Pakasaritaan ti Biag

Tinulongannak ni Jehova a Mangsapul Kenkuana

KAS INSALAYSAY NI FLORENCE CLARK

Iniggamak ti ima ni lakayko a nakaro a masakit. Kas maysa nga Anglicano, inkararagko iti Dios nga umimbag koma ni lakayko, ken inkarik a no malasatanna dayta, sapulek ti Dios agingga a masarakak. Ket kukuanakton.

NAIPASNGAYAK idi Setiembre 18, 1937, idiay Aboriginal Oombulgurri Community iti nasulinek a rehion ti Kimberley Plateau iti Makinlaud nga Australia. Florence Chulung ti naited a naganko.

Pagay-ayatko a lagipen ti kinaagtutubok kadagidi panawen a naragsak ken awan pay ti pakadanagak. Iti mision ti simbaan, naadalko ti sumagmamano a simple a bambanag maipapan iti Dios ken iti Biblia, ngem ni nanangko ti nangisuro kaniak kadagiti Nakristianuan a prinsipio. Regular nga ibasana kaniak ti Biblia, ket manipud iti kinaubingko, nasursurok nga ipateg dagiti naespirituan a banag. Rinaemko met ti maysa kadagiti ikitko a maysa a misionera iti relihionna. Ammo toy pusok a kayatko ti agbalin a kas kenkuana.

Iti komunidadmi, a sigud a naawagan Forrest River Mission, adda ti probision a panageskuela manipud iti umuna agingga iti maikalima a grado. Nageskuelaak iti dua laeng nga oras iti kada agsapa. Limitado unay ngarud ti panageskuelak, banag a saan a nagustuan ni tatangko. Tinarigagayanna a maaddaan dagiti annakna iti nasayaat nga edukasion, isu nga inkeddengna a panawanmin ti Oombulgurri ket umakarkamin idiay Wyndham. Naladingit ti aldaw nga ipapanawmi, ngem idiay Wyndham, naan-anay a nakapageskuelaak iti simmaganad nga uppat a tawen, manipud 1949 agingga 1952. Agyamyamanak unay ta tinulongannak ni Tatang a manggun-od iti dayta nga edukasion.

Ni Nanang ket empleado ti maysa a doktor, isu nga idi nagturposak iti eskuelaan idi agtawenak iti 15, intukon ti doktor ti panagtrabahok kas nars iti ospital ti Wyndham. Siraragsak nga inawatko dayta agsipud ta narigat idi ti agsapul iti trabaho.

Sumagmamano a tawen kalpasanna, naam-ammok ni Alec, maysa a puraw nga agay-aywan iti dinguen. Nagkasarkami idi 1964 iti ili ti Derby, a sadiay regular a nakigimongak iti Iglesia Anglicano. Naminsan, simmarungkar dagiti Saksi ni Jehova iti pagtaenganmi. Imbagak kadakuada a talaga a saanak nga interesado ket saanda koman nga agsubsubli. Ngem interesadoak iti maysa a banag nga imbagada​—adda personal a nagan ti Dios―Jehova.

“Dika Kadi Makapagkararag iti Bukodmo?”

Idi 1965, nangrugi a rumigat unay ti biag. Namitlo a nakapasar ni lakayko iti nakaro nga aksidente​—namindua iti kabaliona ken naminsan iti luganna. Imbag la ketdin ta immimbag dagiti sugatna isu a nakasubli iti trabahona. Ngem di nagbayag kalpasanna, naaksidente manen iti kabaliona. Iti daytoy a gundaway, nakaro a nasugatan ti ulona. Idi simmangpetak iti ospital, kinuna ti doktor a matay ni lakayko. Kasta unay ti leddaangko. Maysa a nars ti nagkiddaw a sarungkarannak ti padi iti dayta a lugar, ngem kinuna ti padi: “Inton bigaten. Awan ti wayak ita!”

Imbagak iti madre a kayatko a kaduaannak ti padi nga agkararag. Kinuna ti madre: “Apay koma? Dika kadi makapagkararag iti bukodmo?” Nagkarkararagak ngarud kadagiti rebulto iti simbaan, ngem saan a nakatulong dayta kaniak. Kasla agbugbugsoten ni lakayko. Napanunotko, ‘Kasanoak payen no matay ni lakayko?’ Maseknanak met kadagiti tallo nga annakko​—da Christine, Nanette, ken Geoffrey. Ania ngata ti pagbanaganda no maulilada iti ama? Makaparagsak, tallo nga aldaw kalpasanna, nagsubli ti puot ni lakayko ket nakaruar iti ospital idi Disiembre 6, 1966.

