Nayanakda iti Nasion a Pinili ti Dios

“Sika ti pinili ni Jehova a Diosmo nga agbalin nga ilina.”​—DEUTERONOMIO 7:6.

1, 2. Ania dagiti inaramid ni Jehova maipaay iti ilina a mangiparangarang iti pannakabalinna, ken ania ti inaramid dagiti Israelita kalpasan ti panagdaliasatda manipud Egipto?

IDI 1513 K.K.P., nangipasdek ni Jehova iti maysa a baro a relasionna kadagiti adipenna ditoy daga. Iti dayta a tawen, imbabainna ti maysa a pannakabalin ditoy lubong ken inispalna dagiti Israelita manipud pannakaadipen. Gapu iti dayta nga inaramidna, isu ti nagbalin a Manangisalakan ken Makinkukua kadakuada. Sakbay a nagtignay, kinuna ti Dios ken ni Moises: “Kunaem iti annak ti Israel, ‘Siak ni Jehova, ket sigurado nga iruarkayto manipud sidong dagiti pammadagsen dagiti Egipcio ken ispalenkayo iti panangadipenda, ket pudno a bawyenkayto babaen ti siuunnat a takiag ken babaen kadagiti dadakkel a panangukom. Ket sigurado nga alaenkayto maipaay kaniak kas maysa nga ili, ket pudno nga agbalinakto a Dios kadakayo.’”​—Exodo 6:6, 7; 15:1-7, 11.

² Di nagbayag kalpasan ti panagdaliasatda manipud Egipto, dagiti Israelita nakitulagda iti Diosda a ni Jehova. Imbes a nakitulag ni Jehova kadagiti indibidual, pamilia, wenno grupo dagiti agkakabagian, nangrugi a naaddaan iti maysa nga organisado nga ili wenno nasion ditoy daga. (Exodo 19:5, 6; 24:7) Impaayanna ti ilina kadagiti linteg a mangiwanwan iti inaldaw a panagbiagda, ken kangrunaanna, iti panagdayawda. Kinuna kadakuada ni Moises: “Ania a dakkel a nasion ti addaan didios nga asideg iti dayta a kas iti kaadda ni Jehova a Diostayo iti isuamin nga iyaawagtayo kenkuana? Ket ania a dakkel a nasion ti addaan kadagiti nalinteg nga alagaden ken kadagiti hudisial a pangngeddeng a kas iti isuamin daytoy a linteg nga ikabilko iti sangoyo ita nga aldaw?”​—Deuteronomio 4:7, 8.

Nayanak iti Nasion Dagiti Saksi

3, 4. Ania ti maysa a napateg a rason no apay a nabukel ti Israel kas maysa a nasion?

³ Sumagmamano a siglo kalpasanna, impalagip ni Jehova kadagiti Israelita babaen ken ni propetana nga Isaias ti maysa a napateg a rason no apay a nabukelda kas maysa a nasion. Kinuna ni Isaias: “Daytoy ti kinuna ni Jehova, ti Namarsua kenka, O Jacob, ken ti Nangporma kenka, O Israel: ‘Dika agbuteng, ta sinakaka. Inawaganka iti naganmo. Sika ket kukuak. Ta siak ni Jehova a Diosmo, Daydiay Santo ti Israel a Manangisalakanmo. . . . Iyegmo ti annakko a lallaki manipud iti adayo, ken ti annakko a babbai manipud iti ungto ti daga, tunggal maysa a naawagan iti naganko ken pinarsuak maipaay iti bukodko a dayag, a binukelko, wen, nga inaramidko. Dakayo dagiti saksik,’ kuna ni Jehova, ‘ti mismo nga adipenko a pinilik, . . . ti ili a binukelko maipaay kaniak, tapno isaritada koma ti pakaidaydayawak.’”​—Isaias 43:1, 3, 6, 7, 10, 21.

⁴ Kas maysa nga ili a mangaw-awit iti nagan ni Jehova, saksian dagiti Israelita ti kinasoberanona iti imatang dagiti nasion. Agbalinda a kas ili a ‘naparsua maipaay iti dayag ni Jehova.’ Masapul nga ‘isaritada ti pakaidaydayawan ni Jehova,’ ipakaammoda dagiti nakaskasdaaw nga inaramidna a panangisalakan ket iti kasta, maipadayag ti nasantuan a naganna. Iti ababa a pannao, agbalinda a maysa a nasion dagiti saksi maipaay ken ni Jehova.

