Kitaem! Nakaskasdaaw ti Lawag!
NO NAPADASAMON ti nagkaradap iti kasipngetan gapu iti panangsapulmo iti dalanmo, ammom no kasano karigat dayta. Anian a makapabang-ar no adda ti lawag! Nalabit napasaram metten ti maysa a kasasaad nga arigna addaka iti kasipngetan. Nalabit a napasamak dayta idi saanmo a marisut ti maysa a parikut. Kalpasanna, in-inut a nakakitaka iti lawag—adda nasarakam a solusion. Nakasaysayaat a kapadasan ti makaruar iti kasipngetan wenno narikut a kasasaad.
Idi umuna a siglo, adda iti naespirituan a kinasipnget ti kaaduan a tattao. Iti suratna kadagidiay nangpanaw iti sigud a patpatienda ken nagbalinda a Kristiano, kinuna ni apostol Pedro: “[Ti Dios ti] nangayab kadakayo manipud iti kinasipnget nga agturong iti nakaskasdaaw a lawagna.” (1 Pedro 2:9) Para kadakuada, daytoy ket kasla iruruar manipud iti nakasipsipnget a lugar nga agturong iti naraniag a lawag. Mabalin met a maidilig dayta iti panagmaymaysa nga awanan namnama sa kalpasanna panagbalin a kameng ti maysa a pamilia nga addaan iti natalged a masanguanan.—Efeso 2:1, 12.
“Pinanawam ti Ayat nga Adda Kenka Idi Damo”
Dagiti nagkauna a Kristiano nasarakanda “ti kinapudno”—ti pudno a Nakristianuan a pammati. (Juan 18:37) Nakitada ti nakaskasdaaw a lawag ti kinapudno ket pinanawanda ti naespirituan a kinasipnget ken inabrasada ti lawag. Ngem iti panaglabas ti tiempo, limmamiis ti damo a kinagagar ken regta ti dadduma Kristiano. Kas pagarigan, idi agngudo ti umuna a siglo, rimsua ti maysa a nakaro a parikut iti kongregasion idiay Efeso. Ni napagungar a Jesu-Kristo nabigbigna ti parikut, a kunkunana: “Adda daytoy a busorek kenka, ta pinanawam ti ayat nga adda kenka idi damo. Gapuna lagipem no manipud ania ti nakatnagam, ket agbabawika ken aramidem dagiti immuna nga aramid.” (Apocalipsis 2:4, 5) Dagiti Kristiano idiay Efeso kasapulan a parayrayenda manen ti ayatda iti Dios ken iti kinapudno.
Komustatayo met? Nagrag-otayo met idi nakitatayo ti lawag, idi naammuantayo ti nakasaysayaat a kinapudno iti Sao ti Dios. Inayattayo ti kinapudno. Ngem mabalin a mapukaw ti ayattayo iti kinapudno gapu kadagiti rigat a gagangay iti sangatauan. Mainayon pay ditoy dagiti parikut a gagangay “kadagiti maudi nga aldaw.” Agbibiagtayo iti lubong a natukoy kas “napeggad a tiempo a narigat a pakilangenan”—maysa a lubong dagiti tattao a ‘managayat iti bagbagida, managayat iti kuarta, napalangguad, natangsit, managtabbaaw, nasukir kadagiti nagannak, saan a managyaman, saan a nasungdo.’ (2 Timoteo 3:1, 2) Gapu iti impluensiada, mabalin a mapukaw ti regtatayo ken lumamiis ti ayattayo ken Jehova.
No napukawtayo daydi damo nga ayattayo, nasken a ‘lagipentayo no ania ti nakatnagantayo ket agbabawitayo.’ Masapul nga isublitayo ti damo a naespirituan a kasasaadtayo. Kanayonanna, masapul nga agannadtayo ket ditay ipalubos a kumapuy ti panangipategtayo iti kinapudno. Anian a nagpateg a taginayonentayo amin ti positibo ken naragsak a panangmatmat ken pagtalinaedentayo a narayray ti panagayattayo iti Dios ken iti kinapudno!
‘Ti Kinapudno a Mangwayawaya Kadatayo’
Nakaskasdaaw ti lawag manipud iti Biblia agsipud ta sungbatanna dagiti napateg a saludsod a mangburburibor iti sangatauan iti adun a milenio. Dagitoy ti sumagmamano kadagita a saludsod: Apay nga addatayo ditoy? Ania ti panggep ti biag? Apay nga agraraira ti kinadakes? Adda kadi biag kalpasan ti ipapatay? Linawlawagannatayo ni Jehova kadagiti nakaskasdaaw a kinapudno maipapan kadagiti doktrina iti Biblia. Saan kadi a rumbeng laeng a naimpusuan nga agyamantayo? Ditay koma pulos tagilag-anen dagiti naammuantayo!