Nupay nagsayaat ti panagsubli ti salun-atna, nadangran ti utek ni lakayko. Adda dagiti gundaway a mapukawna ti lagipna ken nalakan nga agpungtot ken mangranggas. Saanna a maanusan dagiti ubbing ken agbalin nga agresibo no saanda a mangipangag a kas kadagiti adulto. Narigat ti mangaywan kenkuana. Dandani siak amin ti mangaramid kadagiti bambanag para kenkuana. Insurok kenkuana no kasano ti agbasa ken agsurat manen. Napaksuyanak a mangay-aywan kenkuana ken kadagiti dadduma pay nga annongen iti pamilia, ket naapektaran ti isipko. Pito a tawen kalpasan ti pannakaaksidente ni lakayko, nagnumuanmi nga agsinakami pay laeng tapno maisubli ti salun-atko.

Innalak dagiti ubbing ket nagpaabagatankami iti siudad ti Perth. Sakbay dayta, ti kabsatko a babai nangrugi a makipagadal iti Biblia kadagiti Saksi ni Jehova idiay Kununurra, maysa a bassit nga ili iti Makinlaud nga Australia. Impakitana kaniak ti ladawan iti libro a Ti Kinapudno a Mangiturong iti Biag nga Awan Inggana,a a mangiladladawan iti paraiso a daga nga ikarkari ti Biblia. Iti daytoy a libro, impakitana pay kaniak a ti nagan ti Dios ket Jehova, ket nagustuak dayta. Yantangay dagitoy a banag ket saan pulos a naibaga kaniak ti simbaan, inkeddengko ti agtelepono kadagiti Saksi ni Jehova apaman a nakasimpakamin idiay Perth.

Nupay kasta, kasla bumdengak a makisarita kadakuada. Maysa a rabii, adda nagtimbre iti ruangan. Napan iti ruangan ti anakko a lalaki sa nagdardaras a nagsubli kaniak, a kunkunana, “Nanang, adda dagiti tattao a panggepyo a teleponuan.” Medio naklaatak ket kinunak, “Ibagam nga awanak!” Ngem insungbatna, “Nanang, ammoyo met a dakes ti agulbod.” Husto met dayta isu a napanko linuktan ti ridaw ket kinablaawak dagiti nagtimbre. Nadlawko a kasla masmasdaawda. Rantada a kasao ti maysa a tao ngem immakaren iti pagtaengan. Inawisko ida a sumrek ket nagsasaruno dagiti saludsodko kadakuada, a makapnek a sinungbatanda babaen ti Biblia.

Iti simmaganad a lawas, inrugik ti regular a pannakipagadal iti Biblia kadagiti Saksi, nga inusarmi ti libro a Ti Kinapudno a Mangiturong iti Biag nga Awan Inggana. Dayta a panagadal ti nangisubli iti panangipategko kadagiti naespirituan a banag. Dua a lawas kalpasanna, tinabunuak ti Pananglaglagip iti ipapatay ni Kristo Jesus. Nakigimongak kada Domingo, ket di nagbayag, tabtabunuak payen dagiti gimong iti tengnga ti lawas. Nangrugi met nga inranudko dagiti maad-adalko. Simmayaat ti mental ken emosional a salun-atko gapu iti panangtulongko kadagiti sabsabali a mangammo kadagiti kinapudno iti Biblia. Innem a bulan kalpasanna, nabautisaranak iti kombension distrito idiay Perth.

Bayat a rimmang-ayak iti naespirituan, nangrugi a maapresiarko ti panangmatmat ni Jehova iti kinasagrado ti panagasawa, agraman ti prinsipio ti Biblia a masarakan iti 1 Corinto 7:13, nga agkuna: “Ti maysa a babai nga addaan iti di mamati nga asawa, ket kaskasdi isu umanamong a makipagnaed kenkuana, saanna koma a panawan ti asawana a lalaki.” Daytoy a kasuratan ti nangtignay kaniak nga agsubli ken ni Alec.

