“Ti Tulongko Aggapu ken Jehova”

No ti Kinalakay ken Kinabaket Agbalin a “Korona ti Kinapintas”

“DAYTA ti kasayaatan a biag,” kinuna ti agtawen iti 101 a ni Muriel. “Pudno a pribilehio dayta!” inyebkas ti agtawen iti 70 a ni Theodoros. “Awanen ti nasaysayaat pay a nangusarak koma iti biagko,” kinuna ti agtawen iti 73 a ni Maria. Aminda ket impamaysada ti biagda iti panagserbi ken ni Jehova a Dios.

Adu ti kas kadakuada nga aktibo nga agdaydayaw ken ni Jehova iti sangalubongan. Iti laksid ti panaglakay ken panagbaket, panagkapuy ti salun-at, ken dadduma pay a narigat a kasasaad, agtultuloy ti amin a kararua a panagserbida iti Dios. Iti kongregasion Kristiano, mararaem dagiti kasta a matalek a lallakay ken babbaket gapu iti mapagulidanan a debosionda iti Dios. Ipatpateg unay ni Jehova ti serbisio dagiti lallakay ken babbaket, uray no mabalin a limitado ti maaramidanda gapu iti kasasaadda.a​—2 Corinto 8:12.

Maitutop ti ibaga ti libro a Salmo maipapan iti kalidad ti biag a manamnama dagiti matalek a lallakay ken babbaket. Mayarigda iti lakayen ken nadaeg a kayo nga agtultuloy a nabunga. Mainaig kadagiti matalek a lallakay ken babbaket, inkanta ti salmista: “Agtultuloydanto pay nga agbarusbos bayat ti kinaubanan, agtultuloydanto a nalukmeg ken nasalibukag.”​—Salmo 92:14.

Amken ti dadduma a mabaybay-an ken mayaleng-alengdanto inton kumapuydan gapu iti kinalakay wenno kinabaket. Impakaasi ni David iti Dios: “Saannak nga ibelleng iti tiempo ti kinalakay, inton agkapuyen ti bilegko, saannak a baybay-an.” (Salmo 71:9) Ania ti mamagbalin kadagiti lallakay ken babbaket a narang-ay nupay kumapkapuy ti bagida? Isu ti nadiosan a galad ti kinalinteg. “Ti met laeng nalinteg rumangpayanto kas iti panagrangpaya ti maysa a kayo a palma,” inkanta ti salmista.​—Salmo 92:12.

Dagidiay simamatalek nga agserserbi iti Dios iti unos ti biagda ti agtultuloy a mangpataud iti naimbag a bunga bayat ti kinalakay wenno kinabaketda. Arigna nga agtubo ken mangpataud iti nawadwad nga apit ti adu kadagiti bin-i nga immulada iti bagida wenno kadagiti dadduma. (Galacia 6:7-10; Colosas 1:10) Iti kasumbabangirna, dagiti tattao a mangus-usar iti biagda kadagiti managimbubukodan a kalat ken mangilaksid kadagiti daldalan ti Dios ket mayarig iti nakudidit a mula bayat ti panaglakay wenno panagbaketda.

Ti kinalinteg kas adorno ti kinalakay ken kinabaket ket naipaganetget met iti Proverbio a libro ti Biblia. Kunana: “Ti kinaubanan ket korona ti kinapintas no masarakan dayta iti dalan ti kinalinteg.” (Proverbio 16:31) Wen, ti kinalinteg ti mangiparangarang iti makin-uneg a pintas. Mararaem ti tao nga agbibiag a nalinteg. (Levitico 19:32) Pakaidayawan ti kinaubanan no nabuyogan dayta iti sirib ken kinaimbag.​—Job 12:12.

Makaay-ayo unay ken ni Jehova ti nalinteg a panagbiag. Kuna ti Kasuratan: “Uray iti kinalakay ti maysa siak [ni Jehova] met laeng Daydiay; ket iti kinaubanan ti maysa agtultuloyakto a mangimet. Sigurado nga agtignayakto, tapno mangawitak ken tapno mangimetak ken mangipaayak iti itatalaw.” (Isaias 46:4) Anian a makaliwliwa a maammuan a ti naayat a nailangitan nga Amatayo inkarina a saranayen ken tulonganna dagiti nasungdo kenkuana agingga iti kinalakay wenno kinabaketda!​—Salmo 48:14.

