Ayatem ti Dios a Mangipatpateg Kenka
“Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.”—MATEO 22:37.
1, 2. Ania ti mabalin a makagapu a nayimtuod no ania ti kadakkelan a bilin?
IDI kaaldawan ni Jesus, agparang a nabara a pinagsusupiatan dagiti Fariseo no ania ti kapatgan kadagiti nasurok nga 600 a paglintegan a mangbukel iti Mosaiko a Linteg. Daydiay kadi linteg a mainaig iti panagdaton? Total, naaramid ti panagdaton tapno mapakawan dagiti basol ken kas ebkas ti panagyaman iti Dios. Wenno saan ngata a ti linteg a mainaig iti panagkugit ti kapatgan? Napateg met dayta yantangay ti pannakakugit ket tanda ti pannakitulag ni Jehova ken ni Abraham.―Genesis 17:9-13.
2 Nupay dadduma kadagita a linteg ti kasla saan unay a napateg, ibilang dagiti mangan-annurot kadagiti tradision a saan nga umiso a panunoten nga adda natantan-ok a linteg yantangay para kadakuada, agpapada ti kinapateg ti tunggal linteg nga inted ti Dios. Inkeddeng dagiti Fariseo nga iyimtuod ken ni Jesus dayta a mapagsusupiatan idi a saludsod. Namnamaenda nga adda maibagana a mangdadael iti kredibilidadna. Maysa kadakuada ti nangyimtuod ken ni Jesus: “Ania ti kadakkelan a bilin iti Linteg?”—Mateo 22:34-36.
3. Ania ti imbaga ni Jesus a kadakkelan a bilin?
3 Nakapatpateg kadatayo ti sungbat ni Jesus. Ginupgopna ngamin no ania ti saan a pulos a nagbalbaliw a kapatgan a paset ti pudno a panagdayaw. Iti panangadawna iti Deuteronomio 6:5, kinuna ni Jesus: “‘Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.’ Daytoy ti kadakkelan ken umuna a bilin.” Nupay maysa laeng a bilin ti dinamag ti Fariseo, dinakamat kenkuana ni Jesus ti sabali pay a bilin. Inadaw ni Jesus ti Levitico 19:18: “Ti maikadua, nga umasping iti dayta, isu daytoy, ‘Masapul nga ayatem ti padam a tao a kas iti bagim.’” Kalpasanna, impamatmat ni Jesus a dagitoy a dua a linteg ti pakagupgopan ti nasin-aw a panagdayaw. Tapno maliklikanna a pagdudumaen ti pateg dagiti dadduma pay a linteg, ingngudona: “Kadagitoy dua a bilin nga agpannuray ti intero a Linteg, ken dagiti Mammadto.” (Mateo 22:37-40) Iti daytoy nga artikulo, usigentayo ti kadakkelan kadagitoy dua a bilin. Apay a rumbeng nga ayatentayo ti Dios? Kasano a maipakitatayo dayta? Ken kasano a maparayraytayo ti kasta nga ayat? Napateg a maammuantayo ti sungbat kadagitoy a saludsod yantangay tapno maay-ayotayo ni Jehova, masapul nga ayatentayo iti amin a puso, kararua, ken isiptayo.
Ti Pateg ti Ayat
4, 5. (a) Apay a saan a nasdaaw ti Fariseo iti sungbat ni Jesus? (b) Ania ti ad-adda nga ipateg ti Dios ngem kadagiti sakripisio ken daton?
4 Agparang a saan a naklaat wenno nasdaaw ti Fariseo iti sungbat ni Jesus iti saludsodna. Ammona a napateg ti panagayat iti Dios mainaig iti pudno a panagdayaw, nupay adu ti saan a mangiparparangarang iti dayta. Kadagiti sinagoga, nakaugalian a napigsa a maibalikas ti Shema, wenno panangyebkas iti pammati, ket karaman kadagiti linaonna ti sasao a masarakan iti Deuteronomio 6:4-9, nga inadaw ni Jesus. Sigun iti pumada a salaysay iti Marcos, kinuna ti Fariseo ken ni Jesus: “Mannursuro, naimbag ti panangikunam maitunos iti kinapudno, ‘Isu ket Maymaysa, ket awanen ti sabali no di Isu’; ket daytoy panagayat kenkuana buyogen ti intero a puso ti maysa ken buyogen ti intero a pannakaawat ti maysa ken buyogen ti intero a pigsa ti maysa ken daytoy panagayat ti maysa iti padana a tao a kas iti bagina ket adayo a napatpateg ngem kadagiti amin a sibubukel a daton a mapuoran ken sakripisio.”—Marcos 12:32, 33.