Panagsubli Idiay Derby

Addaak manen idiay Derby idi Hunio 21, 1979, kalpasan ti nasurok a lima a tawen a panagsinami ken ni lakayko. Siempre, aglalaok ti mariknak ken pinampanunotko no ania ngata ti reaksionna iti panagsublik. Nasdaawak ta naragsakan ni lakayko iti panagsublik kenkuana, nupay medio naupay ta nagbalinak a maysa kadagiti Saksi ni Jehova. Dagus nga insingasingna a tumabunoak iti simbaanna, daydiay tumabtabunoak sakbay ti iyaakarko idiay Perth. Inlawlawagko a saanko a maaramid dayta. Inkagumaak a rinaem ti kinaulona ken inaramidko ti kabaelak kas Kristiano nga asawa. Inkagumaak nga isarita kenkuana ti maipapan ken ni Jehova ken kadagiti nakaskasdaaw a karina para iti masanguanan, ngem saan nga interesado.

Kamaudianna, nupay kasta, saan laeng nga inawat ni Alec ti baro a wagas ti panagbiagko no di ket sinuportarannak pay iti pinansial tapno makatabunoak kadagiti kombension ken asamblea, agraman kadagiti linawas a gimong. Agyamyamanak unay idi gimmatang iti lugan​—maysa a napateg a banag iti daytoy nasulinek a paset ti Australia​—tapno adda mausarko iti Nakristianuan a ministerio. Dagiti kakabsat, agraman ti manangaywan iti sirkito, masansan nga agdagusda iti pagtaenganmi iti sumagmamano a rabii. Gapu iti dayta, naam-ammo ni Alec ti adu a Saksi, ket agparang a nagustuanna ti pannakilangenda.

Nariknak a Kaslaak ni Ezequiel

Tinagiragsakko ti panagbisita dagiti kakabsat, ngem adda pakarigatak. Siak laeng ti Saksi nga umili iti Derby. Ti kaasitgan a kongregasion ket idiay Broome, 220 a kilometro ti kaadayona. Gapuna, inkeddengko nga aramiden ti amin a kabaelak a mangisaknap iti naimbag a damag. Iti tulong ni Jehova, nayurnosko ti bambanag ket inrugik ti nangasaba iti binalaybalay. Narigatanak iti daytoy a trabaho, ngem kanayon nga ipalagipko iti bagik dagiti sasao ni apostol Pablo: “Ta iti amin a bambanag addaanak iti bileg gapu iti daydiay mangmangted kaniak iti pannakabalin.”​—Filipos 4:13.

Ti klero iti lugarmi saan a naragsakan iti aktibidadko, nangruna ti panangasabak kadagiti pada nga Aborigine. Pinadasdak a butbutngen ken pasardengen iti panangasabak. Ti ibubusorda ti ad-adda ketdi a namagbalin kaniak a determinado nga agtultuloy, ket regular a nagkararagak ken ni Jehova a tulongannak. Masansan a malagipko dagiti sasao a nangparegta ken ni Ezequiel: “Adtoy! Pinagbalinko ta rupam nga apag-isu a katangtangken dagiti rupada ken ta mugingmo nga apag-isu a katangtangken dagiti mugingda. Pinagbalinko ti mugingmo a kas iti diamante, a natangtangken ngem iti pamulinawen. Dika agbuteng kadakuada, ket dika agaligaget kadagiti rupada.”​—Ezequiel 3:8, 9.

Iti nagduduma nga okasion, dua a lallaki a kameng ti maysa a relihion ti immasideg kaniak bayat ti pannakitiendak. Siaariwawa a linaisdak, nga inkagumaanda nga alaen ti atension dagiti makitientienda. Diak inkankano ida. Naminsan, bayat ti panagsarungkarko iti maysa nga interesado a tao, immasideg ti ministro ti maysa a relihion ket kinunana a saanak a mamati ken ni Jesus. Rinabsutna ti iggemko a Biblia, inwagwagna iti rupak, sa induronna nga insubli iti imak. Pinerrengko ti ministro, ket siaalumamay ngem situtured nga inadawko ti Juan 3:16 tapno paneknekak kenkuana a mamatiak ken ni Jesus. Naikuleng ti ministro gapu iti sikokompiansa a reaksionko ket pimmanaw a di pulos nakatagari.

Tinagiragsakko ti mangasaba kadagiti Aborigine iti lugar ti Derby. Maysa a padi ti nangpadas a mangpasardeng kaniak a mangdanon kadagiti tattao iti maysa a partikular a komunidad, ngem isu ket nayakar. Gapuna, naidanonko kadakuada ti mensahe ti Biblia. Tinartarigagayak ti agbalin a misionera a kas iti ikitko, ket ita ar-aramidekon ti trabaho ti maysa a misionera, a tultulongak dagiti sabsabali a mangammo iti linaon ti Sao ti Dios. Adu kadagiti umili nga Aborigine ti naginteres iti ikaskasabak, ket nakairugiak kadagiti panagadal iti Biblia.