Kinuna ni Jesus kadagiti adalanna: “Maammuanyonto ti kinapudno, ket ti kinapudno wayawayaannakayto.” (Juan 8:32) Babaen ti pangsubbot a daton ni Jesus, posiblen a mawayawayaantayo manipud basol ken ipapatay. Ngem dagitoy a napateg a kinapudno winayawayaandatayo met manipud iti kinaignorante ken kinaawan namnama iti nasipnget a lubong. No mennamennaentayo dagiti naammuantayo buyogen ti panagyaman, maparayraytayo ti ayattayo ken Jehova ken iti Saona.
Kadagiti Kristiano idiay Tesalonica, insurat ni apostol Pablo: “Idi inawatyo ti sao ti Dios, a nangngegyo kadakami, inawatyo dayta, saan a kas sao dagiti tattao, no di ket, kas iti kinapudno daytoy, kas sao ti Dios, nga agtigtignay met kadakayo a manamati.” (1 Tesalonica 2:13) Dagiti taga-Tesalonica inimdengan ken ‘inawatda ti sao ti Dios buyogen ti rag-o.’ Awandan iti “sipnget.” Imbes ketdi, nagbalinda nga “annak ti lawag.” (1 Tesalonica 1:4-7; 5:4, 5) Naammuan dagidi a Kristiano a ni Jehova ti Namarsua ken isu ket mannakabalin-amin, masirib, naayat, ken naasi. Kas kadagiti dadduma a pasurot ni Kristo, naammuanda met a nangipaay ni Jehova iti probision tapno mapunas dagiti basolda babaen ti pangsubbot a daton ti Anakna a ni Jesu-Kristo.—Aramid 3:19-21.
Nupay saan nga ammo dagiti taga-Tesalonica ti amin a masapul a maammuanda maipapan iti kinapudno, ammoda no sadino ti pangalaanda iti pannakaammo. Ti naipaltiing a Kasuratan mapagbalinna ti tao ti Dios a “naan-anay a nakabalan maipaay iti tunggal naimbag nga aramid.” (2 Timoteo 3:16, 17) Dagiti Kristiano idiay Tesalonica mabalinda ti agtultuloy nga agadal, a maulit-ulit a mabigbigda a pudno a nakaskasdaaw ti lawag manipud iti Dios. Adda rasonda a kanayon nga agrag-o. (1 Tesalonica 5:16) Kastatay met koma.
Silaw iti Danatayo
Iti panangdakamatna iti rason no apay a nakaskasdaaw ti lawag, inkanta ti salmista: “Ti saom ket pagsilawan iti sakak, ken silaw iti danak.” (Salmo 119:105) Babaen ti panangiwanwan ti Dios a magun-odtayo iti Saona, maikeddengtayo ti sigurado a dana ti biagtayo ken matagiragsaktayo ti makapnek a biag. Maliklikantayo ti agbalin a kas iti barko nga awanan iti direksion. Masalaknibannatayo ti panangammo ken panangyaplikar iti kinapudno tapno saantayo a “mayallo-allon a kas panangyallon dagiti dalluyon ket iyallaalla ditoy ken idiay ti tunggal angin ti sursuro.”—Efeso 4:14.
“Dikay ikabil ti panagtalekyo kadagiti natan-ok, wenno uray iti anak ti naindagaan a tao, a kenkuana awan pannakaisalakan,” kuna ti Biblia. Kunana pay: “Naragsak daydiay a ti Dios ni Jacob ti katulonganna, a ti namnamana adda ken Jehova a Diosna.” (Salmo 146:3, 5) Kasta met, ti panagtalektayo ken Jehova tulongannatayo a mangparmek iti buteng ken danag. Insurat ni apostol Pablo: “Dikay maringgoran iti aniaman, no di ket iti amin a banag babaen iti kararag ken araraw agraman panagyaman maipakaammo koma dagiti dawatyo iti Dios; ket ti talna ti Dios a mangringbaw iti isuamin a panunot saluadannanto dagiti pusoyo ken dagiti pannakabalin ti isipyo babaen ken Kristo Jesus.” (Filipos 4:6, 7) Pudno a pagimbagantayo no agpaiwanwantayo iti lawag ti Sao ti Dios.
