a naikondukta iti teritoria a masakupan ti sanga nga opisina idiay Tahiti idi napan a tawen.
7. Sigun iti maysa a lalaki idiay Alemania, ania ti nangpalagda iti relasionda nga agassawa?
7 Idiay Alemania, binusor ti maysa a lalaki ti panaginteres ti asawana iti kinapudno a linaon ti Biblia ta patienna a kayat dagiti Saksi ni Jehova nga allilawen ti asawana. Ngem idi agangay, sinuratanna daydi Saksi a damo a nakisarita iti asawana: “Agyamanak iti panangyam-ammom ken baketko kadagiti Saksi ni Jehova. Idi damo, madanaganak agsipud ta nakaad-adu ti dakes a madamdamagko maipapan kadakuada. Ngem idi napankami nakigimong ken baketko, nautobko a nagkamaliak. Ammok a pudno ti maad-adalko, ket dayta ti nangpalagda iti relasionmi nga agassawa.” Karaman ti adu a pamilia a nagkaykaysa iti nadiosan nga ayat kadagiti 162,932 a Saksi ni Jehova idiay Alemania—ken kadagiti 1,773 kadagiti isla a masakupan ti sanga nga opisina idiay Tahiti.
Panagayat Kadagiti Kristiano a Kakabsattayo
8, 9. (a) Siasino ti mangibagbaga nga ayatentayo dagiti kakabsattayo, ket ti ayat tignayennatay a mangaramid iti ania? (b) Mangtedkayo iti ehemplo no kasano a ti ayat matulonganna dagiti kakabsat nga agbibinnadang.
8 Kinuna ni Pablo kadagiti Kristiano idiay Tesalonica: “Sinursuruannakayo a mismo ti Dios nga ayatenyo ti maysa ken maysa.” (1 Tesalonica 4:9) Wen, agiinnayat dagidiay ‘sinursuruan ni Jehova.’ (Isaias 54:13) Iyeb-ebkasda ti ayatda babaen ti aramid, kas ken Pablo idi kinunana: “Babaen ti ayat agpaadipenkayo iti maysa ken maysa.” (Galacia 5:13; 1 Juan 3:18) Aramidenda daytoy, kas pagarigan, no sarungkaranda dagiti masakit a kakabsat, liwliwaenda dagiti malmalday, ken saranayenda dagiti nakapsut. (1 Tesalonica 5:14) Rumangrang-ay ti naespirituan a paraisotayo gapu iti napaypayso a Nakristianuan nga ayattayo.
9 Iti Ancón Congregation—maysa kadagiti 544 a kongregasion idiay Ecuador—impakita dagiti kakabsat ti ayatda iti praktikal a pamay-an. Gapu iti krisis ti ekonomia, naawananda iti trabaho wenno pagsapulan, isu nga inkeddeng dagiti agibumbunannag ti agiremedio iti kuarta babaen ti panaglako iti taraon kadagiti mangngalap iti lugarda apaman a makaawid dagitoy manipud iti panagdaklisda iti rabii. Nagtitinnulongda amin, agraman dagiti ubbing. Mangrugida iti ala una ti parbangon tapno nakasaganan ti taraon iti alas kuatro no agawiden dagiti mangngalap. Pagraranudan dagiti kakabsat ti naglakuanda sigun iti kasapulanda. Pammaneknek ti Nakristianuan nga ayat ti kasta a panagtitinnulong.
10, 11. Kasanotay a maipakita ti ayat kadagiti kakabsat a ditay am-ammo?
10 Nupay kasta, saan laeng a dagiti Kristiano a personal nga am-ammotayo ti ayatentayo. Kinuna ni apostol Pedro: “Maaddaankayo ti ayat iti intero a timpuyog dagiti kakabsat.” (1 Pedro 2:17) Ayatentayo dagiti kakabsattayo agsipud ta kapadatay amin ida nga agdaydayaw ken ni Jehova a Dios. Kadagiti panawen ti krisis, addaantayo iti gundaway a mangipakita iti daytoy nga ayat. Kas pagarigan, iti 2000 a tawen serbisio, dinidigra ti nakaro a layus ti Mozambique, ken adu ti pimmanglaw idiay Angola gapu iti gerra sibil. Adu kadagiti 31,725 a kakabsat idiay Mozambique ken kadagiti 41,222 idiay Angola ti naapektaran kadagitoy a pasamak. Gapuna, nangipatulod dagiti Saksi idiay South Africa iti nawadwad nga abasto a pangsaranay kadagiti kakabsat kadagita a pagilian. Impakitada ti ayat babaen ti sitatallugod a panangtedda iti ‘pagsursurokanda’ kadagiti agkasapulan a kakabsatda.—2 Corinto 8:8, 13-15, 24.
