Makaparagsak a Panagrang-ay iti Napintas nga Isla

SIGURADO nga agamanga dagiti bumisbisita iti Taiwan gapu kadagiti nalangto a mulmula a nangabbungot iti isla. Iti panawen ti panagani, agbalin a maris balitok ti napintas a berde a kapagayan. Naabbongan dagiti bakras ti bantay kadagiti napuskol, nalangto a kabakiran. Maisupadi kadagiti napusek a siudad, pudno a makapabang-ar dagiti naraber a berde a mulmula iti tay-ak ken bambantay. Kinapudnona, dayta ti nangtignay iti immuna a taga-Laud a pimmasiar iti isla a nangawag iti dayta iti Ilha Formosa, wenno “Napintas nga Isla.”

Wen, ti Taiwan ket napintas ngem bassit nga isla​—390 kilometro laeng ti kaatiddogna ken agarup 160 kilometro ti kaakaba ti kalawaan a pasetna. Nangato a bambantay ti kaaduan a paset ti isla. Ti Yü Shan (Bantay Morrison) ket nangatngato ngem ti Bantay Fuji idiay Japan wenno ti Bantay Cook idiay New Zealand. Ti aglawlaw dagiti makintengnga a kabambantayan ket napalikmutan kadagiti akikid a tanap a dumanon agingga iti baybay. Dagitoy a tanap iti igid ti baybay ket napusek kadagiti okupado nga umili ti Taiwan, nga agdagup itan iti nasurok a 22 milion.

Ti Sabali a Kita ti Panagrang-ay

Nupay kasta, adda sabali pay a kita ti panagrang-ay a maim-imatangan ita idiay Taiwan​—ti panagrang-ay iti naespirituan. Naiparangarang daytoy iti kinaregta nga ipakpakita dagiti tattao, ubing man wenno nataengan, apaman a naam-ammoda ti pudno a Dios, ni Jehova. Pudno a makaparagsak a makita ti iyaadu ti bilang dagidiay sireregta nga agtartrabaho tapno tumulong kadagiti sabsabali nga agsursuro maipapan ken ni Jehova ken iti panggepna.

Gapu iti panagrang-ay, nasken a mapalawa ti sanga. Idi Disiembre 1990, adda nagatang a sanikua para iti nalawlawa a sanga nga opisina dagiti Saksi ni Jehova. Ti dati a pasilidad idiay Taipei ket naileten para iti pannakaiwardas ti trabaho ti 1,777 nga agibumbunannag ti Pagarian idiay Taiwan iti daydi a tiempo. Kalpasan ti sumagmamano a tawen a nagaget a panagtrabaho dagiti internasional ken lokal a boluntario, aniaman ti edadda, mabalinen nga usaren dagiti baro a pasilidad idiay Hsinwu idi Agosto 1994. Iti dayta a tiempo, addan ti nasurok a 2,515 a makiramraman iti pannakaiwaragawag ti naimbag a damag manipud iti Sao ti Dios, ti Biblia. Ita, kalpasan ti nasurok a sangapulo a tawen, nagdoble daytoy a bilang ta addan ti nasurok a 5,500 nga agibumbunannag, ket binulan nga agarup kakapat daytoy a bilang ti makiramraman iti amin-tiempo a trabaho a panagebanghelio. Ti naisangsangayan kadagitoy ket dagiti agtutubo a lallaki ken babbai a kas kadagiti makapabang-ar nga “amor” iti agsapa.​—Salmo 110:3.

Naespirituan a Panagrang-ay Dagiti Ubbing

Ubbing ti adu kadagiti nareregta nga agibumbunannag iti naimbag a damag. Elementaria ti dadduma kadakuada. Kas pagarigan, iti maysa nga ili idiay makin-amianan a deppaar ti Taiwan, adda agassawa a naawis iti umuna a gundaway a tumabuno iti Teokratiko nga Eskuelaan ti Panagministro, a pakaadalan dagiti Saksi ni Jehova no kasano nga isuro kadagiti sabsabali dagiti kinapudno iti Biblia. Nasdaaw ti agassawa a nakakita iti ubing a lalaki a ni Weijun, nga agbasbasa iti Biblia iti plataporma. Nasaysayud pay ti panagbasana ngem kadagiti adu nga adulto. Kadagiti dadduma pay a gimong a tinabunuanda, kasta unay ti ragsakda a nakakita nga uray dagiti ubbing a di pay agbasbasa ket nagsayaat dagiti sungbatda. Nagkomento dagitoy nga agassawa maipapan iti nagimbag a kababalin dagiti ubbing iti Kingdom Hall.

