Nasayaat Kadi a Pagtagibi ti Telebision?
NO DADDUMA, kasla nasayaat a pagbuyaem dagiti annakmo iti telebision bayat nga ar-aramidem ti dadduma a banag. Ngem ania ti epektona dayta kadagiti annakmo?
“Uray dagiti maladaga mabalin a maimpluensiaanda kadagiti makaapektar iti rikna a pabuya iti telebision,” impadamag ti The New York Times. Iti maysa a nabiit pay a panagadal kadagiti maladaga nga agtawen iti maysa, naipabuya kadakuada dagiti ababa nga eksena iti telebision a nangipakita iti nagduduma a reaksion ti maysa nga aktres iti pannakakitana iti maysa nga abalbalay. “Idi a ti aktres nagbuteng iti abalbalay,” kuna ti Times, “liniklikan dagiti maladaga ti mangay-ayam iti dayta ken agparang a dakdakkel ti posibilidad a maamak, agmisuot, wenno agsangitda. Ngem idi makitada a maay-ayo ti aktres iti abalbalay, nagannayas dagiti maladaga a mangay-ayam iti dayta.”
Nabatad a ti telebision maapektaranna dagiti maladaga. Ania met ngata ti agpaut nga impluensiana kadagiti ubbing? Ni Dr. Naoki Kataoka, maysa a propesor mainaig iti panangaywan iti salun-at dagiti ubbing iti Kawasaki Medical College idiay Kurashiki, Japan, napaliiwna ti adu a di matagtagari ken nakamulengleng nga ubbing. Dagitoy dagiti ubbing a kanayon nga agbuya iti telebision wenno video. Maysa a lalaki nga agtawen iti dua ti saan a makabael a makisarita ken bassit ti bokabulariona. Sipud ngamin idi agtawen iti maysa, inaldaw nga agbuya iti video manipud agsapa agingga iti rabii. Sa la simmayaat ti bokabulario daytoy nga ubing idi sinurot ti ina ti balakad ti doktor nga isardengnan a pagbuyaen ti anakna iti video ket rugianna ketdi a kaay-ayam. Wen, dagiti nagannak masapul a kalangenda dagiti annakda.
Ni Jehova a Dios, ti Autor ti panagpamilia, impaganetgetna ti kinapateg ti kasayaatan a pannakilangen. Imbagana idi iti ilina: “Masapul nga iyukuokmo [ti sasao ti Dios] iti anakmo ken sawem ti maipapan kadagita no agtugawka iti balaymo ken no magnaka iti dalan ken no agiddaka ken no bumangonka.” (Deuteronomio 6:7) Dagiti nagannak, saan ket a ti telebision, ti makaisuro kadagiti annakda iti kasayaatan a pamay-an babaen ti sao ken ulidan, “sigun iti dalan nga agpaay” kadakuada.—Proverbio 22:6.