11 Maiparangarang met ti ayat no tumulong dagiti kakabsat iti adu a pagilian a mangbangon kadagiti Kingdom Hall ken Assembly Hall kadagiti saan unay a narang-ay a pagilian. Alaentay a pagarigan ti Solomon Islands. Nupay nakaro ti riribuk, 6 porsiento ti nginatuan ti bilang dagiti agibumbunannag idiay Solomon Islands idi napan a tawen, ket dimmanon iti 1,697 ti bilangda. Implanoda ti agibangon iti Assembly Hall. Nupay adu dagiti pimmanaw iti dayta a pagilian, adda dagiti boluntario a taga Australia nga immay timmulong nga agibangon. Di nagbayag, nasken nga agawiden dagiti boluntario, ngem sada la nagawid idi nasanaydan dagiti kakabsat sadiay a mangileppas iti pundasion. Naggapu idiay Australia dagiti nasangalen a landok nga estruktura ti Assembly Hall, ket ti pannakaileppas daytoy nagsayaat a pasdek a pagdaydayawan—iti panawen nga adu a pasdek ti nabaybay-an—ket nagsayaat a pammaneknek iti nagan ni Jehova ken iti ayat dagiti kakabsat.
Kas iti Dios, Ayatentayo ti Lubong
12. Kasanotay a matulad ni Jehova iti pannakilangen kadagiti saantay a kapammatian?
12 Ti pamilia ken dagiti kakabsattayo laeng kadi ti ayatentayo? Saan, no ‘tuladentayo ti Dios.’ Kinuna ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangalagad iti pammati kenkuana saan koma a madadael no di ket maaddaan iti agnanayon a biag.” (Efeso 5:1; Juan 3:16) Kas ken Jehova a Dios, ayatentayo ti amin a tattao—agraman dagidiay saantay a kapammatian. (Lucas 6:35, 36; Galacia 6:10) Nangnangruna iti daytoy a banag, ikasabatayo ti naimbag a damag ti Pagarian ken ipakaammotayo kadagiti sabsabali ti maipapan iti naindaklan nga ayat ti Dios kadakuada. Mabalin nga agbanag daytoy iti pannakaisalakan ti asinoman a dumngeg.—Marcos 13:10; 1 Timoteo 4:16.
13, 14. Ania ti sumagmamano a kapadasan dagiti kakabsat a nangipakita iti ayat kadagiti saan a Saksi, uray no narigat nga aramiden dayta?
13 Alaentay a pagarigan ti uppat nga special pioneer idiay Nepal. Naidestino dagitoy iti maysa a siudad iti makin-abagatan a laud ti pagilian, ket iti napalabas a lima a tawen, impakitada ti ayatda babaen ti siaanus a panangasabada iti siudad ken kadagiti nasulinek a purok. Tapno mawanas ti teritoriada, masansan nga agbisikletada iti adu nga oras uray no nakapudpudot ti panawen. Nasayaat ti bunga ti ayat ken ‘panagibturda iti aramid a naimbag’ idi a nabuangay ti maysa a grupo para iti panagadal iti libro iti maysa kadagiti purok. (Roma 2:7) Idi Marso 2000, 32 ti immay dimngeg iti palawag publiko ti sumarsarungkar a manangaywan ti sirkito. Idiay Nepal, dimmanon iti 430 ti kangatuan a bilang dagiti agibumbunannag idi napan a tawen—maysa daytoy a 9 porsiento nga irarang-ay. Nalawag a bembendisionan ni Jehova ti regta ken ayat nga ipakpakita dagiti kakabsat iti dayta a pagilian.
14 Idiay Colombia, napan kinasabaan dagiti temporario nga special pioneer dagiti Wayuu nga Indian. Tapno maaramidda daytoy, masapul nga agadalda iti baro a pagsasao, ngem nasubadan ti naayat a pannakaseknanda idi a 27 ti timmabuno iti palawag publiko nupay nagtudo iti napigsa. Gapu iti ayat ken regta a kas iti impakita dagitoy a payunir, ngimmato iti 5 porsiento ti bilang dagiti agibumbunannag idiay Colombia nga agdagupen iti 107,613. Idiay Denmark, kayat ti maysa a baketen a kabsat nga iranud ti naimbag a damag kadagiti sabsabali, ngem isu ket baldado. Ngem saan a naupay. Sinuratanna dagiti interesado a tattao. Iti agdama, 42 a tattao ti kasinsinnuratna ken 11 ti iyad-adalanna iti Biblia. Maysa daytoy a kabsat kadagiti 14,885 nga agibumbunannag a nagreport idiay Denmark idi napan a tawen.