Sipapanunot iti Naespirituan a Kasapulak

Iti lima a tawen, siak laeng ti Saksi ni Jehova idiay Derby. Narigat ti agtalinaed a nabileg iti naespirituan no awan ti regular a pannakigimong a kadua dagiti kapammatian. Naminsan, nakariknaak iti pannakaupay ket nagmanehoak a napan iti maysa a lugar. Idi nagawidak iti mumalmalem, nasangpetak nga agur-uray ti maysa a kabsat a kaduana dagiti pito nga annakna. Nangyegda iti abasto a literatura para kaniak manipud iti nagadayo a kongregasion idiay Broome. Sipud idin, maysa a ngudo ti lawas kada bulan nga umaynak kaduaen daytoy a kabsat a ni Betty Butterfield. Mangasabakami sa adalenmi Ti Pagwanawanan iti pagtaengak. Maminsan met iti kada bulan a mapanak idiay Broome.

Manangtulong dagiti kakabsat idiay Broome ken no dadduma, mapanda idiay Derby tapno tulongandak iti tay-ak ti serbisio. Indagadagda a sumarungkar koma kaniak ti siasinoman a kakabsat manipud kadagiti sabali nga ili a dumalan iti Derby, ket kaduaandak iti ministerio. Dagitoy nga agdaldaliasat a kakabsat nangyegda met kadagiti nairekord a palawag publiko. Dadduma ti nangkadua kaniak a mangadal iti Ti Pagwanawanan. Makaparegta unay dagitoy nga ababa a panagsarungkar.

Kanayonan a Tulong

Iti sumagmamano a tawen, nakaawatak iti kanayonan a pammabileg idi a da Arthur ken Mary Willis, retirado nga agassawa manipud iti makin-abagatan a paset ti Makinlaud nga Australia, immayda tapno tumulongda kaniak iti tallo a bulan bayat ti nalam-ek a tiempo. Inkondukta ni Kabsat Willis ti kaaduan kadagiti gimong ken indauluanna ti ministerio iti tay-ak. Nagkakaduakami a nagdaliasat a napan kadagiti nasulinek a paset ti Kimberley Plateau, a napankami kadagiti rantso ti baka kadagitoy nga adayo a luglugar. Tunggal pumanaw da Kabsat Willis, mariknak ti kasta unay a liday.

Kamaudiananna, idi arinunos ti 1983, nakaawatak iti naragsak a damag a maysa a pamilia ti umay agnaed idiay Derby​—da Danny ken Denise Sturgeon ken dagiti uppat nga annakda a lallaki. Nanipud idi simmangpetda, regular a nakapaggigimongkami iti linawas ken agkakaduakami a makipaset iti tay-ak ti serbisio. Idi 2001, maysa a kongregasion ti nabuangay. Ita, ti Derby ket addaan iti nabileg a kongregasion a buklen ti 24 nga agibumbunannag iti Pagarian, nga addaan iti dua a panglakayen ken maysa a ministerial nga adipen a mangay-aywan a naimbag kadagiti naespirituan a kasapulanmi. No dadduma, dumanon iti 30 ti bilang dagiti makigimong.

Maragsakanak unay no malagipko no kasano ti panangtulong kaniak ni Jehova tapno makapagserbiak kenkuana. Nupay saanko pay a kapammatian ni lakayko, agtultuloy ti panangsuportana kaniak kadagiti dadduma a pamay-an. Lima iti pamiliak ti nagbalin a bautisado a Saksi​—ti dua nga annakko a babbai, dua nga appok a babbai, ken maysa a kaanakak a babai. Kanayonanna, sumagmamano pay a kabagiak ti makipagad-adal iti Biblia kadagiti Saksi ni Jehova.

Agyamyamanak unay ta tinulongannak ni Jehova a mangsapul kenkuana. Determinadoak nga agserbi kenkuana iti agnanayon.​—Salmo 65:2.

[Footnote]

[Mapa/Dagiti Ladawan iti panid 15]

(Para iti aktual a pannakaurnosna, kitaem ti publikasion)

AUSTRALIA

Wyndham

Kimberley Plateau

Derby

Broome

Perth

[Credit Lines]

Kangaroo ken lyrebird: Lydekker; koala: Meyers

[Ladawan iti panid 14]

Idi 1953, bayat nga agtartrabahoak kas nars iti ospital ti Wyndham

[Ladawan iti panid 15]

Kongregasion ti Derby, 2005