“Tinungpalko ti Pammati”

KAS INSALAYSAY DAGITI GAGAYYEM NI BRUNELLA INCONDITI

“NAKABAMBANNAYAT ken nakalidliday daydi nga aldaw ti Sabado. Agmaymaysaak laeng iti kuarto, makarikrikna ti kinaawan iti namnama. Kaslaak magmagna iti pasilio. Nasayaat met ti amin, idi kellaat nga adda nangipanalbaag iti ridaw iti sangok a mismo, ket diak makaruar, uray kasanot’ panangikagumaak.”

Nagdagensen ti napalaus a pannakapaay iti puso ni 15-años a Brunella Inconditi. Aglablabas ti kapatgan nga aldaw iti biagna kas maysa nga agtutubo. Nasapa iti dayta a tawen, ti dumakdakkel a panagayatna ken Jehova ken iti Biblia ti nangtignay kenkuana a mangidedikar ti biagna kenkuana. Idi Hulio 1990 naikeddeng a mabautisaran koma iti “Nadalus a Pagsasao” a Kumbension Distrito dagiti Saksi ni Jehova idiay Montreal, Canada. Imbes ketdi, di nagbayag naipasango ni Brunella iti maysa a suot iti pammatina a nagpaut agingga iti nabatbati a paset ti panagbiagna.

Dua nga aldaw sakbay ti ninamnamana a panangisimbolo ti dedikasionna babaen ti pannakabautisar iti danum, naammuan ni Brunella nga adda leukemia-na. Kayat dagiti doktor iti lokal nga ospital dagiti ubbing a rugian nga insigida ti panangagas, isu a nagtalinaed ni Brunella iti ospital.

Natignay Dagiti Doktor Kadagiti Bukodna a Sasao

Ammo ni Brunella a sagrado ti dara ken Jehova a Dios. (Levitico 17:11) Inyunay-unay dagiti nagannakna, da Edmondo ken Nicoletta, a di rumbeng a mayalisonan iti dara iti panangagasda iti anakda. “Kayat ni Brunella a mangngegan met dayta dagiti doktor manipud kenkuana, nupay menor de edad pay laeng,” linagip ni tatangna. “Sititibker nga imbagana kadakuada a dina kayat ti panangagas a mangsalungasing iti bilin ti Biblia nga ‘adaywan ti dara.’”​—Aramid 15:20.

Idi Hulio 10, 1990, tallo a doktor ken maysa a social worker ti nakisarita kadagiti nagannak ni Brunella ken iti dua a ministro iti lokal a kongregasion dagiti Saksi ni Jehova. Pinasingkedan dagiti panagsukimat nga addaan ni Brunella iti nakaro a lymphoblastic leukemia. Inlawlawag dagiti doktor ti planoda a panangagas iti sakit. Sitataktika nga imbagada a nagrigat nga agasan dayta. “Ti kababalin ken determinasion ni Brunella nga agtulnog iti Dios ti nakatignay iti rikna dagiti doktor ken ti social worker. Nasdaawda iti ayat dagiti nagannakna ken ti suporta dagiti gagayyem iti kongregasion Kristiano. Inapresiarda met ti pannakaawat ken panagraemmi iti posisionda,” nalagip ti maysa kadagiti panglakayen iti kongregasion.

Kayat dagiti doktor a maliklikan ti panangyalison ti dara. Maipakat ken Brunella ti nainget a chemotherapy, ngem dayta ket di unay nakaro ngem iti gagangay. Mangpabassit daytoy iti pannakadangran dagiti selula ti darana gapu iti panangagas. “Inkonsiderar dagiti doktor ti pisikal, emosional, ken espiritual a kasapulan ni Brunella,” ilawlawag ni Nicoletta. “Idi indawatmi kadakuada nga agkonsulta iti maysa nga espesialista nga addaan kapadasan iti panangagas nga awan dara iti ubing nga addaan leukemia, immanamongda.” Napatanor da Brunella ken dagiti kameng ti ospital ti nabara a singgalut ti ayat.

Dagiti Naespirituan a Kalat

Nupay nasayaat dagiti resulta ti damo a panangagas, rugrugi la dayta ti panagrigat ni Brunella. Idi Nobiembre 1990 simmayaat ti sakitna, isu a nabautisaran a di nagtantan. Iti panangut-utobna iti napalabas a sumagmamano a bulan, inako ni Brunella: “Nagrigat daydi. Kasapulam ti adu a pigsa, ken kasapulan nga agpanunotka a sipopositibo. . . . Nasuot ti pammatik, ngem nagtalinaedak a natibker, ken panggepko pay laeng nga aramiden a karera ti panagregular pioneer [amin-tiempo a ministro].”

