Isasang-at iti Lansad ti Saba

TI Saba nga isla dagiti Olandes nagserbi idi kas sarikedked dagiti pirata a naglayag iti Baybay Caribe tapno agsapul iti samsamenda. Ita, daytoy a bassit nga isla, a masarakan 240 a kilometro iti daya ti Puerto Rico, ket pagnanaedan ti agarup 1,600 nga umili, a pakaibilangan ti lima a Saksi ni Jehova. Dagitoy a naandur a ministro agsapsapulda iti banag nga adayo a napatpateg ngem iti samsam. Siaanep a birbirokenda dagiti tattao a “siuumiso nga agannayas iti agnanayon a biag.”​—Aramid 13:48.

Ti naimbag a damag ti Pagarian ti Dios ket damo a naidanon iti Saba idi Hunio 22, 1952, idi simmanglad sadiay ti Sibia, maysa a bapor (schooner) dagiti Saksi ni Jehova. (Mateo 24:14) Dagiti misionero a da Gust Maki ken Stanley Carter sinang-atda Ti Agdan, nasurok a 500 ti tukadna a bato a dalan a sumang-at iti Lansad, ti kabesera ti Saba.a Iti sinigsiglo, daytoy nga akikid a dalan ti kakaisuna a pagnaan tapno madanon dagiti umili iti isla.

Ti damo a naipablaak a report iti trabaho a Nakristianuan a panangsaksi idiay Saba ket nagparang iti 1966 Yearbook of Jehovah’s Witnesses. Sigun iti dayta a report, maymaysa laeng ti aktibo a Saksi iti isla. Idi agangay, maysa a pamilia manipud Canada ti nangbusbos iti sumagmamano a tawen tapno ikasabada sadiay ti naimbag a damag. Itay nabiit, da Russel ken Kathy, a nataenganen nga agassawa manipud Estados Unidos, napanda idiay Saba ket nangasabada sadiay. Usigenyo ti kapadasanda.

Panagbisita iti Saba

Simmangpetkami ken ni baketko babaen ti eroplano tapno bumisita ken ni Ronald, ti kakaisuna a Saksi iti isla bayat ti kaaduan a paset ti dekada 1990. Agur-uray ni Ronald iti eropuerto. Naragsakan iti naikarton a bassit a nateng a sagutmi kenkuana, yantangay awan ti magatang sadiay a produkto ti talon. Naglugankami iti bassit a trak ket siaannad a simmang-atkami agingga iti tuktok daytoy a natay a bulkan a maaw-awagan Mount Scenery.

Nagsardengkami iti purok ti Hell’s Gate tapno kitaen ni Ronald no adda pay laeng iti pagpaskilan ti publiko ti impormasion a mangyaw-awis iti palawag publiko iti dayta a Domingo. Naragsakankami ta nakapaskil pay latta. Naglugan manen ni Ronald, ket intuloymi ti simmang-at iti kadakkelan a purok ti isla, ti Windwardside. Kas ipasimudaag ti naganna, daytoy a nangayed a purok nga 400 a metro iti ngatuen ti baybay ket masarakan iti deppaar ti isla a nakasuba iti angin. Idi simrek ti luganmi iti arubayan ti bassit a balay ni Ron, nakitami ti namaris a marka iti paraangan a mangipabpabigbig iti dayta kas Kingdom Hall dagiti Saksi ni Jehova.

Bayat ti pangngaldaw, inyimtuodko ti saludsod a nakatignayanmi a bumisita, “Kasano a nagbalinka a manangiwaragawag iti Pagarian ditoy Saba?”

Kuna ni Ron: “Idi nalpas a nabangon ti sanga nga opisina dagiti Saksi ni Jehova idiay Puerto Rico idi 1993, interesadokami ken ni baketko a mangitultuloy iti serbisiomi iti sabali a pagilian. Nakapankami idin iti Saba a kaduami ti sabali pay nga agassawa a payunir ket naammuanmi nga adda 1,400 nga umili ngem awan ti Saksi. Gapuna, nakisaritakami iti Komite ti Sanga nga Opisina iti Puerto Rico maipapan iti iyaakarmi ditoy.

“Paborable dagiti pasamak, ket nakaawatkami kamaudiananna iti pammalubos nga umakar. Makapaladingit ta dua a tawen kalpasanna, nakaro a nagsakit ni baketko, isu a nagsublikami idiay California. Kalpasan ti ipupusayna, nagsubliak ditoy Saba. Kayatko ngamin a leppasen ti aniaman a rinugiak.”

Panangasaba iti Binalaybalay Idiay Saba

Ti salas ti sangagasut ti tawennan a balay ni Ron ket maus-usar met kas Kingdom Hall.b Bayat a nammigatkami ken nagsagana a mapan mangasaba, ti tudo ti lumablabas nga ulep binasana ti kosina iti ruar ti balay. Kalpasan ti pammigat, rimmuarkami tapno mangasaba iti binalaybalay idiay Lansad. Iti kada balay, awagan ni Ron ti nagan ti bumalay no kablaawanna ida. Ti panagsasarita ket naisentro iti maysa a nabiit pay nga agdindinamag a pasamak. Kaaduan a tattao ket pamiliarda ken ni Ron ken iti ministeriona, ket adu ti sidadaan a mangawat iti literatura a naibatay iti Biblia.

Ti panangsalimetmet iti rekord dagiti interesado iti mensahe ti Pagarian ket mabalin a narigat no saanmo a kabesado dagiti pumurok. Apay? Agsipud ta “ipaulog ti linteg nga agpapada ti kolor ti amin a balay,” kuna ni Ron. Nadlawko dayta bayat a kimmitaak iti aglawlaw ket napaliiwko a puraw amin a balay idiay Saba ken nalabaga dagiti atepda.

Kalpasan a makasabaanmi ti maysa a bumalay, awisenmi a tumabuno iti Kingdom Hall tapno dumngeg iti naibatay iti Biblia a palawag publiko iti Domingo. No adda ni Ron iti isla, linawas a mangipaay iti palawag publiko. Iti agdama, 17 ti mayad-adalan iti Biblia iti Saba. Duapulo ti timmabuno iti Panglaglagip iti ipapatay ni Kristo idi 2004. Nupay agparang a bassit dayta a bilang, irepresentarna ti 1 a porsiento iti pakabuklan a populasion ti Saba!

Pudno a pagregreggetan dagiti Saksi ni Jehova a ti mensahe ti Dios maipapan iti pannakaisalakan ket maidanonda iti amin a tattao agingga a posible. Iti man bassit nga isla a kas iti Saba wenno iti intero a kontinente, simamatalek dagiti Saksi ni Jehova a mangitungtungpal iti bilin a ‘mangaramid iti ad-adalan kadagiti tattao iti amin a nasion.’​—Mateo 28:19.

Makapaladingit, nagngudon ti panagbisitami. Sakbay a simrekkami iti eroplano, nagpayapaykami tapno agpakada iti nangsangaili kadakami. Malaglagipminto a kanayon ti panagbisitami idiay Saba ken ti isasang-atmi iti Lansad!

[Footnotes]

[Dagiti Mapa iti panid 10]

(Para iti aktual a pannakaurnosna, kitaem ti publikasion)

PUERTO RICO

[Picture Credit Line iti panid 10]

Ladawan: www.sabatourism.com