‘Insuronakami a Mangraem iti Relihionna’
MAYSA kadagiti Saksi ni Jehova iti probinsia ti Rovigo, Italia, ti naadaan iti tumor ket serioso ti kasasaadna. Kalpasan ti sumagmamano a daras a pannakayospitalna, a kadagita a gundaway kiniddawna a saan a mayalisonan iti dara, nayawid ket addada nars a nangaywan kenkuana.
Ti nabileg a pammati ken kooperasion daytoy a pasiente nga agtawen iti 36 ket nagsiddaawan dagiti doktor ken nars a nangtaming kenkuana. Sakbay a pimmusay gapu iti kanser, maysa kadagiti nars a nangaywan kenkuana ti nagsurat iti maysa a magasin mainaig iti panagaywan, ket insalaysayna ti kapadasanna iti pasiente nga inawaganna iti Angela.
“Narayray ni Angela ken determinado nga agbiag. Ammona ti kasasaadna ken ti serioso a sakitna, ken kas iti kayattay amin, nagsapul ni Angela iti solusion, pamuspusan, wenno agas, . . . Iti panaglabas ti aldaw adu ti naammuanmi maipapan kenkuana. Saanna a pinagkedkedan ti tulongmi. Imbes ketdi, mannakikooperar isu a saankami a narigatan a nangasikaso kenkuana. Makaay-ayo nga aywanan agsipud ta isu ket napudno ken makagunggona met ti makilangen kenkuana. . . . Dagus a naammuanmi a makalapped ti relihionna iti pannakataming ti sakitna.” Kasta ti kuna ti nars agsipud ta patienna a masapul a mayalisonan ni Angela iti dara, a pinagkedkedan ti pasiente.—Aramid 15:28, 29.
“Kas nasanay a mangaywan kadagiti masakit, imbagami ken ni Angela a saankami nga umanamong iti desisionna, ngem babaen ti tulongna, naawatanmi no kasano ti kinapateg ti biag kenkuana. Naawatanmi met ti pateg ti relihion kenkuana ken iti pamiliana. Saan a simmuko ni Angela. Saanna nga impalubos a maapektaran unay gapu iti sakit. Napigsa ti pakinakemna. Kayatna ti agbiag, ket sipopositibo nga inkagumaanna ti agtultuloy nga agbiag. Impakaammona ti determinasionna, ti patpatienna. Addaan iti determinasion a masansan nga awan kadatayo, pammati a nabileg a saan a kas iti adda kadatayo. . . . Insuro kadakami ni Angela ti pateg ti panangraem iti relihionna, banag a naiduma unay iti prinsipio ti propesionmi. . . . Patienmi a napateg unay ti insuro kadakami ni Angela, agsipud ta maipaspasangokami iti amin a kita ti tattao, amin a kita ti kasasaad, ken amin a kita ti relihion, ket makasursurokami ken makatulongkami iti amin a pagserbianmi.”
Kalpasanna, impaganetget ti magasin ti linaon ti Code of Professional Ethics for Italian Nurses, a naaprobaran idi 1999, nga agkuna: “Dagiti nars aramidenda ti annongenda, nga ikabilanganda ti kultura, narelihiosuan ken moral a takder dagiti pasiente, agraman ti puli ken ti seksoda.” No dadduma, mabalin a marigatan dagiti doktor ken nars a mangbigbig iti narelihiosuan a patpatien ti maysa a pasiente, ngem maraem unay dagidiay situtulok a mangaramid iti dayta.
Natinong a naimbag dagiti pangngeddeng dagiti Saksi ni Jehova mainaig iti salun-at ken medikal a pannakatamingda. Serioso nga inkabilanganda ti ibaga ti Kasuratan, ket kas iti impakita ti kaso ni Angela, saanda a panatiko. (Filipos 4:5) Iti sangalubongan, umad-adu ti bilang dagiti propesional a mangay-aywan iti salun-at a situtulok a mangraem iti konsiensia dagiti pasienteda a Saksi.