5. Iti ania nga anag a maysa a naidedikar a nasion ti Israel?

⁵ Idi maika-11 a siglo K.K.P., impasimudaag ni Ari Solomon nga inlasin ni Jehova ti Israel kas maysa a nasion. Iti kararagna ken ni Jehova, kinunana: “Sika inlasinmo ida kas tawidmo manipud kadagiti amin nga ili ti daga.” (1 Ar-ari 8:53) Kas indibidual, addaan met dagiti Israelita iti naisangsangayan a relasion ken ni Jehova. Sakbayna, kinuna kadakuada ni Moises: “Annaknakayo ni Jehova a Diosyo. . . . Ta nasantuanka nga ili ken Jehova a Diosmo.” (Deuteronomio 14:1, 2) No kasta, dagiti ubbing nga Israelita saanda a kasapulan nga idedikar dagiti bagida ken ni Jehova. Nayanakda ngaminen a kameng ti naidedikar nga ili ti Dios. (Salmo 79:13; 95:7) Naisuro iti tunggal baro a kaputotan ti maipapan kadagiti linteg ni Jehova ken obligadoda a mangannurot kadagita maigapu iti tulag nga inaramid ti Israel ken ni Jehova.―Deuteronomio 11:18, 19.

Addaan iti Wayawaya nga Agpili

6. Ania a panagpili ti nasken nga aramiden ti tunggal maysa nga Israelita?

⁶ Nupay nayanak dagiti Israelita iti maysa a naidedikar a nasion, agpannuray iti tunggal indibidual no ikeddengna ti agserbi iti Dios. Sakbay a simrekda iti Naikari a Daga, kinuna kadakuada ni Moises: “Aramatek ti langlangit ken ti daga kas saksi maibusor kadakayo ita nga aldaw, nga inkabilko ti biag ken patay iti sangom, ti bendision ken ti lunod; ket masapul a piliem ti biag tapno makapagtalinaedka a sibibiag, sika ken ti putotmo, babaen ti panangayat ken Jehova a Diosmo, babaen ti panagimdeng iti timekna ken babaen ti panagtalinaed kenkuana; ta isu ti biagmo ken ti kaatiddog ti al-aldawmo, tapno makapagnaedka iti daga nga insapata ni Jehova kadagidi ammam a da Abraham, Isaac ken Jacob nga ited kadakuada.” (Deuteronomio 30:19, 20) Gapuna, agpannuray iti indibidual nga Israelita no pilienna nga ayatenna ni Jehova, ipangagna ti timekna, ken agtalinaed kenkuana. Yantangay adda wayawaya dagiti Israelita a mangikeddeng, sungsungbatanda ti aniaman a resulta dagiti desisionda.―Deuteronomio 30:16-18.

7. Ania ti napasamak kalpasan a limmabas ti kaputotan ni Josue?

⁷ Silalawag nga ipakita dagiti pasamak idi panawen dagiti ukom no ania dagiti resulta ti panagbalin a matalek ken di matalek. Sakbay a nangrugi dayta a panawen, sinurot dagiti Israelita ti nasayaat nga ulidan ni Josue isu a nabendisionanda. “Dagiti umili nagtultuloyda nga agserbi ken Jehova iti amin nga al-aldaw ni Josue ken iti amin nga al-aldaw dagiti lallakay a ti al-aldawda naglaylayon kalpasan ni Josue ken isuda a nakakita iti isuamin a naindaklan nga aramid ni Jehova nga inaramidna maipaay iti Israel.” Nupay kasta, kalpasan ti ipapatay ni Josue, “nangrugi a tumaud ti sabali pay a kaputotan iti kalpasanda a saan a makaam-ammo ken Jehova wenno iti aramid nga inaramidna maipaay iti Israel. Ket inaramid ti annak ti Israel no ania ti dakes kadagiti mata ni Jehova.” (Uk-ukom 2:7, 10, 11) Agparang a ti baro, kurang ti kapadasanna a kaputotan dina impateg ti tawidna kas kameng ti maysa a naidedikar nga ili, maysa a nasion a pinakitaan idi ni Jehova a Dios kadagiti nabileg nga ar-aramid.―Salmo 78:3-7, 10, 11.

Panangitungpal iti Dedikasionda

8, 9. (a) Ania nga urnos ti nangted iti gundaway kadagiti Israelita tapno maipakitada ti dedikasionda ken ni Jehova? (b) Ania ti nagun-od dagidiay nangipaay iti boluntario a daton?

