Nakasaganakayo Kadi Agpaay iti Pannakaisalakan?
“Sumrekka, sika ken ti intero a sangakabbalayam, iti daong, agsipud ta sika ti nakitak a nalinteg iti sanguanak iti tengnga daytoy a kaputotan.”—GENESIS 7:1.
1. Ania ti inyurnos ni Jehova tapno magun-od ti pannakaisalakan idi kaaldawan ni Noe?
IDI kaaldawan ni Noe, ‘nangyeg ni Jehova iti layus iti lubong dagiti di nadiosan a tattao,’ ngem nangyurnos met iti pamay-an tapno magun-od ti pannakaisalakan. (2 Pedro 2:5) Ti pudno a Dios intedna ken ni nalinteg a Noe dagiti nalawag nga instruksion no kasano ti mangbangon iti maysa a daong a pakaitalimengan ti biag bayat ti sangalubongan a layus. (Genesis 6:14-16) Kas manamnama iti maysa a natulnog nga adipen ni Jehova, “inaramid ni Noe ti maitunos iti isuamin nga imbilin kenkuana ti Dios.” Wen, “inaramidna ti kasta met laeng.” Adda naaramidan ti panagtulnog ni Noe no apay a sibibiagtayo ita.―Genesis 6:22.
2, 3. (a) Ania ti reaksion dagiti tattao iti ar-aramiden ni Noe? (b) Iti ania a nagtalek ni Noe idi simrek iti daong?
2 Saan a nalaka ti panangbangon iti daong. Mabalin a masmasdaaw dagiti tattao bayat a buybuyaenda ti ar-aramiden ni Noe ken ti pamiliana. Ngem saanda a nakombinsir a pakaisalakananda no sumrekda iti daong. Idi agangay, nagpatingga ti anus ti Dios iti dayta a dakes a lubong.―Genesis 6:3; 1 Pedro 3:20.
3 Kalpasan ti sumagmamano a dekada a makabannog a panagtrabaho ni Noe ken ti pamiliana, kinuna ni Jehova ken ni Noe: “Sumrekka, sika ken ti intero a sangakabbalayam, iti daong, agsipud ta sika ti nakitak a nalinteg iti sanguanak iti tengnga daytoy a kaputotan.” Buyogen ti pammati ken panagtalek iti sao ni Jehova, “simrek ni Noe, ken ti annakna ken ti asawana ken ti assawa ti annakna a maikuyog kenkuana.” Rinikpan ni Jehova ti ridaw tapno masaluadanna dagiti agdaydayaw kenkuana. Idi dimteng ti Layus ditoy daga, napaneknekan a ti daong ti mapagpannurayan a probision ti Dios a pakaisalakanan.—Genesis 7:1, 7, 10, 16.
Moderno a Kapada ti Kaaldawan ni Noe
4, 5. (a) Nangidiligan ni Jesus iti tiempo ti kaaddana? (b) Ania dagiti pagpadaan ti kaaldawan ni Noe ken ti panawentayo?
4 “Kas idi kaaldawan ni Noe, kastanto ti kaadda ti Anak ti tao.” (Mateo 24:37) Babaen kadagita a sasao, impamatmat ni Jesus a ti tiempo ti di makita a kaaddana ket umasping iti kaaldawan ni Noe. Kasta nga agpayso ti napasamak. Nangnangruna sipud idi 1919, naipakaammo kadagiti tattao iti amin a nasion ti maysa a mangpakdaar a mensahe nga umasping iti impakaammo ni Noe. Kaaduanna, ti reaksionda ket umasping iti tignay dagiti tattao idi kaaldawan ni Noe.