Rumaniag kas Silsilaw iti Lubong
Malaksid kadagita, nakaskasdaaw ti lawag iti Sao ti Dios agsipud ta babaen dayta a maaprobetsar dagiti tattao ti kapatgan nga annongen. Imbilin ni Jesus kadagiti pasurotna: “Inkayo . . . ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo. Ket, adtoy! Addaak kadakayo iti amin nga al-aldaw agingga iti panungpalan ti sistema ti bambanag.” Imbilinna dayta kalpasan nga imbagana: “Isuamin nga autoridad naiteden kaniak idiay langit ken ditoy daga.”—Mateo 28:18-20.
Panunotenyo no siasino ti tumultulong kadagiti pudno a Kristiano iti trabaho a panangikasaba iti naimbag a damag ken panangisuro iti kinapudno iti Biblia kadagiti tattao iti isuamin a nasion. Inkari ni Jesus kadagiti pasurotna ti kaaddananto kadakuada. Talaga a tinulonganna ida iti ministerioda bayat a ‘pagsilsilnagenda ti silawda’ iti kasta a pamay-an ken babaen ti dadduma pay a “nasayaat nga aramid.” (Mateo 5:14-16) Nairaman met dagiti anghel iti daytoy a trabaho a panagebanghelio. (Apocalipsis 14:6) Komusta met ni Jehova a Dios? Insurat ni apostol Pablo: “Nagmulaak, ni Apolos nagsibug, ngem ti Dios ti nangpadpadakkel iti dayta.” Anian a pribilehio ti maibilang kadagiti ‘katrabahuan ti Dios.’!—1 Corinto 3:6, 9.
Panunotenyo met no kasano a mabembendisionan daytoy a trabaho nga impaannong ti Dios. Awanen ti napatpateg pay ngem iti inted-Dios a pribilehiotayo nga ‘agsilnag kas silsilaw ti lubong.’ Babaen ti panangyanninawtayo iti lawag ti Sao ti Dios kadagiti sao ken aramidtayo, maipaaytayo ti tulong a talaga a kasapulan dagiti tattao a napudno ti panagpuspusoda. (Filipos 2:15) Ken mabalintayo ti agrag-o bayat a sireregtatayo a mangasaba ken mangisuro, ‘ta saan a nakillo ti Dios tapno lipatenna ti aramidtayo ken ti ayat nga impakitatayo maipaay iti naganna.’—Hebreo 6:10.
‘Gumatangka iti Sapsapo iti Mata nga Iyaprosmo Kadagita Matam’
Iti mensahena iti kongregasion idiay Laodicea idi umuna a siglo, kinuna ni Jesus: “Gumatangka kaniak iti . . . sapsapo iti mata nga iyaprosmo kadagita matam tapno makakitaka. Amin dagidiay dungdungnguek tubngarek ken disiplinaek.” (Apocalipsis 3:18, 19) Ti masinunuo a pangpaimbag iti naespirituan a kinabulsek ket “sapsapo iti mata”—dagiti pannursuro ken panangdisiplina ni Jesus. No kayattayo a mataginayon ti umiso a panangmatmattayo iti kasasaad ken iti masanguanantayo, masapul nga awatentayo ti balakadna ken agtulnogtayo iti dayta ken iti panangiwanwan a masarakan iti intero a Biblia. Masapul met a tuladentayo ti panagpampanunot ken ulidan ni Kristo. (Filipos 2:5; 1 Pedro 2:21) Saan a libre ti sapsapo iti mata. Kinuna ni Jesus: ‘Gatangem dayta kaniak.’ Karaman kadagiti ibayadtayo ti panawen ken panagregget.
No sumrektayo iti nasilawan a siled manipud iti nasipnget a lugar, palabsentayo pay ti sumagmamano a kanito sakbay a mairuam dagiti matatayo iti dayta. Umasping iti dayta, kasapulan ti tiempo iti panangadaltayo iti Sao ti Dios ken tapno makitatayo ti lawag ti kinapudno. Kasapulan ti tiempo a mangmennamenna iti maad-adaltayo ken mangusig iti kinapateg ti kinapudno. Ngem saan a nangina wenno narigat unay ti makalikaguman. Apay? Ngamin, nakaskasdaaw ti lawag!
[Ladawan iti panid 14]
“Gumatangka kaniak iti . . . sapsapo iti mata nga iyaprosmo kadagita matam tapno makakitaka”