No Kasano a Mapennekyo Dagiti Naespirituan a Kasapulanyo
“ITI naglabas a dekada, aglaplapusanan ti nailako a kopia ti nasurok a 300 a nagduduma a libro maipapan iti espiritualidad iti panggedan—manipud iti Jesus CEO agingga iti The Tao of Leadership,” kuna ti U.S.News & World Report. Daytoy ti mangipamatmat iti kinapudno a kadagiti adu a nabaknang a pagilian, umad-adu dagiti agkasapulan iti naespirituan a panangiwanwan. Mainaig iti daytoy, kuna ti Training & Development, maysa a periodiko a mainaig iti negosio: “Iti tiempo a ti teknolohia ti mangiturong iti nadumaduma nga aspeto ti biagtayo, sapsapulentayo ti naun-uneg a kaipapanan ken panggep ti biag, ken ti nasaysayaat a personal a pannakapnek.”
Ngem sadino ti pakasarakanyo iti makapnek a naespirituan a panangiwanwan? Iti naglabas, immadani dagiti tattao kadagiti nalatak a relihion a tumulong kadakuada a mangbirok iti “naun-uneg a kaipapanan” ken “panggep” ti biag. Ita, adu ti nangtallikud kadagiti nalatak a relihion. Iti maysa a surbey kadagiti 90 a nangangato ti akemda a manedyer ken ehekutibo, naammuan a “dakkel ti nagdumaan ti relihion ken espiritualidad iti panangmatmat dagiti tattao,” kuna ti Training & Development. Sigun kadagiti napagdamagan, “nainget ken mamagsisinasina” ti relihion, idinto ta “sapasap ken nalawa ti saklawen” ti espiritualidad.
Kadagiti saan a relihioso a kagimongan, kas iti Australia, New Zealand, United Kingdom, ken Europa, uray dagiti agtutubo matmatanda a nagduma ti relihion ken espiritualidad. Iti artikulona iti Youth Studies Australia, impaganetget ni Propesor Ruth Webber: “Adu nga agtutubo ti mamati iti Dios, wenno iti kita ti karkarna a puersa, ngem dida matmatan ti simbaan kas napateg wenno makatulong iti espiritualidadda.”
Ti Pudno a Relihion Itandudona ti Espiritualidad
Maawatan ti kasta a panagduadua iti relihion. Adu a narelihiosuan nga organisasion ti naigamer iti napolitikaan a kontrobersia ken kinamanaginsisingpet ken responsableda iti pannakapapatay dagiti inosente a tattao iti di mabilang a gubat nga insungsong ti relihion. Nupay kasta, iti panangilaksidda kadagiti managinsisingpet ken manangallilaw a narelihiosuan nga organisasion, adda dagiti sibibiddut a nangilaksid met iti Biblia, nga ipapanda a mangpampanuynoy kadagita nga aramid.
Iti kinapudnona, kondenaren ti Biblia ti kinamanaginsisingpet ken kinakillo. Kinuna ni Jesus kadagiti lider ti relihion idi kaaldawanna: “Asikayo pay, eskriba ken Fariseo, a managinsisingpet! agsipud ta umarngikayo kadagiti napapuraw a tanem, nga iti ruar pudno nga agparangda a napintas ngem iti uneg napnoda iti tultulang dagiti natay a tattao ken tunggal kita ti kinarugit. Iti kasta a wagas dakayo met, pudno nga iti ruar, agparangkayo a nalinteg kadagiti tattao, ngem iti uneg napnokayo iti panaginsisingpet ken kinakillo.”—Mateo 23:27, 28.
Kanayonanna, ti Biblia iparparegtana kadagiti Kristiano ti panagbalin a neutral kadagiti amin a napolitikaan nga ar-aramid. Imbes nga idagadagna kadagiti manamati a patayenda ti maysa ken maysa, ibilinna a masapul a situtulokda a matay gapu iti maysa ken maysa. (Juan 15:12, 13; 18:36; 1 Juan 3:10-12) Imbes nga agbalin a “nainget ken mamagsisinasina,” ti pudno a relihion a maibatay iti Biblia ket “nalawa ti saklawenna.” Kinuna ni apostol Pedro: “Ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.”—Aramid 10:34, 35.
