Panangidayaw ken ni Jehova Idiay Eskuelaan
ITI intero a lubong, ikagkagumaan dagiti agtutubo a Saksi ni Jehova ti mangbirok kadagiti gundaway tapno maidaydayawda ti Dios idiay eskuelaan—babaen iti sasao ken konduktada. Imutektekanyo ti sumagmamano a kapadasan a mangyilustrar iti kinaregtada kas agtutubo.
Maysa nga agtutubo a Saksi idiay Grecia ti nakalikaguman a mangaramid ti report maipapan iti polusion iti atmospera ti daga. Kalpasan a nagsirarak iti Watch Tower Publications Index, nakasarak iti makatulong a material iti magasin nga Agriingkayo!, ket iti ngudo ti reportna, dinakamatna a dayta a magasin ti reperensiana. Kinuna kenkuana ti maestrana a dayta ti maysa kadagiti kasayaatan a report a nabasana. Idi agangay, inusar ti maestrana dayta nga impormasion bayat ti maysa a seminar, a nangyeg iti agkakaimbag a resulta. Daytoy nga agtutubo a kabsat inkeddengna ngarud nga itukon iti maestrana dagiti kanayonan a ruar ti Agriingkayo!, agraman ti isyu a naglaon iti serye a “Dagiti Mannursuro—Kasanotayo Ngata no Awanda?” Dayta a maestra pinadayawanna ti magasin nga Agriingkayo! iti sanguanan dagiti estudiante, ket dadduma kadakuada ti nagkiddaw kadagiti kopia. Nangitugot ti kabsat iti dadduma pay a kopia ti magasin idiay eskuelaan tapno mabasa dagiti estudiante ti dadduma pay a ruar ti magasin.
Idiay Benin, Africa, maysa a Kristiano a tin-edyer ti naipasango iti saan a gagangay a kita ti suot. Kas nakairuaman iti dayta a lugar, adu a nagannak ti nangtangdan kadagiti mangisuro kadagiti annakda mainaig kadagiti naririgat a leksion kas paset ti panagsagana dagiti estudiante para iti eksaminasion. Nupay kasta, ti agsapa ti Sabado ti pinili dagiti natangdanan a mangisuro tapno aramidenda dagita a sesion. Saan nga immanamong ti agtutubo a Saksi: “Ti agsapa ti Sabado ti eskediul ti intero a kongregasion a mangasaba. Para kaniak, dayta ti kararagsakan a tiempo ti lawas, ket diak kayat nga isukat dayta iti aniaman!” Umanamong ti amana, a maysa nga agsolsolo a nagannak ken maysa met a Saksi, isu nga inkagumaanna ti nakisarita iti maysa a grupo dagiti nagannak ken mannursuro tapno mabaliwan ti eskediul. Ngem nagkedkedda amin. Inkeddeng ti agtutubo nga uray awanen ti mangisuro kenkuana. Nakiraman ketdi iti panangasaba ti kongregasionda. Inumsi dagiti kaklasena, nga indagadagda kenkuana nga isardengnan ti panangasabana ken tallikudannan ti Diosna. Namnamaenda a dina maipasa ti eksaminasion. Ngem nagbanaganna, saan a nakapasa ti grupo dagiti nasuruan idinto a nakapasa ti agtutubo a kabsat. Nagsardeng ngarud ti panangumsi kenkuana. Ita, ibagbaga kenkuana dagiti estudiante, “Itultuloymo ketdi ti agserbi iti Diosmo.”
Iti Czech Republic, maysa a balasitang nga agtawen iti 12 ti nangisagana iti maysa a report maipapan iti maysa a libro. Pinaregta ni nanangna nga usarenna ti libro a Ti Katan-okan a Tao a Nagbiag Pay Laeng. Rinugianna ti reportna babaen kadagiti saludsod nga: “Ania ti panagkunam? Siasino ti katan-okan a tao a nagbiag?” Dineskribirna ni Jesus, ti biagna ditoy daga, ken dagiti pannursurona. Kalpasanna, insalaysayna ti kapitulo a napauluan “Maysa a Leksion iti Pammakawan.” Kinuna ti maestrana, “Dayta ti kasayaatan a report a nangngegko kenka!” ket siyayaman nga inawatna ti maysa a kopia dayta a libro. Tinarigagayan met ti dadduma nga estudiante ti maaddaan iti kopia. Kabigatanna, maragsakan ti balasitang a nangipaima iti 18 a kopia.
Dakkel ti rag-o dagiti kasta nga agtutubo a mangidaydayaw ken ni Jehova idiay eskuelaan. Nasken a tuladentayo ti kinaregta dagitoy nga agtutubo.