Maysa a Leksion Maipapan iti Kinatangsit ken Kinapakumbaba

MAYSA a pasamak iti biag ni Ari David ti mangitampok iti nagdumaan ti pudno a kinapakumbaba ken ti kinatangsit. Napasamak dayta kalpasan a naparmek ni David ti Jerusalem ken inaramidna dayta kas ti kabesera a siudadna. Ni David minatmatanna ni Jehova kas ti pudno nga Ari ti Israel, isu nga inyurnosna a ti Lakasa a simbolo ti presensia ti Dios ket maipan iti siudad. Nakapatpateg ken ni David dayta a pasamak isu nga impakitana ti rag-ona iti publiko bayat a sursurotenna dagiti papadi a nangawit iti Lakasa. Dagiti agnaed iti Jerusalem nakitada ti arida nga “aglagtolagto” ken “nagsalsala . . . buyogen ti isuamin a bilegna.”​—1 Cronicas 15:15, 16, 29; 2 Samuel 6:11-16.

Ngem saan a nakiraman iti dayta a martsa ni Mical nga asawa ni David. Nagbuya ni Mical manipud iti tawa, ken imbes a pagragsakanna ti pamay-an ni David a nangiturong iti dayaw ken ni Jehova, “rinugianna nga umsien iti pusona.” (2 Samuel 6:16) Apay a kasta ti rikna ni Mical? Nabatad a kasta unay ti panangitan-okna iti saadna kas ti anak ni Saul nga immuna nga ari ti Israel ken asawa ti agdama ken maikadua nga ari ti Israel. Mabalin a nariknana a saan a rumbeng a nakipagrambak kadagiti ordinario a tattao ti asawana yantangay maysa daytoy nga ari. Nagminar ti kinapangasna iti wagas a panangkablaawna ken ni David idi nagawid ti ari. Buyogen ti panangumsi, kinunana: “Anian a nagdayag ti namagbalinan ti ari ti Israel iti bagina ita nga aldaw idi linukasanna ti bagina ita nga aldaw iti matmata dagiti tagabo a babbai dagiti adipenna, no kasano a ti maysa kadagiti kawaw ti panagul-ulona a tattao silalawag a lukasanna ti bagina!”​—2 Samuel 6:20.

Ania ti sungbat ni David iti daytoy a panangbabalaw? Tinubngarna ni Mical, a kinunana a linaksid ni Jehova ti amana a ni Saul ket isu ti inanamongan ti Dios. Innayon ni David: “Pagbalinekto ti bagik a nalaglag-an pay ti pannakaipategna ngem iti daytoy, ket agbalinakto a nababa kadagiti matak; ket kadagiti tagabo a babbai a dinakamatmo, determinadoak a mangipadayag iti bagik kadakuada.”​—2 Samuel 6:21, 22.

Wen, determinado ni David a mangitultuloy iti napakumbaba a panagserbina ken ni Jehova. Daytoy a kababalin ti tumulong kadatayo a mangtarus no apay a ni Jehova inawaganna ni David kas “lalaki a naanamongan iti pusok.” (Aramid 13:22; 1 Samuel 13:14) Kinapudnona, tultuladen ni David ti kasayaatan nga ulidan ti kinapakumbaba​—ni Jehova a Dios. Makapainteres, ti ebkas nga inusar ni David idi kinunana ken ni Mical, “agbalinakto a nababa” ket naggapu iti Hebreo a berbo a nausar met a mangdeskribir iti mismo a panangmatmat ti Dios iti tao. Nupay isu ti katan-okan a Persona iti uniberso, ni Jehova ket nadeskribir iti Salmo 113:6, 7 nga “agpakumbaba tapno kumita iti langit ken daga, nga ibangonna daydiay nanumo manipud iti mismo a tapok; itan-okna daydiay napanglaw manipud iti abut ti dapo met laeng.”

Yantangay napakumbaba ni Jehova, di pagsiddaawan a guraenna dagiti “napalalo a matmata” dagiti natangsit a tattao. (Proverbio 6:16, 17) Gapu iti panangiparangarangna iti dayta a dakes a kababalin ken di panangraem iti daydiay pinili ti Dios kas ari, napukaw ni Mical ti pribilehio a mangipasngay iti anak ni David. Natay ni Mical nga awanan iti anak. Anian a nagpateg a pakasursuruantayo! Amin nga agtarigagay iti anamong ti Dios masapul nga iyaplikarda dagitoy a sasao: “Bariksanyo ti bagbagiyo iti kinapakumbaba iti panagpampanunot maipaay iti maysa ken maysa, agsipud ta ti Dios busorenna dagiti natangsit, ngem mangted iti di kaikarian a kinamanangngaasi kadagiti napakumbaba.”​—1 Pedro 5:5.