Ti Biblia—Maysa a Mapagtalkan a Giya iti Naespirituan a Salun-at
Ibaga kadatayo ti Biblia a naparsua dagiti tattao iti ladawan ti Dios. (Genesis 1:26, 27) Dina kayat a sawen daytoy a dagiti tattao literal a kalanglangada ti Dios. Imbes ketdi, kaipapananna nga addaanda iti abilidad a mangyanninaw kadagiti personalidad ti Dios, agraman ti naespirituan a kapasidad, wenno espiritualidad.
No kasta, lohikal a patien a ti Dios ipaayna met kadatayo dagiti banag a mangpennek kadagiti naespirituan a kasapulantayo, agraman dagiti umiso a panangiwanwan tapno mailasintayo no ania ti makapaimbag ken makadangran iti espiritualidadtayo. Ti Dios pinarsuanatayo nga addaan iti nakasaysayaat ti pannakadiseniona a sistema ti imiunidad, a sumaranget iti sakit ken mangtaginayon iti salun-attayo. Umasping iti dayta, inikkannatayo iti konsiensia, a makatulong kadatayo nga agdesision a siuumiso ken mangliklik kadagiti aramid a makadangran iti pisikal ken naespirituan a salun-attayo. (Roma 2:14, 15) Ammotayo a masapul a siuumiso a mataraonan ti sistema ti imiunidadtayo tapno mabalinna ti sumaranget. Umasping iti dayta, tapno agkurri ti konsiensiatayo, masapul a taraonantayo dayta kadagiti makapasalun-at a naespirituan a taraon.
Iti panangdakamatna iti kita ti taraon a mangtaginayon iti naespirituan a salun-attayo, kinuna ni Jesus: “Ti tao agbiag, saan nga iti tinapay laeng, no di ket iti tunggal sao a rumrummuar iti ngiwat ni Jehova.” (Mateo 4:4) Naisurat iti Saona, ti Biblia, dagiti sasao ni Jehova, ket dagitoy “makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg.” (2 Timoteo 3:16) Adda ngarud kadatayo a mangikagumaan a mangan kadagitoy a naespirituan a taraon. Ti pannakagunggonatayo iti naespirituan ken pisikal a pamay-an ket agpannuray iti kaadu ti pannakaammotayo iti Biblia ken iti panangikagumaantayo a mangyaplikar kadagiti prinsipiona iti biagtayo.—Isaias 48:17, 18.
Makagunggona Kadi?
Pudno, kasapulan ti tiempo a mangpakired iti naespirituan a salun-attayo babaen ti panagadal iti Biblia; ket kasla nagrigat nga iwayaan dayta. Ngem makagunggona no ikagumaan! Imutektekanyo ti panangilawlawag ti sumagmamano nga okupado a propesional a tattao no apay a napateg kadakuada ti panangilatang iti tiempo tapno maaywananda ti naespirituan a salun-atda.
Ni Marina, maysa a doktor, kunana: “Talaga a diak pulos pakaseknan ti espiritualidadko agingga idi mangrugiak nga agtrabaho iti ospital ket mariknak ti panagsagaba dagiti sabsabali. Naamirisko a kasapulan a pennekek ti naespirituan a kasapulak tapno maaddaanak iti pannakakontento ken talna ti panunot, yantangay ti kinaokupado ti biag ken ti kasapulan a panangtaming kadagiti pakadanagan dagiti tattao ket mabalin a makabannog para iti maysa a kas kaniak ti propesionna.
“Makipagad-adalak itan iti Biblia kadagiti Saksi ni Jehova. Daytoy a panagadal tultulongannak a mangsukimat kadagiti tignay ken motibok iti positibo a pamay-an ken mangsansanay iti panunotko nga agbalin nga ad-adda a positibo, tapno masalimetmetak ti natimbeng a panagbiag. Makapnek unay kaniak ti sekular a trabahok. Ngem ti panagadalko iti Biblia ti nangpasayaat iti emosional a salun-atko, a tumultulong kaniak a mangkontrol kadagiti negatibo a riknak, mangpakalma iti tension, ken agbalin nga ad-adda a naanus ken mannakipagrikna kadagiti tattao. Simmayaat met ti relasionko iti asawak gapu iti panangyaplikarko kadagiti prinsipio ti Biblia. Kapatgan iti amin, naam-ammok ni Jehova ken mariknak ti nawaya a panagayus ti espirituna, a nangipaay iti dakdakkel a kaipapanan ti biagko.”