5 Babaen ti Layus, dinadael ni Jehova ti lubong a “napno iti kinaranggas.” (Genesis 6:13) Nabatad kadagiti isuamin ti saan a pannakipaset ni Noe ken ti pamiliana iti kasta a kinaranggas ken ti sitatalna a panangibangonda iti daong. Adda met kapadana dayta iti kaaldawantayo. Makita ita dagiti napasnek a tattao “ti pagdumaan iti nagbaetan daydiay nalinteg ken daydiay nadangkes, iti nagbaetan daydiay agserserbi iti Dios ken daydiay saan a nagserbi kenkuana.” (Malakias 3:18) Kadagiti saan a mangidumduma, apresiarenda ti kinapudno, kinaimbag, kinatalna, ken kinagaget dagiti Saksi ni Jehova ket dagitoy a galad ti nakaidumaan dagiti adipen ti Dios kadagiti kaaduan a tattao iti lubong. Laksiden dagiti Saksi ti amin a kita ti kinaranggas ken agpaiwanwanda iti espiritu ni Jehova. Dayta ti gapuna no apay a naparaburanda iti talna ken magmagnada iti nalinteg a dana.―Isaias 60:17.
6, 7. (a) Ania ti saan a nabigbig dagiti tattao idi kaaldawan ni Noe, ken kasano a pumada dayta iti kaaldawantayo? (b) Ania dagiti pagarigan a mangipakita a naiduma dagiti Saksi ni Jehova?
6 Saan idi a binigbig dagiti tattao a ti Dios ti mangsupsuporta ken mangiwanwanwan kadagiti ar-aramiden ni Noe. Gapuna, inyaleng-alengda ti ikaskasabana ket dida nagtignay iti mangpakdaar a mensahena. Komusta met ita? Nupay adu ti mangapresiar iti trabaho ken kondukta dagiti Saksi ni Jehova, kaaduan kadakuada ti mangyaleng-aleng iti naimbag a damag ken kadagiti pakdaar ti Biblia. Dagiti kaarruba, amo, wenno kakabagian padayawanda dagiti agkakaimbag a galad dagiti pudno a Kristiano ngem kunaenda, “No la koma ta saanda a Saksi ni Jehova!” Saan ngamin a binigbig dagitoy a tattao a ti nasantuan nga espiritu ti Dios ti makagapu no apay a maiparparangarang dagiti Saksi dagiti galad a kas iti ayat, talna, kinamanangngaasi, kinaimbag, kinaalumamay, ken panagteppel. (Galacia 5:22-25) Dayta koma ti ad-adda a panggapuan dagiti tattao a mamati iti mensaheda.
7 Idiay Russia, kas pagarigan, mangipatpatakder dagiti Saksi ni Jehova iti maysa a Kingdom Hall. Maysa a lalaki a dimmaw-as tapno makisarita iti maysa kadagiti trabahador ti nagkuna: “Nakaskasdaaw daytoy a lugar ti konstruksion―awan ti agsigsigarilio, awan ti agsasao iti naalas, ken awan ti nabartek! Dakayo kadi ket Saksi ni Jehova?” Inyimtuod kenkuana ti trabahador, “No ibagak a saan, patiennak kadi?” Dagus a simmungbat ti lalaki, “Sigurado a saan.” Iti sabali a siudad ti Russia, kasta unay ti siddaaw ti mayor idi maimatanganna ti panangbangon dagiti Saksi iti baro a Kingdom Hall-da. Kinunana a kalpasan a nakitana ti napasnek ken di managimbubukodan a panagtrabaho dagiti Saksi ni Jehova, nagbaliw ti sigud a panangmatmatna nga agpapada ti amin a narelihiosuan a grupo. Dagitoy ti dua laeng kadagiti pagarigan a mangipakita a naiduma dagiti adipen ni Jehova no idilig kadagidiay saan a mangan-annurot kadagiti pagalagadan ti Biblia.
8. Iti ania nga agpannuray ti pannakaispaltayo inton manungpal daytoy dakes a lubong?
8 Kabayatan ti maudi a paset ti “nagkauna a lubong” a natalipupos idi Layus, ni Noe ket maysa a matalek a “manangaskasaba iti kinalinteg.” (2 Pedro 2:5) Kadagitoy maudi nga al-aldaw ti agdama a sistema ti bambanag, dagiti adipen ni Jehova ipakpakaammoda dagiti nalinteg a pagalagadanna ken iwarwaragawagda ti naimbag a damag maipapan iti namnama a pannakaitalimeng agingga iti baro a lubong. (2 Pedro 3:9-13) No kasano a ni Noe ken ti pamiliana a managbuteng iti Dios naitalimengda iti daong, ti pannakaisalakan dagiti indibidual ita ket agpannuray iti pammatida ken iti nasungdo a pannakitimpuyogda iti naindagaan a paset ti sapasap nga organisasion ni Jehova.
