Saannakanto Pulos a Panawan ni Jehova

NAKAPASAR dagiti Kristiano idiay Judea iti narungsot nga ibubusor, ken nagbileg ti impluensia ti materialistiko a panangmatmat dagiti tattao iti aglikmutda. Tapno maparegta ida ni apostol Pablo, inadawna ti sinao ni Jehova kadagiti Israelita bayat ti iseserrekda iti Naikari a Daga. Insurat ni Pablo: “Saankanto a pulos panawan ket saankanto a pulos baybay-an.” (Hebreo 13:5; Deuteronomio 31:6) Daytoy a kari awan duadua a pinabilegna dagiti Hebreo a Kristiano idi umuna a siglo.

Ti kasta a kari pabilgennatayo met koma a mangdaer kadagiti pakadanagan bayat nga agbibiagtayo iti daytoy “napeggad a tiempo a narigat a pakilangenan.” (2 Timoteo 3:1) No agtalektayo ken ni Jehova ken agtignay maitunos iti dayta, saranayennatayo tapno makapagtultuloytayo uray kadagiti karirigatan a kasasaad. Tapno makitatayo no kasano a maitungpal ni Jehova dayta a kari, usigentayo ti pagarigan ti kellaat a pannakapukaw ti pagbiagan ti maysa a tao.

Panangsango iti di Napakpakadaan

Umad-adu dagiti awanan iti trabaho iti sangalubongan. Sigun iti maysa a magasin a Polaco, naibilang ti kinaawan ti trabaho kas “maysa kadagiti karikutan a parikut ti kagimongan ken ekonomia.” Apektado met dagiti industrialisado a pagilian. Kas pagarigan, uray kadagiti kameng ti Organization for Economic Cooperation and Development, ti bilang dagiti awanan iti trabaho iti 2004 “ngimmato iti nasurok a 32 a milion, a nangatngato ngem idi dekada 1930 bayat ti Great Depression.” Idiay Poland, tallo a milion ti awanan iti trabaho a nailista ti Central Statistical Office idi Disiembre 2003, a “mangibagi iti 18 porsiento a sibilian nga addan iti edad a mabalinen ti mangged.” Maysa a report ti nangibaga a ti kaadu dagiti Africano nga awanan iti trabaho idiay Makin-abagatan nga Africa ket dimmanonen iti 47.8 porsiento idi 2002!

Ti kellaat a pannakapukaw ti trabaho ken di ninamnama a panagkissay iti trabahador ket pudno a pangta iti adu, agraman kadagiti adipen ni Jehova. “Ti tiempo ken ti di mapakpakadaan a pasamak” mapagteng iti siasinoman. (Eclesiastes 9:11) Mabalin a maibagbagatayo met ti sasao ni salmista a David: “Dagiti tuok ti pusok immaduda.” (Salmo 25:17) Madaeram kadi dagiti kasta a narigat a kasasaad? Makaapektar dagita iti emosional, naespirituan, ken namaterialan a kasasaadmo. No maawananka iti trabaho, kabaelam kadi nga isubli ti normal a kasasaadmo?

Panangdaer iti Emosional a Pakarigatan

“Narigrigat kadagiti lallaki ti maawanan iti trabaho,” yantangay isuda ti mamatmatan a mangbibiag iti pamilia, inlawlawag ti sikologo a ni Janusz Wietrzyński. Kinunana a dayta ti mabalin a “nakaro a mamagbalbaliw iti emosion” ti lalaki, manipud panagunget agingga iti pannakaupay. Ti maysa nga ama a naikkat iti trabaho ti mabalin a mapukawan iti panagraem iti bagi ken mangrugi a “makirikiar iti pamiliana.”

Ni Adam, maysa a Kristiano a dua ti annakna, inlawlawagna no kasano ti riknana idi napukawna ti trabahona: “Naglakaak a maringgoran; kasla awan ti diak karurod. Uray matmaturogak, matagtagainepko latta ti maipapan iti trabaho ken no kasano a maipaayko ti kasapulan dagiti annakko ken ni baketko, a padak a di ninamnama a naikkat iti trabaho.” Idi napukawan iti pagsapulan da Ryszard ken Mariola, agassawa nga addaan iti maysa nga anak, dakkel ti utangda iti banko. Insalaysay ti asawa a babai: “Kanayon a maringgoranak, sidsidirennak ti konsiensiak no apay nga immutangkami iti dakkel. Mapampanunotko a kanayon a basolko amin dayta.” No maipasangotayo iti kasta a kasasaad, mabalin a nalakatayo a makapungtot, maringgoran, wenno lumdaang, ket malapunostayo. Kasanotayo ngarud a makontrol dagiti negatibo nga emosion a mabalin a mariknatayo?