Yantangay makaay-ayo unay ken ni Jehova ti biag a nabusbos iti matalek a panagserbi kenkuana, saan kadi a rumbeng a pagraeman met dayta dagiti sabsabali? Kas panangyanninaw iti panangmatmat ti Dios, ipategtayo dagiti lallakay ken babbaket a kapammatiantayo. (1 Timoteo 5:1, 2) No kasta, sumapultayo koma kadagiti praktikal a pamay-an a maipakitatayo ti Nakristianuan nga ayat iti panangasikaso kadagiti kasapulanda.

Pannagna iti Dana ti Kinalinteg Uray Nataenganen

“Iti dana ti kinalinteg adda biag,” impanamnama kadatayo ni Solomon. (Proverbio 12:28) Ti kinalakay wenno kinabaket ket saan a lapped iti pannagna iti dayta a dana. Kas pagarigan, idiay Moldova, maysa a lakay nga agtawen iti 99 ti nangbusbos iti kinaagkabannuagna iti panangitandudo iti Komunismo. Pagpannakkelna ti personal a pannakitungtongna kadagiti nalatak a lider ti Komunista, kas ken ni V. I. Lenin. Ngem iti panagkapuy ken pannakaparmek ti Komunismo, napukaw ti panggep ken direksion ti biag daytoy a lakay. Ngem idi inlawlawag kenkuana dagiti Saksi ni Jehova a ti Pagarian ti Dios ti kakaisuna a solusion dagiti parikut ti sangatauan, inawatna ti kinapudno iti Biblia ket nagbalin a naanep nga estudiante ti Kasuratan. Ti laeng ipapatayna ti nanglapped kenkuana nga agpabautisar kas adipen ni Jehova.

Idi naammuanna ti maipapan kadagiti nalinteg a pagannurotan ti Dios maipapan iti moral, nabigbig ti maysa nga agtawen iti 81 a baket idiay Hungaria a masapul nga agkasarda iti lalaki a kabkabbalayna iti sumagmamanon a tawen. Inturtured ti baket nga inlawlawag ken ni lakayna ti panangmatmatna a naibatay iti Biblia. Nasorpresa ken kasta unay ti rag-ona idi immanamong ni lakayna nga agkasarda. Idi agbalin a legal ti panagasawada, napartak a rimmang-ay iti naespirituan. Iti uneg ti walo a bulan sipud nangrugi a mayadalan iti Biblia, nagbalin a di bautisado nga agibumbunannag, ket nabautisaran di nagbayag kalpasanna. Pudno unay a ti kinalinteg mabalangatanna dagiti lallakay ken babbaket iti pudno a pintas!

Wen, dagiti matalek a lallakay ken babbaket a Kristiano masiguradoda a maseknan ti Dios kadakuada. Saan a baybay-an ni Jehova dagidiay agtalinaed a nasungdo kenkuana. Imbes ketdi, nagkari nga iwanwan, tulongan, ken pabilgenna ida uray no lallakay wenno babbaketdan. Paneknekanda met a pudno dagiti sasao ti salmista: “Ti tulongko aggapu ken Jehova.”​—Salmo 121:2.

[Footnote]

[Blurb iti panid 9]

“Ti kinaubanan ket korona ti kinapintas no masarakan dayta iti dalan ti kinalinteg.”​—PROVERBIO 16:31

[Kahon iti panid 8]

AYWANAN NI JEHOVA DAGITI LALLAKAY KEN BABBAKET NGA ADIPENNA

“Iti sanguanan ti ubanan rebbeng a tumakderka, ket masapul nga ipakitaam ti konsiderasion ti kinatao ti maysa a lakay.”​—Levitico 19:32.

“Uray iti kinalakay ti maysa siak met laeng Daydiay; ket iti kinaubanan ti maysa agtultuloyakto a mangimet.”​—Isaias 46:4.