5 Nupay ti Linteg kalikagumanna dagiti sakripisio ken daton a mapuoran, ti talaga a napateg iti Dios isu ti naimpusuan a panagayat dagiti adipenna. Iti panangmatmat ti Dios, napatpateg ti maysa a billit-tuleng a maidaton kenkuana buyogen ti ayat ken debosion ngem iti rinibu a kalakian a karnero a maidaton buyogen ti di umiso a motibo. (Mikias 6:6-8) Lagipenyo ti salaysay maipapan iti napanglaw a balo a nakita ni Jesus idiay templo ti Jerusalem. Ti dua a babassit a sensilio nga impisokna iti baul ti gameng di pay umdas a paggatang iti maysa a billit-tuleng. Nupay kasta, napatpateg ken ni Jesus dayta a kontribusion a nabuyogan iti naimpusuan a panagayat ken ni Jehova ngem kadagiti dadakkel a donasion a sobsobra laeng dagiti nabaknang. (Marcos 12:41-44) Anian a makapabileg a maammuan a ti pudno a napateg ken ni Jehova ket daydiay kabaelantayo nga iyebkas aniaman ti kasasaadtayo―ti panagayattayo kenkuana!
6. Ania ti insurat ni Pablo maipapan iti kinapateg ti ayat?
6 Impaganetget ni apostol Pablo ti kinapateg ti ayat iti pudno a panagdayaw idi insuratna: “No agsaoak kadagiti pagsasao ti tattao ken dagiti anghel ngem awan ayatko, nagbalinak nga agun-uni a suer wenno umaw-aweng a piangpiang. Ket no addaanak iti sagut ti panagipadto ken ammok amin dagiti sagrado a palimed ken amin a pannakaammo, ket no addaanak iti amin a pammati tapno iyakarko dagiti bantay, ngem awan ayatko, awan kaes-eskak. Ket no itedko amin a sanikuak tapno mapakan ti sabsabali, ket no iyawatko ti bagik, tapno makapagpasindayagak, ngem awan ayatko, saanak a pulos magunggonaan.” (1 Corinto 13:1-3) Nalawag a kasapulan ti ayat tapno makaay-ayo ti panagdayawtayo iti Dios. Ngem kasanotayo a maipakita nga ay-ayatentayo ni Jehova?
No Kasano a Maipakitatayo nga Ay-ayatentayo ni Jehova
7, 8. Kasanotayo a maipakita nga ay-ayatentayo ni Jehova?
7 Saan laeng a basta maysa a rikna ti pudpudno nga ayat. Dayta ket maysa a tignay. Ti Biblia tukoyenna ti ayat kas maysa a “dalan a naringringbaw” ken maysa a banag a ‘surotentayo.’ (1 Corinto 12:31; 14:1) Maiparparegta kadagiti Kristiano nga agayatda, saan laeng nga “iti sao wenno babaen iti dila, no di ket iti aramid ken kinapudno.”—1 Juan 3:18.
8 No ay-ayatentayo ti Dios, aramidentayo no ania ti makaay-ayo kenkuana. Idepensa ken itandudotayo ti kinasoberanona, agpadpada iti sao ken iti aramidtayo. Liklikantayo met nga ayaten ti lubong ken dagiti dakes a daldalanna. (1 Juan 2:15, 16) Guraentay pay ti kinadakes. (Salmo 97:10) Ti panagayat iti Dios ramanenna met ti panangayat iti kaarruba, a mausig iti sumaruno nga artikulo. Maysa pay, no ay-ayatentayo ti Dios, masapul a natulnogtayo kenkuana. Kuna ti Biblia: “Daytoy ti kaipapanan ti ayat iti Dios, a tungpalentayo dagiti bilinna.”—1 Juan 5:3.