Mangipaay ti Biblia iti epektibo a balakad no kasano a taginayonen ti positibo a kababalin. “Dikay maringgoran iti aniaman,” imbalakad ni apostol Pablo, “no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.” (Filipos 4:6, 7) Ti iyaadani ken Jehova iti kararag ipaayannatayo iti “talna ti Dios,” ti kalmado a kondision ti panunot a naibatay iti pammati kenkuana. Kuna ni Irena nga asawa ni Adam: “Inkararagmi ken ni Jehova ti kasasaadmi ken no kasano nga ad-adda a mapasimplemi ti biagmi. Ni lakayko, a naglaka a maringringgoran, nangrugi nga agtalek nga addanto ti solusion.”

No di ninamnama a mapukaw ti trabahom, maitutop nga iyaplikarmo ti balakad ni Jesu-Kristo iti Sermonna iti Bantay: “Isardengyo ti maringgoran maipapan kadagiti kararuayo no ania ti kanenyonto wenno no ania ti inumenyonto, wenno maipapan iti bagbagiyo no ania ti ikawesyonto. . . . Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay a bambanag mainayonto kadakayo.” (Mateo 6:25, 33) Da Ryszard ken Mariola inyaplikarda daytoy a balakad tapno mapagballigianda dagiti negatibo a riknada. “Kanayon a liniwliwanak ni lakayko ken impaganetgetna a saannakami a baybay-an ni Jehova,” kinuna ni Mariola. Innayon ni lakayna: “Babaen ti kanayon a panagkararagmi a sangsangkamaysa, simmingedkami iti Dios ken iti maysa ken maysa, ket dayta ti nangipaay iti kasapulanmi a liwliwa.”

Ti nasantuan nga espiritu ti Dios tulongannatayo met a mangdaer. Ti panagteppel, a mapataud kadatayo ti espiritu, makatulong kadatayo nga agtalinaed a kalmado. (Galacia 5:22, 23) Mabalin a saan a nalaka dayta, ngem posible agsipud ta inkari ni Jesus a “ti Ama sadi langit mangted iti nasantuan nga espiritu kadagidiay agdawdawat kenkuana.”​—Lucas 11:13; 1 Juan 5:14, 15.

Saanmo a Baybay-an Dagiti Naespirituan a Kasapulam

Ti di ninamnama a pannakaikkat iti trabaho ket makaupay no damo uray iti natimbeng a Kristiano, ngem saantayo a rumbeng a baybay-an dagiti naespirituan a kasapulantayo. Ti maysa a pagarigantayo ket ni Moises idi agtawen iti 40. Nagbalbaliw ti biagna idi napukawna ti saadna iti aristokrasia ket nagbalin a pastor, trabaho nga umsien dagiti Egipcio. (Genesis 46:34) Masapul nga iruam ni Moises ti agbiag iti sabali a kasasaad. Iti simmaganad nga 40 a tawen, pinalubosanna ni Jehova a mangsukog iti kinataona ken mangisagana kenkuana iti baro nga annongen nga agur-uray kenkuana. (Exodo 2:11-22; Aramid 7:29, 30; Hebreo 11:24-26) Iti laksid dagiti pakarigatan, impamaysa ni Moises ti atensionna kadagiti naespirituan a bambanag, a sidadaan a timmulok iti panangsanay kenkuana ni Jehova. Ditay koma ipalubos a dagiti narigat a kasasaad ti mangringbaw kadagiti naespirituan a patpatien ken prinsipiotayo!

Nupay narigat ti di ninamnama a pannakapukaw ti trabaho, nasayaat dayta a gundaway tapno pabilgentayo ti singgaluttayo ken ni Jehova a Dios ken iti ilina. Kasta ti inaramid ni Adam a nadakamat itay. Kunana: “Idi napukaw ti trabahomi ken ni baketko, dimi pulos pinanunot ti agliway kadagiti Nakristianuan a gimong wenno kissayan ti pannakipasetmi iti trabaho a panagebanghelio. Babaen ti kasta a panangmatmat, saanmi a pakadanagan unay ti sumaruno nga aldaw.” Kasta met laeng ti narikna ni Ryszard: “No saan a maigapu kadagiti gimong ken iti ministerio, dimi koma pulos nadaeran ti kasasaadmi; nalapunoskami koman iti danag. Makapabileg ti naespirituan a pannakipatang kadagiti dadduma, agsipud ta iturongna ti atensionmi kadagiti pakaburiboranda saan ket a kadagiti pakarigatanmi.”​—Filipos 2:4.

Wen, imbes a maringgoran maipapan iti trabaho, usarem ti nawaya a tiempom agpaay kadagiti naespirituan nga aktibidad, personal a panagadal, pannakiraman kadagiti aktibidad ti kongregasion, wenno ti panangpalawa iti ministeriom. Imbes nga agpalpalabas lattan iti oras, maaddaanka iti ‘adu nga aramiden iti trabaho ti Apo’​—a mangparag-o kenka ken iti siasinoman a napasnek nga indibidual a mangawat iti mensahe ti Pagarian nga ikasabam.​—1 Corinto 15:58.