Ni Nicholas, maysa nga arkitekto, kunana: “Sakbay a nakipagadalak iti Biblia kadagiti Saksi ni Jehova, diak paginteresan dagiti naespirituan a banag. Awan panggepko iti biag no di ti panagballigi ti propesionko. Iti panagadalko iti Biblia, naisuro kaniak nga adda dakdakkel a kaipapanan ti biag ken mangyeg iti pudno ken manayon a kinaragsak ti panangaramid iti pagayatan ni Jehova.
“Pudno nga adda pannakapnek nga inyeg kaniak ti propesionko, ngem ti Biblia ti nangisuro kaniak iti pateg ti panangsalimetmet iti simple a panagbiag babaen ti panangipamaysa kadagiti naespirituan a banag. Babaen ti panangaramid iti dayta, naliklikanmi ken ni baketko ti adu a pakasikoran a maigapu iti materialistiko a panagbiag. Naaddaankami met iti adu a pudno a gagayyem babaen ti pannakitimpuyogmi kadagidiay addaan iti isu met laeng a naespirituan a panangmatmat iti biag.”
Ni Vincent, maysa nga abogado, kunana: “Adda marikna a pannakapnek no nasayaat ti sekular a trabaho. Ngem nabigbigko nga ad-adu pay ti kasapulan tapno maaddaan iti kinaragsak ken pannakakontento. Sakbay a naammuak ti sursuro ti Biblia maipapan iti dayta, naamirisko ti kinaubbaw ti biag—ti pannakaipasngay, panagdakkel, panagasawa, panagtrabaho tapno maipaay ti material a kasapulan ti panangpadakkel iti annak, panangsanay kadakuada a mangsurot iti kasta a siklo ti biag, ket kamaudiananna lumakay ken matay.
“Saak la nakaawat kadagiti makapnek a sungbat kadagiti saludsodko maipapan iti panggep ti biag idi nakipagadalak iti Biblia kadagiti Saksi ni Jehova. Babaen ti panagadalko iti Biblia, naam-ammok ni Jehova kas maysa a persona ken nasukayko ti nasged a panagayat kenkuana. Dayta ti makagapu a nataginayonko ti nasalun-at a naespirituan a panangmatmatko bayat nga ikagkagumaak ti agbiag maitunos iti ammok a panggepna. Ita, addaankami ken ni baketko iti pannakapnek ta ammomi nga us-usarenmi ti biagmi iti kasayaatan a posible a pamay-an.”
Maaddaan met iti panggep ken kaipapanan ti biagmo babaen ti panagadal iti Biblia. Maragsakan dagiti Saksi ni Jehova a tumulong kenka. Kas kada Marina, Nicholas, ken Vincent, mabalinmo a matagiragsak ti pannakapnek nga agtaud iti panangammo iti maipapan ken ni Jehova ken kadagiti panggepna para iti intero a sangatauan ken para kenka kas maysa nga indibidual. Saanka laeng a maaddaan iti rag-o iti panangpennek kadagiti naespirituan a kasapulam ita no di ket maaddaanka met iti namnama a mangtagiragsak iti agnanayon a biag nga addaan iti perpekto a pisikal a salun-at—namnama a silulukat laeng kadagidiay “sipapanunot iti naespirituan a kasapulanda.”—Mateo 5:3.
Ti maysa a pamay-an tapno mapatanor ti espiritualidadtayo isu ti panagkararag. Nangbusbos ni Jesus iti tiempo a nangisuro kadagiti adalanna no kasano ti agkararag, nga impaayanna ida iti aw-awagan ti kaaduan kas ti Kararag ti Apo. Ania ti kaipapananna ti kararag kadakayo ita? Kasanokayo a magunggonaan iti dayta? Maammuanyo dagiti sungbat iti sumaganad a dua nga artikulo.
[Dagiti Ladawan iti panid 6]
Ni Marina
[Dagiti Ladawan iti panid 7]
Ni Nicholas
[Dagiti Ladawan iti panid 7]
Ni Vincent