Ayatenyo Dagiti Kabusoryo
15, 16. (a) Sigun ken Jesus, siasino pay ti ayatentayo? (b) Kasano a nakilangen a siaayat dagiti responsable a kakabsat iti maysa a tao a namadpadakes kadagiti Saksi ni Jehova?
15 Kinuna ni Jesus iti lalaki a nalaing iti Linteg a maibilang a kaarruba ti maysa a Samaritano. Iti Sermonna iti Bantay, kinuna pay ni Jesus: “Nangngegyo a naikuna, ‘Masapul nga ayatem ti kaarrubam ket guraem ti kabusormo.’ Nupay kasta, kunak kadakayo: Itultuloyyo nga ayaten dagiti kabusoryo ket ikararaganyo dagidiay mangidaddadanes kadakayo; tapno mapaneknekanyo ti bagbagiyo nga annak ni Amayo nga adda iti langlangit.” (Mateo 5:43-45) Uray no busorennatayo ti maysa a tao, ‘itultuloytayo a parmeken ti dakes babaen ti naimbag.’ (Roma 12:19-21) No mabalin, iranudtayo kenkuana ti nagpateg a banag nga adda kadatayo, ti kinapudno.
16 Idiay Ukraine, kinuna ti maysa nga artikulo iti pagiwarnak a Kremenchuk Herald a maysa kano a napeggad a kulto dagiti Saksi ni Jehova. Serioso daytoy agsipud ta idiay Europa, kasta ti ibagbaga ti dadduma maipapan kadagiti Saksi ni Jehova tapno maipapati kadagiti umili a rumbeng a maingetan wenno mapawilan ti trabaho dagiti Saksi. Gapuna, nakiddaw iti editor a mangipablaak iti press release a mangatur iti nadakamat nga artikulo. Immannugot, ngem iti impablaakna a press release, imbagana a pudno ti impormasion a nakaibasaran ti orihinal nga artikulo. Isu a napan manen kenkuana dagiti responsable a kakabsat ket nangidatagda iti kanayonan nga impormasion. Kamaudiananna, nautob ti editor a saan a pudno ti naisurat iti orihinal nga artikulo, ket binabawina dayta babaen ti panangipablaakna iti maysa nga artikulo. Ti prangka ken naanus a pannakilangen kenkuana isu ti naayat a wagas a panangtaming iti kastoy a kasasaad, ket nagsayaat ti resultana.
Kasanotay a Mapatanor ti Ayat?
17. Ania ti mangipakita a mabalin a saan a nalaka a kanayon ti makilangen a siaayat kadagiti sabsabali?
17 No mayanak ti maladaga, maayatan a dagus kenkuana dagiti dadakkelna. Ngem saan a kanayon a nainkasigudan ti panagayat kadagiti nataenganen. Nalabit a dayta ti makagapu a maulit-ulit nga ibagbaga ti Biblia nga agiinnayattayo—sursuruentayo ti agiinnayat. (1 Pedro 1:22; 4:8; 1 Juan 3:11) Ammo ni Jesus a masubok ti ayattayo idi kinunana a rumbeng a pakawanentayo ti kabsattayo “agingga iti mamimpitopulo ket pito.” (Mateo 18:21, 22) Indagadag met ni Pablo nga ‘itultuloytayo ti agiinnanus.’ (Colosas 3:12, 13) Di pakasdaawan a naibilin kadatayo: “Surotenyo ti ayat”! (1 Corinto 14:1) Kasanotay a maaramid daytoy?
18. Ania ti tumulong kadatayo a mangayat kadagiti sabsabali?
18 Umuna, laglagipentay a kanayon ti ayattayo ken Jehova a Dios. Napigsa daytoy nga ayat a manggutugot kadatayo a mangayat iti padatayo a tao. Apay? Agsipud ta pakaidayawan ken pakaitan-okan ti nailangitan nga Amatayo no aramidentay dayta. (Juan 15:8-10; Filipos 1:9-11) Maikadua, matmatantayo dagiti bambanag a maitunos iti panangmatmat ni Jehova. Kada makabasoltayo, ni Jehova ti pakabasolantayo; ngem maulit-ulit a pakawanennatayo ken ay-ayatennatay latta. (Salmo 86:5; 103:2, 3; 1 Juan 1:9; 4:18) No tuladentayo ti panangmatmat ni Jehova, matignaytayo a mangayat kadagiti dadduma ken mangpakawan kadagiti basolda kadatayo. (Mateo 6:12) Maikatlo, aramidentayo kadagiti sabsabali ti kayattayo nga aramidenda kadatayo. (Mateo 7:12) Gapu ta imperpektotayo, masansan a kasapulantayo ti pammakawan. Kas pagarigan, no adda maisawangtayo a makasair kadagiti dadduma, namnamaentayo a laglagipenda a masansan a makaisawangtayo amin iti di umiso. (Santiago 3:2) No kayattayo a naayat ti pannakilangen dagiti dadduma kadatayo, naayat met koma ti pannakilangentayo kadakuada.
