Impormal a Panangasaba Kadagiti Ingles ti Pagsasaoda Idiay Mexico
BAYAT nga ur-urayenna dagiti kakaduana nga agdaliasat idiay Atenas, impormal a nangasaba ni apostol Pablo. Kuna ti Biblia: “Rinugianna ti makirinnason . . . iti tunggal aldaw idiay plasa kadagidiay nairanrana nga adda.” (Aramid 17:17) Iti panagdaliasatna manipud Judea nga agturong idiay Galilea, impormal a nangasaba ni Jesus iti maysa a Samaritana iti asideg ti bubon. (Juan 4:3-26) Ikagkagumaanyo kadi nga isarita ti naimbag a damag ti Pagarian ti Dios iti amin a gundaway?
Nangnangruna a maitutop ti impormal a panangasaba kadagidiay Ingles ti pagsasaoda idiay Mexico. Adu a turista ti agpasiar kadagiti resort, nadumaduma nga estudiante ti agadal kadagiti unibersidad, ken dagiti retirado a ganggannaet idiay Mexico masansan nga addada kadagiti parke ken restawran. Adu a Saksi ni Jehova a makapagsao iti Ingles ti nagbalin a nasigo a makisarita kadagiti kasta a tattao. Kinapudnona, alertoda a makisao iti asinoman a madlawda a ganggannaet wenno makapagsao iti Ingles. Kitaentayo no kasanoda nga ar-aramiden dayta.
Kadagiti ganggannaet a Saksi a mangaskasaba kadagidiay makapagsao iti Ingles, kaaduanna nga iyam-ammoda ti bagida kadagidiay di mailibak a ganggannaet ket imtuodenda no sadino ti pagilianda. Sigurado a tumaud ti saludsod no ania ti ar-aramiden ti ganggannaet a Saksi idiay Mexico ket dayta ti mangted kenkuana iti gundaway a mangiranud kadagiti Nakristianuan a patpatienna. Kas pagarigan, ni Gloria, nga agserserbi idiay Oaxaca gapu iti dakdakkel a panagkasapulan kadagidiay makapagsao iti Ingles, nalaka a makairugi iti saritaan gapu iti kasta a wagas. Iti panagawidna kalpasan ti impormal a panangasabana iti plasa, maysa nga agassawa a taga Inglatera ti immasideg kenkuana. Kinuna ti babai: “Diak namnamaen a makakitaak iti nangisit a babai iti lansangan ti Oaxaca!” Imbes a masair ti riknana, nagkatawa ni Gloria, ket nangrugi a nagsaritaanda no apay nga adda ni Gloria idiay Mexico. Inawis ti babai nga agkapeda idiay balayna. Kalpasan a nakitulag, intukon ni Gloria dagiti magasin a Pagwanawanan ken Agriingkayo!, ngem pinagkedkedan ti babai gapu ta isu ket maysa nga ateista. Kinuna ni Gloria a magusgustuanna ti makisarita kadagiti ateista ket kayatna nga ammuen no ania ti makuna ti babai maipapan iti artikulo a “Dagiti Lugar a Pagdayawan—Kasapulantayo Kadi?” Innala dayta ti babai, a kunkunana: “Apresiarek la ketdi no makombinsirnak.” Napasarunuan dayta iti sumagmamano a makapainteres a saritaan bayat ti panagkapeda. Nagsubli ti agassawa idiay Inglatera, ngem nagtultuloy ti saritaan babaen ti e-mail.
Ni Gloria nakasaritana met ni Saron, maysa nga estudiante manipud iti Washington, D.C., nga agbolboluntario idiay Oaxaca kadagiti katutubo a babbai tapno magun-odna ti master’s degree. Kalpasan a kinomendaranna ti panagregget ni Saron, inlawlawag ni Gloria no apay nga adda isuna idiay Mexico. Naiturong dayta iti nasayaat a saritaan maipapan iti Biblia ken no ania ti aramiden ti Dios agpaay kadagiti napanglaw ken kadagiti isuamin. Kinuna ni Saron a nupay awan a pulos ti nakasaritana a Saksi idiay Estados Unidos, maysa a Saksi ni Jehova ti maysa kadagiti damo a nakasaritana idiay Mexico! Inawat ni Saron ti maysa a panagadal iti Biblia ken dagus a rinugianna ti timmabuno kadagiti Nakristianuan a gimong.
