Ti Iyaay ni Kristo​—Rumbeng Kadi a Pagbutngantayo?

KASANOM nga iladawan ti iyaay ni Jesu-Kristo? Ibilangmo kadi dayta a maysa a pasamak a mangyeg iti pannakaukom, pannakadadael, ken pannakadusa ti sangatauan? Wenno namnamaem a dayta ti mamagpatingga iti amin a parikuttayo? Rumbeng kadi a pagbutngantayo ti iyaay ni Kristo? Wenno rumbeng a seggaantayo dayta?

Mainaig iti iyaay ni Kristo, kuna ti Biblia: “Adtoy! Isu um-umay a buyogen dagiti ulep, ket isu makitanto ti tunggal mata, . . . ket amin dagiti tribu iti daga saplitendanto ti bagbagida iti ladingit gapu kenkuana.” (Apocalipsis 1:7) Daytoy nga iyaay tuktukoyenna ti masanguanan a panagparang ni Jesus tapno gunggonaanna dagiti nalinteg ken dusaenna dagiti nadangkes.

Imbes a pagbutnganna dayta, sinegseggaan ni apostol Juan ti iyaay ni Kristo. Kalpasan a naipalgak kenkuana ti maipapan iti dayta nga iyaay ken no ania ti kaipapananna para iti daga, sipapasnek nga inkararag ni Juan: “Umayka, Apo Jesus.” (Apocalipsis 22:20) Ngem apay nga “amin dagiti tribu iti daga saplitendanto ti bagbagida iti ladingit gapu kenkuana”? Iti ania a pamay-an a “tunggal mata” makitadanto ni Kristo? Ania ti maibanag ti iyaay ni Kristo? Kasano a pagimbagantayo ita ti panamati iti dayta? Ti sumaganad nga artikulo sungbatanna dagitoy a saludsod.