Dagiti Makatulong Tapno Makontroltayo ti Emosiontayo
ADDA kadi dagiti gundaway a rimbawannakayo ti negatibo a rikna? Nalakakayo kadi nga agrurod, agunget, wenno maupay? Masansan kadi a lapunosennakayo dagiti pakaringgoran iti biag? Ania ti makatulong?
Ti negatibo a rikna ket kadawyan iti tao. No siuumiso a mamedmedan, pagbalinenna a makapainteres ti biag. Nupay kasta, bigbigen ti Biblia nga uray “ti panangirurumen laeng mapagtignayna a simamauyong ti masirib.” (Eclesiastes 7:7) Iti lubong a gagangayen dagiti kinaranggas ken aksidente, siasino ti saan a maapektaran ti emosionna gapu kadagiti paspasamak iti aglawlawna? Ngem ibaga met ti Kasuratan: “Awan ti nasaysayaat ngem ti panagrag-o ti tao kadagiti aramidna.” (Eclesiastes 3:22) Tapno ad-adda a makaparagsak ti biag, nasken ngarud a sursuruentayo ti agrag-o babaen ti panangsukay kadagiti nasayaat nga emosion. Kasanotayo a patanoren dagiti makagunggona nga emosion ken iwaksi dagiti makadangran?
Ti panangaramid kadagiti praktikal a tignay masansan a kissayanna ti kinakaro dagiti negatibo nga emosion. Kas pagarigan, no maringgorantayo gapu kadagiti banag a ditay makontrol, saan aya a nasaysayaat a baliwantayo ti rutinatayo wenno panawantayo pay laeng dagita a pakaringgoran imbes a panunotentayo dagiti makapadanag a banag? Ti pannagna tapno agaliwaksay, panagdengngeg kadagiti makaliwliwa a musika, nasaranta a panagwatwat, wenno naasi a panangtulong iti maysa nga agkasapulan ket makaipaay iti liwliwa ken ragsak kadatayo.—Aramid 20:35.
Ngem ti kasayaatan a pamay-an tapno maiwaksi dagiti negatibo a rikna isu ti panagtalektayo iti Namarsua. No agtultuloy ti negatibo a panagpampanunot, nasken nga ‘iyallatiwtayo ti isuamin a pakaringgorantayo iti Dios’ babaen ti kararag. (1 Pedro 5:6, 7) Ipanamnama kadatayo ti Biblia: “Ni Jehova asideg kadagidiay nadunor ti pusoda . . . Adu ti didigra daydiay nalinteg, ngem manipud kadakuada amin isu ispalen ni Jehova.” (Salmo 34:18, 19) Kasanotayo a makapagtalek a ti Dios ti ‘tulong ken Manangilisi’ kadatayo? (Salmo 40:17) Maaramidtayo dayta babaen ti panangadal iti Biblia ken panangmennamenna kadagiti pudno a pasamak a mangipakita a personal a maseknan ti Dios iti pagimbagan dagiti adipenna.