19. Kasanotay a magun-od ti tulong ti nasantuan nga espiritu iti panangpatanor iti ayat?
19 Maikapat, mabalintay ti dumawat iti tulong ti nasantuan nga espiritu agsipud ta maysa ti ayat kadagiti bunga ti espiritu. (Galacia 5:22, 23) Masansan a nainkasigudan ti panaggayyem, kinadekket ti pamilia, ken romantiko nga ayat. Ngem kasapulantayo ti tulong ti espiritu ni Jehova tapno mapatanortayo ti ayat nga adda ken Jehova, ti ayat a naan-anay a singgalut ti panagkaykaysa. Magun-odtayo ti tulong ti nasantuan nga espiritu babaen ti panagbasa iti naipaltiing a Biblia. Kas pagarigan, no adalentayo ti biag ni Jesus, makitatayo no kasano ti pannakilangenna kadagiti tattao, ket masursurotayo a tuladen. (Juan 13:34, 35; 15:12) Maysa pay, mabalintay nga idawat ken Jehova nga ikkannatayo iti nasantuan nga espiritu, nangnangruna kadagiti kasasaad a mamagbalin a narigat kadatayo ti agtignay a siaayat. (Lucas 11:13) Kamaudiananna, maipakitatayo ti ayat babaen ti panagtalinaed a nadekket iti kongregasion Kristiano. Ti pannakitimpuyog kadagiti kakabsat tulongannatayo a mangpatanor iti ayat.—Proverbio 13:20.
20, 21. Ania a naisangsangayan a pammaneknek ti ayat ti impakita dagiti Saksi ni Jehova iti 2000 a tawen serbisio?
20 Idi napan a tawen, 6,035,564 ti kangatuan a bilang dagiti agibumbunannag iti naimbag a damag iti intero a lubong. Agdagup iti 1,171,270,425 nga oras ti nabusbos dagiti Saksi ni Jehova a nangbirok kadagiti tattao a nangipakaammuanda iti naimbag a damag. Gapu iti ayat, inanduranda ti pudot, tudo, ken lam-ek tapno maitungpalda daytoy a trabaho. Ayat ti nangtignay kadakuada a makisarita kadagiti kaeskuelaan ken katrabahuan ken umasideg kadagiti tattao a saanda a pulos am-ammo kadagiti lansangan ken iti dadduma pay a lugar. Adu kadagiti sinarungkaran dagiti Saksi ti di nangikankano, ket adda sumagmamano a bimmusor. Nupay kasta, adda dagiti naginteres, isut’ gapuna a 433,454,049 ti naireport a panagsarungkar, ken 4,766,631 a panagadal iti Biblia ti naikondukta.a
21 Amin dagitoy ket pammaneknek ti panagayat dagiti Saksi ni Jehova iti Diosda ken iti padada a tao! Pulos a di lumamiis dayta nga ayat. Mangnamnamatayo nga iti 2001 a tawen serbisio, ad-adu a pammaneknek ti maipaay iti sangatauan. Sapay koma ta agtultuloy a bendisionan ni Jehova dagiti nasungdo ken naregta nga agdaydayaw kenkuana bayat nga ‘aramidenda ti isuamin buyogen ti ayat’!—1 Corinto 16:14.
[Footnote]
a Para iti kompleto a detalye ti Report ti 2000 a Tawen Serbisio, kitaenyo ti tsart iti panid 18-21.
Mailawlawagyo Kadi?
• Siasino ti tultuladentayo no ayatentayo ti padatayo a tao?
• Siasino dagiti rumbeng nga ayatentayo?
• Ania ti sumagmamano a kapadasan a pakakitaan ti Nakristianuan nga ayat?
• Kasanotay a mapatanor ti Nakristianuan nga ayat?
[Tsart iti panid 18-21]
REPORT TI 2000 A TAWEN SERBISIO DAGITI SAKSI NI JEHOVA ITI SANGALUBONGAN
(Kitaem ti bound volume)
[Dagiti Ladawan iti panid 15]
Ti Nakristianuan nga ayat mapagkaykaysana ti pamilia
[Dagiti Ladawan iti panid 17]
Ti ayat tignayennatayo a mangiranud iti namnamatayo kadagiti dadduma