Panangbirok Kadagiti Naespirituan a Gameng Ditoy Guinea
ITI adun a siglo, insarsarak dagiti managsukisok ti biagda iti panagbirokda iti gameng ken kinabaknang. Dagiti natured a nakadanon ditoy Guinea, iti Makinlaud nga Africa, nakasarakda iti dua a nagpaiduma a kita ti kinabaknang—material ken naespirituan. Nasurok a siam a milion a Guineano ti agnanaed iti daga a nabaknang kadagiti diamante, balitok, naba ti landok, ken de kalidad a bauxite (a pagtaudan ti aluminum).
Nupay manmano dagiti relihion ti Kakristianuan iti daytoy a pagilian, napateg ti panagdayaw iti Dios, ken adu ti mangipatpateg kadagiti naespirituan a gameng. Ania ngamin aya dagitoy a gameng? Isuda dagiti matalek nga adipen ni Jehova, a nadeskribir idiay Haggeo 2:7 kas “dagiti matarigagayan a banag dagiti amin a nasion.”
Dagiti Naespirituan a Gameng
Nasken ti napinget a panagkali tapno mabirokan ti nalmeng a gameng. Umasping iti dayta, nasken met ti napasnek a panagregget iti Nakristianuan a ministerio tapno masarakan dagiti naespirituan a kinabaknang. Ditoy Guinea, nangrugi ti trabaho a panangikasaba iti Pagarian iti nasulinek a paset ti pagilian idi rugrugi ti dekada 1950 ken sa la nakadanon dayta iti kabeserana a Conakry idi rugrugi ti dekada 1960. Ita, addan agarup 900 a Saksi ni Jehova iti 21 a kongregasion ken grupo iti intero a pagilian.
Simmangpet dagiti misionero idi 1987 ken nakipagtrabahoda iti maymaysa pay la idi a kongregasion iti Conakry. Ita, addan nasurok a 20 a misionero iti kabesera ken kadagiti nasulinek a lugar. Sireregta a pabpabilgenda dagiti kongregasion ken makipaspasetda iti trabaho a panangasaba a kadua dagiti kakabsat iti dayta a lugar.
Ni Luc, nga agnanaed idiay Conakry, nasagrapna ti rag-o bayat nga inyadalanna iti Biblia ni Albert, maysa nga agkabannuag a doktor. Nagduduma a relihion ti nangbirokan ni Albert iti narelihiosuan a kinapudno, ken makipaspaset idi kadagiti espiritistiko nga aramid. Us-usarenna idi ti mangyeg kano iti suerte a singsing nga inted kenkuana ti maysa a mannakiuman iti espiritu. Gapu iti napalalo a pannakapaayna a mangbirok iti pudno a relihion, imbelleng ni Albert ti singsingna ken inkararagna: “Apo Dios, no addaka, ipalubosmo koma a maam-ammoka tapno makapagserbiak kenka. Ta no saan, agbiagak lattan a maitunos kadagiti tarigagayko.” Di nagbayag, simmarungkar ni Albert iti pagtaengan ni manangna ket naallingagna ti maysa kadagiti Saksi ni Jehova a mangyad-adal iti Biblia iti kaanakanna a babai. Di nagbayag, nayurnos a ni Luc ti mangyadal iti Biblia kenkuana.
Iti tunggal lawas, siraragsak ni Luc a magna iti nasurok a lima a kilometro iti tunggal agpapan tapno mangyadal. Nupay nababa ti adal ni Luc, nasdaaw kenkuana ti nakaturpos iti unibersidad a ni Albert gapu iti natibker a pammatina iti Kasuratan ken praktikal a panangyaplikarna iti isursuro ti Biblia. Anian ti ragsak ni Albert idi naammuanna a saan a ti Dios ti mapabasol iti panagsagaba ti sangatauan no di ket panggep ni Jehova a pagpatinggaen ti amin a panagsagaba ken pagbalinenna a paraiso daytoy daga. (Salmo 37:9-11) Natukay ti puso ni Albert gapu kadagiti kinapudno iti Biblia agraman ti nasayaat a kababalin a napaliiwna kadagiti miembro ti kongregasion.