Panangipaay iti Material a Kasapulan ti Pamiliam

Nupay kasta, kasapulantayo met ti pisikal a taraon, saan laeng a naespirituan a taraon. Laglagipentayo koma daytoy a prinsipio: “Pudno unay no ti asinoman saanna nga ipaay ti kasapulan dagidiay kukuana, ken nangnangruna dagidiay kameng ti sangakabbalayanna, pinaglikudanna ti pammati ket isu dakdakes ngem ti tao nga awanan pammati.” (1 Timoteo 5:8) “Uray pay naparabur iti material dagiti kakabsat iti kongregasion,” inadmitir ni Adam, “pagrebbenganmi ti agsapul iti panggedan kas Kristiano.” Mabalintayo ti agpatulong ken ni Jehova ken iti organisasionna, ngem ditay pulos liplipatan a kasapulan a pagreggetantayo ti agsapul iti trabaho.

Ania ti aramidem? “Saanka nga agtugaw lattan nga ur-urayem ti tignay ti Dios, a namnamaem ti milagro,” inlawlawag ni Adam. “No agsapsapulka iti trabaho, saanka a bumdeng a mangyam-ammo iti bagim kas Saksi ni Jehova. Dagiti amo kaaduanna a tagipatgenda dayta.” Imbalakad ni Ryszard: “Agimtuodka iti siasinoman nga adda ammona a pagtrabahuan, kanayon nga agdamagka iti ahensia ti trabaho, basaem dagiti pakaammo, kas iti: ‘Kasapulan, babai a mangaywan iti baldado a tao’; wenno ‘Temporario a trabaho: agburas iti strawberry.’ Itultuloymo ti agsapul! Saanka a napili unay, aramidem uray ti trabaho a nanumo wenno saanmo nga ar-arapaapen.”

Wen, ‘ni Jehova ti katulongam.’ ‘Saannakanto a pulos panawan ket saannakanto a pulos baybay-an.’ (Hebreo 13:5, 6) Saan a kasapulan a maringgoranka unay. Insurat ni salmista a David: “Iyadanim ken Jehova ti dalanmo, ket agkammatalekka kenkuana, ket isu agtignayto.” (Salmo 37:5) Ti ‘panangyadani iti dalantayo ken ni Jehova’ kaipapananna nga agpannuraytayo kenkuana ken aramidentayo dagiti bambanag sigun iti pagayatanna, uray no saan a paborable kadatayo ti kasasaad.

Da Adam ken Irena nasuportaranda ti bagbagida babaen ti panagdalus iti tawa ken agdan ken babaen ti saanda a panagbalin a gastador. Regular met a bimmisitada iti ahensia ti trabaho. “Kanayon nga adda tulong no kasapulanmi dayta,” kuna ni Irena. Innayon ni lakayna: “Naammuanmi babaen ti kapadasan nga adda dagiti inkararagmi a bambanag a saan a maitunos iti pagayatan ti Dios. Daytoy ti nangisuro kadakami nga agpannuray iti siribna ken saan nga agtignay maitunos iti bukodmi a pannakaawat. Nasaysayaat ti sikakalma nga aguray iti solusion nga ipaay ti Dios.”​—Santiago 1:4.

Simrek da Ryszard ken Mariola iti nagduduma a di regular a trabaho, ngem nangaskasabada latta kadagiti teritoria a dakdakkel ti pakasapulan. “Kanayon a makabirokkami iti trabaho a kasapulanmi kabayatan dagiti panawen nga awanen ti taraonmi,” kuna ni Ryszard. “Pagkedkedanmi dagiti trabaho a nangato ti sueldo ngem mangsinga kadagiti teokratiko nga annongenmi. Ikeddengmi ti aguray ken ni Jehova.” Patienda a ni Jehova ti nangipamuspusan tapno makasapulda iti pagnaedan a nalaka ti abang ket kamaudiananna nakasapul ni Ryszard iti trabaho.

Nagrigat ti maawanan iti trabaho, ngem apay a dimo matmatan dayta kas gundaway tapno mapaneknekam a mismo a saannakanto a pulos baybay-an ni Jehova? Aywanannaka ni Jehova. (1 Pedro 5:6, 7) Inkarina babaen ken propeta Isaias: “Dika agtalangkiaw, ta siak ti Diosmo. Patibkerenkanto. Pudno a tulongankanto.” (Isaias 41:10) Dimo pulos ipalubos a kumapuyka gapu iti di mapakpakadaan a pagteng, agraman ti pannakapukaw ti trabaho. Aramidem ti amin a kabaelam, ket ipabiangmon ken ni Jehova dagiti dadduma pay a banag. Urayem ni Jehova, “uray siuulimek.” (Un-unnoy 3:26) Sibabaknang a mabendisionankanto.​—Jeremias 17:7.

[Ladawan iti panid 9]

Usarem ti gundaway para kadagiti naespirituan nga aktibidad

[Dagiti Ladawan iti panid 10]

Liklikam ti agbalin a gastador, ken dika napili unay no agsapsapulka iti trabaho