Iti daytoy a pagilian a kaaduan ket Budista ken Taoista, apay a naipamaysa dagitoy nga ubbing kadagiti pannursuro ti Biblia? Gapu ta inyaplikar dagiti Kristiano a nagannakda dagiti prinsipio ti Biblia ken nangbangonda iti naragsak a pamilia a naipamaysa iti relasion ken Jehova. Gapu iti panangikagumaan dagiti nagannak ni Weijun nga agbalin a naragsak ti sangapamilia a panagadalda iti Biblia ken pannakiramanda iti ministerio iti tay-ak, bautisado a Saksi itan ti manong ken manang ni Weijun. Iti nabiit pay, kiniddaw ni Weijun a makiraman iti trabaho a panangasaba iti publiko. Kinuna ni nanangna nga uray pagtitiponen ti naipaimada a sangapamiliaan iti dayta a bulan, ad-adu pay laeng ti naipaima ni Weijun. Nabatad a pagragsakanna ti panangisarsarita iti kinapudno, panagkomento kadagiti gimong, ken panangiranud kadagiti sabsabali dagiti nasursurona.

Bayat nga Agmataengan Dagiti Ubbing

Kasano no agmataenganen dagita nga ubbing? Adu ti nagtultuloy a nangipakita iti napaypayso nga ayat ken ni Jehova ken iti ministerio. Kas pagarigan, ni Huiping ket maysa nga estudiante. Maysa nga aldaw, kinuna ti mannursurona nga adda maysa a relihion a dagiti kamengna ket agkedked nga agpayalison iti dara ngem dina nga ammo no siasinoda. Kalpasan ti klase, daytoy nga agtutubo a Kristiano imbagana iti mannursurona nga isuda dagiti Saksi ni Jehova ken inlawlawagna no apay a kasta ti takderda.

Adda sabali pay a mannursuro a nangipabuya iti video maipapan kadagiti sakit a mayakar babaen ti sekso. Ti 1 Corinto 6:9 ket nadakamat iti video ngem kinuna ti mannursuro a saan a kondenaren ti Biblia ti homoseksualidad. Daytoy ti nangilukat manen iti gundaway ken Huiping tapno mailawlawagna iti mannursuro no ania ti panangmatmat ti Dios mainaig iti dayta a banag.

Idi a ni Shuxia a kaklasena ket agisagsagana iti maysa a report maipapan iti kinaranggas iti pamilia, inted ni Huiping ti Nobiembre 8, 2001 nga Agriingkayo! a napauluan iti “Tulong Kadagiti Makabkabil a Babbai” ken inlawlawagna a naglaon dayta iti adu a naibatay iti Biblia nga impormasion maipapan iti reportna. Idi agangay, ni Shuxia ket nagbalin a di bautisado nga agibumbunannag. Ita, duadan ken ni Huiping a mangiranranud iti naimbag a damag kadagiti sabsabali.

Para kadagiti adu a Kristiano nga ages-eskuela, saan a nalaka ti maibilang kas maysa nga agbibiag maitunos kadagiti pagalagadan iti Biblia. Nangnangruna a pudno daytoy kadagiti babassit nga ili iti away. Nasken nga ibturan idi ni Zhihao ti pananglais kenkuana dagiti kakaduana gapu iti pammati ken panangaskasabana. Kinunana: “Masmasnaayanak ta maamakak a makakita kadagiti kaklasek bayat a makiramramanak iti ministerio. No dadduma, adda sangapulo a manglalais kaniak!” Maysa nga aldaw, ni Zhihao ket tinudingan ti mannursurona a mangiparang iti maysa a presentasion maipapan iti relihionna sa idatagna dayta iti imatang dagiti kaklasena. “Inrugik ti presentasionko iti Genesis kapitulo 1 sa inlawlawagko dagiti saludsod a kas iti: Siasino ti nangparsua iti daga ken kadagiti amin a banag nga adda iti dayta? Ken kasano a naadda dagiti tattao? Apaman nga imbasak ti Kasuratan, adda dagidiay nangkatkatawa kaniak, a kunkunada nga adu la amin ti patpatiek. Nupay kasta, intultuloyko nga inleppas ti presentasionko. Kalpasanna, naaddaanak iti gundaway a makisarita a mismo kadagiti dadduma a kaklasek maipapan iti trabaho ken pammatitayo. Ita, saandakon a katkatawaan no makitadak a mangaskasaba!”