Adu a ganggannaet ti immakar kadagiti resort iti aplaya idiay Mexico gapu ta agsapsapulda iti naparaisuan a kasasaad. Dayta ti inusar ni Laurel a mangirugi iti saritaan idiay Acapulco, nga imtuodenna kadagiti tattao no ti Acapulco ket ad-adda nga umasping iti paraiso ngem iti lugar a naggapuanda ken no ania ti kayatda iti dayta. Kalpasanna, ilawlawagna nga iti din agbayag, agbalinto a pudpudno a paraiso ti intero a daga. Idi inusarna dayta a wagas iti pannakisaritana iti maysa a babai a taga Canada a naam-ammona iti opisina ti beterinario, nagturong dayta iti panagadal iti Biblia. Mabalin met kadi nga epektibo iti lugaryo ti kasta a pamay-an ti pannakisarita?
‘Kadagiti Lansangan ken Kadagiti Plasa’
Masansan a mairugi ti saritaan kadagiti lansangan ken plasa babaen ti panangimtuod: “Makapagsaokayo kadi iti Ingles?” Adu a taga Mexico ti makapagsao iti Ingles gapu iti propesionda wenno gapu ta nagnaedda iti Estados Unidos.
Maysa nga agassawa a Saksi ti immasideg iti maysa a baket a naka-wheel chair nga idurduron ti maysa a nars. Dinamagda iti baket no makapagsao iti Ingles. Kinunana a kabaelanna gapu ta adu a tawen a nagnaed iti Estados Unidos. Inawatna Ti Pagwanawanan ken Agriingkayo!, a dina pay napadas a basaen, ket imbagana a Consuelo ti naganna ken intedna ti adresna. Idi pinasiarda iti intedna nga adres, maysa gayam dayta a pagaywanan kadagiti babbaket ken lallakay nga imatmatonan dagiti madre a Katoliko. Idi damo, narigatda a makasarita ni Consuelo gapu ta pagsuspetsaan ida dagiti madre ken kunada a di kayat ni Consuelo ti makisango kadakuada. Impakaasida kadagiti madre nga ibagada ken ni Consuelo a nagpasiarda ket kayatda a komustaen. Pinauneg ida ni Consuelo. Sipud idin, regular nga agad-adal iti Biblia daytoy agtawen iti 86 a baket, iti laksid ti negatibo a komento dagiti madre. Natabunuanna metten ti dadduma a Nakristianuan a gimong.
Kuna ti Proverbio 1:20: “Ti met laeng pudno a sirib agpukpukkaw a sipipigsa iti mismo a kalsada. Kadagiti publiko a plasa iyes-esngawna ti timekna.” Kitaenyo no kasano a napasamak dayta iti plasa ti San Miguel de Allende. Iti maysa nga agsapa, kinasarita ni Ralph ti maysa a nakatugaw a lalaki a medio nataenganen. Nasorpresa ti lalaki idi naitukon kenkuana Ti Pagwanawanan ken Agriingkayo! ket insalaysayna ken ni Ralph ti pakasaritaan ti biagna.
Dati a soldado a nakigubat idiay Vietnam. Kas resulta ti emosional a pannakariribukna gapu iti nakitana a nakaad-adu a natay, naapektaran ti isipna bayat ti kaaddana iti militar. Nayakar iti kampo manipud iti paggugubatan. Nadutokan sadiay a mangdalus kadagiti bangkay dagiti natay a soldado sakbay a maipatulod iti Estados Unidos. Ita, 30 a tawenen ti naglabas, agtultuloy latta a mabatbatibat ken makarikna iti buteng. Bayat a situtugaw iti plasa iti dayta a bigat, siuulimek nga ikarkararagna ti tulong.
Inawat ti beterano ti naitukon a literatura agraman ti imbitasion a tumabuno iti Kingdom Hall. Kalpasan a nakigimong, kinunana a kabayatan dayta dua nga oras a kaaddana iti Kingdom Hall, nariknana manen ti talna kalpasan ti 30 a tawen. Sumagmamano la a lawasna idiay San Miguel de Allende, ngem magustuanna ti sumagmamano a panagadalna iti Biblia ken tinabunuanna ti amin a gimong agingga a nagsubli iti pagilianna. Nayurnos ti agtultuloy a panagadalna.
