Salsaludsod Dagiti Agbasbasa

Ania ti kaipapanan dagiti sasao ni Pablo a ti maysa a balo masapul nga “asawa ti maymaysa a lalaki” tapno maiparbeng a tulongan ti kongregasion Kristiano?​—1 Timoteo 5:9.

Tangay maipapan iti balo ti dakdakamaten ni apostol Pablo, ti sasao nga “asawa ti maymaysa a lalaki” sigurado a tuktukoyenna ti kasasaad ti asawa a babai sakbay a nabalo. Kayat kadi a sawen daytoy a masapul a naminsan laeng a nakiasawa? Wenno adda sabali a kaipapanan dagiti sasao ni Pablo?a

Kuna ti dadduma a tuktukoyen ni Pablo ti maipapan kadagiti balo a naminsan laeng a nakiasawa. Agpayso nga iti adu a kultura ken kagimongan, mamatmatan a natalunggadingan ti maysa a balo no saanen a makiasawa pay. Ngem maikontra dayta a panangmatmat kadagiti sasao ni Pablo iti dadduma a suratna. Kas pagarigan, inlawlawagna kadagiti Kristiano idiay Corinto a nupay imbagana a naragragsak ti maysa a balo no saanen a makiasawa pay, “isu siwayawaya a makiasawa iti siasinoman a kayatna, isuna laeng ta iti Apo.” (1 Corinto 7:39, 40; Roma 7:2, 3) Mainayon pay, iti suratna ken Timoteo, kastoy ti kinuna ni Pablo: “Tarigagayak a dagiti ub-ubing a balo a babbai makiasawada.” (1 Timoteo 5:14) No kasta, saan a mababalaw ti maysa a balo no kayatna ti makiasawa manen.

Ania ngarud ti kayat a sawen dagiti sasao ni Pablo ken ni Timoteo? Iti laeng 1 Timoteo 5:9 ti pakabasaan iti ebkas nga “asawa ti maymaysa a lalaki.” Iti orihinal a pagsasao a Griego, ti literal a kaipapanan daytoy ket “babai a kukua ti maymaysa a lalaki.” Makapainteres ta umasping daytoy iti sasao a sumagmamano a daras nga inusar ni Pablo kadagiti suratna. Isu daytoy ti, “asawa ti maymaysa a babai,” wenno “lalaki a kukua ti maymaysa a babai” iti orihinal a lenguahe. (1 Timoteo 3:2, 12; Tito 1:6) Inusar ni Pablo daytoy nga ebkas idi imbensabensana dagiti kualipikasion agpaay kadagiti Kristiano a manangaywan ken ministerial nga adipen. Iti daytoy a konteksto, ti kangrunaan a kaipapanan ti sasao nga “asawa ti maymaysa a babai” ket ti maysa a lalaki, no naasawaan, masapul a matalek ken nasungdo iti asawana ken awan pakababalawanna iti moral tapno agbalin a kualipikado a maaddaan iti annongen iti kongregasion.b Tangay pudno daytoy, ti ebkas iti 1 Timoteo 5:9 mabalin met a kastoy ti kaipapananna: Tapno kualipikado ti maysa a balo nga umawat iti tulong ti kongregasion, isu ket masapul a nadungngo ken nasungdo nga asawa a nagmatalek ken ni lakayna idi sibibiag pay ken awan koma ti pakababalawanna iti moral. Dagiti dadduma pay a kualipikasion nga imbensabensa ni Pablo tuktukoyenna met laeng dagiti kasta a balo.​—1 Timoteo 5:10.

[Footnotes]