Kinuna pay ni Zhihao: “Gapu ta Saksi dagiti dadakkelko, binigat nga us-usigenmi ti teksto. Ad-adalenmi pay ti Biblia ken regular a tabtabunuanmi dagiti gimong. Dayta ti gapuna a kabaelak a sanguen ti siasinoman a manglais pay laeng kaniak bayat nga ikagkagumaak nga iranud kadagiti sabsabali dagiti makapabang-ar a kinapudno iti Biblia.”

Ni Tingmei ket maysa nga estudiante iti technical school. Naminsan, isu ket naawis iti maysa a piknik a kadua dagiti dadduma a kaklasena agraman dagiti lallaki manipud iti sabali nga eskuelaan. Nakitana ti moral a pagpeggadan ti kasta a pannakitimpuyog isu a saan a simmurot. Namin-adu latta nga inaw-awis dagiti kaklasena nupay inranudna kadakuada ti nagsayaat a material manipud iti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo.a Isu ket inumsi dagiti kaklasena a babbai, a kunkunada a kadaanan kanon ti estilona. Nupay kasta, napaneknekan a nainsiriban ti panangsurotna kadagiti pagalagadan iti Biblia idi nagsikog ken nagparegreg ti maysa kadagiti kaklasena. Kinuna ni Tingmei: “Naaddaanak iti nadalus a konsiensia gapu iti panangsurotko iti bilin ni Jehova. Kas resultana, naaddaanak iti rag-o ken naan-anay a pannakapnek.”

Panangdaer Kadagiti Lapped iti Panagrang-ay

Ni Ruiwen ti maysa kadagiti kasingedan a gayyem ni Tingmei. Idi ubing pay, impapan ni Ruiwen a makabannog a rutina ti itatabuno kadagiti Nakristianuan a gimong ken ti pannakiraman iti ministerio iti tay-ak. Ngem idi nakitana ti nagdumaan ti napaypayso nga ayat dagiti kakongregasionna ken ti kinarabaw ti panaggagayyem dagiti kaklasena, isu ket nakombinsir a nasken a mangaramid kadagiti sumagmamano a panagbalbaliw iti biagna. Rinugian ni Ruiwen a kasabaan dagiti kaeskuelaanna ket di nagbayag, ad-adda a naamirisna no ania ti rumbeng nga aramidenna. Inrugina ti agserbi kas auxiliary pioneer, a binulan a mangbusbos iti nasurok a 50 nga oras iti ministerio. Kalpasanna, nag-regular pioneer, a binulan a mangbusbusbos iti nasurok a 70 nga oras iti ministerio. Kinuna ni Ruiwen: “Agyamanak unay ken ni Jehova. Pulos a dinak binaybay-an. Ipatpategnak latta uray no nakaaramidak kadagiti bambanag a makapasakit kenkuana. Kasta met laeng ti panangipateg kaniak ni nanangko ken dagiti dadduma pay iti kongregasion. Ita ta addaanakon iti lima nga iyad-adalan iti Biblia, mariknak a talaga a makiramramanak iti makapnek a trabaho.”

Iti maysa a haiskul iti away, dua a Saksi ti napusgan a mangibagi iti eskuelaan iti maysa a salip iti sala. Idi naammuanda ti maipapan iti pasalip, narikna dagiti agtutubo a Saksi a no makiramanda iti dayta, masalungasing ti konsiensiada kas Kristiano. Inlawlawagda ti takderda ken kiniddawda a saanda a makiraman ngem saan a napatgan dayta. Imbes ketdi, kinuna dagiti mannursuro a gapu ta isuda ti napusgan, masapul a makisalipda. Gapu ta saan a kayat dagitoy nga agtutubo a Saksi nga ikompromiso ti takderda, linuktanda ti Web site ti departamento ti edukasion sa nangipatulodda iti surat a mangilawlawag iti parikutda. Di nagbayag, nupay awan ti naawatda a sungbat, nakaawat ti eskuelaan iti bilin a saanda a piliten ti siasinoman a makiraman iti kasta a pasalip. Anian a ragsak dagitoy dua nga agtutubo a nakapaneknek a ti pannakasanayda iti Biblia saanna laeng a sinukog ti konsiensiada no di ket nangted pay kadakuada iti bileg a mangsalimetmet iti takderda no ania ti umiso!