Impormal a Panangasaba iti Pagtrabahuan ken Eskuelaan
Idiay pagtrabahuanyo, iyam-ammoyo met laeng kadi ti bagiyo kas maysa kadagiti Saksi ni Jehova? Kasta ti inaramid ni Adrián, maysa nga aglaklako kadagiti apartment idiay Cape San Lucas. Kas resultana, kinuna ti katrabahuanna a ni Judy: “No tallo a tawen sakbay ita ket imbagam kaniak nga agbalinak a Saksi ni Jehova, sigurado nga ibagak, ‘Pulos!’ Ngem inkeddengko a basaen ti Biblia. Pampanunotek, ‘Saan a narigat dayta yantangay magusgustuak ti agbasa.’ Bueno, agarup innem laeng a panid ti nabasak idi nabigbigko a kasapulak ti tulong. Ti katrabahuak a ni Adrián ti kakaisuna nga ammok a makatulong kaniak. Kayatko a kasarita ta isuna laeng ti desente a katrabahuak.” Dagus nga intukon ni Adrián ti panagsarungkar a kaduana ti nobiana a ni Katie, ket sinungbatanda ti amin a saludsod ni Judy. Rinugian ni Katie nga inyadalan iti Biblia, ket di nagbayag, nabautisaran ni Judy kas maysa a Saksi.
Komusta met ti impormal a panangasaba idiay eskuelaan? Dua a Saksi ti agad-adal iti sao nga Espaniol iti unibersidad ngem naglanganda iti maysa nga aldaw tapno tumabuno iti maysa a Nakristianuan nga asamblea. Idi simrekda manen, nakiddaw nga isalaysayda iti Espaniol no ania ti inaramidda. Ginundawayanda ti nangasaba iti Espaniol agingga iti kabaelanda. Ti maestrada a ni Silvia interesado unay kadagiti padto ti Biblia. Nagpayadal iti Biblia iti pagsasao nga Ingles ket maysa itan nga agibumbunannag iti naimbag a damag. Agad-adal met itan ti dadduma a kameng ti pamiliana. Kuna ni Silvia: “Nasarakak ti sapsapulek iti intero a panagbiagko.” Wen, ti impormal a panangasaba mangyeg iti nasayaat a resulta.
Panangaprobetsar Kadagiti Dadduma a Gundaway
Ti kinamanagpadagus luktanna ti gundaway a mangasaba. Napaneknekan dayta da Jim ken Gail, nga agserserbi idiay San Carlos, Sonora. Maysa a babai a mangipaspasiar iti asona iti 6:00 ti bigat ti simmardeng tapno apresiarenna ti arubayanda. Inawis da Jim ken Gail nga agkape. Iti uneg ti 60 a tawen, damo a mangngegna ti maipapan ken ni Jehova ken ti namnama a biag nga agnanayon. Narugian a nayadalan iti Biblia.
Naasian met ni Adrienne kadagiti ganggannaet. Mangmangan idi iti maysa a restawran idiay Cancún idi inasitgan ti maysa a barito a nagimtuod no isu ket taga Canada. Idi naammuanna a taga Canada, inlawlawag ti barito a tultulonganda ken ni nanangna ti adingna a babai mainaig iti asaynmentna idiay eskuelaan maipapan kadagiti taga Canada. Immasideg ni nanangna, a makapagsao iti Ingles. Kalpasan nga inan-anusanna a sinungbatan dagiti saludsodna maipapan kadagiti taga Canada, kinuna ni Adrienne: “Ngem adda a talaga ti napateg a rason no apay nga immayak ditoy—tapno tulongak dagiti tattao nga agadal iti Biblia. Kayatmo kadi ti agadal iti Biblia?” Kinuna ti babai a kayatna. Naglusulos gayam daytoy iti simbaanda sangapulo a tawenen ti napalabas ket ikagkagumaanna nga adalen ti Biblia iti bukodna. Intedna ken ni Adrienne ti numero ti telepono ken adresna, ket narugian ti maysa a nabunga a panagadal iti Biblia.