Napateg ti Pammati Tapno Maisalakan
9, 10. Apay a napateg ti pammati tapno malasatantayo ti panungpalan ti sistema ti bambanag ni Satanas?
9 Ania ti nasken nga aramiden ti tao tapno malasatanna ti umad-adanin a pannakadadael daytoy lubong nga adda iti pannakabalin ni Satanas? (1 Juan 5:19) Umuna, rumbeng a bigbigenna a kasapulanna ti pannalaknib. Kalpasanna, nasken nga aprobetsarenna dayta a pannalaknib. Dagiti tattao idi kaaldawan ni Noe intultuloyda ti inaldaw a rutinada ket impagarupda a dida kasapulan ti pannalaknib iti umad-adani a didigra. Ti makagapu―awan pammatida iti Dios.
10 Iti sabali a bangir, binigbig ni Noe ken ti pamiliana a kasapulanda ti pannalaknib ken pannakaispal. Impakitada met ti pammatida iti Sapasap a Soberano, ni Jehova a Dios. “No awan ti pammati isu [ni Jehova] di mabalin nga ay-aywen a naan-anay,” insurat ni apostol Pablo, “ta ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.” Innayon ni Pablo: “Babaen iti pammati, kalpasan a naipaayan iti nadibinuan a pakdaar maipapan iti bambanag a saan pay a nakita, nangipakita ni Noe iti nadiosan a buteng ket nangibangon iti daong a pakaisalakanan ti sangakabbalayanna; ket babaen itoy a pammati kinondenarna ti lubong, ket isu nagbalin nga agtawid iti kinalinteg a maitunos iti pammati.”—Hebreo 11:6, 7.
11. Ania ti maadaltayo iti pamay-an ti panangsalaknib ni Jehova idi umuna a panawen?
11 Tapno malasatantayo ti panungpalan ti agdama a dakes a sistema ti bambanag, saan nga umdas a basta patientayo a madadael dayta. Nasken nga ipakitatayo a mamatitayo kadagiti probision nga inyurnos ti Dios agpaay iti pannakaisalakan babaen ti naan-anay a pananggundaway kadagita a probision. Siempre, masapul nga ipakitatayo ti pammatitayo iti pangsubbot a daton ni Jesu-Kristo, ti Anak ti Dios. (Juan 3:16, 36) Nupay kasta, ditay liplipatan a dagidiay laeng adda iti uneg ti daong ni Noe ti nakalasat iti Layus. Uray dagiti siudad a pagkamangan idi nagkauna nga Israel nagserbida met a salaknib kadagidiay di nangigagara a nakapatay no la ket ta agkamangda nga umuna iti maysa kadagita a siudad ken agtalinaedda sadiay agingga a matay ti nangato a padi. (Numeros 35:11-32) Iti maikasangapulo a saplit iti Egipto idi kaaldawan ni Moises, napapatay ti amin nga inauna nga anak dagiti Egipcio, idinto ta naispal ti annak dagiti Israelita. Apay? Ni Jehova binilinna ni Moises: “Masapul nga alaen [dagiti Israelita] ti dadduma iti dara [ti kordero ti Paskua] ket iwarsida iti dua a bautek ken iti makinngato a paset ti ruangan nga adda kadagiti balay a panganandanto iti dayta. . . . Ket awan kadakayo ti rummuar iti pagserkan ti balayna agingga iti bigat.” (Exodo 12:7, 22) Asino koma kadagiti inauna nga annak dagiti Israelita ti nakaitured a nangyaleng-aleng iti dayta a bilin ti Dios ket rimmuar iti balay a nawarsian iti dara iti dua a bautek ken makinngato a paset ti ruangan?