⁸ Nangipaay ni Jehova kadagiti gundaway tapno maitungpal dagiti adipenna ti dedikasionda kas maysa a nasion. Kas pagarigan, ti Lintegna nangipaulog kadagiti urnos ti panagdaton. Dadduma kadagita ti obligado a maannurot, bayat nga adda met dagiti boluntario a maannurot. (Hebreo 8:3) Karaman kadagiti boluntario a daton isu ti daton a mapuoran, daton a bukbukel, ken daton ti pakikaykaysa―sagsagut a maidatag ken ni Jehova tapno magun-od ti anamongna ken kas ebkas ti panagyaman.―Levitico 7:11-13.

⁹ Makaay-ayo ken ni Jehova dagita a boluntario a daton. Naibilang a “makabang-ar a sayamusom ken Jehova” ti daton a mapuoran ken ti daton a bukbukel. (Levitico 1:9; 2:2) Iti daton ti pakikaykaysa, maidaton ken ni Jehova ti dara ken ti taba ti animal, bayat a kanen dagiti papadi ken ti nagdaton ti dadduma kadagiti lasag. No kasta, maysa dayta a simboliko a pannangan a mangipamatmat iti natalna a relasion ken ni Jehova. Sagudayen ti Linteg: “Ita no kas pagarigan agisakripisiokayo iti pakikaykaysa a sakripisio ken Jehova, isakripisioyo dayta tapno magun-odanyo ti anamong maipaay iti bagbagiyo.” (Levitico 19:5) Nupay naidedikar ken ni Jehova ti amin nga Israelita gapu iti kapuonanda, adda dagidiay pudpudno a personal a nangikeddeng a ni Jehova ti Dios a pagserbianda babaen ti panangipaayda kadagiti boluntario a daton. Gapuna, ‘nagun-odda ti anamong maipaay iti bagida’ ket sibabaknang a nabendisionanda.―Malakias 3:10.

10. Kasano nga inyebkas ni Jehova ti dina pannakaay-ayo idi kaaldawan da Isaias ken Malakias?

¹⁰ Nupay kasta, masansan nga impakita ti naidedikar a nasion ti Israel a saanda a matalek ken ni Jehova. Babaen iti propetana a ni Isaias, kinuna ni Jehova kadakuada: “Saanmo nga inyeg kaniak ti karnero dagiti sibubukel a datonmo a mapuoran, ket saannak nga indaydayaw babaen kadagiti sakripisiom. Saanka a pinilit nga agserbi kaniak buyogen ti maysa a sagut.” (Isaias 43:23) Maysa pay, awan pategna ken ni Jehova dagiti daton a napilpilit ken saan a tinignay ti ayat. Kas pagarigan, tallo a siglo kalpasan ti panawen ni Isaias, nangidaton dagiti Israelita kadagiti depektibo nga animal idi kaaldawan ni mammadto a Malakias. Gapuna, imbaga kadakuada ni Malakias: “‘Awan ti pakaragsakak kadakayo,’ kinuna ni Jehova ti buybuyot, ‘ket saanak a maragsakan iti daton a sagut manipud iti imayo.’ . . . ‘Nangyegkayo iti inagaw, ken iti pilay, ken iti masakit; wen, inyegyo dayta a kas sagut. Pagragsakakto aya dayta iti imayo?’ kinuna ni Jehova.”​—Malakias 1:10, 13; Amos 5:22.

Nailaksid Kas Maysa a Naidedikar a Nasion

11. Ania a gundaway ti naited iti Israel?

¹¹ Idi panawen a nagbalin dagiti Israelita kas maysa a naidedikar a nasion ken ni Jehova, inkarina kadakuada: “No siiinget nga agtulnogkayto iti timekko ket pudno a salimetmetanyonto ti tulagko, iti kasta sigurado nga agbalinkayto a naisangsangayan a sanikuak manipud iti amin a sabsabali nga ili, agsipud ta kukuak ti intero a daga. Ket dakayo agbalinkayto kaniak a maysa a pagarian ti papadi ken maysa a nasantuan a nasion.” (Exodo 19:5, 6) Agtaud kadakuada ti naikari a Mesias ket isuda ti naikkan iti umuna a gundaway nga agbalin kas kameng ti gobierno a Pagarian ti Dios. (Genesis 22:17, 18; 49:10; 2 Samuel 7:12, 16; Lucas 1:31-33; Roma 9:4, 5) Nupay kasta, kaaduan kadagiti Israelita ti saan a nangsalimetmet iti dedikasionda. (Mateo 22:14) Inlaksidda ti Mesias ken pinapatayda idi agangay.―Aramid 7:51-53.