“Ipalladawmo ti Tinapaymo iti Rabaw ti Dandanum”
No isarita ti kinapudno a linaon ti Biblia iti amin a gundaway, masansan a makasabaan dagidiay manmano wenno di pulos nakangngeg iti mensahe ti Pagarian. Iti maysa a restawran nga aduan iti kostumer iti sangladan nga ili ti Zihuatanejo, maysa a Saksi ti nangitukon iti lamisaanna iti agassawa a ganggannaet yantangay napunnon ti restawran. Pito a tawenen nga aglaylayag iti nadumaduma a lugar daytoy nga agassawa. Inyebkasda ti negatibo a panangmatmatda kadagiti Saksi ni Jehova. Kalpasan dayta a panagsasaritada iti restawran, pinasiar ti Saksi dagita nga agassawa iti baporda ket inawisna ida iti pagtaenganna. Inawatda ti nasurok a 20 a magasin ken 5 a libro ken inkarida nga agsapulda kadagiti Saksi iti sumaruno a pagsangladanda.
Napaliiw da Jeff ken Deb ti maysa a pamilia nga addaan iti napintas a maladaga a babai iti maysa a panganan idiay Cancún. Idi kinomentuanda ti maladaga, intukon dagiti nagannakna ti pizza kada Jeff ken Deb. Taga India gayam dayta a pamilia. Pulos a dida pay nangngeg ti maipapan kadagiti Saksi ni Jehova, ken dida pay nakakita kadagiti literaturatayo. Idi nagsisinada, nangala daytoy a pamilia kadagiti publikasion dagiti Saksi.
Iti maysa nga isla iti asideg ti Yucatán, adda umasping a napasamak. Adda dua a kakaskasar a Tsino a nagkiddaw a retratuen ni Jeff , ket sitatallugod nga inaramidna. Naammuanna a nupay nagnaedda iti Estados Unidos kadagiti naglabas a 12 a tawen, pulos a dida pay nakakita wenno nakangngeg kadagiti Saksi ni Jehova! Nagturong dayta iti naragsak a saritaan. Pinaregta ida ni Jeff nga agbirokda kadagiti Saksi inton agawidda.
Nalabit nga adda dagiti espesial nga okasion iti lugaryo a mabalinyo ti mangasaba iti impormal. Idi a ti presidente ti Estados Unidos pinasiarna ti presidente ti Mexico iti rantsona iti asideg ti Guanajuato, dagiti reporter iti nadumaduma a paset ti lubong immayda tapno ipadamagda dayta a pasamak. Maysa a Saksi a pamilia ti nangikeddeng a mangaprobetsar iti dayta a gundaway a mangasaba iti Ingles. Nagsayaat ti resultana. Kas pagarigan, maysa a reporter ti nangipadamag maipapan iti sumagmamano a gubat, kas iti gubat idiay Kosovo ken Kuwait. Maysa a kaduana a reporter ti natay iti sakruyna kalpasan a napaltogan. Apaman a nangngegna ti maipapan iti panagungar, nakalua ti reporter a nagyaman iti Dios gapu ta naammuanna nga adda gayam panggep ti biag. Kinunana a nupay dinanto makita manen dagitoy nga agassawa a Saksi, awit-awitna iti pusona daytoy a naimbag a damag ti Biblia.
Ipakita dagita a nadakamat a kapadasan a masansan a ditay ammo no ania ti resulta ti kasta a panangasaba. Kaskasdi, kinuna ni masirib nga Ari Solomon: “Ipalladawmo ti tinapaymo iti rabaw ti dandanum, ta iti panaglabas ti adu nga aldaw masarakamto manen dayta.” Kinunana pay: “Iti bigat imulam ti bin-im ket agingga iti rabii saanmo a paginanaen ta imam; ta saanmo nga ammo no sadino nga agballiginto daytoy, no ditoy wenno sadiay, wenno no isuda a dua agpadadanto a naimbag.” (Eclesiastes 11:1, 6) Wen, sireregta nga “ipalladawmo ti tinapaymo” kadagiti dandanum ket sibubulos nga “imulam ti bin-im,” kas inaramid da Pablo ken Jesus ken dagiti moderno-aldaw a Saksi kadagiti Ingles ti pagsasaoda idiay Mexico.