Pagrag-oan met unay dagidiay addaan iti pisikal a limitasion nga iranud kadagiti sabsabali ti maipapan iti naibatay iti Biblia a namnamada. Nayanak a baldado ni Minyu. Gapu ta saanna a magaraw dagiti imana, ti dilana ti us-usarenna a mangyalis kadagiti binulong ti Biblia no adda birokenna a teksto a kayatna a basaen. No adda pasetna iti Teokratiko nga Eskuelaan ti Panagministro iti Kingdom Hall, nakaidda ni Minyu iti nababa a sopa bayat a nakatugaw iti bangkito ti kaduana tapno isu ti mangiggem iti mikropono. Anian a makaliwliwa a makita ti panangikagumaan ni Minyu a mangisagana kadagitoy a paset!

Idi tarigagayanen ni Minyu ti agbalin nga agibumbunannag iti Pagarian, adda dagiti kakabsat a babbai iti kongregasion a nagsursuro no kasano ti mangasaba babaen ti telepono tapno matulonganda ni Minyu. Usaren ni Minyu ti dilana a mangitalmeg kadagiti numero ti telepono ket dagiti kakabsat ti mangisurat kadagiti impormasion maipapan kadagiti inawaganna. Tagtagiragsaken unay ni Minyu daytoy a trabaho isu a nagpasalista kas auxiliary pioneer. No maipapan iti panangasabana babaen ti telepono, mangbusbusbos iti 50 agingga iti 60 nga oras iti kada bulan a mangisarsarita kadagiti sabsabali ti maipapan iti Pagarian ti Dios. Adda dagiti nakasaritana a mayat nga umawat kadagiti literatura iti Biblia ken sipapalubos kenkuana nga umawagto manen. Ita, addan ti tallo nga iyad-adalanna iti Biblia babaen ti telepono.

Wen, kas iti makapabang-ar nga amor, dagiti agtutubo a lallaki ken babbai iti 78 a kongregasion dagiti Saksi ni Jehova idiay Taiwan sidadaan ken sireregta nga idandanonda ti makaited-biag a naimbag a damag ti Pagarian kadagiti riniwriw a populasion daytoy nga isla. Daytoy ket bassit laeng a paset ti sangalubongan a kaitungpalan ti padto ti Biblia a: “Dagiti tattaom situtulok nga idatondanto ti bagbagida iti aldaw ti puersa militarmo. Kadagiti kinangayed ti kinasanto, manipud iti aanakan ti bannawag, addaanka iti bunggoy dagiti agtutubo a tattao a kas kadagiti amor.” (Salmo 110:3) Dagitoy agtutubo ket pudno a makaparegta kadagiti nataengan a padada nga agibumbunannag, ken kangrunaan iti amin, maparparagsakda ti nailangitan nga Amada, ni Jehova a Dios!​—Proverbio 27:11.

[Footnote]

[Kahon/​Ladawan iti panid 10]

KASAPULAN TI ADU PAY A KINGDOM HALL

Gapu iti panagrang-ay idiay Taiwan, dakkel a karit ti panagkasapulan iti adu pay a Kingdom Hall. Apay? Gapu ta dandani awan ti maitutop a lote a pakaibangonan dagiti Kingdom Hall. Maysa pay, nakanginngina dagiti lote ken nainget dagiti paglintegan mainaig iti panagibangon ken panangtagikua iti lote. Kadagiti daddadakkel nga ili ken siudad, ti kakaisuna a pamuspusan ket ti pananggatang kadagiti pasdek a pagopisinaan sa pagbalinenda dagita a Kingdom Hall. Nupay kasta, nakababbaba ti atep ti adu nga opisina, nangina ti abangna, limitado ti sumrek, ken adda dadduma pay a rason no apay a saan a maitutop dagita nga usaren kas Kingdom Hall.

Kaskasdi, kadagiti kallabes a tawen, naaddaan dagiti Saksi ni Jehova idiay Taiwan iti sumagmamano a baro a Kingdom Hall. Madama pay laeng nga agbirbirok dagiti Saksi iti baro a lote ket situtulokda a mangibaklay iti magastos babaen kadagiti boluntario a donasion ken tarigagayanda met ti agbalin a nasigo iti panagibangon.