9. Kasano nga impakita ni Jesus nga ay-ayatenna ti Dios?
9 Naan-anay nga impakita ni Jesus nga ay-ayatenna ti Dios. Ti ayat ti nangtignay kenkuana a mangpanaw iti nailangitan a kasasaadna tapno makipagtaeng ditoy daga kas tao. Dayta ti nanggutugot kenkuana a mangipadayag iti Amana babaen kadagiti aramid ken pannursurona. Ti ayat ti nangtignay kenkuana nga agbalin a ‘natulnog agingga iti ipapatay.’ (Filipos 2:8) Dayta a panagtulnogna―nga ebkas ti panagayatna―ti nanglukat iti gundaway tapno matagiragsak dagiti matalek a tattao ti nalinteg a takder iti imatang ti Dios. Insurat ni Pablo: “Babaen ti kinasukir ti maysa a tao [ni Adan] adu ti naibilang a managbasol, kasta met a babaen ti panagtulnog ti maysa a persona [ni Kristo Jesus] adu ti maibilangto a nalinteg.”—Roma 5:19.
10. Apay a ti panagayat iti Dios ramanenna ti panagtulnog?
10 Kas ken Jesus, maipakitatayo ti ayattayo babaen ti panagbalintayo a natulnog iti Dios. Insurat ti patpatgen ni Jesus a ni apostol Juan: “Daytoy ti kaipapanan ti ayat, nga agtultuloytayo a magna maitunos kadagiti bilinna.” (2 Juan 6) Dagidiay pudno nga agayat ken ni Jehova tarigagayanda ti agpaiwanwan kenkuana. Gapu ta bigbigenda a dida kabaelan nga iturong ti bukodda nga addang, agpannurayda iti sirib ti Dios ken agpaidalanda iti naayat a panangiwanwanna. (Jeremias 10:23) Mayarigda kadagidiay nanakman ti panagpampanunotda a taga-Berea a nangawat iti mensahe ti Dios buyogen ti “kinagagar ti panunot,” nga addaan iti nasged a tarigagay a mangaramid iti pagayatan ti Dios. (Aramid 17:11) Sinukimatda a naimbag ti Kasuratan tapno naan-anay a maawatanda ti pagayatan ti Dios, a tumulong kadakuada a mangiparangarang iti ayat babaen ti agtultuloy a panagtulnogda.
11. Ania ti kayat a sawen ti panagayat iti Dios buyogen ti amin a puso, isip, kararua, ken pigsatayo?
11 Kas kinuna ni Jesus, ti panagayat iti Dios ramanenna ti intero a puso, isip, kararua, ken pigsatayo. (Marcos 12:30) Aggubuay dayta nga ayat manipud iti puso―a pakainaigan ti rikna, tarigagay, ken kaunggan a pampanunot―ket nasged ti tarigagaytayo a mangay-ayo ken ni Jehova. Agayattayo met buyogen ti isiptayo. Agserserbitayo ken ni Jehova gapu ta adda pannakaammotayo maipapan kadagiti galad, pagalagadan, ken pangpanggepna. Usarentayo ti kararuatayo―ti intero a katataotayo ken ti biag nga ik-ikutantayo―tapno agserbi ken mangidaydayaw kenkuana. Kasta met laeng ti pangus-usarantayo iti pigsatayo.
No Apay a Rumbeng nga Ayatentayo ni Jehova
12. Apay a kalkalikaguman ti Dios nga isu ket ayatentayo?
12 Ti maysa a rason no apay a rumbeng nga ayatentayo ni Jehova ket gapu ta kalkalikagumanna nga iyanninawtayo dagiti galadna. Ti Dios ti gubuayan ken ti kangrunaan nga ulidan ti ayat. “Ti Dios ket ayat,” insurat ti napaltiingan a ni apostol Juan. (1 Juan 4:8) Dagiti tattao naparsuada iti ladawan ti Dios; gapuna, nadiseniotayo nga agayat. Kinapudnona, ti kinasoberano ni Jehova ket naibatay iti ayat. Ti kayatna nga iturayan isu dagidiay agserserbi kenkuana gapu ta ay-ayaten ken tarigagayanda ti nalinteg a wagas ti panangiturayna. Wen, napateg ti ayat tapno agkaykaysa ken agtutunos ti amin a parsua.
13. (a) Apay a naibaga kadagiti Israelita: “Ayatem ni Jehova a Diosmo”? (b) Apay a maiparbeng a namnamaen ni Jehova nga isu ket ayatentayo?