Idi rugrugi ti 1991, nabignat ni Brunella. Gistay natay bayat nga umaw-awat iti chemotherapy, ngem anian a siddaaw ken ragsak ti amin ta isu ket nakalasat. Iti bulan ti Agosto naaddaan iti umdas a pigsa tapno busbosenna dayta a bulan iti publiko a panagministerio kas maysa nga auxiliary pioneer. Kimmaro manen ti sakitna, ket idi Nobiembre 1991 nagwaras ti kanser iti nadumaduma a paset ti bagina. Rinugian ti sabali a grupo dagiti doktor iti sabali nga ospital nga agasan babaen ti radiation therapy.

Uray iti sidong dagiti kasta a narigat a kasasaad, nagtalinaed a natibker ni Brunella ken nangikeddeng kadagiti naespirituan a kalat. Idi damo a maammuanna nga adda leukemia-na, naibaga kenkuana a mabalin nga innem a bulan laengen ti panagbiagna. Ita, agarup maysa a tawen ket kagudua ti napalabasen, agtultuloy pay laeng ti panagplano ni Brunella para iti masanguanan. “Inusarna ti panawenna iti panangragpat kadagiti kalatna,” kinuna ti maysa a panglakayen iti kongregasion. “Ti pammati ni Brunella iti Paraiso nga inkari ti Dios ti nangandingay kenkuana iti panawen ti panagrigatna. Rimmang-ay iti kinanataengan kas maysa a Kristiano nupay adda pay laeng iti kinaagtutubo. Naparegta ti kongregasion iti ugali ken kababalinna ken natignayna ti puso dagidiay makaam-ammo kenkuana, agraman dagiti kameng ti ospital.” Malaglagip ni nanangna: “Pulos a di nagreklamo. No adda mangkomusta iti marikriknana, kunana, ‘Mayat met’ wenno, ‘Nasayaat, ket sika met ngay?’”

Natalged a Masakbayan

Implano ni Brunella ti tumabuno iti “Dagiti Managawit iti Lawag” a Kumbension Distrito dagiti Saksi ni Jehova idi Hulio 1992. Ngem, idi dimtengen ti panawen ti kumbension, nayospital ni Brunella, ket agngangabiten ti biagna. Nupay kasta, inatendaranna ti kumbension a naka-wheelchair, a panggepna a buyaen ti drama a Panangaramid ti Umiso iti Imatang ni Jehova.

Nagsubli iti pamiliana tapno makalangenna ida kadagiti maudi a sumagmamano nga al-aldaw ti panagbiagna. “Agingga iti kanibusanan ti panagbiagna, ad-adda a maseknan kadagiti sabsabali ngem iti bagina,” kuna ni Nicoletta. “Pinaregtana ida nga agadal iti Biblia, nga ibagbagana kadakuada, ‘Agkakaduatayto idiay Paraiso.’”

Natay ni Brunella idi Hulio 27, 1992, a natibker ti namnamana a mapagungar iti biag iti Paraiso a daga. Nairugina laeng a ragpaten dagiti kalatna, ngem panggepna nga itultuloy ti napasnek a kursona kalpasan ti panagungarna. Sumagmamano laeng nga aldaw sakbay a natay, inaramid ni Brunella ti sumaganad a surat, a naibasa idi pumponna.

“Patgek a Gagayyem:

“Pagyamanan ti yaayyo. Ti kaaddayo ket dakkel a banag para iti pamiliak.

“Kadagiti tattao a nadekket kaniak​—adun ti naglasatantayo. Adu dagiti dakes a panawentayo, ngem adda met sumagmamano a makaparagsak a panawen. Maysa dayta a narigat ken napaut a pannakidangadang, ngem diak ipagarup a napaayak. Kas kunaen ti Kasuratan, ‘nakirupakak iti nasayaat a dangadang, tinarayko ti tarayen agingga iti pagpatinggaan, tinungpalko ti pammati.’​—2 Timoteo 4:7.

“Adu met ti nasursurok, ken dakkel ti rimmang-ayak, ket nakita dagiti gagayyemko ken dagidiay adda iti aglawlawko ti panagbalbaliw. Kayatko ti agyaman kadagiti amin a tattao a nangsaranay kaniak.

“Dakayo a mamati ken ni Jehova ken iti baro a sistema ti makaammo nga addanto panagungar, kas kunaen ti Juan 5:28, 29. Isu nga agtalinaedkayo a natibker iti kinapudno, ket agkikitatayto manen.

“Kayatko ti agyaman kadagiti tattao a makaammo iti naglasatak. Ipaayko iti tunggal maysa kadakayo ti napaut nga arakup ken agek. Ay-ayatenkay amin.”

Saan nga impalubos ni Brunella a ti kinaagtutubo wenno ti sakitna ti mangitantan iti panagdedikarna iti Dios. Ti ulidan ti pammati ken determinasionna ti mangparegta agpadpada kadagiti agtutubo ken natataengan a mangiwaksi iti aniaman a manglapped kadakuada iti panagtaray iti tarayen maipaay iti biag.​—Hebreo 12:1.