Nupay kasta, no kasano a ti diamante ket masapul a siaanus a tabasen ti nalaing nga alahero tapno maikkat dagiti nagaspang a pasetna ken tapno agrimat, nasken met nga ikkaten ni Albert dagiti nailubongan ken di makaay-ayo a kapanunotanna tapno maitunosna ti biagna kadagiti nalinteg a pagalagadan ti Dios. Insardengnan ti makiuman kadagiti espiritista agraman ti nalabes a panaginum ken panagsugalna. Nupay kasta, naamiris ni Albert nga agpakarigat a mangisardeng iti panagsigariliona. Ngem idi naimpusuan a nagkararag ken Jehova tapno agpatulong, naisardengna met laeng dayta. Innem a bulan kalpasanna, inkasarna ti kabkabbalayna. Ni baketna ket nangrugi a nakipagadal iti Biblia. Ita, agpadadan a bautisado nga adipen ni Jehova.
Ni Martin ket maysa pay a diamante iti naespirituan nga anag. Rinugianna ti nagadal iti Biblia idiay Guéckédou idi agtawen iti 15. Dagiti Katoliko a nagannakna binusorda ti itatabunona kadagiti gimong dagiti Saksi ni Jehova. Dinadaelda dagiti naibasar-Biblia a literatura ni Martin, kinabkabilda sada pinagtalaw. No kasano a sa la tumaud ti diamante no ti karbon ket maipasidong iti nakapigpigsa a puersa, immuneg met ti panagayat ni Martin iti kinapudno nga isursuro ti Biblia gapu iti nakaro nga ibubusor a linak-amna. Idi agangay, nagawid ni Martin agsipud ta simmayaaten ti panangtrato kenkuana ti nagannakna. Apay a nagbalbaliw dagiti nagannakna? Nadlawda ngamin ti dakkel a nakaidumaan ti kababalin ni Martin iti kababalin dagiti adingna, a nagbalin a rebelioso ken nakaaramidda pay iti seksual nga imoralidad. Gapu ta nakombinsirda a pagimbagan ni Martin ti baro a pammatina, sangsangailienen ni tatangna dagiti kakongregasion ni Martin. Ti met nanang ni Martin ket namin-adun a nagyaman kadagiti kakabsat gapu iti amin a naitulongda iti anakna. Nabautisaran ni Martin idi agtawen iti 18. Idi agangay, nageskuela iti Ministerial Training School ket ita, agserserbin kas maysa nga special pioneer.
Dagiti Naangkat a Naespirituan a Gameng
Nupay ilaklako ti Guinea iti sabali a pagilian ti kaaduan kadagiti natural a kinabaknangna, “inangkat” ti dadduma kadagiti naespirituan a kinabaknangna. Immakar ditoy ti adu a tattao manipud iti dadduma pay a pagilian iti Africa, kaaduanna a gapu iti kasasaad ti panagbiag. Dadduma ket immakar ditoy tapno mapanawanda dagiti nabayagen ken nakaro a gubat.
Ni Ernestine a taga-Cameroon ket immay ditoy Guinea 12 a tawenen ti napalabas. Nakipagadal kadagiti Saksi ni Jehova ken adu a tawenen a makigimgimong ngem saan pay a nabautisaran. Idi 2003, nakasangit idi nabuyana ti bautismo kabayatan ti asamblea sirkito dagiti Saksi ni Jehova. Gapu ta makonsiensia, kastoy ti inkararagna ken Jehova: “Agtawenakon iti 51, ngem awan pay ti naaramidko a naimbag agpaay kenka. Kayatkon ti agserbi kenka.” Kalpasanna, nagtignay ni Ernestine a maitunos iti napakumbaba a kararagna. Inlawlawagna iti kabkabbalayna a no la ket ta agkasarda, saanen a makisina kenkuana. Immanamong, ket idi agangay, uray la a nakasangit ni Ernestine gapu iti ragsakna iti mismo a panagbautisarna idi Nobiembre 2004.