13 Ti sabali pay a rason nga ayatentayo ni Jehova ket gapu ta apresiarentayo ti inaramidna para kadatayo. Lagipenyo ti kinuna ni Jesus kadagiti Judio: “Masapul nga ayatem ni Jehova a Diosmo.” Saan a maikalkalikagum kadakuada nga ayatenda ti maysa a dios a nakayakay ken saanda nga am-ammo. Imbes ketdi, masapul nga ayatenda ti Dios a mangipatpateg kadakuada. Ni Jehova ti Diosda. Isu ti nangiruar kadakuada manipud Egipto nga agturong iti Naikari a Daga, Daydiay nangsalaknib, nangsaranay, ken nangipateg kadakuada, Daydiay nangdisiplina kadakuada buyogen ti ayat. Iti kaaldawantayo, ni Jehova ti Diostayo, daydiay nangited iti Anakna kas subbot tapno magun-odtayo ti biag nga agnanayon. Maiparbeng laeng a namnamaen ni Jehova nga isu ket ayatentayo met! Makalkalikaguman nga ayatentayo ti Dios a mangipatpateg kadatayo. Ti ayattayo ket agpaay iti Daydiay “immuna a nagayat kadatayo.”—1 Juan 4:19.
14. Kasano a ti ayat ni Jehova mayarig iti ayat ti maysa a nagannak?
14 Ti panagayat ni Jehova iti sangatauan ket mayarig iti panagayat dagiti nagannak kadagiti annakda. Nupay imperpekto dagiti naayat a nagannak, igaedda nga aywanan dagiti annakda, nga aramidenda dayta uray dakkel ti isakripisioda iti material ken iti dadduma a banag. Isuro, paregtaen, saranayen, ken disiplinaen dagiti nagannak ti annakda gapu ta kayatda nga agbalin dagitoy a naragsak ken naballigi. Ania met ti kayat dagiti nagannak a pangsubad kadakuada? Kayatda nga ayaten ida dagiti annakda ken ipapuso dagitoy ti isursuroda kadakuada a pagimbaganda. Saan kadi a nainkalintegan a ti perpekto a nailangitan nga Amatayo namnamaenna nga ipakitatayo ti naayat a panangapresiar iti amin a naaramidanna para kadatayo?
Panangpatanor iti Ayat iti Dios
15. Ania ti umuna nga addang tapno mapatanortayo ti panagayattayo iti Dios?
15 Ditay nakita ti Dios wenno nangngeg ti timekna. (Juan 1:18) Kaskasdi, aw-awisennatayo a maaddaan iti naayat a relasion kenkuana. (Santiago 4:8) Kasanotay a maaramid dayta? Sakbay a masursurotayo nga ayaten ti maysa a tao, masapul a maaddaantayo nga umuna iti pannakaammo maipapan kenkuana; narigat ngamin ti makisinninged iti maysa a ditay am-ammo. Impaay ni Jehova ti Saona, ti Biblia, tapno maadaltayo ti maipapan kenkuana. Dayta ti makagapu a ni Jehova, babaen ti organisasionna, paregtaennatayo a regular a basaentayo ti Biblia. Ti Biblia ti mangisuro kadatayo maipapan iti Dios, kadagiti galadna, iti personalidadna, agraman ti wagas ti pannakilangenna kadagiti tattao iti rinibun a tawtawen. Bayat nga ut-utobentayo dagita a salaysay, rumayray ti apresasion ken panagayattayo kenkuana.―Roma 15:4.
16. Kasano a ti panangutobtayo iti ministerio ni Jesus parayrayenna ti panagayattayo iti Dios?
16 Ti maysa a kangrunaan a pamay-an tapno rumayray ti panagayattayo ken ni Jehova isu ti panangusig iti biag ken ministerio ni Jesus. Naan-anay ngamin nga inyanninawna ni Amana isu a naibagana pay: “Ti nakakita kaniak nakitana met ti Ama.” (Juan 14:9) Saan kadi a matukay ti riknayo iti asi nga impakita ni Jesus idi pinagungarna ti bugbugtong nga anak ti balo? (Lucas 7:11-15) Saan kadi a makaay-ayo a panunoten a ni Jesus―ti Anak ti Dios ken ti katan-okan a tao a nagbiag―sipapakumbaba a binugguanna ti saka dagiti adalanna? (Juan 13:3-5) Saankay kadi a matignay a makaammo nga uray no natantan-ok ken nasirsirib ni Jesus ngem iti asinoman a tao, isu ket nalaka nga asitgan ti amin, agraman dagiti ubbing? (Marcos 10:13, 14) Bayat a siyayaman nga utobentayo dagitoy a bambanag, matuladtayo dagiti Kristiano a tuktukoyen ni Pedro idi insuratna: “Nupay saanyo a pulos nakita [ni Jesus], isu ay-ayatenyo.” (1 Pedro 1:8) Bayat a rumayrayray ti panagayattayo ken ni Jesus, rumayrayray met ti panagayattayo ken ni Jehova.