12. Ania a sasao ni Jesus ti mangipakita a nailaksid ti Israel kas naidedikar a nasion ken ni Jehova?

¹² Sumagmamano nga aldaw sakbay ti ipapatayna, kinuna ni Jesus kadagiti narelihiosuan a papanguluen dagiti Judio: “Saanyo aya a pulos nabasa kadagiti Kasuratan, ‘Ti bato a linaksid dagiti managibangon isu ti nagbalin a kangrunaan a bato a pasuli. Manipud ken Jehova a naaramid daytoy, ket nakaskasdaaw dayta kadagiti matatayo’? Daytoy ti makagapu a kunak kadakayo, Ti pagarian ti Dios maikkatto kadakayo ket maited iti nasion a mangpatpataud kadagiti bungana.” (Mateo 21:42, 43) Kas panangipakita nga inlaksid ida ni Jehova kas nasion a naidedikar kenkuana, kinuna ni Jesus: “Jerusalem, Jerusalem, ti mammapatay kadagiti mammadto ken manangubor kadagidiay naibaon kenkuana,​—anian a namin-adu a kinayatko nga urnongen a sangsangkamaysa ti annakmo, iti wagas a ti upa urnongenna a sangsangkamaysa dagiti piekna iti sirok dagiti payakna! Ngem saanyo a kinayat dayta. Adtoy! Ti balayyo mabaybay-an kadakayo.”​—Mateo 23:37, 38.

Baro a Naidedikar a Nasion

13. Ania ti impakpakauna ni Jehova idi kaaldawan ni Jeremias?

¹³ Idi kaaldawan ni propeta Jeremias, impakpakauna ni Jehova ti maysa a baro a banag mainaig iti ilina. Mabasatayo: “‘Adtoy! Adda um-umayen nga al-aldaw,’ kuna ni Jehova, ‘ket mamatalgedakto iti baro a tulag iti balay ti Israel ken iti balay ti Juda; saan a kas iti tulag a pinatalgedak kadagidi ammada iti daydi aldaw a panangkibinko kadakuada tapno iruar ida manipud iti daga ti Egipto, “a dayta a tulagko rinakrakda a mismo, nupay siak tinagikuak ida a kas asawa,” kuna ni Jehova.’ ‘Ta daytoy ti tulag a patalgedakto iti balay ti Israel kalpasan dagidiay nga aldaw,’ kuna ni Jehova. ‘Ikabilkonto ti lintegko iti unegda, ket iti pusoda isuratkonto dayta. Ket agbalinakto a Diosda, ket isuda agbalindanto nga ilik.’”​—Jeremias 31:31-33.

14. Kaano ken ania ti nakaibatayan ti panangrugi ti baro a naidedikar a nasion ni Jehova, ken ania dayta a baro a nasion?

¹⁴ Naipasdek ti pamuon daytoy a baro a tulag idi natay ni Jesus ken kalpasanna indatagna ti pateg ti naibukbok a darana iti saklang ni Amana idi 33 K.P. (Lucas 22:20; Hebreo 9:15, 24-26) Ngem idi naiparukpok ti nasantuan nga espiritu idi Pentecostes 33 K.P. ken naipasngay ti maysa a baro a nasion, “ti Israel ti Dios,” nangrugin nga agtignay ti baro a tulag. (Galacia 6:16; Roma 2:28, 29; 9:6; 11:25, 26) Iti suratna kadagiti napulotan a Kristiano, kinuna ni apostol Pedro: “Dakayo ket ‘maysa a napili a puli, maysa a naarian a kinapadi, maysa a nasantuan a nasion, maysa nga ili nga agpaay a naisangsangayan a sanikua, tapno ideklarayo a sisasaknap dagiti kinatan-ok’ daydiay nangayab kadakayo manipud iti kinasipnget nga agturong iti nakaskasdaaw a lawagna. Ta idi naminsan saankayo a maysa nga ili, ngem itan ket ili ti Dios.” (1 Pedro 2:9, 10) Nagpatinggan ti naisangsangayan a relasion ni Jehova ken ti nainlasagan nga Israel. Sipud idi 33 K.P., saanen a ti naindagaan nga Israel ti an-anamongan ni Jehova no di ket ti naespirituan nga Israel, ti kongregasion Kristiano, ‘maysa a nasion a mangpatpataud kadagiti bunga’ ti Mesianiko a Pagarian.―Mateo 21:43.

Indibidual a Dedikasion

15. Idi aldaw ti Pentecostes 33 K.P., ania a panagpabautisar ti indagadag ni Pedro nga aramiden dagiti agdengdengngeg kenkuana?