Sipud idi rugrugi ti dekada 1990, pinasangbay ti Guinea ti rinibu a nagbakuit manipud Liberia ken Sierra Leone. Karaman kadagitoy ti ginasut nga adipen ni Jehova. Di nagbayag kalpasan a nakasangpetda iti kampo dagiti nagbakuit, inyurnos dagiti kakabsat ti pannakaangay dagiti regular a gimong, inorganisarda ti trabaho a panangasaba, ken nangibangonda iti Kingdom Hall. Dadduma ti nagbalin nga adipen ni Jehova kadagiti kampo dagiti nagbakuit. Ni Isaac ti maysa kadakuada. Kalpasan ti panagbautisarna, naaddaan ni Isaac iti gundaway a makasubli iti dati a saadna iti panggedanna iti maysa a dakkel a kompania idiay Liberia. Nupay kasta, inkeddengna ti agtalinaed iti kampo dagiti nagbakuit idiay Lainé kas regular pioneer. Kastoy ti inlawlawagna: “Ita, saanen a masapul nga ipakadak pay iti maysa nga amo ti pannakigimong wenno pannakiasambleak. Nawayaak a makapagserbi ken Jehova ditoy.” Idi Disiembre 2003, naangay ti maysa a kombension distrito iti nasulinek a kampo agpaay ti 150 a Saksi a karaman kadagiti 30,000 a nagbakuit. Makaparagsak ta 591 ti timmabuno, agraman ti 9 a tuleng a nangtagiragsak iti programa babaen iti sign language. Sangapulo ket dua ti nabautisaran. Apresiaren unay ti kakabsat dagiti naaramid a pamuspusan tapno maisagana ti naespirituan a padaya nga agpaay kadakuada.
“Dagiti Matarigagayan a Banag” Mangaramidda iti Nasken a Panagbalbaliw
Para kadagiti agbirbirok iti balitok ken diamante, awan ti lapped a narigat unay a pagballigian. Makaparagsak a makita ti panagregget dagiti kabbaro a mangparmek iti amin a lapped tapno makapagserbida ken Jehova. Usigem ti kapadasan ni Zainab.
Idi agtawen iti 13, adda dagiti nangpilit kenkuana nga agbalin nga adipen. Naipan ditoy Guinea manipud iti pagtaenganna iti sabali pay a pagilian iti Makinlaud nga Africa. Idi agtawen iti 20, nangngegna ti mensahe ti Biblia. Nagagaran a mangyaplikar iti maad-adalna.
Marigatan idi ni Zainab a tumabuno kadagiti Nakristianuan a gimong. Ngem apresiarenna unay dagita a gimong isu nga inkagumaanna ti di aglangan. (Hebreo 10:24, 25) Ilemmengna no kua dagiti librona iti ruar tapno maitugotna dagitoy inton makigimong. Namin-adu a kinabil dagiti amona gapu iti itatabunona kadagitoy a naespirituan a taripnong.
Idi agangay, nagbalbaliw dagiti kasasaad, ket nawayawayaan ni Zainab iti pannakaadipenna. Insigida a tinabunuanna ti amin a gimong. Dayta ti timmulong kenkuana a rumang-ay iti naespirituan. Dina inawat ti maysa a trabaho nupay nangato koma ti sueldona agsipud ta makalapped dayta iti itatabunona kadagiti gimong a pakagun-odanna iti Nakristianuan a pannursuro. Nagpasalista iti Teokratiko nga Eskuelaan ti Panagministro, nagbalin a di bautisado nga agibumbunannag iti Pagarian, ket idi agangay, insimbolona ti dedikasionna ken Jehova babaen iti panagbautisarna. Kalpasan dayta, nakipaset iti panagserbi kas auxiliary pioneer. Innem a bulan kalpasanna, nagpasalista kas regular pioneer.
Kalpasan ti sumagmamano a pannakigimongna, kastoy ti kinuna ti maysa nga interesado: “No addaak ditoy, diak marikna a napanglawak.” Nupay adu a tattao ti interesado laeng kadagiti material a kinabaknang iti Guinea, dagidiay agay-ayat ken Jehova ket magagaran nga agbirok iti naespirituan a kinabaknang. Wen, “dagiti matarigagayan a banag dagiti amin a nasion” makipaspasetda ita iti pudno a panagdayaw ken Jehova!
[Kahon iti panid 8]
GUINEA-2005
Kangatuan a bilang dagiti Saksi: 883
Mayad-adalan iti Biblia: 1,710
Timmabuno iti Memorial: 3,255
[Dagiti Mapa iti panid 8]
(Para iti aktual a pannakaurnosna, kitaem ti publikasion)
GUINEA
Conakry
SIERRA LEONE
LIBERIA
[Ladawan iti panid 9]
Da Albert ken Luc
[Ladawan iti panid 9]
Kingdom Hall idiay Conakry
[Ladawan iti panid 10]
Ni Ernestine
[Ladawan iti panid 10]
Ni Martin
[Ladawan iti panid 10]
Ni Zainab
[Picture Credit Line iti panid 8]
USAID