17, 18. Rumayray ti panagayattayo ken ni Jehova no usigentayo dagiti ania a naayat a probisionna?
17 Ti sabali pay a pamay-an tapno rumayray ti panagayattayo iti Dios isu ti panangusig kadagiti nabaknang a naayat a probisionna tapno matagiragsaktayo ti biag―ti kinaimnas dagiti parsua, ti nadumaduma a naimas a taraon, ti nabara a timpuyog dagiti nasinged a gagayyem, agraman ti di mabilang a makaay-ayo a banag a makaparagsak ken makapnek kadatayo. (Aramid 14:17) Bayat nga umad-adu ti pannakaammotayo maipapan iti Diostayo, umad-adu ti rasontayo a mangapresiar iti aglaplapusanan a kinaimbag ken kinaparaburna. Panunotem ti amin nga inaramid ni Jehova agpaay kenka. Saanka kadi nga umanamong nga isu ket maikari iti panagayatmo?
18 Maysa kadagiti nagadu a sagut ti Dios isu ti gundawaytayo nga umadani kenkuana babaen ti kararag iti aniaman a kanito, ta ammotayo nga im-imdengannatayo ti “Managdengngeg iti kararag.” (Salmo 65:2) Ni Jehova intalekna iti dungdungnguenna nga Anak ti autoridad a mangituray ken mangukom. Nupay kasta, saanna nga intalek kadagiti dadduma, agraman iti Anakna, ti panangimdeng kadagiti kararag. Isu ti mismo a mangimdeng kadagiti kararagtayo. Iti kasta, ad-adda a sumingedtayo ken ni Jehova gapu iti naayat ken personal a pannakaseknanna kadatayo.
19. Ania dagiti kari ni Jehova a mangpasinged kadatayo kenkuana?
19 Sumingedtayo met ken ni Jehova no panunotentayo ti isagsaganana para iti sangatauan. Inkarina a pagpatinggaenna ti sakit, leddaang, ken ipapatay. (Apocalipsis 21:3, 4) Apaman a maisubli ti sangatauan iti kinaperpekto, awanton ti agsagaba iti panagleddaang, pannakaupay, wenno trahedia. Awanton ti bisin, rigat, ken gubat. (Salmo 46:9; 72:16) Agbalinto a paraiso ti daga. (Lucas 23:43) Iyegto ni Jehova dagitoy a bendision, saan a gapu ta obligado a mangaramid iti dayta, no di ket gapu ta ay-ayatennatayo.
20. Ania ti kinuna ni Moises maipapan kadagiti pagimbagan nga iyeg ti panagayattayo ken ni Jehova?
20 Adda ngarud dagiti nabileg a rason nga ayatentayo ti Dios ken parayrayentayo dayta nga ayat. Itultuloyyo kadi a palagdaen ti ayatyo iti Dios, a palubosanyo nga isu ti mangiwanwan iti biagyo? Dakayo ti mangikeddeng. Ammo ni Moises no ania dagiti gunggona nga iyeg ti panangpatanor ken panangsalimetmet iti ayat ken ni Jehova. Kinuna ni Moises kadagiti Israelita idi ugma: “Masapul a piliem ti biag tapno makapagtalinaedka a sibibiag, sika ken ti putotmo, babaen ti panangayat ken Jehova a Diosmo, babaen ti panagimdeng iti timekna ken babaen ti panagtalinaed kenkuana; ta isu ti biagmo ken ti kaatiddog ti al-aldawmo.”—Deuteronomio 30:19, 20.
Malagipyo Kadi?
• Apay a napateg nga ayatentayo ni Jehova?
• Kasano a maipakitatayo nga ay-ayatentayo ni Jehova?
• Apay a rumbeng nga ayatentayo ni Jehova?
• Kasanotayo a mapatanor ti panagayat iti Dios?
[Ladawan iti panid 20]
Pudno nga ipateg ni Jehova ti kabaelantayo amin nga iyebkas―ti panagayattayo kenkuana
[Dagiti Ladawan iti panid 23]
“Ti nakakita kaniak nakitana met ti Ama.”—Juan 14:9