12. Ania ti rumbeng nga imtuoden ti tunggal maysa kadatayo iti bagina, ken apay?
12 Adda ngarud ti rason no apay a masapul a sukimatentayo a naimbag ti mismo a kasasaadtayo. Addatayo kadi a talaga iti uneg ti urnos ni Jehova agpaay iti naespirituan a pannakasalaknib? Inton dumteng ti dakkel a rigat, dagidiay nangaprobetsar iti dayta a pannalaknib agarubosto ti luada gapu iti rag-o ken panagyamanda. Ngem kadagiti dadduma, agsangitdanto gapu iti ladingit ken naladaw a panagbabawi.
Isagsagananatayo Dagiti In-inut a Panagbalbaliw
13. (a) Ania ti resulta dagiti panagbalbaliw a naaramid iti uneg ti organisasion? (b) Ilawlawagyo ti sumagmamano kadagiti in-inut a panagrang-ay.
13 Nangipaay ni Jehova kadagiti in-inut a panagbalbaliw iti uneg ti naindagaan a paset ti organisasionna. Nagserbi dagita a mangpangayed, mangpasingked, ken mangpatibker iti urnosna mainaig iti naespirituan a pannalaknib. Sipud idi dekada 1870 agingga 1932, dagiti kameng ti kongregasion ti mangibutos no siasino dagiti agakem kas panglakayen ken diakono. Idi 1932, dagiti nabutosan a papanglakayen ket nasukatan iti komite ti serbisio nga imbutos ti kongregasion tapno tumulong iti nadutokan a direktor ti serbisio. Idi 1938, naaramid dagiti urnos tapno agbalin a teokratiko ti pannakadutok ti amin nga adipen iti kongregasion. Sipud idi 1972, iti sidong ti panangiwanwan ti Bagi a Manarawidwid dagiti Saksi ni Jehova, maaramid nga umuna dagiti rekomendasion ket no maaprobaran dagitoy, makaawat dagiti kongregasion iti surat a teokratiko a mangdutok kadagiti panglakayen ken ministerial nga adipen. Kadagiti naglabas a tawtawen, dimmakkel ti akem ti Bagi a Manarawidwid isu a naaramid dagiti panagbalbaliw a mangpalag-an iti trabahoda.
14. Ania a programa ti panagsanay ti nangrugi idi 1959?
14 Idi 1950, ti naannad a pannakausig ti Salmo 45:16 ket nagturong iti pannakaipasdek ti maysa nga agtultuloy a programa ti panagsanay. Kuna dayta a bersikulo: “Kas mangsandi kadagidi ammam addanto ti annakmo, a dutokamto kas piprinsipe iti intero a daga.” Dagiti panglakayen ita a mangidadaulo iti kongregasion masansanayda kadagiti teokratiko nga annongen iti agdama ken kalpasan ti Armagedon. (Apocalipsis 16:14, 16) Idi 1959, nangrugi ti Kingdom Ministry School. Kadagidi a tiempo, adda makabulan a panagadal dagiti adipen ti kongregasion (congregation servant), kas pannakaawag idi kadagiti mamangulo a manangaywan. Ngem iti agdama, mabalinen nga agadal iti dayta nga eskuelaan ti amin a panglakayen ken ministerial nga adipen. Kalpasanna, idauluan dagitoy a kakabsat a lallaki ti panangsanay kadagiti indibidual a Saksi ni Jehova kadagiti kongregasionda. Iti kasta, amin ket matulongan iti naespirituan ken maparang-ayda ti kinaepektibo ti ministerioda kas manangiwaragawag iti naimbag a damag ti Pagarian.―Marcos 13:10.
15. Iti ania a dua a pamay-an a mataginayon ti kinadalus ti kongregasion Kristiano?
15 Adda dagiti kualipikasion a rumbeng a maragpat dagiti indibidual nga agtarigagay nga agbalin a kameng ti kongregasion Kristiano. Nainkalintegan laeng a saan a maikari dagiti moderno-aldaw a manangumsi, no kasano a dagiti kasta a tattao dida napalubosan a sumrek iti daong ni Noe. (2 Pedro 3:3-7) Nangnangruna sipud idi 1952, ad-adda a sinuportaran dagiti Saksi ni Jehova ti maysa nga urnos a tumulong a mangsaluad iti kongregasion—ti panangilaksid kadagiti nakabasol nga awanan iti panagbabawi. Iti sabali a bangir, siaayat a natulongan dagidiay pudno nga agbabbabawi tapno ‘mapalinteg ti danada maipaay kadagiti sakada.’—Hebreo 12:12, 13; Proverbio 28:13; Galacia 6:1.