¹⁵ Kalpasan ti Pentecostes 33 K.P., tunggal indibidual​—Judio man wenno Gentil​—masapul a mangaramid iti personal a panagdedikar iti Dios ken agpabautisar “iti nagan ti Ama ken ti Anak ken ti nasantuan nga espiritu.”a (Mateo 28:19) Idi Pentecostes, kinuna ni apostol Pedro kadagiti manangipangag a Judio ken proselita: “Agbabawikayo, ket mabautisaran koma ti tunggal maysa kadakayo iti nagan ni Jesu-Kristo maipaay iti pannakapakawan dagiti basolyo, ket awatenyonto ti awan bayadna a sagut ti nasantuan nga espiritu.” (Aramid 2:38) Masapul nga ipakita dagidi a Judio ken proselita nga iti panagpabautisarda, saanda laeng nga indedikar ti biagda ken ni Jehova no di ket bigbigenda met a babaen ken ni Jesus a pakawanen ni Jehova dagiti basolda. Masapul a bigbigenda a ni Jesus ti insaad ni Jehova kas ti Nangato a Padi ken Liderda, ti Ulo ti kongregasion Kristiano.―Colosas 1:13, 14, 18.

16. Idi kaaldawan ni Pablo, kasano a nagbalin a paset ti naespirituan nga Israel dagidiay umiso ti pagannayasanda a Judio ken Gentil?

¹⁶ Sumagmamano a tawen kalpasanna, kinuna ni apostol Pablo: “Agpadpada kadagidiay adda idiay Damasco nga umuna ken kadagidiay adda idiay Jerusalem, ken iti intero a pagilian ti Judea, ken kadagiti nasion indanonko ti mensahe nga agbabawida ket bumaw-ingda iti Dios babaen iti panagaramid kadagiti aramid a maitutop iti panagbabawi.” (Aramid 26:20) Kalpasan a nakombinsir ni Pablo dagiti tattao―Judio ken Gentil―a ni Jesus ti Kristo a Mesias, tinulonganna ida nga agdedikar ken agpabautisar. (Aramid 16:14, 15, 31-33; 17:3, 4; 18:8) Babaen ti iyaadanida iti Dios, dagidi a kabbaro nga adalan nagbalinda a kameng iti naespirituan nga Israel.

17. Ania ti dandani makompleton a panangselio a trabaho, ken ania ti sabali pay a trabaho a napartak a maitungtungpal ita?

¹⁷ Ita, asidegen ti maudi a pannakaselio dagiti natda ti naespirituan nga Israel. Inton makompleto dayta, maibilin kadagiti “uppat nga anghel” a palusposanda dagiti angin ti pannakadadael nga iyeg “ti dakkel a rigat.” Kabayatanna, nakaparpartak itan ti pannakaurnong ti “dakkel a bunggoy,” dagidiay mangnamnama nga agbiag nga agnanayon ditoy daga. Sipapakinakem a pinili dagitoy a “sabsabali a karnero” nga iparangarangda ti pammatida iti “dara ti Kordero” ken agpabautisarda kas simbolo ti panagdedikarda ken ni Jehova. (Apocalipsis 7:1-4, 9-15; 22:17; Juan 10:16; Mateo 28:19, 20) Karaman kadakuada ti adu nga agtutubo a pinadakkel dagiti Kristiano a nagannak. No maysaka kadagita nga agtutubo, sigurado nga interesadoka a mangbasa iti sumaruno nga artikulo.

[Footnote]

Pangrepaso

• Apay a saan a kasapulan idi a personal nga agdedikar ken ni Jehova dagiti ubbing nga Israelita?

• Kasano a maipakita dagiti Israelita a tungtungpalenda ti dedikasionda?

• Apay nga inlaksid ni Jehova ti Israel kas ti nasion a naidedikar kenkuana, ken kasano a nasukatan dayta?

• Sipud idi Pentecostes 33 K.P., ania ti nasken nga aramiden agpadpada dagiti Judio ken Gentil tapno agbalinda a kameng ti naespirituan nga Israel?

[Ladawan iti panid 21]

Nayanak dagiti Israelita kas kameng ti nasion a pinili ti Dios

[Ladawan iti panid 23]

Tunggal Israelita ti masapul a personal a mangikeddeng no kayatna ti agserbi iti Dios

[Ladawan iti panid 23]

Dagiti boluntario a daton ti nangted kadagiti Israelita iti gundaway tapno maipakitada ti panagayatda ken ni Jehova

[Ladawan iti panid 25]

Kalpasan ti Pentecostes 33 K.P., dagiti pasurot ni Kristo ti masapul a personal nga agdedikar iti Dios ken isimboloda dayta babaen ti panagpabautisarda