16. Ania ti naespirituan a kasasaad ti ili ni Jehova?
16 Saan a basta naiparparna wenno di ninamnama ti naespirituan a kinarang-ay ti ili ni Jehova. Babaen ken ni propeta Isaias, kinuna ni Jehova: “Adtoy! Dagiti bukodko nga adipen mangandanto, ngem dakayo agbisinkayto. Adtoy! Dagiti bukodko nga adipen uminumdanto, ngem dakayo mawawkayto. Adtoy! Dagiti bukodko nga adipen agrag-odanto, ngem dakayo agsagabakayto iti pannakaibabain. Adtoy! Dagiti bukodko nga adipen agdir-idanto a sirarag-o gapu iti nasayaat a kasasaad ti puso, ngem dakayo agsangitkayto gapu iti saem ti puso ket aganug-ogkayto gapu iti bin-ig a pannakarba ti espiritu.” (Isaias 65:13, 14) Agtultuloy nga ipapaay ni Jehova ti aglaplapusanan a suplay ti naintiempuan ken makapasalun-at a naespirituan a taraon a mangtaginayon iti naespirituan a pigsatayo.―Mateo 24:45.
Agsaganakayo Agpaay iti Pannakaisalakan
17. Ania ti tumulong kadatayo nga agsagana agpaay iti pannakaisalakan?
17 Ita ti kangrunaan a tiempo tapno “agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, kas iti kaugalian ti dadduma, no di ket agpipinnaregtatayo.” (Hebreo 10:23-25) Makapagsaganatayo agpaay iti pannakaisalakan no sisisinged a makitimpuyog ken agtalinaedtayo nga aktibo a kameng ti maysa kadagiti nasurok a 98,000 a kongregasion dagiti Saksi ni Jehova. Manamnamatayo ti suporta dagiti kapammatiantayo bayat nga ikagkagumaantayo nga iparangarang “ti baro a personalidad” ken naimpusuan a pagreggetantayo a tulongan dagiti dadduma tapno maammuanda ti probision nga inyurnos ni Jehova agpaay iti pannakaisalakan.—Efeso 4:22-24; Colosas 3:9, 10; 1 Timoteo 4:16.
18. Apay a determinadokayo nga agtalinaed a nasinged iti kongregasion Kristiano?
18 Ni Satanas ken ti dakes a lubongna kasta unay ti tarigagayda a mangiwawa kadatayo manipud iti kongregasion Kristiano. Ngem rumbeng nga agtalinaedtayo iti dayta tapno malasatantayo ti panungpalan ti agdama a dakes a sistema ti bambanag. Sapay koma ta ti panagayattayo ken ni Jehova ken ti panagyamantayo kadagiti naayat a probisionna ti mangtignay kadatayo nga agbalin nga ad-adda a determinado a mangdaer kadagiti panagregget ni Satanas. Mapatibker dayta a determinasiontayo no panunotentayo dagiti tagtagiragsakentayo a bendision iti agdama. Ti dadduma kadagita a bendision ti mausig iti sumaruno nga artikulo.
Ania ti Sungbatyo?
• Ania ti pagpadaan ti tiempotayo ken ti kaaldawan ni Noe?
• Ania a galad ti kasapulan tapno maisalakan?
• Ania dagiti in-inut a panagbalbaliw a nangpatibker iti urnos ni Jehova a mangsalaknib kadatayo?
• Kasanotayo a personal a makapagsagana agpaay iti pannakaisalakan?
[Ladawan iti panid 22]
Ni Noe ket inyaleng-aleng dagiti tattao idi kaaldawanna
[Ladawan iti panid 23]
Napateg ti panangipangag iti mangpakdaar a mensahe ti Dios
[Ladawan iti panid 24]
Ania ti panggep ti Kingdom Ministry School?
[Ladawan iti panid 25]
Itan ti kangrunaan a tiempo a nasken nga agtalinaed a sisisinged iti kongregasion Kristiano